Matthew 13

NAKATA 13

Hivuniunek nauttiyekhiyikun

(Mk. 4:1-9; Lk. 8:4-8)

1Uvlumi tapfumani Jesus iglumin anigami tahium hinaani ingiyuk. 2Inuillu amigaitun iluvagmayyuk umiagmun ikiyuk ingivluni, inuit nangektillugit hinaani. 3Jesusimlu ukagvigiyain amihumik hivuniunektigun, ukakhuni, “Nauttiyekhiyi nauttiyekhivaktuk. 4Taimaliuktillugu nautiakhait ilangit apkunmun katangmata kupanuat negiyain. 5Nautiakhaillu allat uyagaliagmun nunakukitumun katakamik kilamik naulektun nunakukitman. 6Hikenegli nuiman nauhimayun panekpallialektun mangutikhainamiglu tukuinaktun. 7Nautiakhaillu allat kakilautilingnun kataktun. Kakilautilgillu nauvlutik huguktitain. 8Nautiakhaillu allat nunagiktumun katainaktugaluit. Tapkua nauvaktun naguyumik mukpauyakhagnikhutik ilait 100nik, ilait 60nik, ilaitlu 30niglunin. 9Inuit hiutikagumik tuhaalit.”

Hivuniunit atuglugit

(Mk. 4:10-12; Lk. 8:9-10)

10Talva maligutaita upagamitku ukaktun, “Hug inuit ukagvigivigit hivuniunektigun?” 11Kiuyain, “Ilipfingnun kilaum atanguviata naunangningit naunaekpaktun, tapkuali naunangninganik kauyimalimaitun. 12Inugli pikaktuk tunihiviuniaktuk pikagaluakuvlugu. Pikangngituminli tapfuma piyutain mikigaluakhuni piektitauniaktun. 13Taima uvanga ukagvigiyatka hivuniunektigun takulimaimata uitakaluaktillugit, tuhaayuimatalu nalainakhutik, kangekhilimaitkivlutiglu. 14Ilaa Isaiam tapkua unipkautigivagain ilumuktumik ukangman,

'Nalauniaktuhi kangekhihimaitumik, tautugniaktuhilu ilitugihimaitumik 15hapkua inuit umatimingni ekiahukamik hiutimingni tuhaayunaekhutik. Iyingillu uitaektun tautugnakhavun iyimigun tuhaalutiglu hiutimingnun kangekhilutiglu uvanga naguhipkakuvlugit.'

16“Ilipfi iyihi naguguktun tautugamik, hiutihilu tuhaagamik. 17Ilumuktumik ukautigipfi, nalautaiyit amihun, angutillu naguyun takuyapfingnik takuyumavaktun takulimaitkaluaktillugit, tuhaayapfingniglu tuhaayumavaktun tuhaangitgaluakhutik.

Nauttiyekhiyim hivuniugutata itkumayyutaa

(Mk. 4:13-20; Lk. 8:11-15)

18“Tayya tuhaahiuk nauttiyikhiyim hivuniugutaa. 19Inum atanguvium ukauhia tuhaapagu kangekhiyuitillugu, Tupilak kaiyuk akhaakhugu tamna tapfuminga iliyauyumik umataanin. Tamnauyuk apkunmun katakhimayugaluak. 20Uyagaliagmun kataktun tamnauyuk ukauhek tuhaagamiuk aliatakpiaktuk tayyainak 21iluminili mangutikhangnginami ukpegafukaaktillugu naglikhaktitaugumi aiyukalekhunilunin ukauhitigun ipigaktuk. 22Kakilautilingni katakhimayun tamnauyuk ukauhengmik tuhaayuk aliagivallaagamigit nunaum pikutain aaguhukhuni maninik ukauhek naulimaituk ahianiyuikivluni. 23Nunagiktumunli kakaktun, tamauyuk ukauhengmik tuhaayuk kangekhivluni. Tamantauk ahianikpaktuk 100nik, 60niglunin 30niglunin.

Nagungitun nauvaktun

24Jesusim hivuniunek aipa ukautigiyaa tapkununga ukakhuni, “Kilaum atanguvia nauttiviliktun-iliyuk tamna nauttiviminun nauttiyekhivagman naguyunik. 25Inuilli hiniktillugit nauttivilium akigaa kaivaktuk nauttiyekhivluni nagungitunik nautiakhait naguyun akunganun, taimaligami angilgaktuk. 26Aahin ilaani nautiakhait niumata nagungituntauk niukatauyun. 27Talva nauttivilgum kivgaita upagamitku ukallautiyaat, 'Atanek, nauttiyekhivagngilatin naguyunik nauttivingnun? Kanuk nagungitpiaktun naulekat?' 28Tapfuma kiuyain, 'Akigaga uminga pivaktuk'. Kivgait ukangmiyun tapfumunga, 'Tapkuninga katitiaktukuniakitigut?' 29Kiuyugaluak, 'Imanak katitiaktukgupfigit nagungitun naguyunlu piniagunakhiyahi nautinagit. 30Tamangmik nauthimalit katihivik tikiniagutaanun, kativingukan ukallautiyyavatka havaktit imaatun, 'Hivullengmik katihiyyavuhi nauhimayunik nagungitunik kileglugillu ikualakuvlugit, mukpauyakhailli naguyun katihigit tutkukhivimnun'.”

Hivuniunit nautiahagun mustardmik taiyauyukun, puvlaakunlu

(Mk. 4:30-34; Lk. 13:18-21)

31Jesusimlu ukautiyain hivuniunengmik allamik ukakhuni, “Kilaum atanguvia mustardim nautiakhangatun-iliyuk inuk tapfuminga iliman nauttiviminun. 32Tamna nautiakhak nautiakhainin allanin tamainin mikikiyauyuk, nautluakaalunili angikiyauniaktugaluak napaaktungukhuni, aahin kihektutaini tingmiat uvluliukpaktun.

33Talva Jesusim ukautiyain hivuniunengmik allamik ukakhuni, “Kilaum atanguvia puvlaaktun-iliyuk angnak tapfuminga piyuk akutikuvlugit mukpauyamun ukumaitlaanun 100nun puvlaakakhimakuvlugit.”

34Taimatumik Jesus unipkaktuk inungnun hivuniunengnik, hivuniukhimaitumik ukangngitugaluak. 35Taimaliyuk nalautaiyyim ukauhiit ilumukuvlugit ukakhimangman,

“Hivuniunengmik ukagumayunga ukautigilugit naunaktun nunaum hanayauningaanin.”

Hivuniunek nautiakhakun nagungitukun kangekhipkaktauyuk

36Talva Jesusim inuit amigaitun kimakhugit iglumun itektuk. Maligutaitalu upagamitku ukaktun, “Tamna hivuniunek nautiakhaitigun nagungitutigun, tapfuminga kangekhipkaktitigut.” 37Kiuyuk, “Inuk nauttiyekhivaktuk naguyunik Inum engniga tamnauyuk. 38Nauttivik tamna nunauyuk, nautiakhait naguyun atanguvium kitungain tapkuanguyun, nautiakhaitli nagungitun Tupilaum kitungain tapkuanguyun. 39Tamnatauk akigak nauttiyyekhivaktuk Tupilak tamnauyuk, katihiviglu nunaum ihhua tamnayuk katihiyullu ihalgulgit tapkuanguyun. 40Nauthimayun nagungitun katitaumata ikualakuvlugit, ayyikutauniaktuk nunam ihhua tikitpan. 41Inum engningata ihalgulini tiliniaktain tapkua katikuvlugit atanguviminin huinekipkaiyit tamaita ihuitullu 42igitlugit ingnegvikpagyuamun; takanani inuit kiahunguyun kiipkaktivlutik. 43Talva inuit ilumuktun kaumangniaktun hikenektun angumi atanguviani. Inuk hiutikakumi tuhaali.

Hivuniunit pikutigun, pinekutagunlu, kuvyakunlu.

44“Kilaum atanguvia pikutitin-iliyuk nauttivingmi iyekhimangman. Inumli nalvakamiuk tayyainak uliktaa tautugnaitkuvlugu allanun. Talva kuviatakpiagami tapfuma tamaiyani tamaita niuvgutigiyain nauttivingmik tapfuminga niuvekuvlugu.

45“Aahin kilaum atanguvia niuvayitun-iliyuk tamna keniaktukpagman pinektutinik akituyunik. 46Talva tamna katkagami pinekutamik akitukpiaktumik tayyainak pikutini tamaita niuvgutigiyain niuvekuvlugu tamna.

47“Aahin kilaum atanguvia kuvyaktun-iliyuk ningititauman imangmun ikaluktuk amigaitunik ayyikiingitunik. 48Tatangman inuit hinaanun kakkititaat ikaluit naguyun tutkuktagivlugit katayunun, igitugit nagungitun. 49Taimatun-itniaktut nunaum ihhuani. Ihalgulgit tikitkumik avipkangniaktain huinekiyun ilumuktunin 50igitkuvlugit ingnegvigpagyuamun, takanani inuit kianiaktun kiihipkaktivlutik.” 51Jesusim apegiyain, “Hapkuninga tamainik kangekhivakpihi?” Kiyuaat, “Ilaa”. 52Ukallautimiyain, “Tiitigaktit tamangmik kilaum atanguvianik ilihimagumik iglukpaliktun-iliyun pikutikagviminin anitiyuk nutaanik utukainiglu.”

Nazarethmiun piyumangngitaat Jesus

(Mk. 6:1-6; Lk. 4:16-30)

53Jesus hapkuninga ilihauyyiguegami aahinungaktuk 54nunaminullu tikinami inungnik ilihauyyiyuk atugvianni. Tapkuali agligutakpiagamik tapfumunga ukaktun, “Nakin uma ihumatutain kaitauvat havaangillu? 55Hanayim engnigingilauk? Angnanga taiyaungilak Marymik? Umalu James, Josephlu, Simollu, Judaslu nukagingilagit? 56Naiyangillu tamangmik uvaptingiingilat? Nakin tamna pitkuheminik piva?” 57Talva tapkua Jesus ihuigiyaat. Jesusimli ukallautiyagaluangat “Nalautaiyit nunamingnitillugit ilamingnitillugillu nagugiyaungitugaluit, aahiniitkumik kihimi”. 58Talvani tapfumani hapengnaktunik amigaitunik havayuituk inuit ukpegluanginmata.

Currently Selected:

Matthew 13: Sperry

Highlight

Copy