Matthew 12

NAKATA 12

Uvluk Sabbath puiguktaukunagu

(Mk. 2:23-38; Lk. 6:1-5)

1Tapfumani Jesusim nauttivit mukpauyakhaglit apkutigiyain Sabbathium uvluani. Maligutaillu kaalegamik mukpauyakhainik ilainik ungavakhutik negiyun. 2Pharisekulli takugamitigit Jesus ukallautiyaat, “Taku, maligutin Sabbathmi piyukhangitumik pilektun.” 3Kiuyainli imaatun, “Taigugngilahi Davidim huliyanik inungitlu kaalegamik 4Godim igluanun itegami mukpauyamik Godim piyutanik negivaktuk, tapfuminga tapkua negiyukhaungitgaluaktillugit Davidlu inungitlunin angayyuvikkut kihimi? 5Pitkuyaniglunin taigugngilahi, Sabbathium uvluani angayyuvikkut angayyuvigmiitillugit havainaktun ihuitugiyauhimaitunik. 6Ukautigapfili, inuk angayyuvikpagyuagmin ataniukiak hamanitunektuk. 7Ilitugigupfigit hapkua ukauhit, 'Nagliguhuktun pitkuhiit nagutkiyaunahugiyatka aitutikhainin' ihuigiyunaitahi kanuiliyuitun. 8Ilaa Inum engniga Sabbathmuntauk ataniuyuk.”

Inuk algagluktuk naguhipkaktauyuk

(Mk. 3:1-6; Lk. 6:6-11)

9Talvangalu Jesus aullagami atugvingmun itektuk. 10Aahin inuk algagluktuk taikaniituk. Inuillu apegiyumavlugu Jesus ukaktun, “Sabbatiutillugu naguhipkailugit aaniaktunik naamakpa?”, tamna imakaagiyauniangmangan ihumavlutik. 11Tapfuma ukallautiyain, “Nallikhi imnailiuguvin atauhengmik Sabbatiutillugu itekhangmun katakpan tiguyunaitpiuk? 12Inuk imnainmin kanuk akitukkiyauva? Taima naamakpiaktuk naguyumik pigupfi Sabbathmi.” 13Talva ukallautiyaa algagluktuk, “Ihaguk.” Inuk ihagami naguhiyuk igluatun. 14Pharisekulli anigamik tayyainak katimakatauyun Jesuskun tukutumagamitku.

Kivgak pilluakhimayuk

15Jesusli tapfuminga ilihimagami kimauyuk talvanga. Inuit amigaitun maligmayyuk naguhipkaktain tamaita 16uniuyitailivlugit inmigun allanun. 17Nalautaiyim Isaiam ukautigihimayain ilumukuvlugit ukangman,

18“Takuluhiuk kivgaga pilluaktaga nagugivlugu.

Tamna umatima kuviahutigiyaa.

Uvanga anengnimnik tuniniagiga,

tapfumalu Jewmiungitun ukagviginiaktain ilumugnengmik.

19Akhugunaituglu tukhulauyumangngitkivluni,

aahin nipaa tuhaanagunaituk iglukagvit apkutaini.

20Ivik pingiyakan igitunaitaa,

maniglu ihilekan kamitunaitaa,

Godim ilumugniga akimangniagutaanun.

21Atinganunlu Jewmiungitun ukpengniaktun.”

Jesus tupilagmun ikayuktaunginami ukaktuk

(Mk. 3:20-30; Lk. 11:14-23, 12:10)

22Aahin Jesusmun agiuktulik takpiitumik, ukalimaitumiglu kagitiyauyuk tapfuma naguhipkagmani ukayuitugaluak ukalektuk tautuklekhunilu. 23Inuillu tamangmik agligutakhutik ukaktun, “Ilaa una angun Davidim engnigingilauk?” 24Pharisekulli tuhaagamitku ukaktun “Uma agiuktun anipkainaktain Beelzebulkun, agiuktun ataniagun,” 25Jesusimli ihumangit tapkua ilihimagamigit ukautiyain, “Atanguvigmiun ingmingnik avitkumik piektitauhunguyun, iglukagvigmiullu, iglukpagmiullunin ingmingnik avitkumik itlimaektun. 26Taima Satan Satanmik anipkaigumi inminik avigniaktuk. Talva pigumi kanuk atanguvia itniakka? 27Uvangalu agiuktun anipkagupkit Beelzebulkun kinakun kitungapfi anipkakpatigik tapkua? Ilipfi uktuktauluhi kitungapfingnin. 28Uvangali agiuktun anipkakupkit Godim Anengningagun talva Godim atanguvia ilipfingnun tikitunektuk.

29“Inuk kukiyuktuk hakugiktum igluanun kanuk itegniakka kukitumavluni hivullengmik kilekhugngitkumiuk hakugiktuk? Kinguagun kihimi igluata tamaiyain tiguniaktain.

30“Kialika ilagingitkuminga akikektuktanga. Kinalunin katipkaingitkumi uvamnun aptektuk uvamnin. 31Talvanga ukautigipfi, inuit huinekutain tamaita ihumagiyauyunainiaktun, inuilli Anengnek Naguyuk mitautigigumitku tapkua ihumagiyauyunailimaitugaluit. 32Kinalika Inum engninganun ukanilukumi ihumagiyauyunaektuk. Inugli Anengnimun Naguyumun ukanilukumi tamna ihumagiyauyunailimaituk tayyalunin talvangaaninlunin nunaum ihua naallugu.

33“Ilipfingnun pinagialik; Napaaktuk naguyuk ahiakaktuk naguyumik, napaaktugli nagungituk ahiakaktuk nagungitumik. Napaaktuk ilaa nagumanganlunin ilitagiyauyuk ahiagingnin. 34Nimegiat kitungagiyaahi! Ilipfi kanuk naguyumik ukangniakkihi nagungitkaluaktilluhi? Umatim tatayutain ukaktauyun kaningmin. 35Inuk naguyuk naguyumik anitiyuk umaminin naguyumin, inugli nagungituk nagungitumik anitiyuk umaminin nagungitumin.

36“Ukautigipfi, uktuktauvium uvlua tikitpan inuit apegiyauhunguyun ukauhimigun tapkununa ihuimangatalunin. 37Ukauhipfigun ihuagiyauhunguyuhi, ukauhipfigunlu ihuigiyauhunguyuhilunin.

Jesus naunaikutamik tunihiyumangngituk

(Mk. 8:11-12; Lk. 11:29-32)

38Tiitigaktillu, Pharisekullu ilaita ukaullautiyaat Jesus, “Ilihauyyi, naunaikutamik takuyumaktugut ilingnin”. 39Kiuyagaluangit, “Hapkua inuit nagungitun ilumugngitunlu naunaikutamik takuyumainaktun, ilaa naunaikutamik allamik piyunaitun nalautaiyim Jonam naunaikuta kihimi. 40Jonah uvlivangman pingahunik ikaluakpaum iluani, taimatuntauk Inum engniga uvlihunguyuk nunaum iluani. 41Uktuktauvingmi Ninivehmiun nangekatigikhunguyun hapkua inuit ihuigikuvlugit, tapkua Ninevehmiun ihumaliukikpagamik Jonam ilihauyyutatigun, tayyali inuk Jonahmin ataniukiak hamanitunektuk. 42Uktuktauvingmilu kuik paanitpaktuk nangegniaktuk inuit hapkua ihuigilugit, ungahiktumin akuivagami tuhaayaktugumavlugit Solomam ihumatutain. Tayyali inuk Solomonmin aiyuitkiak hamanitugaluak.

Inuk allangukluangitkumi aiyukalektuk

(Lk. 11:24-26)

43“Agiuktuk agiuktulingmin anigumi hanguinaktuk imekangngitumun innikhaminik kenigiaktukhuni katkangngitugaluak tapfuminga. 44Kinguagun ukaktuk, 'iglumnun kimaktagaluamnun utiunialekkunga'. Utektuk katkakhugu igluni inuektumik, halumaktumik, ihuakhiyauvlunilu. 45Animigamilu agitivlugit agiuktun allat 7guyun inminun, tapkua nagungitkiat inminin. Tamangmiglu itekhutik naiyukatigiktun tapfumani, kinguaguntauk tamna inuk agiuktulik ingatakpaktuk hivullengmin. Ayyikutaaniglu inuit hapkua piniaktun.”

Katangutigit naguyun

(Mk. 3:31-35; Lk. 8:19-21)

46Jesuslu inungnun ukaktillugu, ilaa, angnanga katangutaillu hilataaniitun ukagvigiyumavlugu. 47(Inum ukallautiyaa, “Angnan katangutinlu tatkaaniitun ukagvigiyumavlutin”.) 48Jesusim kiugamiuk tamna ukaktuk, “Angnaga kinauva, kikullu katangutitka?” 49Ihakhuni maligutiminun ukaktuk, “Tahapkua angnaga katangutitkalu. 50Kinalika angutima kilangmiitum piyumayaanik pitpan tamna nukagiyaga, naiyagiyagalu angnagivlugulunin.”

Currently Selected:

Matthew 12: Sperry

Highlight

Copy