John 9

NAKATA 9

Jesus takpikhipkaiyuk takpiitumik inugmik

1Jesus talvungautillugu angunmik takpiitumik takulimaitkivluni inutillugu tautuktuk. 2Maligutaita apegiyaat, “Rabbi, kia huinekutaita takpiektitpauk una, nanmimi angayukamilunin? 3Jesus kiuyuk, “Una takpiekhimaituk huinekivagami inmi, angayukangillunin huinekivangmata. Inuvaktuk takpiekhuni Godim havaanga naunaekuvlugu inumini kihimi. 4Ilaa tiliyima havaangit piyakhavut kaumaktillugu, taakhekpan havalimainapta. 5Uvanga nunamiitillunga nunaum inungingnun kaumaniuyunga.” 6Taimatun ukagami, nunamun tivguaktuk maglutekakhugu nanutigiyaik inum iyaanun, 7ukautivlugu, “Taki tahigagmungauguit Siloamiitumun (Tuniyauyumik atikaktumun) uagiaginlu.” Talvungaugamilu uakhuni, utiugamilu tautukhiyuk.

8Tapfuma nuakatait, inuillu tautuinaktagaluangat takpiitugaluak tukhiaktiutillugu, ukaktun, “Inuk ikhivayuktuk tukhiakpakhuni una tamnaungilak?” 9Ilait ukaktun, “Tamnauyuk ilaa”, allat ukaktugaluit, “Imanak, tapfumaatun-iliyuk kihimi.” Angulli inmi ukaktuk, “Tamnauyunga ilaa.” 10Tapkua ukallautiyaat “Kanuk tautuglekkin?” 11Kiuyuk, “Inum, atikaktum Jesusmik, maglugmik nanutigiyaik iyikka ukautivlungalu, 'Siloamungauguinguk uaglutin.' Talvungakama uakpaktunga, tautuglekaahivlunga.” 12Tapkua ukallautimiyaat, “Inuk tamna nanitpa?” Ukaktuk, “Naluyunga tayya.”

13Tapkuali agitiyaat takpiitugaluak Pharisekunun. 14Ilaa Jesus maglugmik havakpaktuk takpikhipkaivluni Sabbathiutillugu. 15Pharisekuttauk apekhukpiaktaat agitiyauyuk kanuk takpikhipkaktitaumangan. Tapfuma ukallautiyain, “Tapfuma iyikka nanutigimagik maglugmik uakaaktillunga tautuglekaahivlunga.” 16Pharisekut ilait ukaktun, “Tamna inuk, takpikhipkaiyi, Godmin kaithimangngituk Sabbath ihumaginginamiuk.” Allat ukaktugaluit, “Inuk huinekitugumi kanuk hapkuninga naunaikutanik havangniakka?” Talvuna ayyikiitumik ihumangngitpiaktun.

17Aahin ukallangmiyun takpikhipkaktauyumun, “Ilvilli kanuk ukautigiviuk tamna takpikhipkakpatin?” Ukaktuk, “Nalautaiyiuyuk tamna.” 18Jewmiulli tuhaatinatik takpiitum angayukagingnin ukpegngitpiaktun takpiitukun, 19apekhukpiakhugik, “Una engnigivitku inukaakpaktuk tautukhimaitumik ukakkutik? Kanuk tayya tautuglekka?” 20Tapfuma angayukangita kiuyain, “Una engnigigaptigu, takulimaitpiangmanlu anikaatillugu ilihimayuguk, 21tayyali kanuk tautuglekka, kialunin takpikhipkakpagaa ilihimangngitkaluaktugut. Inmi inengningugman apegiyyavakhi, inminik ukagli.” 22Angayukangit tapfuma taimatumik ukainaktun Jewmiut ekhigigamitigik, hivugani tapkua ukakhimangmata inukguk nalliaklunin Christiunahugigumiuk Jesus, tamna anipkaktitauyukhak atugvingmin. 23Talva angayukangit kiuyuk, “Inengningugman apegiyyavakhi.”

24Aahintauk tapkua kaitkuyaak takpiitugaluak ukautivlugu, “Itkumayumik Godmun ukagin, tamna inuk huinekituman ilihimagaptigu uvagut.” 25Tamna kiuyuk, “Tamna huinektumangan naluyunga uvanga, atauhengmigli ilihimagaluaktunga, kangagaaluk takpiipiaktunga tayyali tautuglekaahivlunga uvanga.” 26Tapkua ukallautiyaak, “Humik pivakka ilingnun? Kanuk takpikhipkakpatin?” 27Kiuyagaluangit “Ukautivaktagaluapfi tamainik tuhaalimaitpiaktuhi. Hug tuhaakigniakkihi? Ilipfitauk malikuvlugu tamna?” 28Tapkua ukanilutigivlugu ukaktun, “Ilvin ilaa malingnaktan tamna, uvagut malikpaktugut Mosesmun kihianun. 29Godim ukagvigimagu Moses ilihimayugut, unali nakin pimangan ilihimangngitkaluaktugut.” 30Inum kiuyain, “Aglingnakpiaktuk tamna, tamna pimangan ilihimangngitpiaktuhi, takpikhipkaiyugaluak uvamnik. 31God tuhaayunaiman huinekituyunun ilihimayugut, inumli nagugipani God, ihumangit ihumagilugit, Godim tuhaayaa tamna. 32Hivungani tuhaanaitpiaktuk takpikhipkaiyikun takpikhipkakpagu inuk takuhimaitpiaktuk anikaktillugu. 33Tamna Godmin kaithimangngitkumi hapengnaktumik pilimaitpiaktuk.” 34Tapkua kiuyaat, “Ilvin huinekinekun inutkaluaktillutin ilihautiniakkitigut uvagut?” Talva anipkaktaat. 35Tapkua anipkakpagmayyuk tamna Jesus tuhaagamiuk katkaktaa ukautivlugu, “Inum engniga ukpegiviuk?” 36Kiuyuk, “Atanek, kinauva tamna uvanga ukpegikuvlugu?” 37Jesusim kiuyaa, “Tautukpagan, ukalektuk ilingnun tayya tamnauyuk.” 38Ukaktuk, “Atanek ukpektunga,” angayyuvigivlugu.

39Jesus ukallaktuk, “Nunamun tikittunga uktugiaktukuvlunga tautuyuitun tautukuvlugit, tautuktunlu takpiekuvlugilli.” 40Pharisekullu ilaita tapfumanitun tuhaagamitku tamna ukaktun, “Uvaguttauk takpiektugut?” 41Jesus ukallautiyain, “Takpiitkupfi ihuigiyauyunaituhi. Tayyali ukalegapfi, 'Tautuktugut', ihuigiyauhimalektuhi.”

Currently Selected:

John 9: Sperry

Highlight

Copy