John 6

NAKATA 6

Inuit 5000guyun negipkaktauyun

(Mt. 14:13-21; Mk. 6:30-44; Lk. 9:10-17)

1Kinguagun Jesusim tahek Galileemik taiyauyuk ikagvigiyaa, Tiberiasmiglu taiyauyuglu. 2Inuillu amigaitpiaktun maliktaat takugamitigit Jesusim naunaikutain pimagit aaniaktun pivlugit. 3Jesuslu manilgulmun maiyuakhuni maligutiminiituk ingivluni. 4Aahin Jewmiun negiaktugviat, Kangiutivik, kaglilektuk. 5Jesuslu kiviakami tautukhuni inungnik amigaitunik kailektillugit Philip ukallautiyaa, “Kanuk nekimik niuvegiaktugniakkita hapkua inuit negikuvlugit?” 6Ukallaktuk taima uktugumagamiuk piniaktaminik ilihimagaluaktillugu inmi. 7Philipim kiuyaa, “200 dalanik atugupta mukpauyanun naamayunaitunlunin tapkua atuni negikuvlugit mikiyumik.” 8Maligutaita ilangata, Andrewm, Simon Peterm nukata ukallautiyaa, 9“Taika inuhuktuk mukpauyakaktuk talimanik, ikalungniglu malgunik, amigaitununli naamangngitpiaktugaluit.” 10Jesus ukaktuk, “Inuit ingitihigit,” ivikangman amihumik talvani. Inuillu ingivlutik 5000guyun. 11Talva Jesus mukpauyanik tiguhiyuk kuyahukamilu tapkuninga tunipkaiyuk inungnun ingihimayunun, taimalivlunilu ikalungnik. Tamangmik inuit akeatukpaktun. 12Negihuegmata Jesusim maligutini ukallautiyain, “Nekit ilakuit katilugit tamakunagit.” 13Tapkuningalu katihiyun tigumiaktit 12n tatatugit mukpauyat talimat ilakungingnin negivaktunin.

14Inuit takugamitku tamna Jesusim naunaikuta, pimagu, ukaktun, “Ilumun, tamna nalautaiyiuyuk nunamun kaiyukhauyuk.”

Jesus kimauyuk inuilgulmun imam kangagunlu pihuktuk

(Mt. 14:22-27; Mk. 6:45-52)

15Talva Jesus ilihimagami inuit ataninguktinahualegmayyuk (Herodtun) kimauyuk manilgulmun kihimgiukhuni. 16Unulengman Jesusim maligutait ataaktun. 17Umiagmun ikivlutik ikagahualektuk Capernaumun taakhilektillugu Jesus tapkunani-itngitugaluak. 18Talva anukhilengman imak maligyuaktuk. 19Tapkua mailnun hitaman naatugit paugamik tautuktaat Jesus imam kangagun pihukhuni umiagmun kaglilekhunilu. Ekhitakpiaktun tapkua. 20Tapfuma ukallautiyain, “Uvangauyunga, ekhitailuhi.” 21Talva kuviatakhutik ikipkaktumayaat umiagmun tayyainagli nunamun tikitakhaanun tikittainaktun.

Inuit naunaikutamik takuyumayun

22Akagunguman inuit tahiup akianiitpaktun tautuktun umiagmik atauhengmik, ilihimavlutik Jesus umiaktukataungiman maligutaini, tapkua kihimgiukhutik aullangmata. 23Tiberiasminlu umiat allat tikingnaktun nunamun takanani inuit negivangmata Jesus kuyahukaaktillugu. 24Talva inuit ilihimagamik Jesus maligutaillu tamangmata, ingmingnik umiaktuktun aahin iglukagvik Capernaum tikittugu kenigiaktukhugu Jesus. 25Inuit katkagamitku Jesus tahiup akiaani, ukautiyaat “Rabbi kanga hamungakpakpin?”

Inunim mukpauyanga

26Jesusim kiuyain, “Ilumuktumik ukautigipfi kenigiaktugngitkipfinga naunaikutanik tautukpagapfi, mukpauyamik akeatukpagapfi kihimi. 27Havaktailuhi nekihakakuvluhi nungutaktunik, ilaa havakpagluhi nekihagnun nungulaitumik inugutilengmik Inum engningata tuniyaahi tapkuninga, tapfuma Angutata Godim naunaikutagimagu naguyumik.” 28Tapkua ukallautiyaat, “Uvagut huliniakkita havakuvluta Godim havaktakhainik?” 29Jesusim kiuyain, “Godim havaanga imaatun-ituk, Godim tiliyanga ukpegilugu.” 30Talva tapkua ukallautiyaat, “Talva kanugmik naunaikutamik piniakkin uvagut tautukuvlugu ukpegikuvlutin? Humik havakkin? 31Hivullivut inuilgulmiitillugit Mannanik negivaktun tiitigakhimangman, 'Godim negipkaktain inuit kilaum nekhautainik.' ” 32Jesusim ukautiyain, “Ilumuktumik ukautigipfi Mosesim tunihimaitaahi kilaum nekhautainik, Angutimali tayya tunilektaahi kilaum nekhautainik ilumuktumik. 33Godim mukpauyanga, tamnauyuk kilangmin atkakhimayuk tunivlugit inuit inuhengmik.” 34Tapkua Jesusmun ukaktun, “Atanek tunitigut mukpauyamik uminga nutkakhimaitumik.” 35Jesusim ukallautiyain, “Uvanga mukpauyauyunga inugutilengmik, inum kaiyyutigiguminga kaagunaituk, ukpegigumingalu imekiyunaektuk talvangaanin. 36Ukautiyagaluapfili, ilipfi tautukaluaktillunga ukpegngituhi uvamnun. 37Angutima tunitpanga inungnik, tamangmik uvamnungauniaktun, uvamnun kaitpata aahinun igitunaitatka, 38atkakhimagama kilangmin tiliyima ihumangit pikuvlugit uvanga ihumatka pitaililugit. 39Tiliyimalu ihumangit imaatun-itun, inuit tuniyauhimayun uvamnin tamaktukhaungitpiaktun inupkangniagapkin uvluk kingullik tikitpan. 40Angutima ihumanga imaatun-ituk, kialika engniga Godim tautukumiuk ukpegilugu inuhengmik nungulaitumik pikaktukhauyuk, tamnatauk uvanga inupkangniaktaga uvluk kingullik tikitpan.”

41Jewmiullu Jesus ihumalutigiyaat ukakhimangman, “Uvanga mukpauyauyunga kilangmin kaitauhimayuk.” 42Tapkua ukaktun, “Una Jesusiungilak, Josephim engniga, tapfuma anguta, angnangalu ilihimangngilavuk? Tayya kanuk ukakka, 'Kilangmin atkakhimayunga'?” 43Jesusim kiuyain, “Ilipfingnik ihumaluktailuhi. 44Inuk uvamnun kailimaituk Angutima tiliyima pipkagngitpagu, tamnatauk kaithimayuk inupkangniaktaga uvluk kingullik tikitpan. 45Nalautaiyit tiitigaini tiitigakhimayuk, “Tamangmik ilihauyyauhunguyun Godmin.' Ilaa tamangmik tuhaavigigumitku Angutiga ilihauyyauvluni tapfumanga kaivangniaktun uvamnun.

46“Tapkuali takuyuitpiaktagaluangat Angutiga, atauhingnak kihimi Godmin kaithimayuk, tapfuma tautukpaga. 47Ilumun ilumun ukautigipfi, inuk ukpegluaktuk inuhengmik nungulaitumik pikaktuk. 48Uvanga mukpauyauyunga inugutilengmik. 49Hivullihi inuilgulmiitillugit mannanik negivaktun tamangmigli tukuvaktugaluit. 50Una kihimi mukpauyak kilangmin kaitauhimayuk, uminga inuk negikuvlugu tukuhimaitumik. 51Uvanga ilaa mukpauyauyunga inugutilengmik kaitauhimayumik kilangmin. Inuk uminga mukpauyamik negigumi inuniaktuk nungulaitumun, mukpauyamiglu tunihiniaktunga timiga tamna, aitutigiyaga inuit inuyyutain pivlugit.”

52Jewmiullu talva ingmingnik kangutiyun ukakhutik, “Kanuk uma negipkangniaktaatigut timiminik?” 53Jesusim ukaullautiyain,“Ilumuktumik ukautigipfi, ilipfi Inum engningata timaanik negingitkupfi, aunganiglu imingngitkupfi ilupfingni inuhengmik pikangngitpiaktuhi. 54Inuk timimnik negigumi, aumniglu imegluni inunekaktuk nungulaitumik, aahin inupkangniaktaga uvluk kingulik tikitpan. 55Timiga nekhauman, augalu imekhauman nagutpiaktumik. 56Inum timiga negigumiuk augalu imeglugu naiyuktanga atautikun, uvangatauk naiyuktaga tamna. 57Angutima inuyum tilimanga, Angutipkunlu inugama, taima inuk uvamnik negigumi inuniaktuk uvapkun. 58Una mukpauyauyuk kaitauhimayuk kilangmin, una ilaa allauyuk hivullipfi nekhautainin, tapkua tukuhimangmata. Inuk uminga negigumi inuniaktuk nungulaitumun.” 59Jesus taimatun ukauyyiyuk ilihauyyitillugu atugvingmi Capernaumiitumi.

Maligutit ukpegluangitpaktun ilait

60Jesus maligutait amihut tapfuminga tuhaagamik ukaktun, “Uma ukauhia ilitukhinaituk kia tuhaaniakkauk?” 61Jesus inmi ilihimagami maligutait ihumalulengmata, ukallautiyain, “Tamna ukaktaga ihuigivihiuk? 62Huliniakkihi takugupfiuk Inum engniga maiyuktillugu tatpikunga naiyuktaminun hivungani? 63Ilaa anengnek kihimi inupkaiyuk, timik ikayulimaitugaluak. Ukauhitka ukakhimayatka ilipfingnun tapkua anengniuyun inugutilengmik. 64Tayyali ilahi ukpegngitkaluaktuhi.” Jesus hivungaanin ilihimavaktuk ukpektaitunik tapfumingalu tunihiyiminik. 65Ukaktuglu “Taima ukautivagaluapfi, inuit kailimainmata uvamnun Angutima pipkangngitpagit.” 66Kinguagun maligutait amihut maliguektun Jesusmun taimakhugu.

Peter uniuyyiyuk Jesuskun

67Talva Jesusim 12n ukallautiyain, “Ilipfitauk kimangniakkipfinga?” 68Simon Peterm kiuyaa, “Atanek, kimungauniakkita ilvit ukautikakavin inugutilengnik nungulaitunik, 69ukpekpaktugut uvagut ilihimavluta Godim tilimatin?” 70Jesusim kiuyain, “Ilipfi 12nguyuhi pilluangngilapfi? Ilapfili atauhek agiuktugaluak.” 71Taima Jesusim ukautigiyaa Judas, Simon Iscariotim engniga, tamna ilagigaluaktillugit 12n niuvgutiginiagmani.

Currently Selected:

John 6: Sperry

Highlight

Copy