Matìyò 7
7
Yesò ə ziʼì kùmə̀ ə nsoʼo viʼi vətsenəvə
(Luk 6.37-38, 41-42)
1“Kə ghə̀ŋ ə soʼo viʼi ndi kə və lə soʼ ghə̀ŋ. 2Ghə̀ŋ sətsèn ə̀ soʼo viʼi no te a jì ko, və lə boŋ soʼ ghə̀ŋ tò ali. Ghə̀ŋ sə ə soʼo ə wìʼ ə shyèʼ wen no nə̀ nshyèʼ ə ko, və lə be le shyèʼ ghə̀ŋ tò nə̀ nshyèʼ a yì. 3Byìʼì gho a wù ki tò fəfolə̀ fifə a fə diʼ əshɨ ə lèmə̀ wu, alì ke nyenə mpfì ə fəkòʼ fì a fə diʼì a wu əshɨ a? 4Fa ali, wù la zi ə wù gàʼa ale a lèmə̀ wu la, ‘Kəʼə mà shisə fəfolə̀ fifə fa wu əshɨ,’ a diʼ ali kiʼ no mpfì ə fəkòʼ a wu əshɨ a? 5Wìʼ ghèn a ghə̀ wamə wamə ne ənyʉ̀ alə̀! Shisə kəmpfì fə fəkòʼ fì a kə diʼ a wu əshɨ li, ghə̀ layn ə ndi wù kɨ ə yen fəfolə̀ fifə a fə diʼ əshɨ ə lèmə̀ wu.
6“Kə wu le lyɨ̀ kəfo kə ŋwoʼkə ə moʼ a bʉsə. Wù ne ali, sə a bwənsə ə bè lɨmlə tò wù. Kə wu le lyɨ̀ kəfo ə kyəkə ə ku a və ankwʉnyàm. Wù ne tə ali, və zi və be tuʼlə tò na aghʉ.
Yesò ə ziʼì la viʼi ə bèmə fo vyi a vəwenə ə kəŋ fa Nyìngòŋ
(Luk 11.9-13)
7“Ghə̀ŋ ə bèm tò bèm ə ndi ghə̀ ne ku a ghə̀ŋ, kəŋ tò kəŋ ə ndi ghə̀ŋ ne yen, kùmtə tò kùmtə, a ghə̀ ne boʼ a ghə̀ŋ. 8Byìʼì no ndò a ghə̀ bèm, və a ku à wen, no ndò a ghə̀ kəŋ, ghə̀ à yen, à be kùmtə̀ no ndò kùmtə̀ chʉ̀ ngə̀ŋ və à boʼ à wen. 9A diʼ ndo a ghə̀ŋ a ntìntìn a wàyn wen bèmə fozhɨvə ə ghə̀ ku nguʼ a wen a? 10A bwen à lì, ghə̀ bèm shʉ, ə ghə̀ ku zhù a wen a? 11Viʼi və byɨvə alə̀ to nə̀ ghə̀ŋ lə sətsèn ə nə̀ kɨ ə ku fo ə jùŋvə a vunə, no Tìʼ ghə̀ŋ a kaŋ a faŋ ale ke ku fo ə jùŋvə a viʼi vyì a və bèm a wen a?
12“Kə diʼ la ghə̀ŋ ə ne no ghò yi a viʼi a ghə̀ŋ kòŋ la və ə ne a ghə̀ŋ. Əkenkə ə diʼ kətʉ kənyʉ̀ kì a Əsoʼ ə Mosìs nziʼi. Nshə̀ʼtə̀sə ghoʼkə sə ə tsentə gàʼa.
Yesò ə ziʼì la viʼi ə kiʼ ə cho jì fa chʉ ngə̀ŋ ə faʼsə ghə̀
(Luk 13.24)
13“Ghə̀ŋ ə kwenə akəshi əfòyn ə Nyìngòŋ jì ə chʉ ngə̀ŋ ə faʼsə ghə̀, byìʼì ando ə chʉ ə ghoʼo ə kwenə tò akəshi kəbyɨkə. Ji yi a ghə̀ dyʉ̀ akəshi kəbyɨkə ə diʼ ə ghoʼ tò alə̀, chò no a nkàyn. 14Alì, əchʉ̀ ə mbàyn yi a ghə̀ dyʉ̀ akəshi kəbwòŋ ə faʼsə no alə̀, ji yi a ghə̀ dyʉ̀ tsu ə tyetə no alə̀, viʼi və ghoʼvə ko yenə.
Yesò ə ziʼì kùmə̀ fəkòʼ nə̀ ashɨ yi a fə kumə
(Luk 6.43-44)
15“Ghə̀ŋ ə tùʼmə̀ byìʼì nshə̀ʼtə̀sə ndzɨŋsə. Və nè sə ə vi a ghə̀ŋ, ə kə̀ʼ akəʼ to nə̀ byisə njɨ̀ alì a diʼ to no nyamsə kəbo. 16Və yenə kɨ fəkòʼ byìʼì ashɨ yi a fe kumə. Və ko təmə kwòŋ ashɨ kəbvèm fa fəkòʼ fə ndzoŋsə kò və ntəmə boŋtə lamsə lwi fa toʼ kənwìʼtə. 17Kə la diʼ to ndə̀ŋndəŋ to nə̀ fəkòʼ fə jùŋfə ə kumə tò ashɨ ə jùŋ ghə̀, fəbyɨfə kumə tò ashɨ a byɨ ghə̀. 18Fəkòʼ fə jùŋfə zi ko fə kumə ashɨ a byɨ ghə̀, ko fəbyɨfə zi fə kumə ashɨ ə jùŋ ghə̀. 19A fàŋ no fəkòʼ fə ko ke kumə ashɨ ə jùŋ ghə̀, və a bvàʼ ə moʼ a zhìʼ. 20Kə la diʼ la, və ne yen kɨ nshə̀ʼtə̀sə ndzɨŋsə tò byìʼì ənyʉ̀ vyi a vəwenə ə ne.
Yesò ə ziʼì kùmə̀ kətsi kə nsoʼ
(Luk 13.25-27)
21“A ko diʼ viʼi və tsèm a və a laʼtə tò alə̀ dzàŋ mo la ‘Bobo, Bobo,’ a və lə kwen akəshi yi a Nyìngòŋ ə soʼo əfòyn ə wen tsu a kaŋ. A lə kwenə tò vyi a və dzàŋ ali bè ne to ando kwòʼtə ə Tìʼ ghom a kaŋ ə kəŋ. 22A lə ndiʼ a kətsi yi a zhʉ Nyìngòŋ soʼo ə mbyì, ə viʼi və ghoʼvə ə bèm a mo la, ‘Tìʼ, Bobo, a ko yès ə nshə̀ʼtə̀ kənyʉ̀ kə Nyìngòŋ a wu a zhìʼ a? A ko yès ə ndzɨ̀mə̀ shisə əzhwì ə byɨvə fa əwen ə̀ viʼi bè ne ənyʉ̀ ə kàynə və tsenəvə, no ghoʼo tò a wu a zhìʼ a?’ 23Ə zhʉ a yi a mà gàʼa laynsə a vəwenə la, ‘Ma ko təmə nkɨ ghə̀ŋ a viʼi ənyʉ̀ ə byɨvə venə. Ghə̀ŋ lu fa a mò ashɨ!’
Yesò ə ziʼì kənyʉ̀ kùmə̀ tənkyì tə kəmbwom və bò
(Luk 6.47-49)
24“Kə lə diʼ la no mə ndo yi a ghə̀ zhʉ̀tə̀ ənyʉ̀ venə a mà gàʼ lə ə ne to ando mà gàʼa ghə̀ a diʼ to ndo wù ə tofə yi a ghə̀ nlu sə ə əbwom ngə̀ŋ wen ə wye kəchɨ ki nə̀ nguʼsə, 25əwʉ ə lu shiʼi, mu mə to mə fʉ ə cho ə ngə̀ŋ, no əfwofə ətoghə ə cho be nə̀ʼ, alì ngə̀ŋ a yi ə faŋ ko ghə̀ lu bə̀ykə̀ byìʼì ando kəchɨ ki ə ndiʼ mù və wye nə̀ nguʼsə.
26“Alì, mu a zhʉ̀ no ndo zhʉ ənyʉ̀ ə vwomə a venə a mà gàʼa la ə mù faŋ ke ne to ando mà gàʼa, ghə̀ nə̀ ndiʼ to nə̀ kəndzɨ̀ŋtə̀ kə wìʼ kì a kə nlu lyɨ̀ ngə̀ŋ wen ə dyʉ̀ bwom a kətʉ kə kəsese, 27əwʉ ə nlu shiʼi, mu mə to mə fʉ ə cho ə ngə̀ŋ, no əfwofə ətoghə cho ə be nə̀ʼ ngə̀ŋ a yi, no a zhʉ ko ghə̀ fəŋ no əfəŋ ə fàynsə ghə̀.”
28A sə diʼ to ando Yesò ziʼì mwetə ənyʉ̀ na venə, ə chʉ zɨm ənòyn ə viʼi vyi, 29byìʼì ando ghə̀ ə ko ziʼi to ando ndìʼsə̀ sə əsoʼ ə vəwenə. Ghə̀ ə nziʼi to nə̀ wìʼ a ghə̀ nkiʼ adyòʼ.
Currently Selected:
Matìyò 7: bbkDBLnt
Highlight
Share
Copy
Want to have your highlights saved across all your devices? Sign up or sign in
