Mak 13

Yesu apani liboe aplɛ ní Lisɔligba lɛ kuyaʋi yɔ su

1Agi Yesu azeedò ní Lisɔligba lɛ mɛ ɛ, yɛ badɔkpasi ba mɛ tole apani si, “Di ɔdɔbasɛ yɛ! Akla manímaní woli lu la ya te gi bɛkɔ ɛwa agba ʋidi ala ya xe eepedi te e!”

2Yesu ebu le onu si, “Dani mlɛɛmɔ agba ʋidi gaglaa la ya ɛ? Likla ɛtɔtɔ litráwɔ ní lɛ ɔtrɔ klɔ ɔ. Bɛtrátsra la petee.”

Yesu aki kugbágba ní keduyɔyɔ su

3Yesu eze ní Olif ye lito le aʋa, gi libu aŋu mɛ ɛkpɛ Lisɔligba lɛ ɛ. Lɛ Petro nì Yakobo nì Yohanes anì Andrea, ba tete bɛba yɛ klɔ ɛ. 4Lɛ beʋi Yesu si, “Si blɔ lipoe lɛ klɔ gi eboa la ya aaba la mɛ ɛ. Lɛ ege kiabasɛ si lipoe le lina ki eboa la ya la mɛ kubaba a?”

5Lɛ Yesu agba bà si, “Mleze nì aŋu tɔ mlakíki tɔ ɔnɔnɔ omeni mlo o. 6Banɔ glegle biayɔ ɔlɛɛ ní mɛ linyi ne me, gi biabu isu ya onu si, ‘Mɛ menu ye e!’ Nite me si biameni banɔ glegle. 7Pɔ̀ bikíhwani mlɔ ɔ, xe mlenu bigu ʋɛ izi le gi itipɔni mlɔ ɔ, ni agutaboe la ní idzage ne e; lilɛ si eboa la ya elu aba la mɛ ɛ; pɔ̀ líbasɛ si kelea mɛ liblo le lina a. 8Kuse kwiata bigu nì kuse, kaʋaŋaa kiayɔ kedu ní kaʋaŋaa su; kese kiasugu ní ɔkɔ kakaa, lɛ kuʋɛ kwiadɔ ɔ. Eboa la ya alɛ ŋwisi limɛ kutàta kinɛ ɛ.

9“Mlɔ ɔtutɔ mleze ni aŋu. Biavu mlo kɔtsinɔ ní otsixwaklɔ ɔ. Biakusi mlo ní Yudanɛ ma itsaklɔ; kɔkpɛ mɛ loso e, mlɛtralɛɛ ní baʋaŋa ba ni bekusi ba aŋu mɛ tɔ mlaapani liboe gbã nɛ ɔsi ba. 10Pɔ̀ xe able kelea lidu le liana ɛ, lilɛ si basɔli Liboe Gbã nɛ asi kelea petee. 11Lɛ xegi bevu mlo ɛtsinɔ ní otsixwaklɔ ɛ, eboa la gi mlaapani ní niklɔ ɛ, mlakíbu litukpo me ní la su ikpɛ ɔtɔ ɔ. Xegi lipoe le lina ɛ, mlɔ kɔ mlapani liboe kakaa gi liaba mlɔ onu i. Lɛ ese linu si eboa la gi mlɛtrapani i, atrádɔ mlɔ klɔ ɔ; ɛɛtradɔ ní Ɔfuɛfuɛ Dradra lɔ klɔ ɔ. 12Oneminyime aakpɛ oneminyime awla tɔ beye ye; lɛ Ɔka fɛ aabitɛ nite tsinɔ Yebi su u. Bebi ba biayɔ kedu ní ba baka ba ni ba bene ba su tɔ beye ba. 13Banima petee biayɔ kedu ní mlɔ su kɔkpɛ mɛ loso. Pɔ̀ ɔniliɛ gi aatani kulɛɛ gaglaa kɔna ni lipoe gɔgɔ lɛ ɛ, aamɔ kubúbú.

Baxixa zimizi ba su Kuboedoplɛ

14“Xegi mlɛmɔ ebusioboe zimizi na gi izeezizi bidɔ ɔ, gi alɛɛ niklɔ ɔ gi líma si eze e, (Ɔdɔklaɛ okeni odi tɔ onu eboa la ya ese!) Lɛ kɔ banama gi balɛ ní Yudea ɛ, bese atrɛ ní eto la mɛ. 15Ɔniliɛ klɔ gi ɔtini ní yɛ ligba lɛ aʋa ɛ, ɔkizizi lipoe si yiple eku yɛ kepea mɛ tɔ yikɔ kididɔ edono o. 16Ɔniliɛ klɔ gi ɔlɛ ní yɛ ɔnyrɔ nɔ mɛ ɛ, okídzi itrɛ kepea mɛ si yizɛɛkɔ yɛ liwu le e. 17Lɛ liaze gagla ní ewe ala klɔ mɛ kí bamɛdzɛ ba ni bebinea ba gi ba bebi ba bɛɛmwa ɛ. 18Mlaxwa Aya tɔ eboa la ya ʋa akíba la mɛ ní kublɔ lipoe le e! 19Lɛ ese linu si ewe a la klɔ mɛ baxixa ʋa ɛ, bianyani sani báklɔ gi beze edi dɔni lipoe lɛ klɔ gi Aya ebu kelea gakɔna ni omono e. Lɛ baxixa ʋa klɔ elu bátraba tɔɔ ɔ. 20Pɔ̀ Aya aatí ewe ala klɔ aʋa; atɛsi ɔ́bitɛ lɛ nite e, ɔnɔnɔ ɔ́tragɔ ɔ. Pɔ̀ kɔkpɛ yɛ banɔ banɔbúbú ba loso e aati ní ewe a la klɔ aʋa a. 21Ní lipoe lɛ klɔ mɛ ɛ, xegi ɔnutɔ aasi wɔ si, ‘Di imɔ Mesiya yɛ ní ya!’ loo, ‘Di, imɔ yɛ ní kɔlɔ ɛ!’ wukízɛ lɛ aʋa ɛɛŋa a. 22Lɛ ese linu si asia na Mesiya ba ni asia na Beboedoplɛ ba biaba. Biabitɛ enugutseboe la ni eboe mamɔ edi atɔ gi biakɔ meni Aya yɛ banɔ kyakya ba fɛ ɛ, xegi biatanɔ ɛ. 23Lɛ loso e, mleze ní aŋuplɛplɛ mɛ! Masi mlɔ liboe kakaa xe ableke lipoe le liana a.

Ɔnɔɛ Yebi ye kubaba ʋlaa

24“Niteme si ewe ala gi aaba ní baxixa ʋa kede e, liwo le lialɔsi, lɛ ɔdzidzi yɛ ɔ́trakle tɔɔ ɔ, 25Badzidziebi ʋa biawɔli dɔni lifunu ne, lɛ lifunu ne bidɔ mɛ ɛ biaŋwia ní ʋɛ izeklɔ ɔ. 26Lɛ ní lipoe lɛ klɔ mɛ ɛ, banima biamɔ Ɔnɔɛ Yebi ye gi atrába ní aplɛ la mɛ ni kigagla ʋidi ni yɛ kuklekleo. 27Lɛ aakpɛ yɛ lifunu ne baxwɛdzɛ ba kutsisi kesea akɔtɔ tene na mɛ tɔ bakpɛ Aya yɛ banɔbúbú ba likpɔ ɔdɔni kelea mɛ kapɛ tiele kɔtsini kapɛ ʋlaa, ni lifunu ne ɔduklɔ.

Kudɔkpasi ní ogbose lo su

28“Mlaki ogbose lo ɔbasɛ mlɔ bidɔ. Xegi lɔ aya la ɛtuma ɛ, kɔ mlete si kwiku ní kedzenilea mɛ. 29Nite ke xegi mlɛmɔ eboa la ya gi ɛɛba la mɛ ɛ, tɔ mlete si lipoe le lina a. 30Ní anukwarɛɛ mɛ ɛ eboa la ya pɔ́ aaba la mɛ xe ableke banama petee gi balɛ ligbã́ nɛ abla ɛ, biatse e. 31Lifunu ne ni kesea biaza, pɔ̀ mɛ eboe la onu atráza liwewe e.

Ɔnɔnɔ óte liwe le loo lipoe lɛ gi ɔnɔɛ Yebi ye aaba a

32“Ɔnɔnɔ óte liwe lɛ klɔ, ni lipoe lɛ klɔ gi eboa la aaba la mɛ ɛ. Aya yɛ baxwɛdzɛ ba ní lifunu ne fɛ béte e; lɛ Yebi e fɛ óte e; Ɔka Aya ko ete e. 33“Mleze ní aŋuplɛplɛ mɛ tɔ mleze ni aŋu, lɛ ese linu si mléte lipoe lɛ klɔ gi lɛ liaze ɔnyɔsasa nɔ ɔ. 34Liaze ko ŋwisi kiliɛ gi onyime ɔtɔ asɛ yɛ kepea mɛ xe atrɛ ní kude me kinɛ ɛ. Pɔ̀ xe aasɛ ɛ, akɔ yɛ besumubi ba edu ní eboe la onu, lɛ aki ɔkakaa yɛ lixwɛ nɛ ɛ; lɛ asi kevunu ya ɔʋadi ye si oze ni aŋu. 35Mleze ni aŋu lɛ ese linu si mléte lipoe lɛ klɔ gi kepea ɔkaɛ aadzi i liatani ɔlagɔ loo olezatɔ loo livlɛ kuze. 36Lɛ xegi aado ní mlɔ aʋa kpoyi i, ɔ́kiba atsani mlɔ ní sra mɛ ɛ. 37Eboa la gi masi mlɔ ɛ, la ke mɛɛsi ɔnɔ kakaa si: ‘Mleze ni aŋu!’ ”

Currently Selected:

Mak 13: avn

Highlight

Copy