Mak 11

Yesu eti eku Yerusalem ní Kuʋaŋa mɛ

1Agi beti ipɔni Yerusalem, xe beku Betania ni Betfage ní Olif ye lito le su i, Yesu akpɛ yɛ badɔkpasi ba mɛ tiaʋa ní ɔtɔ nɔ 2ni kutrɔtrɔ si, “Mlatrɛ ní kamamia lia klɔ gi kalɛ ní mlɔ ɔtɔ nɔ mɛ ɛ. Xegi mlezekui i, mlaamɔ tedzi obi gi ɔnɔnɔ ɔ́trɔ yɛ aʋa ʋídi gi ɔkpasi ní ohwi lo me e. Mleble ye amani mɛ ní ya. 3Lɛ xegi ɔnutɔ eʋi mlo si ege lɛ loso mleeble ye na ɛ, mlasi ɔniliɛ klɔ si, ‘Ɔkaɛ yɛ aziã yɛ; lɛ aadzi ni ye kumanɔ kpekpemi i.’”

4Agi bɛtrɛ ɛ, bɛmɔ tedzi obi ye ní ablɔ yɛ su kepe atɔ kevunu ya. Lɛ gi bezeeble ye e, 5banɔ batɔ gi bɛlɛɛ níklɔ ɛ, beʋi ba si, “Ege lɛ loso mleeble tedzi ye e?”

6Bebu le onu ŋwisi kiliɛ gi Yesu asi ba kinɛ ɛ. Niteme si banɔ baklɔ ba bɛki ba kudeo. 7Agi bɛmani tedzi obi ye e, ní Yesu klɔ ɛ, bebu ba ewu la ɛtrɔ ní ɔgaɛ aʋa, lɛ Yesu emu atrɔ ɛ. 8Banɔ glegle bene ba ewu la ɛplɛ ní kudeo me, lɛ banɔ batɔ fɛ bɛtsa eseya la ɛplɛ ɛ. 9Banɔ ba klɔ gi beze ní ɔtɔ nɔ nì kedea pɔ́ bɛkpɛ ozi lo si, “Hosana! Aya ɔkrira ɔniliɛ klɔ gi atrába ní Ɔkaɛ yɛ linyine me e! 10Aya ɔkrira blɔ Ɔkatsitsi ye Dawid yɛ kaʋaŋaa gi kɛtraba ɛ. Hosana ní lifunu ne hwii.”

11Gi Yesu eku Yerusalem i, atrɛ ní lisɔligba lɛ mɛ, lɛ edi kidɔ kakaa aklanɔ ɛ. Pɔ̀, agi kelea keeblo onu i, asɛ atrɛ ní Betania ni yɛ badɔkpasi liɔfɔ ni tiaʋa ba.

Yesu exo ifi akpɛ ogbose lo

12Gi kelea kɛti xe bɛsɛ ní Betania ɛ, kuʋɛ kwiku Yesu. 13Lɛ gi amɔ ogbose ɔtɔ gi awlakpa la eze ní lɔ aʋa atsisi ní ɔdzage no e, eti apɔni lɔ ni kugyodi si yɛ amɔ lisebi itɔ ní lɔ mɛ na a. Pɔ̀ gi adzɛ ɛ, awlakpa la tètè ko amɔ, lɛ ese linu si ogbose lo liyopoe le liʋí na a. 14Lɛ Yesu asi ogbose lo si, “Ɔnɔnɔ ɔ́traŋa lisebi dɔni wɔ mɛ liwewe tɔ ɔ!”

Niteme si yɛ badɔkpasi ba benu liboe lɛ gi apani i.

Yesu akpikpini badɔda ba ebu ní lisumugba lɛ mɛ

15Agi bezeeku Yerusalem pɔ́ ɛ, Yesu eti eku ní lisumugba lɛ mɛ; lɛ ekpese badɔda ba ni badɔdzi ba pɔ́ kukpikpini dono e. Lɛ etutru babɔtsrɛ ba ba ikplɔ nɛ ni abronuma ʋa badàdà ba egbo la eʋe e. 16Lɛ ɔ́ki kude si ɔnɔnɔ ɔkɔ bidɔdada tɔtɔ gani Kesumupea mɛ ɛ. 17Lɛ abasɛ banima bidɔ si, “Bɛŋwlimi kpɛ ní Aya yɛ Liboe le me si, ‘Biaxwa Mɛ kepea mɛ si kelea mɛ banima petee ba Aya ɔxwakɔ.’ Pɔ̀ lɛ mlekyi niklɔ edzì beze ba okpokɔ ɛ!”

18Agi kusɔliɔ baka ba ni ɔsã nɔ badɔbasɛ ba benu liboe le e, bekpese kugyodi kiliɛ gi biamɔ kude kutɔ onu u, xe biaye Yesu i. Pɔ̀ bezeese ye e, lɛ ese linu si linɔkpi le pɔ́ lɛ inugu itse ní yɛ bidɔbasɛbasɛ ʋɛ su u.

19Gi ɔlagɔ lɔ ɛna ɛ, Yesu ni yɛ badɔkpasi ba bedo ní ɔma nɔ mɛ.

Kudɔkpasi ní ogbose tsetse lo ni kuziŋa su

20Keletitia livlɛ lɛ gi beze ní kudeo aʋa ɛ; bɛmɔ si ogbose lo etse etsinɔ ní lɔ igu ne me ke. 21Lɛ Petro aplɛ aŋu ní liboe lɛ klɔ gi liba lɛ mɛ aʋa ɛ; lɛ asi Yesu si, “Di! Ɔdɔbasɛ yɛ, ogbose lo gi woxo ifi le ɔkpɛ ɛ, etse!”

22Lɛ Yesu ebu le onu si, “Mlazi Aya aʋa ŋa.” 23“Mɛɛtrɔ likla ní lɛ aʋa ɛki mlɔ si, ɔnɔ kakaa gi aasi ketokpaa lia ya si, ‘kakpaʋi tɔ kazɛŋwia isu ya akpɛ ní axu la mɛ ɛ,’ xe azɛ lɛ aʋa aŋa ní yɛ ɔna nɔ mɛ ɛ, si liboe lɛ gi yɛ apani liaba lɛ mɛ ɔki yɛ ɛ, lianyaba lɛ mɛ ɔki yɛ ɛ. 24Lɛ loso e mɛɛsi mlɔ si: xe mlɛxwa Aya a, xe mleʋi yɛ kiditɔ ɛ, mlazi lɛ aʋa aŋa si mlɛzi kɛ. Nite si kidɔ kakaa gi mleʋi Aya ɛ, akɔ kɛ ɔki mlɔ. 25Lɛ xegi mlalɛɛ si mlɛxwa Aya ɛ, mlakɔ liboe kakaa gi mlevu i kpɛ ní ɔna mɛ aki ɔnɔ kakaa ɛ, kukɔkyɛ yɛ, tɔ mlɔ Ɔkaɛ ní lifunu ne fɛ ɛ, aakɔ̀ mlɔ eboe zimizi na kukɔkyɛ mlɔ. 26Pɔ̀ xegi mlákɔ akyɛ ɛ, mlɔ Ɔkaɛ ní lifunu ne fɛ ɛ, ɔ́trakɔ mlɔ eboe zimizi na ɛkyɛ mlɔ ɔ.”

Eboe Kuŋwlɛŋwlɛ ní Yesu yɛ kigaglaɛ kɛ ɔdɔkɔ su

27Lɛ kede e, bedzi ba Yerusalem. Gi Yesu azaaklanɔ ní Lisɔligba lɛ mɛ ɛ, kusɔliɔ baka ba, ɔsã nɔ badɔbasɛ ba ni banɔtsitsi ba bɛba yɛ klɔ. 28Lɛ beʋi Yesu si, “Kigagla woli wɔmɔ ɔ, xe wɔɛbitɛ eboa la ya elu u? Lɛ nyaŋwɛ aki wɔ kudeo o?”

29Yesu ebu le onu si, “Matraʋi mlo liboe tile. Xegi mlebu le onu i, mɛ fɛ maasi mlɔ niklɔ gi mɛ kigaglaɛ kidɔ ɔ, xe mɛɛkɔ ɛbitɛ eboa la ya elu i. 30Mlasi mɛ, nifɔ Yohanes amɔ kigaglaɛ adɔ nɔ xe azɛakpɛ kuni yo aki banima na a? Aya klɔ loo, banima klɔ na a?”

31Niklɔ kyɔŋ ɛ, kuboehe kwiku ní ba kusi. Lɛ bɛpani si, “Xe kwibu le onu si kigaglaɛ kidɔ ní Aya klɔ ɛ, aaʋi blo si kɔ lɔ, ege lɛ loso kúzi Yohanes aʋa ɛɛŋa na a? 32Pɔ̀ xe kwibu le onu si Kigaglaɛ liɛ klɔ kidɔ ní banima kɔ ɛ, bezeese banima.” Lɛ ese linu si bɛzeese banima ní kiliɛ mɛ gi ɔnɔ kakaa azɛ lɛ si Yohanes anya eze Aya yɛ oboedoplɛ onu i. 33Niteme si bebú le onu ki Yesu si, “Kúte e.”

Lɛ Yesu asi ba si, “Mɛ fɛ matrasi mlɔ niklɔ gi mɛ kigaglaɛ kidɔ ɔ, xe mɛɛkɔ ɛbitɛ eboa la ya elu u.”

Currently Selected:

Mak 11: avn

Highlight

Copy