Luka 6
6
Eboe kuŋwlɛŋwlɛ ní Sabat yɛ su
1Ni sabat ɔtɔ aʋa ɛ, Yesu ni yɛ badɔkpasi ba bɛzɛɛga idoli kayaa atɔ mɛ ɛza. Lɛ yɛ badɔkpasi ba bekpese idoli le kuyasi, bɛ fili lɛ, xe bɛzɛ ta ɛ. 2Niteme si Farisianɛ atɔ beʋi si, “Ege loso kidiliɛ liɛ gi blɔ ɔsã nɔ ɛsi si mlatrátani kubitɛ ní sabat yɛ aʋa ɛ, xe mlɔ kɔ mlɛbitɛ kɛ na a?”
3Yesu ebu lɛ onu akí ba si, “Mlakla kidiliɛ gi Dawid abitɛ lipoe lɛ gi kuʋɔɔ kwiku yɛ ni yɛ banima lo o,? 4Eti eku ní Aya ligba lɛ mɛ, lɛ akɔ lìklã nɛ gi bɛbla ɛplɛ ki Aya ɛ, lɛ atà nɛ, xe aki yɛ banima kyɛ. Gi liyɔ kedu ní blɔ Ɔsã nɔ su lɛ ese linu si kusumu yo baka ba ko bɛmɔ kude si biata lìklã ɛ nɛ klɔ.”
5Lɛ Yesu asi ba si “Ɔnɔɛ Yebie e, onu Ɔka ki sabat yɛ.”
Onyime ɔtɔ gi yɛ ɔŋawla lɔ etse e
6Ni sabat dzedze aʋa ɛ, Yesu atrɛ ní Yudanɛ ma ɔtsaklɔ gi azɛɛbasɛ bidɔ ɔ. Onyime ɔtɔ gi yɛ ɔŋawla lɔ etse e, eze klɔ. 7Ɔsã nɔ badɔbasɛ batɔ ni Farisianɛ batɔ beze klɔ gi bɛzɛpɛ kunutsatsa ní Yesu su i. Lɛ loso e bezevu aŋu ní yɛ su mɔmɔmɔ, tɔ bedi si aayɔ ni ɔnɔ ní Sabat yɛ aʋa na. 8Pɔ̀ Yesu kɔ ete ba begyodi ʋa lɛ loso asi onyimee si, “Yɔ! Ga ba ɔtɔ nɔ yà.” Nite si onyimee ayɔ ɔlɛɛ.
9Lɛ Yesu asi ba si, “Miʋi mlo o: ege blɔ Ɔsã nɔ ɛsi si kubitɛ ní Sabat yɛ aʋa na a? Kubitɛ liboe gbã loo kubitɛ liboe nyani nyani i? Kubu ɔnɔ ligbã loo kudi ye tɔ otse e?”
10Edi ba petee aklanɔ lɛ asi onyimee si, “Nina wɔ ɔwla lɔ!” Yɛ ɔwla lɔ eku lɔ kizee lɛ anina lɔ ɛ. 11Isu ya iyeʋi Ɔsã nɔ badɔbasɛ ba ni Farisianɛ ma nyani nyani nite si begyodi ni ba kusi kidiliɛ gi biatani Yesu kubitɛ ɛ.
Yesu akya yɛ Banɔkpɛkpɛ liɔfɔ ni tiaʋa ba
12Liwetɔ lɛ ɛ Yesu emu atrɛ ketokpa katɔ aʋa si yizɛɛxwa Aya. Eze klɔ elesi la petee. 13Gi kelea kɛti i, axwa yɛ badɔkpasi ba akpɛ likpɔ. Lɛ ebu ba mɛ liɔfɔ ni tiaʋa gi aki ba linyi si banɔkpɛkpɛ ba. 14Banɔkpɛkpɛ ba beze Simon (Yesu axwa yɛ dzɛ si Petro) ni yenemie Andrea, Yakobo ni Yohanes i, Filipo ani Batolomeo. 15Batɔ fɛ beze Mateo ni Toma, Yakobo, Alfeo yebie ni Simon gi adimɛ ni yɛ kesea ɛ. 16Bagɔgɔ ba beze Yuda, Yakobo yebie, ani Yuda Iscariot gi yɛ abakpɛ Yesu ní awla ɛ.
Yesu abasi bidɔ, lɛ ayɔni banyanya ba ɛ
17Gi Yesu eple adɔ ni lito le aʋa a, ni yɛ banɔkpɛkpɛ ba xe ana ɔdada klɔɛ ɛ, atsani yɛ badɔkpasi glegle atɔ. Linɔkpi ʋidi itɔ gi lidɔ ní Yudea kesea petee me e, Yerusalem ɔma nɔ mɛ, Tiro ni Sidɔn gi lɛ kyɛ inu ima ʋidi ni axu la kutu yɔ mɛ ɛ, lize ní iklɔ. 18Banɔ baklɔ ba petee bɛba si benu yɛ bidɔbasɛbasɛ ʋɛ ni tɔ ɔyɔ ni ba dɔni ba bànya ʋa mɛ. Banɔ baklɔ gi ifuɛfuɛ zimizi ne izɛkpɛ kunugu yo fɛ bɛba gi Yesu ayɔni ba a. 19Ɔnɔ kakaa ekeni edi si yigbɔni yɛ, lɛ ese linu si kigagla kizɛdɔ ní yɛ mɛ gi kizɛyɔni banyanya ba petee e.
Isami ni asigaga mɛ kuzeze
20Yesu edi yɛ badɔkpasi ba lɛ apani si,
“Mlamɔ isami mlɔ bepiplinete ba
lɛ ese linu si Aya yɛ kaʋaŋaa ɛ mlɔ kanɛ kenu.
21Mlamɔ isami mlɔ banama gi kuʋɛ kwiku abla ɛ,
lɛ ese linu si mlɛtrake e.
“Mlamɔ isami mlɔ banama gi mlebemi abla ɛ
lɛ ese linu si mlɛtramwɛ ɛ
22Mlamɔ isami xe banima bevu mlo ekpɛ lipo me e,
xe begbe mlo e, xe bekpini mlo o,
xe bedo eboe nyani nyani na ɛyurɔ mlɔ ɔ kɔkpɛ Ɔnɔɛ Yebi ye loso.
23“Mleyo ni isami xe liba lɛ mɛ nite e, lɛ ese linu si mlɔ liʋɛtsatsa lɛ lilɛ ní lifunu ne e. Likípè mlo o, lɛ ese linu si nite ké ba bakatsitsi ba bɛbitɛ tsinɔ ní Aya yɛ beboedoplɛ ba su ní kanɔa mɛ ɛ.
24“Pɔ̀ babaa kí mlɔ bexonete ba a, lɛ ese linu si mlɛŋa mlɔ ligbã́ nɛ kooko! 25Babaa kimlɔ banama gi mlekè abla ɛ, lɛ ese linu si mlɔ kuʋɛ kwitraku u! Babaa ki mlɔ banama gi mlɛmwɛ abla ɛ, lɛ ese linu si mlɔ mlɛtraze ní asigaga mɛ ɛ, xe mlaabemi i!
26“Babaa ki mlɔ xe banima pɔ́ bɛkpɔ̀ mlɔ ɛ, lɛ ese linu si nite ke ba bakatsitsi ba bɛpani ní asia na beboedoplɛ ba su.”
Mlalɔ mlɔ Ahwafianɛ ma
27“Pɔ̀ mɛsi mlɔ banama gi mlenu mɛ liboe le si, mlalɔ mlɔ ahwafianɛ ma; tɔ mlapɛ̀ lipo me aki banama gi bevu mlo ekpɛ ɔna mɛ ɛ. 28Mlakrira banama gi beexo ifi le ekpɛ mlɔ ɛ, lɛ banama gi beebu kini ɛki mlɔ ɛ, mlaxwa Aya ní ba litukpo. 29Xe gi ɔnutɔ ábɔ wɔ osumu ní ɔtuʋa tole e, tɔ kyi ɔʋla lɔ ki yɛ tɔ ɔbɔ, lɛ xegi ɔnutɔ akɔ wɔ liwu le aʋa lini nɛ ɛ, tɔ bu lɛ ese liwu le fɛ ki yɛ. 30Xe ɔnutɔ eʋi wo kiditɔ ɛ, kɔ kɛ ki yɛ. Lɛ xegi ɔnutɔ akɔ wɔ kidɔ ɛ, wukíti ke e. 31Lɛ kidiliɛ gi wɔ̀pɛ si babitɛ aki wɔ ɛ, bitɛ nite ke ki banima.
32“Xegi mlɛdimɛ ni banama ko gi bɛdimɛ ni mlɔ ɛ, kitɛ Aya aakrira mlɔ ɛ? Lɛ ese linu si banɔ zimizi ba kura fɛ ɛ bizɛdimɛ ni banama gi bɛdimɛ ni ba ɛ. 33Lɛ xegi mlɛbitɛ eboe gbã ɛki banama ko gi bizɛbitɛ eboe gbã ɛki mlɔ ɛ, ege lɛ loso biakpɔ mlɔ ɛ? Lɛ ese linu si nite ke banɔ zimizi ba fɛ bizɛbitɛ ɛ. 34Lɛ xegi ɔniliɛ gi aatani kidiliɛ gi wɔdɔ ɔki yɛ dzini kutsa ki wɔ ko wɔɛdɔ bidɔ ɛkɔ ɛ, kukpɔ̀kpɔ̀ tɔtɔ kúma lɛ mɛ ɛki wɔ. Banɔ zimizi ba fɛ nite ko bizɛdɔ bidɔ mɛ ɛki ba ahanuglɔ ba, lɛ ese linu si beedi kudeo onu si biadzini be kutsa aki ba. 35Owo, Boŋu i, mlalɔ mlɔ ahwafianɛ ma tɔ mlapɛ̀ lipo me aki ba. Mladɔ bidɔ aki ba pɔ̀ mlakídi kudeo onu si biadzini ʋɛ kutsa ki mlɔ. Xe mlɛbitɛ nite e, mlɔ liʋɛ nɛ liakeme lɛ mlaaze Lifunu ne Ɔkaɛ yɛ bebi. Lɛ ese linu si, yɛ izepɛ̀ lipo me ɛki banama gi bidɔ biʋíku ba liŋu u, ni litukpo me gagla benete ba. 36Mlazedi banɔ asigaga ŋwisi kiliɛ gi mlɔ Ɔkaɛ Aya fɛ izedi asigaga la kinɛ ɛ.
Ní etsi kuxwaxwa nì banɔ su
37“Mlakíxwa litsi ni mlɔ ahanuglɔ ba tɔ Aya fɛ ɔ́kixwa litsi ni mlo o. Mlakíbu mlɔ ahanuglɔ ba lipɔ tɔ Aya fɛ aabu mlo lipɔ ɔ. Mlakɔ eboe akyɛ tɔ Aya fɛ aakɔ̀ kyɛ mlɔ. 38Mlaki banɔ bidɔ tɔ Aya fɛ aaki mlɔ. Mlaamɔ bidɔ gi biayi kekpoa biami ʋe kpɛ lɛ biagbigba xe biakɔ kpɛ mlɔ awla. Lɛ ese linu si kália mɛ gi wɔkpɛ ɔki wonemi i, kamɛ ké Aya fɛ aakpɛ ɔki wɔ.”
39Yesu ebu abee dzedze aki ba si, “Kaŋupo kátratani kaŋupo dzedze kugbanɔ ɔ. Xe ani nite e, ba tiaʋa pɔ́ biawɔli ku ní lizokpo me e. 40Ableke e, ɔdɔkpasibi ɔ́tɔtɔ óʋikeme ɔsani yɛ ɔdɔbasɛ yɛ ɛ. Pɔ̀ xegi ɔdɔkpasibi ye akpasi bidɔ mɛ pɔ́ ɛ, kɔ edzì ŋwisi yɛ ɔdɔbasɛ yɛ kinɛ ɛ. 41Ege lɛ loso wɔedi ɔflimi nɔ ní wɔ onemi ye kimbie me e, xe wodze kanyikpea lia gi kalɛ ní wɔ ɔtutɔ wɔ kimbi ye me na a? 42Kitɛ wɔasi wɔ onemi ye si, ‘Ki tɔ mibu ɔflimi nɔ ní wɔ kimbi ye me’ gi wɔʋítani kanyikpea lia gi kalɛ ní wɔ kimbi ye me kumɔ na a? Wɔ ɔnɔ aŋumɛboebitɛ, bú kanyikpea ní wɔ kimbi ye me kpɛ ɔtɔ, kɔ wɔmɔ mumɔ kɔ wobu ɔflimi nɔ ní wɔ onemi ye kimbi ye me.
Lisebi le bizɛkɔ tè ose lo
43“Kiliɛ gi ose gbã oʋí yo esebi nyani nyani i, nite ké ose nyani nyani kyɛ ɔ́tratani esebi gbã kuyo o. 44Ose kakaa ɛ, lɔ esebi la bizɛkɔ te lo. Ɔ́nɔnɔ ɔ́ʋigu mangɔ ní ɔdɔ̃ mɛ ɛ; lɛ ɔ́nɔnɔ fɛ ɔ́ʋigu imumɔɛ ní fife me e. 45Lɛ loso e, ɔnɔ gbã ɛ, izebu bidɔ gbã ɛdɔnɔ ní bidɔ gbã ɛ mɛ gi bilɛ ní yɛ ɔna nɔ mɛ ɛ. Nite ké ɔnɔ zimizi ye kyɛ izebu eboe zimizi dɔnɔ ní bidɔ zimizi bɛ klɔ gi bilɛ ní yɛ ɔna nɔ mɛ̀ mɛ ɛ. Lɛ ese linu si eboa la gi eyi ɔna nɔ ɛ, la onugu lo izɛpani.
Bagbawa tiaʋa
46“Lɛ Yesu eʋi ba dzɛ si, “Ege lɛ loso mlɛxwa mɛ si, ‘Ɔka, Ɔka’, xe mláʋibitɛ ní eboa la gi mɛɛsi mlɔ aʋa a! 47Ɔnɔ kakaa gi izɛba mɔklɔ ɛ, xe izenu mɛ eboe la a, xe izɛbitɛ ní la aʋa ɛ, maabasɛ mlɔ ɔniliɛ elu gi onu i. 48Ɔniliɛ klɔ ɔlɛ ŋwisi onyime liɛ gi azɛɛwa ligba kinɛ ɛ. Ebu ide ne gi iidzu u xe ina liklakpɔ lɛ ní sise se me; lɛ akpɛ ɔklaxɔ gagla ní ide ne me e. Onipe lo eyi gbigba gi ɛyaʋi iku ligba lɛ klɔ ese e; pɔ̀ kididɔ kísa ligba lɛ, lɛ ese linu si bɛwa lɛ mumɔ ɔ. 49Pɔ̀, ɔnɔ kakaa gi izenu mɛ eboe la a, xe ɔ́ʋibitɛ ni la aʋa ɛ, ɔlɛ ŋwisi onyime ɔtɔ gi awa yɛ ligba lɛ ɛ. Pɔ̀ ɔ́kpɛ ɔklaxɔ ní ligba lɛ ese kinɛ ɛ. Lɛ loso lipoe lɛ gi kuni yo kwiyaʋi iku ligba lɛ ese e, likpà kyɔŋ gi kibitɛ tɔtɔ kize ní lɛ su u.”
Currently Selected:
Luka 6: avn
Highlight
Share
Copy
Want to have your highlights saved across all your devices? Sign up or sign in
© Ghana Institute of Linguistics, Literacy and Bible Translation, 2017 In cooperation with Wycliffe Bible Translators, Inc
