Yohan 20

Badɔkpasi ba bɛmɔ ɔdrɔ pluplu lo

1Lipadzruwe le olezatɔ nɔ gi kanaa mɛ kaʋídra ɛ, Maria Magdalene atrɛ ní Yesu ɔdrɔ lɔ su lɛ amɔ si likla nɛ líma ní ɔdrɔ lɔ onu u. 2Lɛ loso ese atrɛ ní Simon Petro ni ɔdɔkpasi liɛ klɔ gi Yesu alɔ ɛ, ba klɔ ɔ, lɛ asi ba si i, “Bebu Ɔkaɛ ní ɔdrɔ lɔ mɛ, lɛ kúte niklɔ gi bɛtsini yɛ ɛ!”

3Lɛ Petro ni ɔdɔkpasi liɛ klɔ ɛ, bɛtrɛ ní ɔdrɔ lɔ su i. 4Ba tiaʋa bezeese pɔ̀ ɔdɔkpasi liɛ klɔ ese aza ní Petro aʋa a, lɛ yɛ etu ɔdrɔ lɔ su ku na a. 5Abùbɔ lɛ amɔ asaba pititi ala mɛ gi bɛxla Yesu ikpɛ ɛ, gi afini i, pɔ̀ oti oku ɔdrɔ lɔ mɛ ɛ. 6Simon Petro gi yɛ awɔ kedea ɛ, aba eku lɛ aza eku ní ɔdrɔ lɔ mɛ ɛ. Amɔ asaba pititi la gi afini i, 7ni kusa liɔ klɔ gi bɛkɔ ɛnya Yesu yɛ litukpo le e. Kusa liɔ klɔ kɔ ɛ, kwiklɔʋi gi kwifɛ lidze ní asaba pititi la su u. 8Gɔgɔ ɛ, ɔdɔkpasi liɛ gi yɛ etu ɔdrɔ lɔ su kuna ɛ, kyɛ eti eku, lɛ amɔ nite ke e, lɛ azɛ aŋa si Yesu anya ayɔ ɔ. 9Ga kɔna ni abla ɛ, bénu kuŋwlimiplɛɔ ese e si, lilɛ si Yesu ɔyɔ dɔni bekpo ʋa mɛ.

Yesu ebu isu abasɛ Maria Magdalene

10Lɛ badɔkpasi ba bedzi itrɛ ní ba kepea mɛ ɛ. 11Pɔ̀ Maria alɛɛ ní ɔdrɔ lɔ su azeebemi; gi azeebemi i, abùbɔ lɛ edi ɔdrɔ lɔ mɛ atsisi i 12lɛ amɔ Aya yɔ baxwɛdzɛ tiaʋa gi bɛkpɛ bidɔ pititi i, xe bedi ní niklɔ ɔ, gi Yesu yɛ okpo ye afɛ ɛ, tole ní yɛ etukpo la onu lɛ ɔʋlaɛ ní yɛ ikli lɛ onu i.

13Lɛ beʋi ye si, “Ɔdzɛ, ege lɛ loso woebemi i?”

Ebu le onu si, “Befeke mɛ Ɔkaɛ sɛnɔ, lɛ méte niklɔ gi bɛzɛɛplɛ yɛ ɛ!” 14Lɛ gi ekyi i, amɔ Yesu gi ɔlɛɛ niklɔ ɔ; pɔ̀ ɔ́mɔ yɛ ogyesi si yɛ onu Yesu u. 15Yesu eʋi ye si, “Ɔdzɛ, ege lɛ loso woebemi i? nyaŋwɛ wɔsi wɔɛpɛ ɛ?”

Ɔdzɛɛ egyoedi si abɔ yɛ aʋa odidi onu, lɛ asi yɛ si, “Xe wɔ wofeke ye ɔsɛnɔ ɛ, Ɔka, si mɛ niklɔ gi wɔplɛ yɛ ɛ, atɔ mizeefeke ye.”

16Lɛ Yesu axwa yɛ si, “Maria!”

Ekyi aŋu mɛ akpɛ yɛ lɛ apani ní si Hebri se mɛ si, “Rabboni!” Gi lɛ ese linu si “Ɔdɔbasɛ yɛ ɛ.” 17Yesu asi yɛ si, “Wukísú ní mɛ su u, lɛ ese linu si maʋidzitrɛ ní Mɔka klɔ ɔ. Pɔ̀ trɛ ní mɛ benemi ba klɔ ɔ tɔ si ba si medzi itrɛ ní yɛ klɔ gi onu Mɔka ni ba Ɔka, mɛ Aya ni ba Aya.” 18Lɛ Maria Magdalene atrɛ lɛ azɛɛsi badɔkpasi ba si “Mamɔ Ɔkaɛ!” Lɛ asi ba liboe lɛ gi Yesu asi yɛ ɛ.

Yesu ebu isu abasi Yɛ badɔkpasi ba

19Lize Lipadzruwe le ɔlagɔ, gi badɔkpasi ba bɛkpɛ likpɔ ɔ, xe bɛda ipupo le kpɛ isu ya ɛ, ɔkpɛ gi bezeese Yudanɛ baka ba loso e. Yesu aba ɔlɛɛ ní ba kusi lɛ apani ba si, “Kusuyɔ ki mlɔ ɔ.” 20Agi apani ba pɔ́ ɛ, abasi ba yɛ kuwla mɛ ni yɛ opoga nɔ mɛ. Isami iku badɔkpasi ba koŋ gi bɛmɔ Ɔkaɛ ɛ.

21Yesu asi ba dzɛ si, “Kusuyɔ ki mlɔ, kiliɛ gi Kakaa Aya akpɛ mɛ ɛ, nite mɛɛkpɛ mlɔ.” 22Lɛ gi afuɛ abali ba aʋa ɛ, apani si, “Mlazi Ɔfuɛfuɛ Dradra lɔ. 23Xegi mlɛkɔ banima ba eboe zimizi na ɛkyɛ ba ɛ, Aya aakɔ̀ la kukyɛ ba; xe mlákɔ la akyɛ ba ɛ, bátrakɔ la ɛkyɛ ba.”

Yesu ebu isu ya abasi Toma

24Badɔkpasi Liɔfɔ ni tiaʋa ba mɛ tole Toma, gi bizɛxwa si tiaʋa obi ye e, óze bagɔgɔ ba kusi i, xe Yesu aba a. 25Lɛ badɔkpasi gɔgɔ ba bɛsi yɛ si, “Kwimɔ Ɔkaɛ!”

Toma asi ba si, “Xegi mámɔ kutakpagyeʋio bebikpo ʋa ní yɛ kuwla mɛ ɛ, xe mákpɛ mɛ kiwlaʋiɛ ní bamɛ ɛ, xe mákpɛ mɛ awla la ní yɛ opoga nɔ mɛ ɛ, mátrazi lɛ aʋa ɛɛŋa a.”

26Ogle tole kede, gi badɔkpasi ba bɛkpɛ likpɔ dzɛ ní ligba lɛ mɛ ɛ, xe Toma kyɛ eze ba kusi i. Gi bɛda ipupo le kyɛ ɛ, Yesu aba ɔlɛɛ ní ba kusi lɛ apani ba si, “Kusuyɔ ki mlɔ ɔ!” 27Lɛ Yesu asi Toma si, “Kɔ wɔ kiwlaʋiɛ kpɛ ní ya, tɔ di mɛ kuwlaa mɛ; tɔ nina wɔ awla la kpɛ ní mɛ opoga nɔ mɛ. Atɔ mɔni wɔ eɖikeke la tɔ ziŋa!”

28Toma ebu le onu aki Yesu si, “Mɛ Ɔkaɛ ni mɛ Aya!”

29Yesu asi yɛ si, “Gi wɔmɔ mɛ ɛ, dani wɔzi ŋa ɛ? Biakrira banama gi bámɔ ɔ, pɔ̀ xe bɛzi ŋa ɛ!”

30Ní yɛ badɔkpasi ba aŋu mɛ ɛ, Yesu abitɛ enugutseboe glegle dzedze gi báŋwlimi akpɛ ní keplekpaa lia ya mɛ ɛ. 31Pɔ̀ bɛŋwlimi la ya tɔ mlaakɔ la kuzi ŋa si Yesu yɛ onu Kristo ye, Aya Yebi ye, lɛ gani mlɔ kuziŋa ní yɛ linyi ne me e, mlamɔ ligbã́.

Currently Selected:

Yohan 20: avn

Highlight

Copy