Yohan 18

Yudanɛ ma bevu Yesu

1Agi Yesu axwa Aya ní eboa la su pɔ́ ɛ, yɛ ni yɛ badɔkpasi ba bɛsɛ lɛ bɛtsa Kidron onide no e. Olif ye lisekpɔ ɛtɔ lilɛɛ ní Kidron yɛ oge ʋla lɔ, lɛ Yesu ni yɛ badɔkpasi ba beti eku lɛ mɛ ɛ.

2Yuda gi yɛ akpɛ Yesu awla ɛ, ete niklɔ lɛ ese linu si lipoe glegle e, Yesu ni yɛ badɔkpasi ba bizɛɛtsa niklɔ. 3Lɛ Yuda atrɛ ní lisekpɔ lɛ mɛ, yɛ ni Roma banɛ bagutaatɔ ani banɔsumu batɔ gi kusumu yo baka ba ni Farisianɛ ma bɛkpɛ ni yɛ kude e; bevu bigutadɔ, kaní ʋa ani ibia.

4Yesu ete liboe kakaa gi litrába yɛ aʋa ɛ, lɛ loso edo atrɛ ɔtɔ nɔ lɛ eʋi ba si, “Nyaŋwɛ mlɛɛpɛ ɛ?”

5Bebu le onu si, “Yesu Nazaret ɔnɛɛ,” Yesu apani si, “Mɛ menu yɛ.” Yuda, gi yɛ akpɛ Yesu awla ɛ, alɛɛ niklɔ ni ba. 6Gi Yesu asi ba si i, “Mɛ menu yɛ ɛ,” bɛga kide kide lɛ begleʋe e.

7Lɛ Yesu eʋi ba dzɛ si, “Nyaŋwɛ mlɛɛpɛ ɛ?” bebu le onu si, “Yesu Nazaret ɔnɛɛ.”

8Lɛ Yesu apani si, “Masi mlɔ koko si Mɛ menu yɛ. Xegi mɛ mlɛɛpɛ ɛ, kɔlɔ mlaki tɔ mɛ badɔkpasi ba basɛ.” 9Apani nite tɔ liboe lɛ gi apani azanɔ ɔ si; “Ɔka, málila banɔaklɔ gi wɔ ki mɛ ɛ, bamɛ ɔtɔtɔ” Liaba lɛ mɛ.

10Ihɛ gblamadza eze ní Simon Petro su, etso ye bu ní liklui lɛ mɛ, aŋwia yɛ, lɛ ati kusumu yo ɔka ʋidi ye yɛ ɔnɔdzidzi ye yɛ kaŋaa kutukpaa ɛ. Ɔnɔdzidzi ye yɛ linyi ne lize Malxo.

11Yesu asi Petro si, “Dzini wɔ ihɛ gblamadza yɛ kpɛ ní yɛ liklui lɛ mɛ! Kigyo wogyodi si mátraŋwɛ kinìe kepliʋia lia gi Mɔka aki mɛ na a?”

Bɛmani Yesu ní Hana aŋu mɛ

12Lɛ Roma banɛ baguta ba ni ba ɔkaɛ kɔpɔni Yudanɛ banɔpe ba bevu Yesu lɛ bɛnya yɛ ɛ, 13lɛ ɔtɔpu klɔ gi bɛtsini yɛ ɛ, niklɔ eze Hana klɔ. Hana eze Kayafa yɛnà, lɛ Kayafa yɛ eze Kusumu yo Ɔka ʋidi ye ligɔɛ lɛ klɔ. 14Kayafa yɛ akpɛ kiɖaŋu yɛ aki Yudanɛ baka ba lipoetɔ lɛ zanɔ si, liapɛ xe ɔnɔ tole aatse ní banima petee litukpo o.

Petro anada si yete Yesu

15Simon Petro ni ɔdɔkpasi dzedze bekuni Yesu kude. Gi Kusumu yo Ɔka ʋidi ye ete ɔdɔkpasi liɛ klɔ mɔmɔmɔ loso e, ekuni Yesu kude etiku ní Kusumu yo Ɔka ʋidi ye yɛ kepea mɛ, 16pɔ̀ Petro kɔɔ awɔ kepea kevunu ya. Ɔdɔkpasi liɛ klɔ edzi atrɛ ní kepea kevunu ya nite si egu kunugu ni ɔdisamiɔ nɔ gi eepe kevunu ya, lɛ agbani Petro amani kepea mɛ ɛ.

17Ɔdisami nɔ ní kevunu ya eeʋi Petro si, “Aní ɔka liɛ ya yɛ badɔkpasi ba mɛ tole wonu i?” Petro ebu le onu si, “Owo, ménu ba mɛ ɔnɔ ɔ.”

18Kublɔ kwize lɛ loso baxwɛdzɛ ba ni banɔpe ba bɛkpɛ lifuha gi bɛlɛɛ ní lɛ su u, xe bɛzɛɛŋani i. Lɛ Petro eti apɔni ba xe azɛɛŋani kifu yɛ ɛ.

Kusumu yo ɔka ʋidi ye eʋi Yesu beʋiʋi

19Lɛ Kusumu yo Ɔka ʋidi ye eʋi Yesu beʋiʋi ní yɛ badɔkpasi ba ni yɛ bidɔbasɛbasɛ ʋɛ su i. 20Yesu ebu le onu si, “Mazɛɛpani aki banima petee gbawoo lipoe kakaa; mabitɛ mɛ bidɔbasɛbasɛ ʋɛ petee ní Itsaklɔ ni Lisɔligba lɛ mɛ, niklɔ gi banima pɔ́ bizɛɛkpɛ likpɔ ɛ, mápani liboeboe ní kikpokpo me e. 21Lɛ ege lɛ loso mleeʋi me beʋiʋi i? Mleʋi banama gi beenu mɛ liboe le e. Mleʋi ba liboe lɛ gi masi ba ɛ, bete liboe lɛ gi mapani i.”

22Agi Yesu apani nite e, banɔpe ba mɛ tole asa yɛ bidɔ ní aŋu na mɛ lɛ apani si, “Kude woli wɔmɔ xe wɔɛpani iki Kusumu yo Ɔka ʋidi e nite e?” 23Yesu ebu le onu aki yɛ si, “Xe mápani mumɔ ɛ, si ɔnɔ kakaa ní niya liboe lɛ gi mapani i. Pɔ̀ xe liboe lɛ gi mapani ligyɔ ɛ, ege lɛ loso wɔsa mɛ bidɔ mɛ ɛ?” 24Yesu edzì eze ní igbé ne me xe Hana aki si bɛkɔ yɛ tsisi Kayafa Kusumu yo Ɔka ʋidi ye klɔ ɔ.

Petro anada dzɛ si yete Yesu

25Gi Petro odzi ɔlɛɛ xe ɛɛŋani kifu yɛ ɛ, banɔ gɔgɔ ba beʋi ye si, “Wɔfɛ aní yɛ badɔkpasi ba mɛ tole wonu na a?” Pɔ̀ Petro ebu le onu lɛ anada si, “Owo, ménu ba mɛ tole e.”

26Kusumu yo Ɔka ʋidi ye yɛ ɔnɔdzidzi tole gi onu ɔŋanɛ ki ɔniliɛ gi yɛ kutukpaa Petro atsa ɛ, apani si, “Dani mamɔ wɔ ni yɛ ní lisekpɔ lɛ mɛ ɛ?” 27Petro apani dzɛ si, “Owo,” lipoe lɛ klɔ mɛ ɖii lɛ ologlo lo eme.

Yudanɛ ma bɛmani Yesu ní Pilato aŋu mɛ

28Bɛsɛ ni Yesu ni Kayafa kepea mɛ, livlɛ lɛ fififi ɛtsinɔ ní Roma ɔnɛ kesea ɔʋadi ye yɛ kepea mɛ. Yudanɛ baka ba bétieku kekusipea mɛ, lɛ ese linu si bápɛ si belulù isu, tɔ biatani Kutseolidɔzawe le kuŋa. 29Lɛ loso, Pilato azɛɛtsani ba lɛ eʋi ba si, “Eboe woli mlɛkɔ ní onyime liɛ ya su u?” 30Bebu le onu si, “Kútramani yɛ ní wɔkɔ ɔ, xe ɔ́bitɛ liboe zimizi i.”

31Pilato asi ba si, “Kɔlɔ mlɔ ɔtutɔ mlatsini yɛ tɔ mlaxwa litsi ni yɛ ní mlɔ ɔsã nɔ onu.” Bebu le onu si,

“Kúmɔ Kude si kuye ɔnɔnɔ ɔ.” 32Lɛ ya liba lɛ mɛ tɔ eboa la gi Yesu apani ní yɛ Kutseo liɔ ɔ, gi atrátse su i, aba la mɛ. 33Pilato edzì atrɛ ní kekusipea mɛ lɛ axwa Yesu u, xe eʋi ye si i, “Wɔ wonu Yudanɛ ma Okusi ye na a?”

34Yesu ebu le onu si, “Kuʋiʋi kuliɔ ya ɛ, wɔkɔ kwidɔ loo banɔ bɛpani mɛ su i si wɔ na a?”

35Pilato eʋi ye si, “Kigyo wogyodi si Yuda ɔnɛ menu na a? Wɔ ɔtutɔ wɔ akɔanɛ ma ni Kusumu yo baka ba ba bɛkɔ wɔ ɛmani mɛ. Ege kɛ wɔ bitɛ ɛ?” 36Yesu apani si, “Mɛ Kaʋaŋaa kádɔ kelea lia mɛ ɛ; atɛsi mɛ kaʋaŋaa kɛdɔ kelea lia ya mɛ ɛ, nya mɛ besumubi ba biaŋwlɛ mɛ litukpo tɔ Yudanɛ ma baki vu me e. Pɔ̀ abla ɛ, mɛ kaʋaŋaa kɛdɔ ɔkɔ dzedze!”

37Lɛ Pilato eʋi Yesu si, “Kɔlɔ okusi wo nu na a?”

Yesu ebu le onu si, “Wɔ wɔpani si menu okusi. Liboe tile loso bɛpɔ mɛ xe maba kelea mɛ ɛ, lɛ linu si tɔ mipani ní anukwarɛɛ su. Ɔnɔ kakaa gi onu anukwarɛɛ ɔnɛ ɛ izɛɛta mɛ liboe le kutu.” 38Lɛ Pilato eʋi Yesu si, “Ege kinu anukwarɛ ɛ?” Lɛ Pilato edzì atrɛ ní oŋwe no ní Yudanɛ ma klɔ lɛ asi ba si, “Mámɔ kesetata tɔtɔ gi maakɔ obu yɛ lipɔ ɔ.

39“Pɔ̀ ni ɔkɔ ɔlɔ̀ gi ɔlɛ ní mlɔ awla onu i, Mizɛɛyurɔ ɔnɔ tole gi bɛkpɛ ligba ɛki mlɔ ní kutseolidɔzawe le aʋa a. Lɛ loso mlɛpɛ si miyurɔ ‘Yudanɛ ma Okusi ye ɔki mlɔ na a’?” 40Bebu le onu ni ozi si, “Owo, aní yɛ ɛ! Kwipɛ Baraba!” Baraba liɛ eze odètsa.

Currently Selected:

Yohan 18: avn

Highlight

Copy