Tic Okwena 2
2
Bino a Cuny Acil
1 #
Olev. 23.15-21; Lodo 16.9-11 Ka nino me Pentekote doŋ otuno, onwoŋo gin luŋ rik ocokere karacel i kabedo acel. 2Cucuttono ginnoro owinyere ame ya i polo kun mor bino bala yamo akodo kede teko, te poŋ yi ot ducu, kan ame onwoŋo gin rik obedo iye. 3Cite gin a cal leb mac ame okaro apol onen baŋgi, te tyer, poto i kom dano acel acel i akinagi. 4Cuny Acil rik te poŋ yigi luŋ, gin te cako dumo leb ocele apapat, acalo Cuny Acil omiogi teko me kobo.
5I Jerucalem rik onwoŋo bedo iye Ojudaya, jo a woro Obaŋa ame oya i rok luŋ a tye i te polo. 6Kare ame ŋur man owinyere, lwak apol ocokere karacel, wigi koŋ te cuŋ oko, pien dano acel acel i akinagi owinyogi akobo leb me turgi. 7Omio gin te wuro atek meicel kun okobo ni, “Jonu ducu a kop-pu mom gin Ogalilaya? 8Kara piŋo wan ducu, ŋat acel acel tye awinyo kop i leb ame onywale iye? 9Wan jo Parti, jo Medi, jo Elam, kede wan jo ame obedo i Mecopotamia kede i Judaya kede Kapadokia, Ponto kede Acia. 10Purugia kede Pampulia, Miciri kede dul lobo me Libia ame otemere kede Kurene, kede wan wele ame oya i Roma, Ojudaya kede jo olokere i dini Ojudaya, 11jo Kurete kede jo Arab, wan doŋ owinyogi orabo kop i lebwa ikome pi tic adoŋo ame Obaŋa otio.” 12Gin ducu owuro, tamgi te tum oko, ote penyere kengi kengi ni, “Kara man te koppere ŋo?” 13Ento mogo te cayo acaa kun okobo ni, “Jo-nu omer amera i koŋo alim.”
Kop ame Petero orabo i kare me Pentekote
14Cite Petero ocuŋ karacel kede jo apar wie acel, te olakino kun kobbigi ni, “Wun jo me Judaya, kede wun jo ducu a bedo i Jerucalem, cik yitwu i koppa, atye i kop ame amito iŋe wunu. 15Jo-ni ba, mom omer kit ame itamo wunu kede, pien caa me iceŋ pwod adek keken; 16ento man en gin a rik adwarpiny Joel okobo pire ni,
17 #
Joel 2.28-32 ‘Man gin ame bino timere i kare me agikki, Obaŋa ame okobo,
abino onyo Cunya i kom jo luŋ,
Otinowu awobe kede anyira bino doko odwarpiny,
awobewu adoŋo bino neno anyut,
jowu oteggo bino leko lek.
18I kare-nono abino onyo Cunya i kom omiro mera a co kede a mon,
gin te doko odwarpiny.
19Daŋ abino nyuto taŋo malo i polo,
kede miyo anyuttogo piny i wi lobo,
remo kede mac kede ikuna a duny bala yito.
20A mom ru nino a Rwot obino,
nino adwoŋ a nen kannaler,
ceŋ bino cido acol icuc,
dwe bino lokere doko remo.
21Dok daŋ jo luŋ ame bino lwoŋo
nyiŋ Rwot obino larogi.’
22“Wun jo Icrael winy wunu koppa: Yecu me Najaret onwoŋo en dano ame Obaŋa onyuto baŋwu kun moke kede tic atek adoŋo kede taŋo kede anyuttogo ame Obaŋa otio i akinawu kede ciŋe, acalo iŋeo wunu. 23#Mat. 27.35; Mar. 15.24; Luk. 23.33; Lak. 19.18Yecu-ni rik jo obin omie baŋwu, kun lubo yik a rik Obaŋa oyiko dok oŋeo con, wun ite gure wunu i kom yataria kun ineke wunu kede ciŋ jo a kwia cik Obaŋa. 24#Mat. 28.5-6; Mar. 16.6; Luk. 24.5Cite Obaŋa doŋ ocere oko, kun ogonye oko i rem me to, pien onwoŋo to mom twero make bedo abuccere. 25#Jab. 16.8-11 Pien Daudi rik okobo kop i kome ni,
‘Kare luŋ yam abedo neno Rwot i nyima,
pien en tye i laŋeta tun cem me kur atagere;
26Ennono omio cunya yom, leba daŋ te lelo;
anaka koma daŋ bino bedo kede gen.
27Pien mom ibino weko tipona ata i Kadec,
kadi miyo kom Dano meri Acil top.
28Imia aŋeo yo me kwo;
i nyimi abino lelo meicel.’
29“Doŋ ba, wun omegona, atwero kobbiwu kannaler ni kwarowa Daudi rik oto, ote daŋ yiko, wi lyellere tye baŋwa anaka onyoni. 30#Jab. 132.11; 2 Cam. 7.12-13Pien onwoŋo rik en adwarpiny; kun en oŋeo ni, Obaŋa yam okwonŋe kwoŋ ni ebino to akware moro i wi kom me loccere, 31omio ogeo neno cer a Kricito con, okobo kop i kome ni, mom oweke ata i Kadec, anaka kome daŋ pe otop. 32Yecu-nono Obaŋa otyeko cero oko wan-ni luŋ ocaden me koppono. 33Ka doŋ otyeko tuŋe malo i kabedo me kwogo i laŋet Obaŋa tuŋ cem, daŋ te gamo Cuny Acil a yam Obaŋa Papo ociko pire, en doŋ te onyo gin ame wun ikomwu ineno wunu dok iwinyo wunu. 34#Jab. 110.1Pien Oaudi gire mom oyito i wi polo; ento en ikome okobo ni,
‘Rwot okobbi Rwotta ni, Bed i laŋeta tuŋ cem i kabedo me kwogo,
35ituno ka abino miyo okwori doko aten tyeni.’
36Doŋ ba, doggola me Icrael myero ŋe ni, Yecu-nono ame iguro wunu i kom yataria, Obaŋa doŋ oloke odoko Rwot kede Kricito.”
37A doŋ gin owinyo mannono, cunygi te ŋeŋema, ote kobbi Petero kede okwena ocele ni, “Omegowa, kara otim ŋo?” 38Petero te gamo doggi ni, “Iŋut wunu, eka dano acel acel i akinawu te batakino i nyiŋ Yecu Kricito me wek balwu, ote miyowu mot man me Cuny Acil. 39Pien rik ociko pirwu, kede pi itinowu kede pi jo ducu ame tye kananbor ame Obaŋa bino lwoŋogi baŋe.” 40Otito i yore ocele apol, kun cuko cunygi kobo ni, “Larre wunu i lwagi jo ogom me kare man.” 41Jo oye koppere ote batijagi; i nino-nono jo te medde tutumia adek. 42Gin te bedo keto cunygi i pwony okwena, kede i notte karacel, i nyilo ogati, kede i kwayo Obaŋa.
Kite a jo ame oye Yecu
43Jo ducu obedo kede lworo, okwena otio taŋo kede anyuttogo apol. 44#Tic 4.32-35Jo luŋ ame oye Yecu ocokere karacel, onoto jamigi karacel. 45Ote cato limgi kede jami ame owoŋo tye baŋgi, gin ote poko kun dano acel acel gamo acalo mittere tye. 46Nino luŋ gin bedo karacel kede cuny acel i ot Obaŋa, onyinyilo ogati i paccigi, daŋ ocamo cemgi kede lelo a cunygi ler, 47kun opako Obaŋa, jo luŋ pwoogi. Didik Rwot obedo medo baŋgi jo ame olarre.
Currently Selected:
Tic Okwena 2: Lango
Highlight
Share
Copy
Want to have your highlights saved across all your devices? Sign up or sign in
Lango Bible © United Bible Societies, 1978, 2019.