Zefaniya 3
3
Kwananga na kuthaskika kwa Yerusalemu
1Soka kwa msumba wa chigaruka na wakukazuzgika,
msumba uwo ukunyekezga ŵanthu.
2Msumba uwu ukupulikira mazgu gha nchenjezgo chara,
nesi kulorako kuchenyeka.
Ukugomezga mwa Fumu chara,
nesi kufumba wovwiri kwa Chiuta wakhe.
3Ŵarongozgi ŵakhe mukati mwakhe
ŵali nga ndi nkharamu zakuwuruma.
Ŵeruzgi ŵakhe ŵali nga mphumphi ku na mise,
izo zikusidako kalikose chara kakurya na mulenje.
4 Nchimi zakhe mbanthu ŵakupuruska,
ŵambula kupwererako.
Ŵasofi ŵakhe ŵakukazuzga icho nchakupatulika,
ŵakuswa dango kwambula soni.
5 Fumu yikuchita urunji mu msumba ura,
kuti yikuchita uheni chara.
Zuŵa lirilose yikurongora weruzgi wakunyoroka,
kuŵala kwa dazi kulikose
kuti yikutondekapo chara.
Kweni ŵakubendera ŵakuchita soni chara.
6 Fumu yikuti,
“Ndamara petu mafuko gha ŵanthu,
ndawiskira pasi malinga ghawo.
Ŵagurwe ŵa misumba ghazgoka mapopa,
ntheura palije na yumoza wakwendamo.
Misumba yawo yazgoka kuŵa mayiyi,
yilije munthu na yumoza wakukharamo.
7Nkhati, ‘Nadi ŵati ŵandichindike,
ŵati ŵapokerere mazgu gha kuchenya kwane.’
Kuŵenge ntheura,
mphanyi msumba wawo ndawulanga chara
nesi kuwuparanya.
Kweni ŵanthu ŵanweka nga mpha kudanga
kuchita mauheni ghakupambanapambana”.
8 Fumu yikuti, “Ndilindizgani,
lindizgani zuŵa ilo ndamkuwuka kuŵa kaboni.
Pakuti ndadumula kuwunjika mafuko gha ŵanthu,
kweniso kuwunganya pamoza maufumu,
kuti ndipungulire ukari wane pa iwo,
kutukutwa kwa ukari wose.
Mu moto wa ukari wa sanje yane,
charu chose cha pasi chamkuphya.”
9Inya, pa nyengo iyo ndamkuphotora kayowoyero ka ŵanthu
kuti kaŵe kaweme,
mwakuti wose ŵasopenge mu zina la Fumu,
na kuyiteŵetera na mtima umoza.
10Kufuma ku sirya kwa mironga ya charu cha Etiyopiya
awo ŵakundisopa ine,
mukati mwa awo ŵali kumbininikira kosekose
ŵizenge na vyakupereka kwa ine.
11Pa nyengo yira mwamkukhozgeka soni chara,
chifukwa cha milimo ya uchigaruka uwo mukandichitira ine.
Pakuti ndamkuwuskamo mukati mwinu ŵakujikuzga,
ndipo mwamkuŵaso ŵakujitukumura chara
mu phiri lane lakupatulika.
12Kweni ndamkuŵasida mukati mwinu
ŵanthu awo mbakuzika na ŵakujiyuyura.
Iwo ŵamkupenja chakuphokweramo mwa Fumu.
13ŴaIsraele awo ŵamkukharako
ŵachitengeso uheni chara,
panji nesi kuyowoya utesi,
nesi milomo yawo kuyowoya yiryarya.
Pakuti ŵaryenge na kugona pasi,
kulije na yumoza uyo wizamkuŵawofya.#Uvu 14.5
Sumu ya chimwemwe
14Yimbani mwakukwezga mwa ŵanthu ŵa ku Ziyoni,
chemerezgani, imwe mwa ŵaIsraele!
Kondwani na kusekerera na mtima winu wose,
imwe mwa ŵanthu ŵa mu Yerusalemu!
15 Fumu yareka kumulangani,
ŵarwani ŵinu ya ŵaponya kuwaro.
Karonga wa Israele, uyo ndi Fumu wali mukati mwinu.
Ntheura mopengeso kaheni chara.
16Pa nyengo yira kwamkuyowoyeka kwa Yerusalemu kuti,
“Ungopanga iwe Ziyoni,
ungathikanga lusoko chara.
17 Fumu, Chiuta wako wamkuŵa mukati mwako,
nga nchinkhara chakukutondera.
Yamkusekerera chifukwa cha iwe na kukondwa,
yamkukhara chete chifukwa cha kutemwa kwakhe.
Yamkumwemweterera na nchemo ya chimwemwe chifukwa cha iwe”.
18“Nga ndi pa zuŵa la chiphikiro,
Ndamkuwuskapo soka pa iwe,
mwakuti ureke kulengeskeka nalo.
19Wonani, pa nyengo iyo ndamkuchita nawo kanthu
wose awo ŵakamunyekezganinge.
Ndipo ndamkuŵathaska ŵakupendera,
na kuwunganya ŵakuparanyika,
ndipo ndizgorenge soni zawo kuŵa marumbo
na lumbiri lwa kutandazgika pa charu chose cha pasi.
20Pa nyengo yira ndamkumuwezgerani ku kwinu,
penepapo ndamkumuwunganyani pamoza.
Nadi, ndamkumuzgorani ŵakumanyikwa na ŵakurumbika
mukati mu ŵanthu wose ŵa pa charu cha pasi,
Para ndamkumuwezgerani usambazi winu
pakufuma ku umikori
mwamkuwuwona.”
Ntheura ndimo yikuyowoyera Fumu.
Currently Selected:
Zefaniya 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
