Zakariya 14
14
Yerusalemu na mafuko gha ŵanthu
1Wonani zuŵa la Fumu likwiza, apo ivyo ŵakumuskogha kwa imwe, ŵamkugaŵana panthazi pinu. 2Pakuti ndamkuwunganya mafuko ghose kurwa nkhondo na Yerusalemu. Msumba wizamkutoreka, nyumba nazo zizamkuskogheka ndipo ŵanakazi ŵizamkukoreka na nkhongono. Chigaŵa chimoza mu viŵiri cha ŵanthu mu msumba ŵamkuyorekera ku umikori, kweni awo ŵakukharako, ŵamkuŵa mwenemura mu msumba. 3Penepapo Fumu yamkwiza na kurwa nawo mafuko ghara nga ndi umo yikarweranga kale. 4Pa zuŵa lenelira malundi ghakhe ghamkwima pa Phiri la maOlive, leneilo liri pafupi na Yerusalemu, ku mafumiro gha dazi. Phiri la maOlive lamkugaŵika paŵirina dambo lisani ilo lamkufuma ku mafumiro gha dazi kuya ku manjiliro gha dazi. Ntheura chigaŵa chimoza cha phiri chamkusezgekera ku mpoto, ndipo chigaŵa chinyakhe ku mwera. 5Dambo ili lamkufika ku Azele. Imwe mwamkuchimbira nga ndi umo mukachitira pakuchimbira ku chindindindi mu mazuŵa gha Uziya karonga wa charu cha Yuda. Penepapo Fumu, Chiuta wane wamkwiza pamoza na ŵangelo wose.
6Pa zuŵa lenelira kwamkuŵako chara kuŵala, kuzizima panji chiwuvi. 7Kwamkuŵara zuŵa nyengo zose. Kwamkuŵavye muhanya na usiku. Pa nyengo ya kuchitikira ichi, Fumu pera ndiyo yikumanya.
8Pa zuŵa lenelira maji ghamoyo ghamkwenda kufuma ku Yerusalemu, hafu wa maji ghara wamkurazga ku nyanja ya ku mafumiro gha dazi, ndipo hafu munyakhe wamkurazga ku nyanja ya ku manjiliro gha dazi. Ndiposo maji ghara ghamkurutilira kwenda ntheura chihanya na chifuku.#Eze 47.1; Yoh 7.38; Uvu 22.1 9Penepapo Fumu yamkuŵa karonga wa ŵakaronga wa pa charu chose cha pasi. Pa zuŵa lenelira Fumu yamkuŵa yimoza pera na kumanyikwa na zina limoza pera.
10Charu chose chamkuzgoka kuŵa dambo kufuma ku msumba wa Geba kuya kafika ku msumba wa Rimoni, ku mwera kwa Yerusalemu. Kweni Yerusalemu wamkukhalirira wakutumphuka pa malo ghakhe, kufuma pa chipata cha Benjamini na kuya kafika ku chipata chakudanga, ndiposo na kuya kafika ku chipata cha pa chingodya, ndipo kufuma pa Chigongwe cha Hananele na kuya kafika ku vyakukamiramo vinyo vya karonga. 11Mu Yerusalemu mwamkukhara ŵanthu, pakuti kwamkuŵaso pharaniko chara. Wose ŵamkukhara mu kufwasa.#Uvu 22.3
12Ndipo chilengo chakofya icho Fumu yamkuŵika pa mafuko ghose, icho chikurwa nkhondo na Yerusalemu ndi ichi: Mathupi ghamkuvunda uku ŵachali ŵamoyo, maso ghawo nagho ghamkuvunda mu vinkhofyera vyawo, malulimi ghawo nagho ghamkuvunda mu milomo yawo. 13Pa zuŵa lenelira, Fumu yamkuŵapa chofyo chikuru, ndipo munthu yose wamkukora munyakhe na kumutimba. 14Nanga ndi ŵaYuda ŵamkurwa nkhondo na ŵa mu Yerusalemu, ndipo ŵa mu Yerusalemu ŵamkuwunjika usambazi wose, golide, siliva na vyakuvwara vinandinandi vya ŵamitundu awo ŵakuŵazingirizga. 15Ndipo nthenda yakofya iyo yikukora ŵanthu, yamkukora mahachi, nyumbu, ngamila, mbunda ndiposo na pa vyakuŵeta vyose ivyo vili mu misasa ya ŵarwani.
16Ntheura mu mafuko ghose agho ghakurwa nkhondo na Yerusalemu ghose agho ghakharako ghakwerenge ku Yerusalemu chirimika na chirimika kukasopa Fumu Mwenenkhongono zose nga ndi karonga, na kusunga chiphikiro cha misasa.#Lev 23.39-43 17Ndipo usange mafuko ghanji pano pa charu ghakureka kukwerera ku Yerusalemu kuya kasopa Fumu Mwenenkhongono zose nga karonga, vura yamkurokwa pa chigaŵa chawo chara. 18Usange ŵaEguputo ŵakureka kuruta ku Yerusalemu kuya kajirongora, yizamkuŵawira nthenda yakofya yeneiyo Fumu yikulangira ŵamitundu awo ŵakureka kusunga chiphikiro cha misasa. 19Ichi ndicho chamkuŵa chilango cha ŵaEguputo na cha ŵamitundu yose iyo yikureka kusunga chiphikiro cha misasa.
20Ndipo pa zuŵa lenelira pamkulembeka pa tumabelo twa mahachi kuti, “Njakupatulikira Fumu.” Viŵiya vya mu Nyumba ya Fumu vyamkuŵa vyakupatulika nga mbadira panthazi pa jochero. 21Ndipo chiŵiya chose mu Yerusalemu na mu charu cha Yuda chamkuŵa chakupatulikira Fumu Mwenenkhongono zose, mwakuti wose awo ŵakupereka sembe ŵize na kuvitora kuti ŵaphikiremo nyama ya sembe. Ndipo pa zuŵa lenelira, kwamkuŵaso chara uyo wakuchita malonda mu Nyumba ya Chiuta Yankhongono zose.
Currently Selected:
Zakariya 14: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
