Obadiya 1
1
1Iyi ndi mboniwoni ya Obadiya.
Fumu yizamkulanga Edomu
Fumu Chiuta wakuti za Edomu:
Tapulika uthenga kufuma kwa Fumu,
ndipo thumi yatumika ku ŵamitundu kukayowoya kuti,
“Wukani! Tiyeni tirwe nkhondo
na charu cha Edomu!”#Yes 34.5-17, 63.1-6; Yer 49.7-22; Eze 25.12-14, 35.1-15; Amo 1.11-12; Mal 1.2-5
2 Fumu yikuti,
“Nditi ndikuzgore kuŵa muchoko mukati mu ŵamitundu,
uti uŵe wakuyuyurika chomene.
3Kujikuzga kwako kwakupusika,
wamweneiwe ukukhara mu zimphanji za jarawe,
wamweneiwe malo ghako ghakukharamo ghali pachanya.
Iwe ukuti mu mtima wako,
‘Kasi ndi njani uyo wangandikhizgira pasi?’
4Nanga uwuruke kuchanya nga ndi nombo,
nanga chivimbo chako chiŵe pakati pa nyenyezi,
ndipouli nditi ndikuwiskire pasi kufuma kwenekura.
Ntheura ndimo yikuyowoyera Fumu.
5Usange ŵankhungu ŵangiza kwa iwe,
usange ŵaskoghi ŵangiza na usiku,
kasi kupasuka kwako kungaŵa uli!
Asi ŵangiba ivyo ŵangakhumba pera?
Usange awo ŵakuponthora mpheska ŵangiza kwa iwe,
asi ŵangarekapo vinyakhe vyakuvulura?
6Kweni wona umo Esau waskoghekera,
vyuma vyakhe vyakubisika ŵavipenjapenja!
7Wose awo ŵali pa wenenawene na iwe ŵakupusika,
ŵakuchimbizga iwe kuya kafika ku mphaka.
Awo ŵakaŵa na mutende na iwe ŵakuthereska,
ŵabwezi ŵako awo ukurya pamoza nawo ŵakuthyera chipingo.
Kweni ichi, iwe kuti ukuchimanya chara.”
8 Fumu yikuti,
“Kasi pa zuŵa lenelira, ndingaya kareka,
kuŵamara ŵavinjeru ŵa mu Edomu,
na umanyi mu ŵanthu ŵa ku Phiri la Esau?
9Vinkhara vyako, We Temani,
vyamkuthika lusoko,
mwakuti musilikari waliyose kufuma mu Phiri la Esau,
wamkukomeka.
Vifukwa vyakulangika kwa Edomu
10Chifukwa cha nkhaza izo ukamuchitira Yakhobe mwana munyako,
soni zamkukukora,
ndipo wamkumara kwa muyirayira.
11Pa zuŵa lira iwe ukimilira waka pa mphepete,
pa zuŵa ilo ŵalendo ŵakaskoghanga katundu wakhe,
para ŵakupanjwa ŵakanjiranga mu vipata vyakhe,
na kumuchitira mphenduzgo Yerusalemu,
iwe ukaŵa nga yumoza wa iwo.
12Kweni iwe mphanyi ukasekerera chara,
pa zuŵa la soka la mwana munyako.
Mphanyi ukakondwera chara
pa ŵanthu ŵa charu cha Yuda,
pa zuŵa la kuparanyika kwawo.
Mphanyi ukajikuzgirapo chara,
pa zuŵa lawo la soka.
13Mphanyi ukareka kunjira pa chipata cha ŵanthu ŵane,
pa zuŵa lawo la soka.
Mphanyi ukasekerera chara,
pa zuŵa lawo la soka.
Mphanyi ukaskogha katundu wawo chara,
pa zuŵa la soka lawo.
14Mphanyi ukimilira pa nthowa zakupatukana chara,
mwakuti ukome awo ŵakachimbira.
Mphanyi ukaŵapereka chara awo ŵakaphokwa ku ŵarwani,
pa zuŵa la suzgo.”
Zuŵa la Fumu lakweruzgira charu
15“Pakuti zuŵa la Fumu laneng'enera,
pa ŵamitundu yose.
Umo iwe wachitira, ndimo kwamkuchitikira kwa iwe,
milimo yako yamkuwerera kwa iwe wekha.
16Umo ŵanthu ŵane ŵamwera nkhombo ya visuzgo,
pa phiri lane lakupatulika,
ndimo ŵamkumwera ŵamitundu wose
awo ŵakumuzingirizgani.
Ŵamkumwa na kupenthyapenthya,
ndipo ŵamkuŵa nga ndi para ŵakaŵako na kale chara.
ŴaIsraele ŵakuthereska ŵarwani ŵawo
17Kweni mu Phiri la Ziyoni, ŵamkuŵamo awo ŵamkupona,
ndipo lamkuŵa lakupatulika.
Penepapo ŵa fuko la Yakhobe,
ŵamkuŵa na charu icho nchawo na chawo.
18Ŵa fuko la Yakhobe ŵamkuŵa nga ndi moto,
ŵa fuko la Yosefe nga ndi dimi la moto,
ndipo ŵa fuko la Esau nga ndi maphekese.
Ŵa fuko la Esau ŵamkocheka na kumara petu,
ndipo kwamkuŵavye na yumoza wakuponapo wa fuko la Esau.
Ntheura ndimo yikuyowoyera Fumu.”
19“ŴaYuda ŵa ku mwera ŵamkuhara Phiri la Esau,
ndipo ŵa ku manjiliro gha dazi ŵamkuhara charu cha ŵaFilisiti.
Iwo ŵamkuhara charu cha Efurayimu na Samariya,
ndipo ŵa fuko la Benjamini ŵamkuhara Gileyadi.
20ŴaIsraele awo ŵali ku umikori, ku Hala,
ŵamkuhara charu cha Kanani mpaka ku Zarefati.
Ŵamikori kufuma mu Yerusalemu awo ŵali mu Sefaradi,
ŵamkuhara misumba ya ku mwera mu charu cha Yuda.
21Ŵakuthaska ŵamkukwera Phiri la Ziyoni,
kuya kawusa Phiri la Esau.
Fumu ndiyo yamkuŵawusa.”
Currently Selected:
Obadiya 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
