Mariko 15

Yesu panthazi pa Pilato

(Mat 27.1-2, 11-14; Luk 23.1-5; Yoh 18.28-38)

1Kukati kwacha waka, ŵasofi ŵarara pamoza na ŵarara ŵa ŵaYuda na ŵamanyi-marango, ndiposo na ŵanyakheso ŵa mphara yose ya ŵaYuda ŵakaŵa na ungano. Ŵakati ŵamukaka Yesu, ŵakaruta nayo na kumupereka kwa Pilato. 2Pilato wakamufumba Yesu wakati, “Kasi ndiwe Karonga wa ŵaYuda?”

Yesu wakamuzgora wakati, “Ndimwe mwayowoya.”

3Ŵasofi ŵarara ŵakamupacha Yesu mu vinthu vinandi. 4Ntheura Pilato wakamufumbaso Yesu wakati, “Kasi ukuzgora kanthu chara? Wona vinandi ivyo ŵakukupacha navyo!”

5Kweni Yesu kuti wakazgora kanthu chara, mwakuti Pilato wakazizwa.

Pilato wakudumula kuti Yesu wakomeke

(Mat 27.15-26; Luk 23.13-25; Yoh 18.38—19.16)

6Pa nyengo ya chiphikiro cha Paska, Pilato wakazgoŵera kuŵasutulira mukayidi yumoza mweneuyo ŵanthu ŵakaromba kwa iyo. 7Wakaŵamo munthu mu gadi zina lakhe Baraba uyo ŵakakakika pamoza na vigeŵenga ivyo vikathiska ndopa mu chigaruka chawo. 8Mzinda wa ŵanthu ukakwerera kwa Pilato ndipo ŵakamuromba kuti waŵachitire icho wakazgoŵera kuŵachitira mazuŵa ghose. 9Pilato wakafumba wakati, “Kasi mukukhumba kuti ndimusutulirani Karonga wa ŵaYuda?” 10Pakuti wakamanya kuti ŵasofi ŵarara ŵakamupereka Yesu chifukwa cha bina.

11Ŵasofi ŵarara ŵakakhuŵirizga mzinda wa ŵanthu kuti Pilato waŵasutulire Baraba. 12Pilato wakafumba wakati, “Kasi nditi nayo uli munthu uyo mukuti ndi Karonga wa ŵaYuda?”

13Pakuzgora ŵanthu ŵara ŵakachemerezga ŵakati, “Mupayika pa mphinjika!”

14Penepapo Pilato wakaŵafumba wakati, “Chifukwa? Wanangachi?”

Ndipo ŵakachemerezga kwakuruska ŵakati, “Mupayika pa mphinjika!”

15Ntheura Pilato, pakukhumba kukondweska mzinda wa ŵanthu wakaŵasutulira Baraba, ndipo wakati wamuthyapula Yesu, wakamupereka kwa iwo kuti ŵamupayike pa mphinjika.

Ŵasilikari ŵakumugoska Yesu

(Mat 27.27-31; Yoh 19.2-3)

16Ndipo ŵasilikari ŵakaruta nayo Yesu mukati mu nyumba ya mukuru wa chigaŵa, yeneiyo ndi nyumba ya weruzgi, ndipo ŵakawunganya pamoza chiwuru chose cha ŵa nkhondo. 17Ŵakamuvwarika munjilira uswesi na kuruka mphumphu ya minga, iyo ŵakamuvwarika pa mutu. 18Ndipo ŵakamba kumutauzga ŵakati, “Muwonire Karonga wa ŵaYuda!” 19Ŵakamutimba pa mutu na thete na kumufunyira mata, ŵakajikama na kumulambira. 20Ŵakati ŵamugoska ŵakamuvura munjilira uswesi ura na kumuvwarikaso vyakuvwara vyakhe. Ndipo ŵakamutora na kuruta nayo kuya kamupayika pa mphinjika.

Yesu wakupayikika pa mphinjika

(Mat 27.32-44; Luk 23.26-43; Yoh 19.17-27)

21Munthu wa ku Kurene zina lakhe Simoni wiske wa Alekizandara na Rufu, wakajumphanga mu nthowa kufuma ku munda. Ŵasilikari ŵakamuchichizga kuyegha mphinjika ya Yesu.#Rom 16.13 22Sono ŵasilikari ŵakiza nayo Yesu pa malo agho ghakuchemeka Gologota gheneagho ghakung'anamula kuti, “Malo gha Bwaza.” 23Ŵakamupa vinyo lakusazgikana na mure, kweni wakakana kumwa. 24Ndipo ŵakamupayika na kugaŵana vyakuvwara vyakhe pakuchita mphenduzgo mwakuti ŵasange icho waliyose wangatora.#Mas 22.18 25Yikaŵa nyengo ya 9 koloko apo ŵakamupayikiranga pa mphinjika. 26Ndipo malembo gha mrandu uwo ŵakamupacha nawo ghakaŵazgikanga ntheura, “Karonga wa ŵaYuda.” 27Pamoza nayo ŵakapayika pa mphinjika vigeŵenga viŵiri, yumoza ku maryero yumoza ku mazere. [28Ntheura Malembo ghakafiskika agho ghakuti, “Wakapendekera pamoza na vigeŵenga.”]#Yes 53.12

29Ŵanthu awo ŵakajumphangapo ŵakamutuka, ŵakapukunya mitu yawo na kuyowoya kuti, “Eya! Iwe ukatenge ukumanya kudilimura Nyumba ya Chiuta na kuyizengaso mu mazuŵa ghatatu.#Mas 22.7, 109.25; Mrk 14.58; Yoh 2.19 30Ujiponoske wekha, khira sono pa mphinjika!”

31Ntheura pera ŵasofi ŵarara na ŵamanyi-marango ŵakamugoska na kuyowoyeskana ŵakati, “Wakaponoskanga ŵanyakhe, kweni walije kumanya kujiponoska yekha! 32Rekani Mesiya uyu, Karonga wa Israele, wikhe sono pa mphinjika kuti tiwone na kupulikana.”

Awo ŵakapayikika nayo pamoza nawo ŵakamutombozganga.

Nyifwa ya Yesu

(Mat 27.45-56; Luk 23.44-49; Yoh 19.28-30)

33Ndipo pa nyengo ya 12 koloko, chisi chikaŵa mu charu chose kufikira pa nyengo ya 3 koloko. 34Pa nyengo ya 3 koloko, Yesu ŵakachemerezga na mazgu ghakuru wakati, “Eloi, Eloi, lamasabakatani?” Ilo likung'anamula kuti, Chiuta wane, “Chiuta wane, kasi mwandisidirachi?”#Mas 22.1

35Ŵanji awo ŵakimilira pafupi ŵakati ŵapulika mazgu agha, ŵakati, “Tegherezgani, wakuchema Eliya.” 36Yumoza ŵakachimbira, wakaya katora sipanje na kubizga mu vinyo la kusasa, wakaŵika ku thete, wakamupa Yesu kuti wamwe, na kuti, “Rekani danga! Tiwone usange Eliya wati wize, kwiza kamukhizga pa mphinjika!”#Mas 69.21

37Sono wakati wachemerezga na mazgu ghakuru, wakafwa.

38Ndipo chisalu chakuchinga mu Nyumba ya Chiuta chikaparuka pakati kufuma pachanya mpaka pasi.#Kuf 26.31-33 39Para murara wa ŵankhondo uyo wakimilira panthazi pa Yesu, wakati wawona umo Yesu wakafwira wakati, “Nadidi munthu uyu wakaŵa Mwana wa Chiuta!”

40Ŵanakazi ŵanji ŵakaŵapo, awo ŵakalaŵiriranga kufuma patali. Mukati mwawo mukaŵa Mariya wa ku chigaŵa cha Magadala, Mariya nyina wa Yakhobe muchoko, Mariya nyina wa Yose, ndiposo na Salome.#Luk 8.2-3 41Ŵanakazi aŵa ŵakendanga nayo Yesu apo wakaŵa ku Galileya, ndipo ŵakamuteŵeteranga. Pakaŵaso ŵanakazi ŵanyakheso ŵanandi ŵeneawo ŵakiza nayo pamoza ku Yerusalemu.

Kusungika kwa Yesu

(Mat 27.57-61; Luk 23.50-56; Yoh 19.38-42)

42Ndipo para mise yikati yafika, pakuti likaŵa zuŵa la kunozgekera, ilo ndi zuŵa pambere Sabata lindafike, 43Yosefe wa ku Arimatiya, munthu wakuzirwa wa mphara yikuru ya ŵaYuda, nayoso wakapenjanga Ufumu wa Chiuta Iyo wakaŵa na chikanga ndipo wakaruta kwa Pilato, na kupempha thupi la Yesu. 44Pilato wakazizwa pakupulika kuti Yesu wafwa kale. Ndipo wakati wachema murara wa ŵankhondo wakamufumba usange chikaŵa cha unenesko kuti Yesu wafwa kale. 45Pilato wakati waphalirika na murara wa ŵankhondo kuti Yesu wafwa nadi, wakapereka thupi la Yesu kwa Yosefe. 46Penepapo Yosefe wakagula salu ya bafuta, wakati wakhizga thupi la Yesu, wakalivungirizga mu salu ya bafuta. Ndipo wakaliŵika mu dindi ilo likazongeka mu jarawe ndipo ŵakakunkhuzgirapo libwe pa muryango wa dindi. 47Mariya wa ku Magadala, na Mariya nyina wa Yose, ŵakaghawona malo agho Yesu wakasungikapo.

Currently Selected:

Mariko 15: Tumbuka

Highlight

Copy