Mateyu 26

Ŵarongozgi ŵa ŵaYuda ŵakupangana kumukoma Yesu

(Mrk 14.1-2; Luk 22.1-2; Yoh 11.45-53)

1Para Yesu wakamara kusambizga vyose ivi, wakati ku ŵasambiri ŵakhe, 2“Mukumanya kuti chiphikiro cha Paska chiŵengeko para pajumpha mazuŵa ghaŵiri, ndipo Mwana wa Munthu wamkuperekeka kuti wapayikike pa mphinjika.”#Kuf 12.1-27

3Penepapo ŵasofi ŵarara, ŵamanyi-marango na ŵarara ŵa ŵaYuda, ŵakawungana mu mphara ya Musofi Mukuru, zina lakhe Kayafa. 4Ŵakapangana umo ŵangamukorera Yesu mu uchenjezi mwakuti ŵamukome. 5Kweni ŵakati, “Tireke kumukora pa nyengo ya chiphikiro, mzire ŵanthu ŵawuske chivulupi.”

Yesu wakuphakazgika mafuta mu Betaniya

(Mrk 14.3-9; Yoh 12.1-8)

6Apo Yesu wakaŵa mu muzi wa Betaniya mu nyumba ya Simoni uyo wakaŵa na vyoni, 7mwanakazi wakiza kwa iyo na supa ya sangalawe yakuzura na mafuta gha kununkhira gha narido gha mtengo wa patali. Wakapungulira mafuta agha pa mutu wa Yesu.#Luk 7.37-38 8Para ŵasambiri ŵakhe ŵakati ŵawona ichi ŵakakaripa ŵakati, “Mwasakazirachi mafuta agha? 9Mafuta agha mphanyi ghanguguliskika na ndarama zinandi kuti ŵaŵagaŵire ŵakavu.”

10Yesu wakati wachimanya ichi, wakati kwa iwo, “Chifukwa uli mukumusuzga mwanakazi uyu? Iyo wandichitira ine chinthu chiweme. 11Pakuti ŵakavu muli nawo mazuŵa ghose, kweni ine kuti muti muŵenge nane mazuŵa ghose chara.#Mar 15.11 12Mwanakazi uyu wapungulira mafuta agha pa thupi lane kulinozgera nkhanira pakusungika kwane. 13Nadi nkhumuphalirani kuti kose uko Uthenga Uweme uwu wamkupharazgika mu charu cha pasi, icho wachita mwanakazi uyu nacho chamkuyowoyeka kuti ŵamukumbukenge.”

Yudasi wakuzomera kumwendera mphiska Yesu

(Mrk 14.10-11; Luk 22.3-6)

14Ntheura yumoza wa ŵasambiri 12 zina lakhe Yudasi Isikariyoti, wakaruta ku ŵasofi ŵarara. 15Wakaŵafumba wakati, “Kasi mundipenge vichi para Yesu ndamupereka kwa imwe?” Ntheura iwo ŵakamupa ndarama za siliva 30.#Zak 11.12 16Kwamba nyengo yeneyira, Yudasi wakapenjanga nyengo yiweme yakumuperekera Yesu.

Yesu wakurya Paska pamoza na ŵasambiri ŵakhe

(Mrk 14.12-21; Luk 22.7-14, 21-23; Yoh 13.21-30)

17Pa zuŵa lakudanga la chiphikiro cha Chingwa chambula chirungo, ŵasambiri ŵakhe ŵakiza kwa Yesu ŵakamufumba ŵakati, “Kasi mukukhumba kuti tikamunozgerani nkhu chakurya cha Paska?”

18Yesu wakazgora wakati, “Rutani mu msumba kwa munthu yunji, mukamuphalire kuti, ‘Musambizgi wakuti, nyengo yane yili pafupi, nkhukhumba kuryeramo Paska mu nyumba yako pamoza na ŵasambiri ŵane.’ ”

19Ŵasambiri ŵakaya kachita nga ndi umo Yesu wakaŵalangulira, ndipo ŵakanozga chakurya cha Paska.

20Na mise, Yesu na ŵasambiri ŵakhe 12 ŵakakhara pa kurya. 21Apo ŵakaryanga, Yesu wakati, “Nadi nkhumuphalirani kuti yumoza wa imwe wandenderenge mphiska.” 22Ŵasambiri ŵakaŵa na chitima chomene, ndipo yumozayumoza ŵakamba kumufumba Yesu kuti, “Kasi ndine Fumu?”

23Yesu wakaŵazgora wakati, “Uyo wakukovya chingwa mu bakule pamoza nane, ndiyo wati wandenderenge mphiska.#Mas 41.9 24Nadi Mwana wa Munthu wakuruta nga ndi umo kuli kulembekera na vya iyo mu malembo, kweni soka kwa munthu uyo wakumwendera mphiska Mwana wa Munthu! Mphanyi kukaŵa kuweme kuti munthu uyo wareke na kubabika wuwo.”

25Ndipo Yudasi uyo wakamwendera mphiska Yesu wakati, “Kasi ndine, Musambizgi?”

Yesu wakamuphalira wakati, “Ndiwe wayowoya ntheura.”

Kwimikika kwa monesko wa Fumu

(Mrk 14.22-26; Luk 22.14-20; 1 Kor 11.23-25)

26Apo ŵakaryanga, Yesu wakatora chingwa, wakawonga Chiuta ndipo wakachimenya na kuŵapa ŵasambiri ŵakhe wakati, “Torani ryaninge, ili ndi thupi lane.”

27Wakatoraso nkhombo, wakati wawonga Chiuta wakaŵapa ŵasambiri wakati, “Mwaninge mose. 28Chifukwa izi ndi ndopa zane izo zikukhozga phangano ndipo zikuthikira ŵanthu ŵanandi kuti zakwananga zawo zigowokereke.#Kuf 24.8; Yer 31.31-34 29Nkhumuphalirani kuti nditi ndimwengeso chara vya chipambi ichi cha mpheska mpaka pa zuŵa ilo ndamkumwa namwe kuphya mu Ufumu wa Ŵadada.”

30Ŵakati ŵimba sumu, ŵakafuma na kuruta ku Phiri la maOlive.

Yesu wakuyowoyerathu kuti Petrosi wamkumukana

(Mrk 14.27-31; Luk 22.31-34; Yoh 13.36-38)

31Ntheura Yesu wakati kwa iwo, “Usiku uno, imwe mose mukhuŵazgikenge mwa ine na kundireka ndekha nga ndi umo kuli kulembekera kuti, ‘Nditi nditimbe muliska ndipo mberere zamkumbininika.’#Zak 13.7 32Kweni para ndawuka ku ŵakufwa, ndamkumudangirirani kuya ku Galileya.”#Mat 28.16

33 Petrosi wakazgora Yesu wakati, “Nanga wose ŵangakhuŵazgika mwa Imwe na kumurekani, ine ndekha chara.”

34Yesu wakamuzgora wakati, “Petrosi, nadi nkhukuphalira kuti usiku weneuwo, tambala wandalire, wamkundikana katatu.”

35Kweni Petrosi wakazgora wakati, “Nanga kungaŵa kuti ndifwe namwe pamoza, kuti ndamkumukanani chara.”

Ŵasambiri ŵanyakhe wose nawo ŵakayowoya ntheura pera.

Yesu wakuromba mu munda wa Getsemane

(Mrk 14.32-42; Luk 22.39-46)

36Penepapo Yesu na ŵasambiri ŵakhe ŵakaruta ku malo ghakuchemeka Getsemane. Ŵali kwenekura, Yesu wakati kwa iwo, “Kharani pano, ine nkhuruta kura kukaromba.” 37Wakatora Petrosi pamoza na ŵana ŵa Zebediya ŵaŵiri, ndipo wakamba kuŵa na chitima na kukweŵeka chomene mu mtima. 38Ndipo wakati kwa iwo, “Mtima wane uli na chitima chikuru chomene chakuti chinganditorera na ku nyifwa wuwo. Kharani papano, mucherezge pamoza nane.”

39Wakati wendapo ka mtunda kachoko waka, wakawa kavunama na kuromba wakati, “Ŵadada, usange nchamachitiko, nkhombo iyi ya visuzgo muwuskeko kwa ine. Ndipouli kuti nga ndi umo nkhukhumbira ine chara, kweni kwakuyana na khumbo linu.”

40Ntheura wakawerera ku ŵasambiri ŵakhe ŵatatu ŵara, ndipo wakaŵasanga kuti ŵali mu tulo. Wakayowoya na Petrosi wakati, “Kasi mwatondeka kucherezga nane nanga ndi ora limoza pera? 41Muŵe maso, murombenge kuti mureke kunjira mu kuyezgeka. Mtima ukukhumba nadi, kweni thupi ndakutomboroka.”

42Wakarutaso kachiŵiri wakaromba wakati, “Ŵadada, usange mukukhumba kuti nkhombo iyi ya visuzgo yireke kundijumpha kuti mpaka ndimwe, ipo khumbo linu lichitike.” 43Wakizaso ku ŵasambiri ŵakhe ndipo wakaŵasanga ŵali mu tulo, chifukwa tulo tukaŵa tunandi.

44Wakaŵarekaso na kuruta kuya karomba kachitatu na kuyowoya mazgu gheneghara. 45Wakiza ku ŵasambiri wakaŵafumba wakati, “Kasi muchali mu tulo na kupumula? Wonani, nyengo yafika yakumuperekera Mwana wa Munthu mu mawoko gha ŵakwananga. 46Wukani tirutenge. Wonani wafika munthu uyo wakundendera mphiska.”

Yesu wakukoreka

(Mrk 14.43-50; Luk 22.47-53; Yoh 18.3-12)

47Apo Yesu wakaŵa wachali kuyowoya, Yudasi, yumoza wa 12 wakafika na mzinda ukuru wa ŵanthu awo ŵakatumika na ŵasofi ŵarara na ŵarara ŵa ŵaYuda, uku ŵayegha malupanga na zinthonga. 48Kweni uyo wakamwendera mphiska wakaŵapa chimanyikwiro chakuti, “Uyo ndamkumufyofyontha ndi mweneuyo. Mukamukore.”

49Penepapo Yudasi wakafika, ndipo wakati Yesu, “Muwonire Musambizgi.” Ndipo wakamufyofyontha.

50Kweni Yesu wakamuphalira wakati, “Nganya, chita icho wizira.”

Penepapo ŵanthu ŵara ŵakiza ŵakamukora Yesu. 51Ndipo yumoza wa awo ŵakaŵa na Yesu, wakanyoroska woko lakhe ndipo wakasorora lupanga lwakhe, wakaheta na kuwunguzura khutu la muteŵeti wa Musofi Mukuru. 52Yesu wakamuphalira wakati, “Wezgera lupanga lwako mu malo ghakhe, pakuti wose awo ŵakutora lupanga ŵati ŵafwenge na lupanga. 53Kasi mukumanya chara kuti ndingaromba Ŵadada sono pano kuti ŵanditumire ŵangelo ŵa nkhondo kuruska viwuru 12? 54Sono kasi vingafiskika uli ivyo malembo ghakuyowoya kuti vikwenera kuŵa ntheura?”

55Pa ora lira Yesu wakawuphalira mzinda ura wakati, “Kasi mwiza kandikora na malupanga na zinthonga nga ndi para ndili munkhungu? Zuŵa na zuŵa nkhakharanga mu Nyumba ya Chiuta na kusambizga, kweni kuti mukandikora chara.#Luk 19.47, 21.37 56Kweni vyose vyeneivi vyachitika mwakuti malembo gha nchimi ghafiskike.”

Penepapo ŵasambiri wose ŵakamureka na kuchimbira.

Yesu panthazi pa mphara yikuru ya ŵaYuda

(Mrk 14.53-65; Luk 22.54-55, 63-71; Yoh 18.13-14, 19-24)

57Ndipo ŵanthu awo ŵakakora Yesu ŵakaruta nayo kwa Kayafa, Musofi Mukuru, uko ŵamanyi-marango na ŵarara ŵa ŵaYuda ŵakawungana. 58Kweni Petrosi wakamurondezga pataliko kuya kafika ku chipanga cha Musofi Mukuru. Wakanjira mukati na kukhara pamoza na ŵalinda kuti wawone na umo ghamalirenge makani. 59Ntheura ŵasofi ŵarara na wose ŵa mphara yikuru ya ŵaYuda ŵakapenja ukaboni wa utesi mwakuti ŵamukome Yesu. 60Kweni kuti ŵakawusanga chara, nanga ŵakaboni ŵa utesi ŵakiza. Pa umaliro ŵakiza ŵanthu ŵaŵiri, 61ŵakati, “Munthu uyu wakayowoya kuti, ‘Nkhumanya kubwangandula Nyumba ya Chiuta na kuyizengaso mu mazuŵa ghatatu.’ ”#Yoh 2.19

62Musofi Mukuru wakimilira ndipo wakamufumba Yesu wakati, “Kasi ulije kanthu kakuzgorapo pa ivyo ŵanthu aŵa ŵakukupanikizgira navyo?” 63Kweni Yesu wakati waka chete. Penepapo Musofi Mukuru wakaphalira Yesu kuti, “Mu zina la Chiuta wamoyo nkhukupempha kuti urape usange ndiwe Mesiya, Mwana wa Chiuta.”

64Yesu wakati kwa iyo, “Ndimwe mwayowoya. Kweni nkhumuphalirani imwe mose kuti kwamba sono muti muwonenge Mwana wa Munthu wakhara ku woko la maryero la Chiuta Mwenenkhongono zose ndipo muti mumuwonengeso wakwiza mu maŵingu gha kuchanya.”#Dan 7.13

65Penepapo Musofi Mukuru wakaparura malaya ghakhe wakati, “Munthu uyu watuka Chiuta. Chifukwa uli tikupenjaso ukaboni unyakhe? Sono namwe mwajipulikira matusi.#Lev 24.16 66Kasi mukuti uli?”

Ŵakazgora ŵakati, “Wakwenera kukomeka.”

67Ntheura ŵakamufunyira mata ku maso na kumubwankhura. Ŵanji ŵakamupamantha na malupi na kuyowoya #Yes 50.6 68kuti, “Iwe Mesiya, loska, kasi ndi njani wakupamantha na malupi?”

Petrosi wakumukana Yesu

(Mrk 14.66-72; Luk 22.56-62; Yoh 18.15-18, 25-27)

69Sono Petrosi wakakhara pa baraza kuwaro, msungwana wanchito, wakiza na kumuphalira Petrosi kuti, “Iwe nawe ukaŵa pamoza na Yesu wa ku Galileya.”

70Kweni wakakana panthazi pa wose wakati, “Kuti nkhumanya chara icho ukuyowoya.” 71Penepapo Petrosi wakafuma kuya ku chipata cha baraza, ndipo msungwana munyakhe wakamuwona wakaŵaphalira awo ŵakimilira penepara wakati, “Munthu uyu wakaŵa pamoza na Yesu wa ku Nazarete.”

72Ndipo Petrosi wakakanaso wakati, “Nkhurapa nadi, munthu uyu nkhumumanya chara.”

73Pakati pajumpha kanyengo kachoko waka, awo ŵakimilira penepara ŵakiza kufupi na kuyowoya na Petrosi, ŵakati, “Na unenesko wose, naweso uli yumoza wa iwo, pakuti kayowoyero kako nako kakukuchombola.”

74Penepapo Petrosi wakamba kutemba na kurapa wakati, “Ndilije kumumanya munthu uyu.”

Penepapo tambala wakalira. 75Ndipo Petrosi wakakumbuka mazgu agho Yesu wakayowoya, ghakuti, “Pambere, tambala wandalire, wamkundikana katatu.” Penepapo Petrosi wakafumira kuwaro na kulira chomene.

Currently Selected:

Mateyu 26: Tumbuka

Highlight

Copy