Yoyele 3
3
Chiuta weruzgenge ŵamitundu
1 Fumu yikuti, “Wonani, pakuti pa nyengo iyo ndamkuwezgeraso mauweme gha Yuda na gha Yerusalemu. 2Ndamkuwunganya mafuko ghose na kwikha nagho ku dambo la Yehoshafati ndipo kura ndamkughayeruzga chifukwa cha ŵanthu awo nchiharo chane Israele. Iwo Ŵaŵambininiskira mu ŵamitundu na kugaŵana charu chane. 3Iwo ŵakachita mphenduzgo pa ŵanthu ŵane kuwona uyo wangatora ŵamikori. Ŵakasinthiska ŵasepuka na mahule na kuguliska ŵasungwana na vinyo kuti ŵamwe.”
4“Kasi mukukhumba kuchita vichi na ine imwe mwa ŵanthu ŵa ku Ture, Sidoni, na ku vigaŵa vyose vya Filisitiya? Kasi mukundiwezgera nduzga? Usange mukukhumba kundiwezgera nduzga, nane ndiwezgerenge nduzga pa imwe mwaŵene mwa luŵiroluŵiro kwambula kuchedwa.#Yes 14.29-31, 23.1-18; Yer 47.1-7; Eze 25.15—28.26; Amo 1.6-10; Zef 2.4-7; Zak 9.1-7; Mat 11.21-22; Luk 10.13-14 5Mwatora siliva wane na golide wane na kuyeghera vyuma vyane mu nyumba zinu za kusoperamo. 6Mwatorera ŵanthu ŵa kwa Yuda na Yerusalemu kutali kufuma ku charu chawo na kuŵaguliska ku ŵaGriki. 7Kweni kufuma ku malo agho mwa ŵaguliska ndiŵawezgenge. Ndimuwezgeraninge nduzga izo mukachita kwa iwo. 8Ndiguliskenge ŵana winu ŵanarume na ŵanakazi ku ŵanthu ŵa kwa Yuda, iwo ŵaŵaguliskenge ku ŵaSaba, fuko la kutali chomene, pakuti ntheura ndimo yikuyowoyera Fumu.”
9“Pharazgani ku mafuko ghose, kuti,
‘Nozgekerani nkhondo,
wuskani mitima ya vigwe vya ŵasilikari.
Ŵasilikari wose ŵasenderere kufupi,
rekani ŵizenge.
10Fulani mayembe ghinu kuti ghaŵe malupanga
ndipo mphopo zinu kuti ziŵe mikondo.
Awo mbakuropwa nawo ŵayowoye kuti,
“Ndine musilikari.”#Yes 2.4; Mik 4.3
11Pusumphani, zaninge,
mose mwa ŵamitundu zingirizge,
muwungane mose kwenekura,
zani navyo vinkhara vyinu, Mwe Fumu.’ ”
12Ŵamitundu ŵawuke ŵekha
na kukhilira ku Dambo la Yehoshafati.
Kwenekura ine ndamkukhara kweruzga ŵanthu ŵa mitundu yose.
13Torani chigeru,
pakuti nyengo ya vuna yafika.
Njirani, pondani,
pakuti chakukamiramo vinyo chazura.
Viŵiya vikufuruka,
pakuti uheni wawo ngukuru.#Uvu 14.14-16, 19-20, 19.15
14Mizinda na mizinda ya ŵanthu,
yili mu dambo la kweruzgiramo!
Pakuti zuŵa la Fumu liri pafupi
mu dambo la kweruzgiramo.
15Dazi na mwezi vyati waka bii,
nyenyezi nazo zareka kuŵala.
Chiuta watumbikenge ŵanthu ŵakhe
16 Fumu yikubangura kufuma mu Ziyoni,
mazgu ghakhe ghakududumira kufuma mu Yerusalemu,
charu cha pasi na mtambo vikusunkhunyika.
Kweni Fumu ndi linga la ŵanthu ŵakhe,
na linga lakukhora ku ŵaIsraele.#Amo 1.2
17“Ntheura mwamkumanya kuti ine ndine Fumu, Chiuta winu,
uyo wakukhara mu Ziyoni,
phiri lane lakupatulika.
Yerusalemu waŵenge wakupatulika,
ndipo ŵalendo kuti ŵamkusorotamoso chara.”
18“Ndipo mu zuŵa ilo mu mapiri mufumenge vinyo lakunowa,
mu tumapiri mwendenge mkaka,
mu tumironga tose twa Yuda
mwamkwenda maji,
ndipo mbwiwi yifumenge mu Nyumba ya Fumu
na kuthilira dambo la Shitimu.
19Eguputo wazgokenge chiparamba
ndipo Edomu mapopa ghakwanangikirathu,
chifukwa cha nkhaza izo zachitikira Yuda,
pakuti ŵathiska ndopa zambula mrandu mu charu chawo.
20Kweni mu charu cha Yuda mwamkukhara ŵanthu kwa muyirayira,
ndipo mu Yerusalemu mwamkukhara ŵanthu ku miwiro yose.
21Ndamkuwezgera nduzga ndopa zawo,
kuti ndamkuwuskapo mrandu wawo chara,
pakuti Fumu yikukhara mu Ziyoni.”
Currently Selected:
Yoyele 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
