Yesaya 3
3
Chivulupi mu Yerusalemu
1Wonani, Chiuta, Fumu Mwenenkhongono zose,
wali pafupi kuwuskamo mu Yerusalemu na mu charu cha Yuda,
wovwiri wa mtundu uli wose uwo ŵanthu ŵakugomezga.
Wizamkuwuskamo chakurya chose na maji ghose.
2Wizamkuwuskamo ngwazi na vinkhara vya nkhondo,
ŵeruzgi na nchimi, ŵakuroska na ŵararaŵarara ŵawo.
3Wizamkuwuskamo ŵarongozgi ŵa ŵasilikari 50
na ŵanthu ŵakuchindikika,
ŵakovwira pa mrandu na ŵamayere,
ndiposo na nkhwantha pakupanga vinthumwa.
4Ndizamkuŵazgora ŵasepuka kuŵa ŵakaronga ŵawo
twabonda ndito tuŵawusenge iwo.
5Ŵanthu ŵamkutindiŵizgirana pasi.
Munthu yumoza ŵamkutindiŵizga munthu munyakhe,
muzengezgani wamkutindiŵizga muzengezgani munyakhe.
Ŵawukirano ŵamkujikuzga pa ŵararaŵarara,
ndiposo vichwapi vyamkujikuzga pa ŵanthu ŵakuzirwa.
6Munthu wamkukora mwana munyakhe,
mu mbumba ya wiske na kuti kwa iyo,
“Iwe uli na chakuvwara,
sono uti uŵe murongozgi withu,
ndipo mulu wa mahami uwu,
ndiwo uti uwuwusenge.”
7Kweni mu zuŵa leneilo iyo wizamkuzgora kuti,
“Ine kuti ndingakuchizga chara.
Mu nyumba yane ndilije chakurya panji chakuvwara.
Mureke kundimika ine
kuŵa murongozgi wa ŵanthu.”
8Nadi, Yerusalemu wapasuka,
charu cha Yuda chikuwa.
Ivyo ŵanthu ŵakuyowoya
na nchito izo ŵakuchita,
ndi vya kutuka Fumu pera.
Ntheura ŵakuderera uchindami wa Chiuta.
9Kutemwera kwawo
kukuŵapanikizgira iwo.
Ŵakwananga pakweru nga ndi ŵanthu ŵa mu Sodomu,
kuti ŵakubisa chara.
Soka kwa iwo,
chifukwa ŵajitorera pharaniko pa iwo ŵenecho.
10Uŵaphalire ŵarunji kuti vyose vyamkuŵaŵira makora,
pakuti ŵizamkurya vipambi vya milimo yawo.
11Soka kwa ŵanthu awo ŵakuchita uheni,
pharaniko liti liŵenge pa iwo.
Chiheni icho ŵakachita ku ŵanyakhe,
ndicho chichitikenge kwa iwo.
12Imwe ŵanthu ŵane,
ŵanichi ndiwo ŵakumutindiŵizgani,
ŵanakazi ndiwo ŵakumuwusani.
Mwe ŵanthu ŵane,
ŵarongozgi ŵinu ndiwo ŵakumupuruskani,
ŵakutimbanizga nthowa zinu.
Fumu yikweruzga ŵanthu ŵakhe
13 Fumu yakhara pa malo ghakhe mu mphara ya mirandu,
kuti yeruzge mirandu ya ŵanthu ŵakhe.
14 Fumu yamba kweruzga mirandu,
ghakususka ŵararaŵarara na ŵarongozgi ŵakhe.
Fumu yikuŵasuska yikuti,
“Imwe ndimwe muli kunanga munda wane wa mpheska.
Ivyo muli kwiba ku ŵakavu,
vili mu zinyumba zinu.
15Kasi mukung'anamulachi,
pakuŵatindiŵizga ntheura ŵanthu ŵane,
na pakuŵayuzgayuzga ŵakavu?”
Ntheura ndimo Fumu Mwenenkhongono zose yikuyowoyera.
Chenjezgo ku ŵanakazi ŵa mu Yerusalemu
16 Fumu yikati,
“Ŵanakazi ŵa mu Yerusalemu mbakujikuzga,
ŵakwenda uku singo zawo zili nyoronyoro,
maso ghawo ghali ŵiruŵiru.
Pakwenda ŵakuti binyubinyu,
uku ŵakulizga vibangili mu malundi ghawo.
17Pa chifukwa ichi, Fumu yizamkuŵameta mipara
ŵanakazi ŵa mu Ziyoni,
ndipo Fumu yizamkuŵendeska nkhule.”
18Mu zuŵa ilo Fumu yizamkuŵavura ŵanakazi ŵa mu Yerusalemu vibangili ivyo ŵakuvwara mu malundi ghawo, mathauro ku mitu yawo na majuda mu singo zawo. 19Yizamkuŵavura ndewerewe mu makutu ghawo, vingwenjere mu mawoko ghawo na salu zakuzinga mu singo. 20Yizamkuŵavura maduku gha ku mutu, mabangili, salu zamanyanda, tumabotolo twa mafuta na vinthumwa, 21mphete za chidindo, na mphete za mu mphuno, 22malaya gha pa viphikiro, vidiko, vilundu, na vikwama. 23Yizamkuŵavura malaya gha usikiti, malaya gha bafuta, vilemba, na vidiko.
24Mu malo mwa mafuta ghakununkhira,
pizamkuŵa kununkha.
Mu malo mwa lamba,
ŵizamkuvwara mukusa.
Mu malo mwa sisi liweme,
ŵizamkuŵa na mupara.
Mu malo mwa munjilira wakudula,
ŵizamkuvwara vigudulu.
Mu malo mwa kutowa,
ŵizamkukhozgeka soni.
25Ŵasilikari ŵinu ŵizamkukomeka na lupanga,
vinkhara vyinu navyo vizamkukomeka mu nkhondo.
26Vipata vyakhe vizamkutengera na kulira.
Msumba wa Ziyoni wizamkubwanganduka
ndipo wizamkuŵavye ŵanthu.
Currently Selected:
Yesaya 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
