Mutendeko 7
7
Chigumura cha maji
1 Fumu yikati kwa Nowa, “Njira mu ngaraŵa, iwe na mbumba yako yose, chifukwa ndawona kuti, mu muwiro uwu, iwe wekha ndiwe uli murunji panthazi pane. 2Utorepo vinyama vinkhonde na viŵiri vyakuphotoka vya mtundu uliwose ivyo nviŵiriviŵiri, chanarume na chanakazi chakhe, ndipo utoreso pa mtundu uliwose wa vinyama vyambula kuphotoka viŵiriviŵiri, chanarume na chanakazi chakhe. 3Viyuni vya mudera navyo utorepo vinkhonde na viŵiri ivyo nviŵiriviŵiri chanarume na chanakazi kusunga mtundu wawo pa charu chose. 4Pakuti mu mazuŵa ghankhonde na ghaŵiri, nditi ndirokweske vura pa charu cha pasi mazuŵa 40, muhanya na usiku. Ndipo vyamoyo vyose ivyo nkhavilenga nditi ndivimare pa charu cha pasi.” 5Ndipo Nowa wakachita vyose umo Fumu yikalangulira iyo.
6Sono Nowa wakaŵa na virimika 600 apo chigumura cha maji chikiza pa charu. 7Nowa na ŵana ŵakhe ŵanarume, ndiposo muwoli wakhe na ŵakamwana ŵakhe, ŵakanjira mu ngaraŵa kuchimbira maji gha chigumura.#Mat 24.38-39; Luk 17.27 8Mu vinyama vyakuphotoka na vyambula kuphotoka, mu viyuni, na mu vyakukhwaŵa vyose, 9viŵiriviŵiri, chanarume na chanakazi, vikanjira mu ngaraŵa pamoza na Nowa, nga ndi umo Chiuta wakamulangulira Nowa. 10Ghakati ghajumphapo mazuŵa ghankhonde na ghaŵiri maji gha chigumura ghakiza pa charu.
11Apo Nowa wakaŵa na virimika 600, mu mwezi wa chiŵiri, zuŵa la 17 la mwezi, zuŵa leneilo mbwiwi zose za mu ndimba zikuru zikaphumuka, ndipo vidangazi vya mu mtambo vikajurika.#2 Pet 3.6 12Vura yikarokwa pa charu mazuŵa 40, muhanya na usiku. 13Pa zuŵa leneilo vura yikambira, Nowa na ŵana ŵakhe aŵa, Shemu, Hamu, na Yafeti, ndiposo na muwoli wakhe pamoza na ŵakamwana ŵakhe ŵatatu, ŵakanjira mu ngaraŵa. 14Iwo ŵakanjira na vinyama vyose kwakuyana na mitundu yakhe na nyakhe, vyakuŵeta vyose kwakuyana na mitundu yakhe na yakhe, vyakukhwaŵa vyose kwakuyana na mitundu yakhe na yakhe, na viyuni vyose kwakuyana na mitundu yakhe na yakhe. 15Vyamoyo vyose ivyo vikaŵa na umoyo vikanjira viŵiriviŵiri mu ngaraŵa pamoza na Nowa. 16Vinyama ivyo vikanjira, vikaŵa chanarume na chanakazi cha vyamoyo vyose, ndipo vikanjira nga ndi umo Chiuta wakamulangulira. Pamanyuma Fumu yikamujalira mukati.
17Chigumura chikarutilira kuŵa pa charu mazuŵa 40 ndipo maji ghakazulirangazuliranga na kunyamura ngaraŵa pachanya. Ngaraŵa yikakwera mpaka pachanya pa charu. 18Maji ghakatura ghakati waka nyete pa charu, ndipo ngaraŵa yikasewanga pachanya pa maji. 19Maji ghakatura chomene pa charu mwakuti mapiri ghose ghatali ghakabizgika. 20Maji ghakatura pachanya pa mapiri na kughabenekerera na mamita 7. 21Vyamoyo vyose ivyo vikendanga pa charu vikafwa: viyuni, vyakuŵeta, vikoko, vilengiwa vyose ivyo vikukhwaŵa pa charu, na ŵanthu wose. 22Vyose ivyo vikaŵa pa mtunda, vyeneivyo vikaŵa na umoyo, vikafwa. 23Chiuta wakavimara petu vyamoyo vyose ivyo vikaŵa pa charu: ŵanthu, vinyama, vyakukhwaŵa, ndiposo na viyuni vya mudera. Kweni Nowa pera pamoza na wose awo ŵakaŵa nayo mu ngaraŵa ndiwo ŵakakharako. 24Maji ghakakhara pa charu mazuŵa 150.
Currently Selected:
Mutendeko 7: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
