Mutendeko 32

Yakhobe wakunozgekera kukumana na Esau

1 Yakhobe wakarutilira ulendo wakhe ndipo ŵangelo ŵa Chiuta ŵakakumana nayo. 2Para Yakhobe wakaŵawona wakati, “Uwu ndi msasa wa Chiuta.” Ntheura malo gheneghara wakaghathya Mahanayimu.#32.2 Mahanayimu: Lizgu ili mu chiHebere likung'anamula kuti “misasa yiŵiri”.

3Sono Yakhobe wakatuma mathenga, pambere iyo wandarute, kwa Esau mukuru wakhe mu charu cha Edomu. 4Wakaŵaphalira wakati, “Mukamuphalire Esau, sekuru wane mwa ntheura: Muteŵeti winu Yakhobe wakuti, ‘Ine nkhakharanga na Labani, ndipo ndakhara nayo mpaka sono. 5Ndili na ng'ombe, mbunda, mberere na mbuzi, ŵateŵeti ŵanarume na ŵanakazi. Ndatuma mathenga kwiza kamuphalirani imwe sekuru wane, usange ndingasanga uchizi pa maso pinu.’ ”

6Para mathenga ghara ghakawerera kwa Yakhobe, ghakati, “Tikafika kwa mukuru winu Esau, ndipo nayo wakwiza kuti wakumane namwe. Wali na ŵanthu 400 pamoza.” 7Ntheura Yakhobe wakofiwa na kukweŵeka chomene. Wakapatula ŵanthu awo ŵakaŵa nayo, mberere na mbuzi, ng'ombe na ngamila kuŵa mipingo yiŵiri. 8Wakaghanaghana kuti, “Usange Esau wafika ku mpingo umoza na kuwumara petu, mpingo unyakhe uwo wakharako uti uphokwe.”

9Ntheura Yakhobe wakati, “Mwe Chiuta, wa ŵasekuru Abrahamu, na Chiuta wa ŵasekuru Yisake, Mwe Fumu, imwe mukati kwa ine, ‘Werera ku charu chako na ku ŵabali ŵako ndipo ine ndamkukuchitira uweme.’ 10Ine nkhwenera chara kupokera nanga nkhachoko waka ka chisungusungu chinu chose na kugomezgeka kwinu kose, vyeneivyo mwarongora kwa nda muteŵeti winu. Nkhambuka mronga uwu wa Yorodani kwambula chilichose kweni ndodo yane pera. Kweni sono ndili na mipingo yiŵiri. 11Nkhuromba kwa imwe nkhuti, ‘Mundithaske kwa mukuru wane Esau pakuti nkhumopa, mzire wize katikome tose, ŵanakazi pamoza na ŵana.’ 12Kweni imwe mukayowoya kuti, ‘Ndamkukuchitira uweme, na kwandaniska mphapu yako nga ndi muchenga wa mu mphepete mwa nyanja, weneuwo unandi wakhe kuti ungapendeka chara.’ ”#Mut 22.17

13Yakhobe wakagona penepapo usiku ura, ndipo wakatoraso mwa ivyo wakaŵa navyo kuŵa chawanangwa kwa Esau mukuru wakhe. 14Wakapereka mbuzi zanakazi 200, ŵapepe 20, mberere zanakazi 200, mberere zanarume 20, 15ngamila zakonkheska 30 pamoza na ŵana ŵawo, ng'ombe zanakazi 40 na nkhambako khumi, mbunda zanakazi 20 ndipo zanarume khumi. 16Viŵeto ivi ŵakaviŵika mu mawoko gha ŵateŵeti ŵakhe, mskambo uwu na uwu, ndipo wakaŵaphalira wakati, “Mudangirenge panthazi pane, ndipo muside kamtunda pakati pa mpingo uwu na uwu.” 17Wakamuphalira muteŵeti uyo wakaŵa panthazi chomene wakati, “Esau mukuru wane wakukumana nawe para na kukufumba kuti, ‘Kasi ndiwe muteŵeti wa njani? Ndipo ukuyankhu? Ivyo vili panthazi pako nvya njani?’ 18Penepapo iwe wamkuti, ‘Ivi nvya Yakhobe muteŵeti winu. Ndi vyawanangwa ivyo wamutumirani imwe Esau sekuru wane. Iyo nayo wali pamanyuma pithu.’ ” 19Mazgu agha wakaphaliraso wa chiŵiri, na wa chitatu ndiposo na wose awo ŵakayirondezga miskambo. Wakaŵaphalira kuti, “Ivi ndivyo mukayowoyenge kwa Esau para mukukumana nayo. 20Mukayowoyeso kuti, ‘Nanga ndiyo muteŵeti winu Yakhobe nayo wali pamanyuma pithu.’ ” Yakhobe wakaghanaghana kuti, “Usange ndingamuzikiska na vyawanangwa ivyo vyadangira munthazi mwane, ndipo pamanyuma ndikumane nayo, panji wamkundipokerera.” 21Ntheura vyawanangwa vya Yakhobe vikatumika kudangira panthazi pakhe, kweni usiku ura, iyomwene wakagona mu msasa kwenekura.

Yakhobe wakulimbana na munthu pa Peniyele

22Usiku wenewura Yakhobe wakawuka, wakatora ŵawoli ŵakhe ŵaŵiri, ŵateŵeti-kazi ŵakhe ŵaŵiri, na ŵana ŵakhe 11, na kwambuka mronga wa Yaboko pa jambuko lakhe. 23Wakati waŵambuska wose ŵara, wakambuskaso na vyose ivyo wakaŵa navyo. 24Yakhobe wakakhara yekha.

Penepapo munthu wakachuchuruskana nayo mpaka ku matandakucha.#Hos 12.3-4 25Para munthu yura wakawona kuti wakutondeka kumuruska Yakhobe, wakamukhwaska nyonga ya chigha chakhe. Ntheura nyonga yira yikagweduka pakuchuchuruskana nayo. 26Penepapo munthu yura wakati, “Reka ndirutenge pakuti kukucha.” Kweni Yakhobe wakati, “Nditi ndikurekezgenge chara kwambula kuti wanditumbika.”

27Munthu yura wakamufumba wakati, “Zina lako ndiwe njani?”

Iyo wakati, “Ndine Yakhobe.”

28Penepapo munthu yura wakati, “Uti uchemekengeso Yakhobe chara, kweni Israele chifukwa walimbana na Chiuta, ndiposo na ŵanthu, ndipo waruska.”#Mut 35.10

29Yakhobe wakamufumba wakati, “Nkhukuŵeya, undiphalire zina lako.” Kweni munthu yura wakati, “Ukufumbirachi zina lane?” Ndipo munthu yura wakamutumbika Yakhobe penepara.#Ŵer 13.17-18

30Ntheura Yakhobe wakaghathya malo ghara Peniyele, wakati, “Chifukwa ndawonana na Chiuta maso na maso, ndipouli umoyo wane wathaskika.” 31Dazi likamufumira para wakafumangapo pa Peniyele, uku wakugontha chifukwa cha chigha chakhe. 32Ndicho chifukwa mpaka sono ŵaIsraele kuti ŵakurya nyama ya pa nyonga chara chifukwa ndi pa msempha weneuwo uli pa nyonga ya chigha, chifukwa Yakhobe wakakhwaskika nyonga ya chigha cha Yakhobe pa msempha wa mu chiuno.

Currently Selected:

Mutendeko 32: Tumbuka

Highlight

Copy