Mutendeko 27

Yisake wakumutumbika Yakhobe

1Para Yisake wakachekura, ndipo maso ghakhe nagho ghakatondeka kuwona makora, wakachema Esau mwana wakhe murara, ndipo wakati kwa iyo, “Mwana wane.”

Esau wakazgora wakati, “Ndine pano.”

2Yisake wakati, “Wona, ine sono ndachekura, ndipo kuti nkhumanya chara zuŵa la nyifwa yane. 3Sono tora mahomwa ghako, phodo yako ya mivwi na uta wako, urute ku thengere ukandikomere nyama. 4Undiphikire chakurya chakunowa chira nkhuchitemwa ndipo wize nacho kwa ine kuti ndirye, mwakuti ndikutumbike pambere ndindafwe.”

5 Rebeka wakapulikizganga para Yisake wakayowoyanga kwa Esau mwana wakhe. Ntheura para Esau wakaruta ku thengere kuya kakoma nyama na kwiza nayo, 6Rebeka wakayowoya na mwana wakhe Yakhobe wakati, “Ndangupulika ŵawuso ŵakuyowoya na mukuru wako Esau kuti, 7‘Ukandikomere nyama na kundiphikira chakurya chakunowa kuti ndirye, mwakuti ndikutumbike panthazi pa Fumu pambere ndindafwe.’ 8Ntheura sono mwana wane, pulikira mazgu ghane kwakuyana na umo nkhukulangulira. 9Ruta sono ku mskambo, ukanditorere kwenekura twana twa mbuzi tuŵiri tuweme kuti ndiŵaphikire ŵawuso chakurya chakunowa nga ndi umo ŵakutemwera. 10Ndipo wamupereka chakurya ku ŵawuso kuti ŵarye, mwakuti ŵakutumbike pambere ŵandafwe.”

11Kweni Yakhobe wakati kwa Rebeka, “Amama, Esau mukuru wane wali na maweya mu thupi, ine ndili wambula maweya. 12Panji ŵadada ŵizamkundipapaska, ndipo ndizamkuwoneka nga ngwa kupusika na kujitorera nthembo pa ndamwene mu malo mwa chitumbiko.”

13Ŵanyina ŵakazgora ŵakati, “Mwana wane, pa ine ndipo paŵenge nthembo yako. Kweni iwe pulikira waka mazgu ghane. Sono rutanga ukanditorere twana twa mbuzi tura.” 14Ntheura Yakhobe wakaruta wakaya katutora na kupereka ku ŵanyina. Iwo ŵakaphika chakurya chakunowa, icho ŵawiske ŵakatemwanga. 15Sono Rebeka wakatora vyakuvwara viweme chomene vya mwana wakhe murara Esau, vyeneivyo vikaŵa mu hema, ndipo wakamuvwarika Yakhobe mwana wakhe muchoko. 16Wakamuvwarikaso vikumba vya twana twa mbuzi mu mawoko ghakhe na mu singo yakhe apo pakaŵavye maweya. 17Ndipo wakatora chingwa na chakurya chakunowa vyeneivyo wakaphika, na kumupira Yakhobe.

18Yakhobe wakaruta ku ŵawiske ndipo wakati, “Ŵadada!”

Iwo ŵakati, “Ndine pano. Kasi ndiwe njani mwana wane?”

19Yakhobe wakazgora wakati, “Ndine Esau mwana winu wa uŵere. Ndachita umo mwangundiphalira. Ndaŵeya wukani kuti murye nyama iyo ndamwana winu ndamuphikirani kuti munditumbike.”

20Kweni Yisake wakamufumba mwana wakhe wakati, “Mwana wane, kasi wayisanga uli mwaluŵiro?”

Iyo wakazgora wakati, “Chifukwa Fumu, Chiuta winu ndiyo wangundipa mwaŵi.”

21Sono Yisake wakati kwa Yakhobe, “Senderera kuno kufupi ndikupapaske, mwana wane, kuti ndimanye usange ndiwe nadi mwana wane Esau panji chara.” 22Ntheura Yakhobe wakasenderera kufupi na Yisake ŵawiske, ndipo wiske wakamupapaska wakati, “Mazgu nga Yakhobe, kweni mawoko nga Esau.” 23Iyo kuti wakamupanikizga chara, chifukwa mawoko ghakhe ghakaŵa na maweya, nga ndi mawoko gha Esau mukuru wakhe. Ntheura wakayamba kumutumbika. 24Kweni wakafumbaso wakati, “Kasi ndiwe nadi mwana wane Esau?”

Iyo wakazgora wakati, “Inya.”

25Yisake wakati, “Zanga nayo kwa ine nyama iyo wandinozgera kuti ndirye, ndipo ndikutumbikenge.” Ntheura wakiza nayo ndipo wakarya. Wakamutoreraso vinyo ndipo wakamwa. 26Sono wiske Yisake wakati kwa iyo, “Senderera kufupi ndipo undivumbatire mwana wane.” 27Iyo wakasenderera pafupi na kumuvumbatira. Yisake wakanuska sungu la vyakuvwara vyakhe ndipo wakamutumbika wakati,

“Wona, sungu la mwana wane

liri nga ndi sungu la munda

uwo Fumu yawutumbika.#Heb 11.20

28Chiuta warokweske jumi la kuchanya,

wakupe nyata mu minda yako,

ndipo wakupe vyakurya vinandi na vinyo!

29Ŵanthu ŵakuteŵeterenge iwe,

ndipo ŵamitundu ŵakulambirenge.

Uwuse ŵabali ŵako,

ndipo ŵabali ŵako ŵakulambirenge iwe.

Watembeke yose uyo wakukutemba,

ndipo watumbikike yose uyo wakukutumbika.”#Mut 12.3

Esau wakuŵeya Yisake kuti wamutumbike

30Para Yisake wakamara waka kupereka vitumbiko, Yakhobe wakafumapo panthazi pa ŵawiske. Nyengo yeneiyo Esau mukuru wakhe nayo wakafika kufumira uko wakaŵambanga. 31Nayoso wakaphika chakurya chakunowa, ndipo wakiza nacho kwa ŵawiske wakati, “Wukani ŵadada murye nyama iyo ndamwana winu ndamuphikirani kuti munditumbike.”

32Yisake wakati kwa iyo, “Kasi ndiwe njani?” Iyo wakazgora wakati, “Ndine Esau mwana winu wa uŵere.”

33Yisake wakambwambwantha chomene, ndipo wakati, “Kasi wanguŵa njani uyo wangukoma nyama na kwiza nayo kwa ine? Ndangurya yose pambere iwe undafike. Inya, wati waŵenge wakutumbikika.”

34Para Esau wakapulika mazgu gha ŵawiske wakalira chomene na mtima wakuŵinya. Wakayowoya ku ŵawiske wakati, “Ŵadada, nditumbikani na ine wuwo.”

35Kweni Yisake wakati, “Munung'una wako wangwiza ndipo wandipusika. Iyo ndiyo wapoka chitumbiko chako.”

36Esau wakati, “Asi ndimo kukumuyanira kuti wachemeke Yakhobe? Iyo wapoka malo ghane kaŵiri. Wakapoka uŵere wane. Sono wandipokaso chitumbiko chane.” Ntheura iyo wakafumba wakati, “Kasi mulije kundisungirako chitumbiko nane?” #Mut 25.29-34

37Yisake wakamuzgora Esau wakati, “Wona, ndamwimwika iyo kuŵa wakukuwusa iwe, ndipo ŵabali ŵakhe wose ndamupa kuŵa ŵateŵeti ŵakhe. Ndamupa vyakurya na vinyo. Kasi ndikuchitirechi sono iwe, mwana wane?”

38Esau wakaŵafumba ŵawiske wakati, “Kasi mwanguŵa na chitumbiko chimoza pera ŵadada? Munditumbike na ine wuwo, ŵadada.” Esau wakamba kulira.#Heb 12.17

39Sono Yisake ŵawiske ŵakati kwa iyo,

“Malo ghako ghakukharamo ghaŵavyenge nyata,

jumi yizamkuŵa pa minda yako chara.#Heb 11.20

40Uti uŵenge wamoyo pakurwa nkhondo,

ndipo uti uteŵetere munung'una wako.

Kweni para wamugarukira,

wamkuphyora goliwoli la muwuso wakhe.”#Mut 36.8; 2 Kar 8.20

41Esau wakamutinkha Yakhobe chifukwa cha chitumbiko cheneicho ŵawiske ŵakamupa. Iyo wakati mu mtima wakhe, “Mazuŵa ghakutengerera ŵadada ghaneng'enera. Apo ndipo ndamkumukoma Yakhobe munung'una wane.”

42Kweni para Rebeka wakapulika maghanoghano ghose gha Esau, mwana wakhe murara, wakamuchema Yakhobe. Wakamuphalira wakati, “Mukuru wako Esau wakujikhungurufya pakunozgekera kukukoma. 43Ntheura sono mwana wane pulikira mazgu ghane. Wuka chimbilira kwa mudumbu wane Labani ku Harani. 44Ukakhareko nayo kanyengo kusuke kutukutwa kwa mukuru wako kugowoke, 45ndiposo ukari wa mukuru wako pa iwe ugowoke, ndipo iyo waruwe icho wamuchitira. Penepapo ndizamkutuma ŵanthu kwiza kakutora. Nchifukwa uli ndipokeke, imwe mwa ŵaŵiri wuwo, mu zuŵa limoza?”

Yisake wakutuma Yakhobe kwa Labani

46Rebeka wakati kwa Yisake, “Ndavuka nawo nkhanira ŵanakazi ŵa chiHiti aŵa. Usange Yakhobe wangatora muwoli mu ŵanakazi ŵa chiHiti mu charu ichi, umoyo wane kuti wandurenge kanthu kwa ine chara?”

Currently Selected:

Mutendeko 27: Tumbuka

Highlight

Copy