Milimo ya Ŵakutumika 7

Mazgu gha Stefano

1Musofi Mukuru wakamufumba Stefano wakati, “Kasi uwu mbunenesko?”

2Stefano wakaŵazgora wakati, “Mwa ŵabali na mwa ŵadada, tegherezgani. Chiuta wa uchindami wakamuwonekera sekuru withu Abrahamu apo wakaŵa mu charu cha Mesopotamiya, wachali wandarute kukakhara ku charu cha Harani.#Mut 12.1 3Wakamuphalira wakati, ‘Fumamo mu charu chako, na mu ŵabali ŵako ndipo urutenge ku charu icho ndamkukurongora.’ 4Ntheura wakasida charu cha Babuloni kuya kakhara mu charu cha Harani. Para wakati wafwa wiske, Chiuta wakamusamiskira ku charu ichi, cheneicho imwe mukukharamo sono.#Mut 11.31, 12.4 5Ndipouli Chiuta kuti wakamupako chiharo chara nanga nkha chigaŵa kachoko waka. Kweni wakapangana kupereka charu ichi kwa iyo na ku mphapu yakhe pamanyuma pakhe kuŵa chiharo chawo, nangauli Abrahamu wakaŵavye mwana.#Mut 12.7, 13.15, 15.18, 17.8 6Chiuta wakayowoya nayo mwa ntheura, ‘Mphapu yako yamkukhara mu charu cha chilendo, kwenekuko ŵamkuŵa ŵazga, ndipo ŵamkunyekezgeka virimika 400.#Mut 15.13-14 7Kweni ine ndekha ndizamkweruzga mtundu wa ŵanthu uwo ŵamkuwuteŵetera. Pamanyuma ŵamkufumamo mu charu chira na kundisopa ine mu malo agha.’#Kuf 3.12 8Ndipo Chiuta wakapereka kwa Abrahamu phangano la ukotori. Ntheura Abrahamu wakababa Yisake, ndipo wakamukotora pa zuŵa la chinkhonde na chitatu. Yisake wakababa Yakhobe na kumukotora, ndipo Yakhobe wakababa ŵasekuru ŵithu 12.#Mut 17.10-14, 21.2-4, 25.26, 29.31—35.18

9“Ŵasekuru ŵithu, chifukwa cha sanje, ŵakamuguliska Yosefe mwana munyawo, ku charu cha Eguputo. Kweni Chiuta wakaŵa nayo.#Mut 37.11, 28, 39.2, 21 10Chiuta wakamuthaska Yosefe ku suzgo yakhe yose. Wakamupa mahara, ndipo wakaŵa wakukondweska panthazi pa Faro, karonga wa charu cha Eguputo. Faro wakimika Yosefe kuŵa nduna yikuru ya charu cha Eguputo na mu nyumba yakhe ya ufumu.#Mut 41.39-41 11Kweni mukaŵa njara mu charu chose cha Eguputo na cha Kanani, ndipo kukaŵa suzgo yikuru chomene. Ŵasekuru ŵithu nawo ŵakatondeka kusanga vyakurya.#Mut 42.1-2 12Para Yakhobe wakapulika kuti mu charu cha Eguputo muli chakurya, wakatuma ŵasekuru pa ulendo wawo wakudanga. 13Pa ulendo wa chiŵiri, Yosefe wakajivumbula ku ŵakuru ŵakhe, ndipo mbumba ya Yosefe yikamanyikwa kwa Faro.#Mut 45.1, 16 14Yosefe wakatuma mazgu gha kumuchema wiske Yakhobe, kuti wize ku charu cha Eguputo pamoza na mbumba yakhe yose. Ŵanthu wose pamoza ŵakaŵa 75.#Mut 45.9-10, 17-18, 46.27 15Ntheura Yakhobe wakaruta ku Eguputo, uko iyo na ŵasekuru ŵithu ŵakafwira.#Mut 46.1-7, 49.33 16Vitanda vyawo vikayeghekera ku Shekemu, kwenekuko ŵakasungika ku mararo agho Abrahamu wakagula na ndarama ku ŵaHamoro.#Mut 23.3-16, 33.19, 50.7-13; Yos 24.32

17“Apo nyengo yikaneng'enera kuti Chiuta wafiske phangano lakhe kwa Abrahamu, fuko lithu mu charu cha Eguputo likakura ndipo ŵanthu ŵakandana.#Kuf 1.7-8 18Pamanyuma karonga munyakhe uyo kuti wakamumanya Yosefe chara, wakamba kuwusa charu cha Eguputo. 19Karonga uyu wakawusira ŵasekuru ŵithu mu uryarya na kuŵasuzga uheniuheni ndipo wakaŵachichizga kuti ŵataye ŵabonda ŵawo kuwaro kuti ŵafwe.#Kuf 1.10-11, 22 20Pa nyengo iyi ndipo Mozesi wakababikiranga. Wakaŵa mwana wakutowa panthazi pa Chiuta. Wakalereka mu nyumba ya ŵawiske myezi yitatu.#Kuf 2.2 21Wakati wafumiskikira kuwaro, mwana mwanakazi wa Faro wakamutora na kumulera nga ndi mwana wakhe.#Kuf 2.3-10 22Mozesi wakasambizgika mahara ghose gha ŵaEguputo, ndipo wakaŵa munthu wankhongono mu mazgu na mu milimo yakhe.

23“Para Mozesi wakaŵa na virimika 40, wakaghanaghana kuti wakachezgere ŵabali ŵakhe ŵaIsraele na kuwona umo ŵaEguputo ŵakukhalira nawo.#Kuf 2.11-15 24Wakasanga kuti muEguputo yunji wakusuzga yumoza wa ŵabali ŵakhe, ntheura iyo wakamuvikirira, na kumuwezgera nduzga muEguputo yura na kumukoma. 25Mozesi wakaghanaghananga kuti ŵabali ŵakhe ŵati ŵapanikizge kuti Chiuta wakukhumba kuŵathaska kwizira mwa iyo, kweni ŵaIsraele kuti ŵakapanikizga chara. 26Na machero ghakhe, wakasanga kuti ŵaIsraele pera ŵaŵiri ŵakutimbana, wakayezga kuŵaphemaniska wakati, ‘Mwa ŵanthu mwe! Imwe muli ŵenenaŵene. Kasi mukwambanachi?’ 27Kweni uyo wakayamba munyakhe, wakamukanchizga Mozesi, na kuyowoya kuti, ‘Kasi ndi njani uyo wakakwimika iwe kuŵa wakutiwusa na wakuteruzga ise? 28Kasi ukukhumba kundikoma nga ndi umo ukakomera muEguputo mayiro?’ 29Para Mozesi wakapulika ichi, wakachimbilira ku charu cha Midiyani. Kwenekura wakakhara nga ndi wamikori na kubaba ŵana ŵanarume ŵaŵiri.#Kuf 2.11, 18.3-4

30“Sono vikati vyajumphapo virimika 40, mungelo wakamuwonekera Mozesi mu mapopa gha mu Phiri la Sinayi mu dimi la moto uwo ukagoleranga mu chivwati.#Kuf 3.1-10 31Mozesi wakati wawona ichi, na icho wakawona. Wakaruta kufupi na chivwati kuti wakawoneseske. Penepapo wakapulika mazgu gha Fumu kuti, 32‘Ine ndine Chiuta wa ŵawusokuru, Chiuta wa Abrahamu, wa Yisake, na wa Yakhobe.’ Mozesi wakatenthema chomene, ndipo kuti wakakangarizga chara kulaŵiskakoso. 33Ntheura Fumu yikamuphalira yikati, ‘Vura skapato zako ku malundi ghako, pakuti malo agho wimilirapo ngakupatulika. 34Ndawona nkhaza izo zikuchitikira ŵanthu ŵane awo ŵali mu Eguputo. Ndapulika kulira kwawo, ndipo ndakhira kuti ndiŵathaske. Sono zanga, nditi ndikutume ku charu cha Eguputo.’

35“Mozesi uyu, mweneuyo ŵaIsraele ŵakamukana pakuyowoya kuti, ‘Kasi ndi njani uyo wakakwimika iwe kuŵa wakutiwusa na wakuteruzga ise?’ Chiuta wakamutuma kuŵawusa na kuŵathaska, pakovwirika na mungelo uyo wakamuwonekera mu chivwati.#Kuf 2.14 36Ndiyo wakaŵarongozga pakufuma mu Eguputo ŵakati ŵachita vya minthondwe na vimanyikwiro mu Eguputo na pa Nyanja ya Matete, ndiposo mu mapopa pa virimika 40.#Kuf 7.5, 14.21; Kup 14.33 37Uyu ndi Mozesi mweneuyo wakaŵaphalira ŵaIsraele kuti, ‘Chiuta wati wamwimikirani nchimi yakuŵa nga ndine mukati mu ŵabali ŵinu.’#Mar 18.15, 18 38Ndi Mozesi mweneuyo wakaŵa na mpingo wa Chiuta mu mapopa, pamoza na mungelo uyo wakayowoyanga nayo pa Phiri la Sinayi ndiposo wakaŵa kwenekura na ŵasekuru ŵithu. Wakapokera zgoro la umoyo kufuma kwa Chiuta na kulipereka kwa ise.#Kuf 19.1—20.17; Mar 5.1-33

39“Kweni ŵasekuru ŵithu ŵakakana kumupulikira. Ŵakamugarukira ndipo ŵakanwekera ku vya charu cha Eguputo. 40Ntheura ŵakamuphalira Aroni ŵakati, ‘Utipangire ŵachiuta kuti ndiwo ŵatirongozgenge. Pakuti tikumanya chara icho chamuwira Mozesi mweneuyo wakatirongozga pakutifumya mu charu cha Eguputo.’#Kuf 32.1 41Ndi mu mazuŵa gheneghara apo ŵakapanga chikozgo cha mwana wa ng'ombe. Ŵakapereka sembe ku chikozgo chira ndipo ŵakaŵa na chiphikiro chakusekerera milimo iyo ŵakachita na mawoko ghawo.#Kuf 32.2-6 42Kweni Chiuta wakaŵarazgira nkhonyoro na kuŵapereka ku kusopa ŵamazaza ŵa mu mlengalenga nga ndi umo kuli kulembekera mu Buku la nchimi kuti,

‘Imwe ŵaIsraele,

kasi mukaperekanga kwa ine

vikoko ivyo mukakomanga zisembe,

pa virimika 40 mu mapopa mura.#Amo 5.25-27 (LXX)

43Mukatora hema la Moleki,

ndipo nyenyezi ya chiuta Refani,

vikozgo vyeneivyo mukavizgora kuti muvisopenge.

Ntheura nditi ndimuwuskanimo na kumutumizgani kutali

kujumpha charu cha Babuloni.’ ”

44“Ŵasekuru ŵakaŵa nacho Chihema cha Ukaboni mura mu mapopa. Chihema chira chikanozgeka kwakuyana na umo Chiuta wakaphalira Mozesi kuti ndimo wachinozgere kwakuyana na chiyerezgero icho Mozesi wakachiwona.#Kuf 25.9, 40 45Pamanyuma pakhe ŵasekuru ŵakapokera Chihema chira kufuma ku ŵawiskewokuru. Ŵakendanga nacho para ŵakarutanga na Yoshuwa na kupoka charu ku ŵamitundu awo Chiuta wakaŵachimbizgamo. Chikakhara mwenemura kufikira mu mazuŵa gha Davide, #Yos 3.14-17 46mweneuyo wakasanga uchizi mwa Chiuta. Ntheura wakamuromba Chiuta kuti wamuzomerezge kumuzengera nyumba Chiuta wa Yakhobe.#2 Sam 7.1-16; 1 Mid 17.1-14 47Kweni wakaŵa Solomoni uyo wakamuzengera Nyumba Chiuta.#1 Kar 6.1-38; 2 Mid 3.1-17

48“Ndipouli, Chiuta Chikurukuru kuti wakukhara mu nyumba yakuzengeka na mawoko chara, nga ndi umo nchimi yikuyowoyera kuti,

49‘Kuchanya ndi chizumbe chane,

charu cha pasi nchitambaliro cha malundi ghane,

Kasi ndi nyumba uli iyo muti mundizengere? Panyakhe

malo ghane ghakupumulirapo ndi nga? Yikuti Fumu.#Yes 66.1-2

50Kasi ndi mawoko ghane yayi agho ghakapanga vyose ivi?’

51“Imwe mwa ŵanthu ŵa mitima yinonono. Mwa ŵanthu ŵambula kupulikana imwe! Mwa ŵa kumangwa makutu imwe! Nyengo zose mukwimikana na Mzimu Mutuŵa. Mukuchita nga ndi umo ŵakachitiranga ŵawiskemwekuru.#Yes 63.10 52Kasi ndi nchimi nji iyo ŵawiskemwekuru ŵakareka kuyizikizga? Ŵakakoma ŵanthu ŵeneawo ŵakaphalira nkhanira na vya kwiza kwa Murunji uyo sono imwe mukamwendera mphiska na kumukoma. 53Ndimwe mukapokerera marango gha Chiuta gheneagho ghakapika na ŵangelo, kweni imwe kuti mukaghasunga chara.”

Stefano wakudinika

54Para ŵa mphara ŵakapulika mazgu agha, ŵakakaripa chomene na kumumemenera mino Stefano. 55Kweni iyo pakuzura na Mzimu Mutuŵa wakadodoliska kuchanya ndipo wakawona uchindami wa Chiuta, na Yesu wimilira ku woko la maryero la Chiuta. 56Iyo wakati, “Wonani! Nkhuwona kuchanya kwajurika ndipo Mwana wa Munthu wimilira ku woko la maryero la Chiuta.”

57Kweni ŵa mphara ŵakachemerezga chomene na kujara makutu ghawo, penepapo wose ŵakarotokera pa iyo. 58Ŵakamuguzira kuwaro kwa msumba ndipo ŵakamudina na mawe. Ŵakaboni ŵakaŵika malaya ghawo musi mu malundi gha munyamata zina lakhe Sauli 59Apo ŵakaŵa ŵachali kumudina na mawe, Stefano wakaromba wakati, “Fumu Yesu, pokererani mzimu wane.” 60Wakajikama pasi na kuchemerezga na mazgu ghakuru wakati, “Fumu, mungaŵapanga mrandu wa kwananga uku chara.” Para wakati wayowoya mazgu agha, ndipera wakafwa.

Currently Selected:

Milimo ya Ŵakutumika 7: Tumbuka

Highlight

Copy