Milimo ya Ŵakutumika 22

1“Mwa ŵabali ŵane, na mwa ŵadada, mundipulike apo nkhujivikirira panthazi pinu.” 2Ŵakati ŵamupulika wakuŵayowoyera mu chiHebere, iwo ŵakachetama. Ndipo iyo wakati,

3“Ine ndine muYuda mwenemwene wa kubabikira mu Taraso wa mu Kilikiya kweni nkhakulira mu msumba weneuwo nga ndi musambiri wa Gamaliyele. Nkhasambizgika mwakukonkhoska kalikose ka marango gha ŵasekuru ŵithu. Nkhaŵa wa phamphu chomene pa vinthu vya Chiuta nga ndi umo imwe muliri mose muhanya uno.#Mil 5.34-39 4Ŵanthu awo ŵakarondezganga Nthowa iyi nkhaŵasuzga na kuŵakoma. Nkhakaka ŵanarume na ŵanakazi na kuŵaponya mu gadi.#Mil 8.3, 26.9-11 5Musofi Mukuru pamoza na ungano wose wa ŵarara mbakaboni ŵane. Nkhapoka kwa iwo makarata agho ghakatumika ku ŵaYuda ŵanyithu, ndipo nkharuta ku Damaseko kuti nkhatoreso awo ŵakaŵa kura na kwiza nawo kuno ku Yerusalemu mu maunyoro kuti ŵalangike.

Paulosi wakwandula na umo wakazgokera mtima

(Mil 9.1-19, 26.12-18)

6“Para nkhendanga na kusenderera ku Damaseko, na muhanya, mwamabuchibuchi ungweru ukuru wakung'azima ukafuma kuchanya na kundiŵalira zingirizge. 7Nkhawa pasi ndipo nkhapulika mazgu ghakuti, ‘Sauli, Sauli! Kasi ukundizikizgirachi?’ 8Nkhafumba nkhati, ‘Kasi ndimwe njani Fumu?’ Ndipo wakati kwa ine, ‘Ine ndine Yesu wa ku Nazarete mweneuyo ukumuzikizga.’ 9Sono awo ŵakaŵa nane ŵakawona ungweru kweni kuti ŵakaghapulika chara mazgu gha uyo wakayowoyanga nane. 10Ndipo nkhati, ‘Fumu, kasi ndichitechi?’ Fumu yikati kwa ine, ‘Wuka, rutanga ukanjire mu Damaseko, mwenemura ndimo ŵamkukuphalira chose icho chanozgekera kuti iwe uchite.’ 11Pakuti nkhatondekanga kulaŵiska chifukwa cha ungweru ura, ŵanyane ŵakanditeteskanga waka, mpaka nkhaya kanjira mu Damaseko.

12“Mu msumba ura mukakharanga munthu zina lakhe Hananiya, uyo wakaŵa wakutemwa kusopa Chiuta na wakusunga marango ghithu ghose ndipo wakaŵa wakumanyikwa na ŵaYuda wose. 13Iyo wati wimilira pafupi nane wakati, ‘Mubali wane Sauli, laŵiskaso.’ Ndipo mu ora lenelira nkhalaŵiska ndipo nkhamuwona iyo. 14Wakandiphalira wakati, ‘Chiuta wa ŵasekuru ŵithu wali kukusora iwe kuti umanye khumbo lakhe, na kuwona Murunji Yura na kupulika mazgu ku mlomo wakhe. 15Pakuti uti uŵenge kaboni wakhe, pa maso pa ŵanthu wose, wa ivyo waviwona na kuvipulika. 16Ndipo sono kasi ukulindachi? Wuka, ubapatizike na kujitozga ku zakwananga zako pakuchema zina lakhe.’

Nchemo ya Paulosi ku ŵamitundu

17“Apo nkhati ndawerera ku Yerusalemu, ndipo apo nkharombanga mu Nyumba ya Chiuta, mboniwoni yikandiwonekera. 18Nkhawona Fumu ndipo yikayowoya nane yikati, ‘Endeska wukamo luŵiro mu Yerusalemu, chifukwa ŵanthu ŵa muno kuti ŵazomerenge chara ukaboni wako pa ine.’ 19Nkhazgora nkhati, ‘Fumu, iwoŵene ŵakumanya makora ghene kuti mu nyumba ya kusoperamo yiliyose, nkhakakanga na kujalira mu gadi na kutimba wose awo ŵakapulikananga mwa imwe. 20Para zikathikanga ndopa za Stefano kaboni winu, ine nane nkhimilira penepapo na kuzomerezga kukomeka kwakhe. Ndine nkhasungilira vyakuvwara vya awo ŵakamukoma.’ #Mil 7.58 21Ndipo Fumu yikati kwa ine, ‘Rutanga, chifukwa nditi ndikutumenge kuya kutali ku ŵamitundu.’ ”

Paulosi mwenekaya wa chiRoma

22Ŵanthu ŵakamupulikizga kufikira apo wakayowoya mazgu agha, ndipo ŵakachemerezga ŵakati, “Muwuskamo mu charu munthu wawakawaka uyo! Kuti wakwenera kukhara wamoyo chara!” 23Ŵanthu ŵakachemerezga na kukhupula vyakuvwara vyawo, ndiposo na kuthibulira fuvu muchanya. 24Murara wa ŵankhondo ya ŵaRoma yura wakaŵalangula kuti Paulosi ŵamunjizge mu linga, na kumuthyapula, ndipo ŵamufumbe chifukwa icho ŵaYuda ŵamupomeranga chomene ntheura. 25Para ŵakati ŵamukaka na vingwe, Paulosi wakamufumba murara wa ŵankhondo uyo wakimilira penepapo wakati, “Kasi chikuzomerezgeka kwa imwe kuthyapula mweneuyo ndi mwenekaya wa chiRoma kwambula kumweruzga na kumususka danga?”

26Para murara wa ŵankhondo wakapulika mazgu agha, wakaruta ku mukuru wa ŵankhondo, wakamufumba wakati, “Kasi mukukhumba kuchitachi? Munthu uyu ndi mwenekaya wa chiRoma.”

27Ntheura mukuru wa ŵankhondo wakiza na kumufumba wakati, “Undiphalire, kasi ndiwe mwenekaya wa chiRoma?”

Paulosi wakazgora wakati, “Inya.”

28Mukuru wa ŵankhondo yura wakati, “Ine uRoma wane nkhawugula na ndarama zinandi.”

Kweni Paulosi wakati, “Ine ndine muRoma kufuma kukubabika kwane.”

29Penepapo ŵanthu awo ŵakatenge ŵamufumbe Paulosi ŵakawerera nyuma. Mukuru wa ŵankhondo wakopa chomene wakati ŵamanya kuti Paulosi wakaŵa mwenekaya wa chiRoma na kutiso wamukaka.

Paulosi panthazi pa mphara ya ŵaYuda

30Mukuru wa ŵankhondo pakukhumba kumanya makora chifukwa chenecho icho ŵaYuda ŵakamupachanga nacho Paulosi, wakamusutula, ndipo wakalangula ŵasofi ŵarara na mphara yose ya ŵaYuda kuti ŵawungane. Wakakhira na Paulosi ndipo wakaya kamwimika panthazi pawo.

Currently Selected:

Milimo ya Ŵakutumika 22: Tumbuka

Highlight

Copy