Matthew 15
15
Taan kaa ishi tipaachimaakanuutwaau aniyehkaanaanich chitaanische waahkumaakanuuch
Mark 7.1-13
1Ekw pasch Phariseech kaye anichii kaa chiskutamaachetwaau wiishuwewiniyuu anite Jerusalemihch chii uhtuhteuch kaa pechi nituwaapamaatwaau Jesus, kaa itaatwaau, 2“Taan e ihtitwaau anichii chichischinuhamuwaakanich wehchi ekaa nanihiihtahkwaau aniyuu ihtuwiniyuu aniyehkaanaanich kuuhtaawiinuuch kaa aashuu miitahkwaau. Wesh namui ihtuutamuch wiyawaau chechii chishtaapautaatwaau utihchiiwaau eshkw ekaa miichisutwaau.”
3Ekw Jesus e nishkweushihaat kaa itaat, “Taan e ihtiyekw maak wii chiyawaau wehchi ekaa nanihiihtamekw Chishemanituu ukacheskwewin teyakuch aniyuu ihtuwin kaa chiskutamaakuyekw e naanahiihtamekw. 4Wesh chii iteu Chishemanituu, ‘Chisteyim kuuhtaawii kaye chikaawii’ kaye maak chii iteu, ‘Awen maayeyimaate uhtaawiih kaye ukaawiih ekush chika nipuu.’ 5Mikw maak chiyawaau aahchiiuh e ishi chiskutamaacheyekw, e itweyekw, ‘Awen e chischeyihtahk uniichihiikw e nuuhtepayihch chekwaayuu ekaa maak mitun kuchihtaat chechii wiichihaat teyakuch Chishemanituu e ihtaayich e ishi pachishtinahk aniyuu chekwaayuu,’ chititaawaau ekaa wanipayit aniyuu e ihtit. 6Aniyuu maak e ihtit namui chisteyimeu uhtaawiih. Uu maak e ishi chiskutamaacheyekw chitihtuutuwaawaauch chechii nahiihtahkwaau aniyuu ihtuwinh kaa chiskutamuwekuch ishpish wii Chishemanituu utayimuwiniyuu chechii naanahiihtamuwaatwaau. 7Chiyawaau kaa ayimihehkaasuyekw eukw chiyawaau taapwe aniyaa uchischiwehiichesuu Isaiah kaa aayimuumitaataakw. 8Chii itweu,
Uchii iinuuch utuuniwaahch nuuhchi chishtaachimikuch, mikw maak namui mitun nitaapateyimikuch utehiiwaahch. 9Namui aapataniyuu aniyuu e pechi nuuchiishtuutwaau wesh teyakuch wiyawaau uwiishuwewinawaauh chiskutamaacheuch, namui wii aniyuuh Chishemanituu taan kaa ishi pechi pachishtinamiyich.”
Aniyuuh chekwaayuuh waanihiikut awen
Mark 7.14-23
10Ekw Jesus kaa wiishaamaat aniyuu iinuuh ekw kaa itaat, “Nituhtamukw taan che ishi wiihtamaatakuch kaye maak wii nisituhtamukw. 11Taapaa namiyeyuu aniyuu taan e ishi piihtahahk awen utuunihch e ihtuutaakut chechii machituutahk wesh aniyuu taan e ishi pechi wiiwiipayiyich e ayimit, eukw aniyuu e ihtuutaakut chechii machituutahk.”
12Ekw aniyuu uchischinuhamuwaakan kaa pechi nituwaapamikut, kaa itikut, “Chichischeyihten aa e chii chishuwaahiitwaau anichii Phariseech aniyuu kaa itweut.”
13Ekw Jesus kaa itaat, “Tahtu e tahtiniyikwaau nihtaauchihchikan Nuuhtaawii kihchikiishikuhch kaa ihtaat ekaa wii uhchi nihtaauchihtaat chika pihkuchipitaakanuyuu. 14Ekush ekaa aayimeyimaahkuch anichii Phariseech. Wesh muyaam awenichii ekaa waapahtahkwaau yaapach maak kaa wii chischinuhtahaatwaau aweyuu ekaa waapahtamiyich ekun e iteyihtaakusitwaau. Taapishkun maak ekaa waapahtahkwaau wehtaniyuu chechii puuhchipayitwaau anite e pukuneyaayich.”
15Ekw Peter kaa itaat, “Pechi wiihtamuunaan maa taan e ishi wiihtamaachemakahch uu tipaachimuwin chiskutamaachewin.”
16Ekw Jesus kaa itaat, “Taapwe namui chichii nisituhtenaawaau kaye chiyawaau. 17Namui aa chinisituhtenaawaau, misiwe awen taan e ishi piihtahahk utuunihch, wataahch ispayiniyuu, ekw maak e ati wiiwiipayihtaat. 18Mikw maak aniyuu e ishi pechi wiiwiipayiyich awen utuunich e ayimit, utehiihch uhchipainiyuu aniyuu, eukw maak uyuu kaa ihtuutaakut awen chechii machaatisiit. 19Wesh mitehiihch uhchipayiyuu machi maamituneyihtamuwin, nipahiiwewin, pisikwaatisiiwin, nitamukw ihtuwin, kachemutuwin, nanatayuwin, kaye maak paashtaamuwin. 20Eukw maak uyuu chekwaayuu e ihtuutaakut awen chechii machituutahk. Ekw maak wii e miichisuyekw ekaa chishtaapautaayekw chitihchiiwaauh namui wii aniyuu ihtuutaakuu awen chechii machituutahk.”
Iskweu ekaa Jewa kaa itiskaanesit utaapwehtamuwin
Mark 7.24-30
21Ekw Jesus kaa chistuhtet anit uhchi, anite itehche kaa ituhtet aniyuu aschiiyuu waaskaa kaa ihtakuniyikwaauh aniyuu ihtaawin Tyre ekw maak Sidon kaa ishinihkaateyikwaauh. 22Iskweu maak chii wiichuu anit Canaan e chii uhchiit, eukw uyuu kaa pechi nituwaapamikut Jesus, e tepweyich e itikut, “Utipeyihchikeu, aniyaa chisheuchimaau David ukusisa, pechi chistimaacheyim maa. Nitaanish naashch taapwe waawiisacheyihtamihiikuu machiahchaahkwa e piihchishkaakut.” 23Mikw maak namui mitun uhchi chistuteu Jesus aniyuu iskweu. Ekw uchischinuhamuwaakan kaa pechi nituwaapamikut, kaa aayihkamihiikut e itikut, “Iichechishihuu maa an iskweu, mwestaastaakusuu aniyuu e ishimut e nuushuushkaakuyihkw.”
24Ekw Jesus kaa itaat aniyuu iskweu, “Nichii pechi itishahukuun chechii pechi nituwaapamakwaau mikw anichii iinuuch muyaam kaa wanishihkwaau maanishchaanishach kaa ishinaakusitwaau Jewa kaa itiskaanesitwaau.”
25Iskutak maak an iskweu piyehtawaat uyuu e itweyich Jesus, chii pechi niipiskuupayihuu anit Jesus e ihtaayich e itaat, “Utipeyihchikeu pechi wiichihii.”
26Ekw Jesus kaa itaat aniyuu iskweu, “Namui kuiskw ishinaakun atimuch chechii ishiwepinamuwaakanuutwaau awaasha umiichimiyuu.”
27Ekw an iskweu kaa itaat, “Chitaapwen Utipeyihchikeu, mikw maak yaapach miichuweuch atimuch uchimaamuwaauh upinituwaaniyuu e pahchishtiniyich anite shiipaa umiichisuunaahtikuyich.”
28Ekw Jesus kaa itaat, “Iiskweu, taapwe suuhchisiimakan chitaapwehtamuwin. Chika ishi ihtuutamaakuun maak taan e ishi pukuseyihtaman.” Tiiwehch maak chii miinuwaatisiyuuh aniyuu utaanisa an iskweu.
Jesus mihchetu aweyuuh kaa miinuwaachihaat
29Jesus kaa chistuhtet anit uhchi, ekw anite aniyuu Galilee saakahiikaniyuu kaa ati yaayewet. Ekw kaa shaakachuwet wachiyuu, ekute anite kaa ati waweyapit. 30Mihchetu maak aweyuu chii pechi nituwaapamikuu, e peshuwaayich aniyuu aweyuu ekaa chii aahtinisuyich, kaye ekaa kaa waapahtamiyich kaye aniyuu kaa maaschisiyich, kaye ekaa kaa nihtaaweyich, kaye mihchetu nanaahkuu kaa itaaspineyitwaauh. Chii aheuch maak misiwe aniyuu anite Jesus usitiyich. Ekw Jesus kaa miinuwaachihaat. 31Chii miskaateyihtamuch maak anichii iinuuch e waapamaatwaau aniyuu ekaa kaa nihtaaweyich e ayimiyich kaye aniyuu kaa maaschisiyich e miyunaakusiyich, kaye aniyuu ekaa kaa nihtaauhteyich e pimuhteyich, kaye aniyuu ekaa kaa waapahtamiyich e waapahtamiyich. Ekw maak kaa maamihchimaatwaau Chishemanituu aniyuu Jewa iinuuh kaa maamihchimaayich.
Jesus kaa ashamaat newaau chishemitaahtumitanuu naapeuh
Mark 8.1-10
32Ekw Jesus kaa wiishaamaat uchischinuhamuwaakan, kaa itaat, “Naashch e chistimaacheyimakwaau uchii iinuuch, shaash nishtu chiishikaauh ihtaauch utah e ihtaauch, namui maak shaash ihtakuniyuu chekwaayuu che miichitwaau. Namui kaye niwii chihchitishahwaauch e siiweyitwaau, nuuhtuu miin chika aakweyihtamuch mekwaach e pimuhtetwaau.”
33Ekw aniyuu uchischinuhamuwaakan kaa itikut, “Taanite che uhtinamuhkw miichim chechii ashamakwaau uchii misiwe iinuuch, ute maak pakwaatiskamikaahch e ihtaayihkw.”
34Ekw Jesus kaa itaat, “Taan tahtu aaihkunaauch e ayaawekuch.” Ekw chii iteuch, “Niishwaashch itashuuch ekw maak aapishiish namesach e ayaapishiishitwaau.”
35Ekw Jesus kaa itashuwaataat aniyuuh iinuuh chechii waweyipihiisuyich anit mushtaskamach. 36Kaa utinaat aniyuu niishwaashch aaihkunaau kaye aniyuu namesa, kaa nanaaskumaat Chishemanituu, kaa papahkwenaat aniyuu aaihkunaau kaye aniyuu namesa ekw kaa miyaat aniyuu uchischinuhamuwaakan chechii maatinamuwaayich aniyuu iinuu. 37Misiwe kaa itashitwaau chii miichisuuch kaye chii tepimiichisuuch. Ekw anichii chischinuhamuwaakanich kaa maamuushtinahkwaau aniyuu iskushtawaaniyuu. Niishwaashch maak utipiiwat chii saakashchinihtaauch. 38Anichii maak kaa ashamaakanuutwaau wiyesh newaau chishemitaahtumitanuu chii tashiichenich naapeuch. Awaashach ekw maak iskweuch namui uhchi asitichimaakanuuch.
39Ekw Jesus kaa chihchitishihwaat aniyuu iinuu, kaa puusit aniyuu utiyuu ekw anite Magadan kaa ishinihkaateyich aschiiyuu chek kaa misakaat.
Currently Selected:
Matthew 15: crjrNT
Highlight
Share
Copy
Want to have your highlights saved across all your devices? Sign up or sign in
Southern East Cree - Roman script New Testament © Wycliffe Bible Translators, Inc. and Canadian Bible Society, 2001.
This work is licensed under the Creative Commons Attribution-NonCommercial-NoDerivatives 4.0 International License. To view a copy of this license, visit http://creativecommons.org/licenses/by-nc-nd/4.0/ or send a letter to Creative Commons, PO Box 1866, Mountain View, CA 94042, USA.
