Zɛkaria 14

Kɔraawiizi kora dii wia

1Hɔpizii la Kɔraawiizi n niŋ di ia seriya la ra bau. Jɛrusalɛm hina, ii dɔma daŋ paagi ii kuna, di bɔnnaa ii sibɔɔ.

2Kɔraawiizi daŋ chaali hɛssi hina maa bá wa lɔ Jɛrusalɛm. Ba daŋ kpegluu, di pigzi u diini di paagi kuna, di punzi u haana. A bolzeŋ hina keza maanii bá lauri kaali, ka ka ba keza.

3Denii Kɔraawiizi izi di yoo a hɛssi hina gunla uŋ ɔɔ ra ɛɛ laal hɔpizii la. 4A hɔl hiŋ, u daŋ chi Ɔlivizi Bizeŋ nyuu Jɛrusalɛm wiifurii, a bii daŋ peri anɛɛ di chi u wiifurii di la u wiicholii, waluuzeŋ chɔɔ a baaŋ. U yeŋ la wiifurii nomɛɛl wiikakag u yeŋ ge la wiifurii nodig wiikakag. 5Ií daŋ ga n bizeŋ waluu di chɔ, dikuu un niŋ du jaŋ di ga hel boljiga Azɛl wia. Ií daŋ chɔ gunla iiŋ faa chɔwɛɛ saŋa la hɛri n ziglee Juda Koori Uzzia kora dii saŋa la.#Emɔs 1:1 Denii Kɔraawiizi la minna hum la ni mɛlikazi la maa kpau ba.

6A hɔl hiŋ, bɔchaaŋ wàá du de. Waari gɛɛ kɔɔl wàá du de. 7A hɔpizii naa daŋ kur. Wàá dɔɔ hɔpizaa gɛɛ hamuŋa. Kɔraawiizi bɛnnɛ zum a hɔpizii. Di bɔr waa biri, ka u daŋ chaani.

8A hɔl hiŋ, nii la n dɔɔ miibɔɔ daŋ pal lii Jɛrusalɛm, u yeŋ pal di ra la Muuzensiwii, u yeŋ ge ra la Muuzeŋ Mɛditerenɛn, wem ni waari saŋazi maa.#Ɛzɛk 47:1; Wipi 22:1

9A saŋa Kɔraawiizi daŋ di kora durnya maa ni. A hɔl hiŋ, Kɔraawiizi kpannɛ niŋ du de, ú bɛŋ sɔŋ ka.

10Di lii a hɛri maa biini, di chi Gɛba n du wiifurii nomɛɛl wiikakag di ga hel Rimɔn n du Jɛrusalɛm wiifurii nodig wiikakag, daŋ chɔɔ kpantalaŋ. Jɛrusalɛm daŋ guali a maa ni, di lii Bɛnjamin Dominuuzeŋ di ra la Lugli Hor la ga hel Sirii Hor la, di kaa chi Hananɛl Diijaŋ la di ra la bɔr la banna kuari koori grepu siŋ la. 11Nɛra daŋ du u biini. Ba ŋmɛnɛ maa wàá ka chɔguu. Jɛrusalɛm daŋ jaa na u hiŋ nɛnnɛ.

12Wiilchɔgii la Kɔraawiizi n niŋ kpa ta hɛssi hina la maa n lɔ Jɛrusalɛm hina laal labuu keŋ. Ba bɔrahɔna danna pɔɔh di ba haa ra nyiŋ. Ba siwee ni ba nuuzuŋŋa maanii niŋ pɔɔh.

13A hɔl hiŋ, Kɔraawiizi daŋ du baala ɔnsii werge maa. Baal maa daŋ lau u dɔŋhiŋ nonii bá lɔ dɔŋa. 14Juda baala gba daŋ du Jɛrusalɛm di ra yoo laal. Ba daŋ paagi hɛssi hina la maa n bar baa la daama maa, ba saliŋ, saliŋhuŋŋa ani laala werge maa. 15A wiilchɔgii naa dɔŋ daŋ lauri ba zagra, nyugmazi, kauzi ani sela la maa n du ba chɔɔribɔra la.

16Durnya hɛssi hina la n niŋ ka di lii banla n lɔ Jɛrusalɛm la, danna ba de di waa jaami Kɔraawiizi la n ɛɛ Koori, di ɛɛ Fɔŋŋa Maa Hiŋ la binaa bina maa. Ba daŋ ɔɔ ra di Pampannizi Hɔpizizeŋ#Levi 23:34, 39-43 la gba de. 17Di durnya hɛri bɛl maa hina wa vɛɛwɔ lugɔ bá la Jɛrusalɛm di ga jaami Koorizeŋ Kɔraawiizi Fɔŋŋa Maa Hiŋ, ba wàá na dooŋ. 18Di Ijip hina wa vɛɛwɔ bá jaa ba ni, ba wàá na dooŋ. Kɔraawiizi daŋ kpa wiilchɔgaa ta ba ni, gunla uŋ ɛɛ hɛrdumazi hina la maa n vɛɛwɛ bá ba wa di Pampannizi Hɔpizizeŋ la. 19Ijip hina ni hɛssi hina la maa n vɛɛwɛ bá la Jɛrusalɛm di ga di a Pampannizi Hɔpizizeŋ naa, digna tɛraarɛ guŋ.

20A hɔl hiŋ, ba daŋ sɛbi zagra bɛlinzi ni, ‘Kɔraawiizi Horaa Keŋ’. Viini la baŋ kpawɛɛ ra daali kuna Kɔraawiizi Dia la ge ɛɛ lugɔ tassananaananaa la n chigɛ mbusu lizibɔr la see. 21Vii la maa n du Jɛrusalɛm ni Juda maa daŋ ɛɛ kunnaniinanii tɛɛ Kɔraawiizi Fɔŋŋa Maa Hiŋ. Banla maa n niŋ ba, bá wa lizi mbusu, daŋ kpa a viini aŋhina daali ba mbusu lizaa ola. A hɔl hiŋ, nɛr maa wàá ka ɛɛ kɔkɔɔzi Kɔraawiizi Fɔŋŋa Maa Hiŋ Dia biini.

Currently Selected:

Zɛkaria 14: vag

Highlight

Copy