Luuk 15

Peleulii sɛɛlii wia

(Mat 18:12-14)

1Lampolɛɛra ni wichɔgɛɛra maa ɔɔ ra nyiŋŋi ba du Yeesu be di ra nuu u wiŋɔzi. 2Guŋ waa Farisizi ni Kɔraawiizi Hɔnzunna la pattɛ. Ba ŋɔ, “Baal naa ɔɔ sɛɛ wichɔgɛɛra wiarɛ, u ni baa ra di.”

3Yeesu jaa ta sɛɛlii bɛl di pɛɛzi baa, 4“Di ii bɛl dɔɔ u peeza kalfa, bɛl ga leu, wàá gil tokkoanaazu ni fidikabɛl la pir, ka la ga nyiŋŋi kpaŋkpaŋ la n leuwe la guŋŋ ú wa nauwaa? 5Di u wa nau, u daŋ kpau sag u baŋaa, u bɔra sɔɔni. 6Di u wa hel bol, u daŋ yir u dammuzi ni u dɔŋahina, di ŋɔ, ‘N na n peleulii labuu. Awia, ií ba ya gil yaa bɔra sɔɔni.’

7Ií gil n ŋɔ ii be, ‘Gunnɛ á wichɔgɛɛri kpaŋkpaŋ n bir u bampirii wia sɔɔni Kɔraawiizi ni u mɛlikazi la bɔra werge kaali nɛnanaa tokkoanaazu ni fidikabɛl la n waa ba bampiree biraa dɔɔwɛ la.’

Kebileulii sɛɛlii wia

8Di haaŋ bɛl dɔɔ saliŋhuŋŋu kebisau fi, bɛl wa leu, wàá choŋŋi fintina chaazi dia di pigzi guŋŋ ú wa nauwaa? 9Di u wa nau, u daŋ yir u dammuzi ni u dɔŋahina di ŋɔ, ‘Ií ba, ya gil yaa bɔra sɔɔni, dikuubɛɛwiai, n na n kebii la n leuwe labuu.’ 10Ií gil n ŋɔ ii be, ‘Gunnɛ Kɔ́raawiizi mɛlikazi ge bɔra sɔɔni, dikuu wichɔgɛɛri kpaŋkpaŋ n bir u bampirii wia la.’ ”

Biileulii sɛɛlii wia

11U kaa ŋɔ, “Baal bɛllɛ izee di dɔɔ biibaala banɛɛ. 12Bichala hiŋ ŋɔ ba mɛɛ be, ‘N mɛ, kpa n kapɛttɛ la min niŋ wa di la tɛŋ.’ U bɔnni u kuna maa di tɛɛ baa.

13Denii hɔpizaa anɛɛ, bichala hiŋ la izi chaali u kuna la maa, di kpa kaali hɛri bɛl n du bɔɔnɛɛ. Uŋ ga du de la, u ra di u hiŋ di kpa u kebee maa ra di jagajaga. 14Uŋ wa di a maa tuŋ, lɔchɔgii chol a hɛri. Waa kaa na diwee ra di. 15U ga zuu a hɛri hiŋ bɛl huma. U gil u la lɛl bɛl, di gaa binni u perekuzi ni. 16U faa ra nyiŋŋi u vii wer di diwee la baŋ kpawɛɛ tɛu, ú ra tɛɛ perekuzi la. Ka nɛr maa wɔɔ tɛɛwɛ kummaa ú di.

17Denii u nfɛrɛ jaa ba. U ŋɔ, ‘N mɛɛ dɔɔ balkpilaa ba du u be ra hum u hunjigzi. Ba maa ɔɔ na diweere di ka ra ka. Ka lɔzi ra kpu miŋwaa. 18N daŋ izi la n mɛɛ be ga ŋɔ u be, N mɛ, n ɛɛ Kɔraawiizii wichɔgaa, di ɛɛ i ge gba wichɔgaa. 19Maa kaa dɛg hiŋ yiriŋ i bie gba. Gil n ɛɛ i balii bɛl.’ 20Awia, u izi ú la u mɛɛ be.

Uŋ haa ga du bɔɔnɛɛ ra ba, u mɛɛ nau. U wia dɔɔu sinyɛna. U chɔ la ga faamuu di suuzuu.

21U bie la ŋɔ, ‘N mɛ, n ɛɛ Kɔraawiizii wichɔgaa, di kaa ɛɛ i ge gba wichɔgaa. Maa kaa dɛg hiŋ yiriŋ i bie.’

22Ka u mɛɛ ŋɔ u balaa be, ‘Ií la manaŋ ga nyiŋŋi tagtajannanii wa laaluu, di nyiŋŋi nonibisig wa du u nonibii, di nyiŋŋi gawa ba di wa du u naazi, 23ka la ga nyiŋŋi nabii la yaa n dɛɛzɛɛ u pɔl werge la ba wa kpu ya di, di ra dua, 24dikuubɛɛwiai, n bie naa faa siuwɔɔ ka bir ra nyiŋ. U faa leuwoo, ka n kaa wa nau.’ Denii ba izi ra dua duari.

25Banna ɛɛ annii naa maa, di u biinabɔma hiŋ haa du koo. Unna ba bol di waa dugli dia, u nuu banna huuh kuna di ra sa. 26U yir ba balii bɛl di pɛɛzuu amaniye la n du dia. 27U ŋɔ, ‘I niweere ballɛ. I mɛɛ gil ba kpu nabii la iin dɛɛzɛɛ u pɔl werge la, dikuu uŋ kaa nau di wiimaa wɔɔ ɛɛwɛ la wia.’

28Denii a biinabɔma hiŋ baaŋ fuuh. Waa sɛɛwɛ u zuu dia. U mɛɛ lii ra fɔrguu. 29U ŋɔ u mɛɛ be, ‘Biŋkpila naa maa miŋ du i be ra humii naa, maa i nua vɛɛwɛ maa. Ka n haa waa bubii gba nawɛɛ i be, ń ni n dammuzi di, di dua gba. 30Ka i biibaal naa n kpa i kebee maa, di tɛɛ sɛnsɛnna ba di n wa ballɛ naa, i gillɔɔ ba kpu nabii la yaa n dɛɛzɛɛ u pɔl werge la tɛu. Nau!’

31U mɛɛ ŋɔ, ‘N biibaal, i du n benii saŋa maa, n kummaa ge ɛɛ i kummaa. 32Miŋ gillɛ ba ra dua duari, di gil ba bɔra sɔɔni naa wessoo, dikuubɛɛwiai, i niwee la faa siuwɔɔ ka bir ra nyiŋ filaŋkeŋ. U faa leuwoo ka yaa bir wa nau.’ ”

Currently Selected:

Luuk 15: vag

Highlight

Copy