Jɔɔn 19

Baŋ ŋɔ ba kpaahzi Yeesu daakaŋlii ni wia

1Denii Pailɔt gil ba lɔɔzi Yeesu.#Mat 27:27-31; Maak 15:16-20 2Soojazi nyiŋŋi sɔɔhri di lawaa gurgi lugɔ kahuro, ka kpa hi Yeesu, di nyiŋŋi tagta aahmu bɛl n aahwɛ lugɔ zagbiiŋ nii, di ɛɛ lugɔ koori tagta, laaluu, 3ka ra hel u be di ra ɛɛu chɛɛtɛ bunɛɛgaa, di ra ŋɔ, “Jus hina koori, jaanjaamɔ,” di ra chɛ u lia.

4Pailɔt kaa lii di la Jus hina la be bossee di ga ŋɔ ba be, “Ií na u ni. Baal labuu ba kpa lii di ra bagli ia la. Maa wiimaa nawɛɛ ń tɛu.” 5Yeesu wa lii di sɔɔhri kahuro la ani tagta aahmu la haa du u ni. Pailɔt ŋɔ, “Waabuu keŋ.” 6Kɔraawiizi Kizeehina Nabɔnzi ni ba balaa n wa nau la, ba izi di ra pogzi, “Gil ba kpuu! Gil ba kpuu daakaŋlii ni!” Pailɔt ŋɔ, “Amɔ, ií himmaa kpau la ga di u kpui seriya ka kpuu daakaŋlii ni. Miŋwaa waa wichɔgaa maa nawɛɛ u ni ń di u kpui seriya.” 7Jus hina la ŋɔ, “A baal faa ŋɔ u ɛɛ Kɔraawiizi biere. Yaa kiire u chɔgi guŋ di dɛg kpui.”

8Pailɔt n wa nuu ba wiŋɔzi naa guŋ, a kaa ɛɛu ɔnsii di ra jaa. 9U kaa zuu seriya diiribɔr di kaa wa pɛɛzi Yeesu, “Lee i lii naanɛi?” Yeesu waa wiimaa ŋɔwɛɛ. 10Pailɔt ŋɔ u be, “Hàá sɛɛ bagliŋ bɔr la hiŋ liwɛɛ? Amɔ, haa zummɛ lugɔ n dɔɔ fɔŋŋaa lugɔ min niŋ wer pillii i ra la, di kaa dɔɔ fɔŋŋa min niŋ di i kpui seriya bá kpui daakaŋlii la nii?” 11Yeesu ŋɔ, “Di Kɔraawiizi faa waa guŋ sɛɛwɛ, i faa waa fɔŋŋa maa dɔɔwɛ n ni. Ama nɛr la n ɛɛŋ sɔsɔgɔ di kpaŋ du i nonee biini naa, u wichɔgaa kannɔ kaali i hor.”

12Denii Pailɔt jaa ra ɛɛ ania maa ú wer tɛu ŋmɛnɛɛ ú ra la, ka Jus hina la ra pogzi di ra ŋɔ, “Di i tɛu ŋmɛnɛɛ u ra la, amɔ, i ɛɛ Koorizeŋ Siiza dɔmnɛ. Di nɛr haŋ ŋɔ lugɔ waabuu koori, amɔ, a koraa u ra foozi la.” 13Pailɔt n wa nuu guŋ, u kpa Yeesu lii bossee di soŋŋi bɔr la bam paa bia dau, de sag chiŋ di ɛɛ ba seriya diiri sognibɔr, Jus hina ra yir de Gabata la. 14Hɔpizii la Jus hina maa n ɔɔ ra ɛɛ sirya ka hɔpizi bá di ba Gillikaali diwee labuu ba ra ɛɛ wia naa. Chɔɔzin barii, Pailɔt ŋɔ Jus hina la be,

“Ií na ii koori la ni.”

15Ba ra pogzi, “Gil ba kpuu! Gil ba kpuu daakaŋlii la ni!”

Pailɔt pɛɛzi baa, “Ii koorii ii ŋɔ ń kpu naá?”

Kɔraawiizi Kizeehina Nabɔnzi la bir ŋɔ, “Yaa waa koori dɔɔwɛ di Koorizeŋ Siiza lɛi.”

16Denii Pailɔt jaa kpau tɛɛ baa bá ga kpu daakaŋlii ni.

Baŋ kpaahzi Yeesu daakaŋlii ni wia

(Mat 27:32-44; Maak 15:21-32; Luuk 23:26-43)

Ba kpau la bá ga kpu. 17U himmaa kpa u daakaŋlii sag u baŋaa ba ra la. Ba wa hel bɔr la banna yir Nyuhog bɔr, Jus hina ge ra yir de Gɔlgɔta la. 18Denii ba kpau kpaahzi mari daakaŋlii la ni di kpau baŋ chiŋ ka kaa ɛɛ baala banɛɛ baŋhina ge guŋ di kpa ba ge baŋzi chiŋ Yeesu kɛra, ka Yeesu du ba maa baambaaŋ.

19Pailɔt faa gillɔɔ ba mɔŋ hɔŋ bɛl di kpa pɛli de di sɛbi wia naa du u ni, “JUS HINA KOORI, NAZARƐF HINUU YEESU.” 20A bɔr ni Jɛrusalɛm faa waa nɛɛ. Awia, Jus hina kpila maanii liwɛɛ ba de di waa karmi a hɔŋ. Ba himmaa mɔɔri biinii ba sɛbi guŋ ani Room hina mɔɔri biini ani Giris hina ge mɔɔri biini. 21Awia, Kɔraawiizi Kizeehina Nabɔnzi ŋɔ Pailɔt be, “Kennaa hiŋ gillɛ ba sɛbi ŋɔ lugɔ Jus hina koorii kennaa, guŋ waa wer. Gil bá sɛbi lugɔ u himmaanii ŋɔwɛɛ lugɔ u ɛɛ Jus hina koorii.” 22Pailɔt bir ŋɔ, “Gunla miŋ gillɛ ba sɛbi la, gunnɛ miŋwaa hor. N teŋ sɛbɔɔrɛ tuŋ.”

23Soojazi banaazuu faa kpaahzi Yeesu mari a daakaŋlii ni. Baŋ wa ɛɛwɛ tuŋ, ba paa u laala, di lawaa mɔnni bɔra anaazu bɔnni dɔŋa. Ka unla uŋ ɔɔ laali di du biini lawaa, ba waa u yemmaa nyɛttɛ ban niŋ wer lau u de pur. Ka u maa ɛɛ u bir.

24Awia, ba ŋɔ dɔŋa be, “Ya gilɛɛ lawuu bargi, ka ta kuna, unla maa n niŋ diu, ya zum a hiŋ.”

Kɔraawiizi Hɔŋ biini ba faa feloore sɛbi yembɛl di ŋɔ,

“Ba kpa n laalaa bɔnni dɔŋa,

ka ta kuna

n tagtajaŋ wia.”

Gunla baŋ faa sɛbɛɛ la, guŋ himmaanii a soojazi ge wa ɛɛ la.

25Yeesu maa ni u maazeŋ ni Klɔpas haaŋ Mɛɛri ni Magdala hinuu Mɛɛri, ba maa chi Yeesu daakaŋlii la be.#Luuk 8:2 26Yeesu na u maa di na u hiŋrinɔŋŋii u be di ŋɔ u maa be, “Na i bie,” 27di kaa ŋɔ u hiŋra la be, “Na i maa.” U hiŋra la jaa kpogluu ga du u himmaa dia di lii a saŋa.

Yeesu siu wia

(Mat 27:45-56; Maak 15:33-41; Luuk 23:44-49)

28Denii Yeesu zum lugɔ wiimaa jaa tunuu. U jaa ŋɔ, “Niinyɔgzii lawiŋ.” Kɔraawiizi Hɔŋ faa bagli guŋ gba wiarɛ.#Yira 69:21 29Sinnyɛg du vii bɛl biini de. Ba kpa chiih bɛl, di suu hisɔp daa bɛl ni di kpau lii sinnyɛg la di kpa tɛr Yeesu ú nyɔɔ. 30Yeesu n wa nyɔɔa tuŋ, u ŋɔ, “Wiimaa jaa tunuu,” ka willi u nyuu ka jaa gil u duma lii u ni u siu.

31Denii Jus hina la, la Pailɔt be di ga suŋŋuu, dí ú gil soojazi la kuugi daakaŋlii hina la naazi ka lizi baa a daakaŋlaa ni, dikuubɛɛwiai, ba waa nyiŋŋi lugɔ bá sag de, bá Hɔpizizeŋ wa hel baa. Ba faa ra ɛɛ siryaa ka hɔ́pizi, bá Hɔpizizeŋ la n ɛɛ u zeŋ himmaa la wa hel. 32Soojazi la la, di ga kuugi banla ni Yeesu baŋ kpaahzɛɛ mari daakaŋlaa ni la naazi. 33Ka baŋ wa hel Yeesu be, ba na lugɔ u teŋ siuwɔɔ. Ba waa kaa kuugi waabuu naazi. 34Ka soojazi la bɛl kpa u kandaa di yag u loŋŋi fur, u chal ni nii wa lii.

35Nɛr la siwee n nau, waabuu ra di daansɛɛ naa. U daansɛɛ la ɛɛ wibiire. N himmaa zummɔ lugɔ wibiire di ra ŋɔa ií ge wer zum lugɔ wibiire. 36Kɔraawiizi Hɔŋ biini, ba faa sɛbɔɔrɛ, “Ba wàá ku u hog maa.”#Yira 34:20 37Ba kaa sɛbi yembɛl, “Ba daŋ binni nɛr la baŋ kpa kandaa yag la.”#Zɛka 12:10 Awia, gunla maa baŋ faa sɛbɛɛ Kɔraawiizi Hɔŋ biini la, guŋ himmaanii ge wa ɛɛwɛ.

Yeesu hugaa wia

(Mat 27:57-61; Maak 15:42-47; Luuk 23:50-56)

38Denii Joosɛf Arimatia ba Pailɔt be. A Joosɛf faa ɛɛ Yeesu hiŋrii ka u faa waa sɛɛwɛ ú ra hiŋuu bɔchaaŋ ni dikuu uŋ faa ra ɔm Jus hina la wia. U ba waa suŋŋi Pailɔt ŋmɛnɛɛ ú lizi Yeesu daakaŋlii la ni di ga hug. Pailɔt tɛu ŋmɛnɛɛ. U la ga lizuu. 39U ni Nikɔdɛmus maanii faa la de. Nikɔdɛmus la n faa la Yeesu be hamuŋa la. U faa kpa daahɛgsɔɔhsuma aŋhina baŋ ɔɔ kpa ra du ba lalaa ni n kannɛ werge di ba.#Jɔɔn 3:1-10 40U ni Joosɛf la lizi Yeesu di kpa wɛjɛhuŋŋu bɛl fɔɔzuu ni kunsɔɔhrisuma, gunla Jus hina n ɔɔ ra ɛɛ ba lalaa ka ra hug baa la.

41Kambol la n du bɔr la baŋ kpu Yeesu labuu, ba faa tug bii bá hug nɛbɛl, ka ba faa haa waa nɛr maa hukke de. 42A bii bɔɔ n dugli de la, ba kpa Yeesu hug de, dikuu uŋ ɛɛ ba Hɔpizizeŋ sirya hɔpizii la wia.

Currently Selected:

Jɔɔn 19: vag

Highlight

Copy