Jɔɔn 1
1
Wiŋɔɔlii la n dɔɔ miibɔɔ wia
1Lugli la, Wiŋɔɔlii bɛllɛ faa du de. A Wiŋɔɔlii faa du Kɔraawiizi benii, di faa ɛɛ Kɔraawiizi.#Lug 1:1; 1Jɔɔ 1:1 2U ni Kɔraawiizi maanii faa du de lugli la.
3U fɔŋŋa biinii kummaa lii. Kummaa waa hoo di waa u fɔŋŋa biini liwɛɛ. 4U benii miibɔɔ lii. A miibɔɔ ra chaani nɛra ni. 5U du bɔbirii di ra chaani. Bɔbiri la wàá wer kpegluu maa.
6Baal bɛl faa izi. U sɔnnɛ faa Jɔɔn. Kɔraawiizi huŋhunnii.#Jɔɔn 3:28 7U ba ú wa di Bɔchaaŋ Hiŋ la daansɛɛ, di bagli u wia, nɛ́r maa wer sɛɛ u wia dikuu u daansɛɛ hiŋ wia. 8A Jɔɔn faa waa a Bɔchaaŋ Hiŋ ɛɛwɛ. U faa ballɔɔ ú wa bagli Bɔchaaŋ Hiŋ la n faa ra ba la wia. 9Unla n ɛɛ Bɔchaaŋ Hiŋ himmaa faa ra ba durnyaa ú waa chaani nɛra maa ni.
10Ka uŋ wa ballɛ la, ba wɔɔ zummɛ. Waabuu faa ta baa, ka uŋ wa ba ba be, ba waa wette ba zumuu. 11U ba u himmaa hɛrii. U himmaa nɛra vɛɛu ta. 12Ka banla waa maa n sɛɛ u wia di yarduu nɛnnɛ la, u gillɔɔ ba wer birgi Kɔraawiizi biizi. 13Gunla nɛra n ɔɔ ɛɛ di lul ba biizi la, guŋ lɛi u ɛɛ ka lul baa. Newea fɔŋŋa biini lɛi ba wer birgi u biizi. Kɔraawiizi fɔŋŋa biinii ba wer birgi u biizi.
14Wiŋɔɔlii la n faa du de saŋa maa la, wa birgi neweere di ba wa du yaa be. Yaa na u girme, di wer zum lugɔ Kɔraawiizi biikpaŋkpannɛ. U wia maa wessoo werge. U kaa dɔɔ wibii ge werge.
15Jɔɔn faa di u daansɛɛrɛ, di ŋɔ u wia bɔkpega ni, “Nɛr la miŋ faa ŋɔ u wia lugɔ mìŋ́ feluu ba, ka waabuu ɛɛ nabɔma n ni werge maa, di du de mɔɔ ka ba haa wa luliŋ la, a hinnɛ keŋ.” 16U faa dɔɔ Kɔraawiizi hiinaare werge, yaa maa ra na hiinaa werge u be. 17Moosis faa bagli yaabuu Kɔraawiizi Gbɔgni. Yeesu Kristo genii bagli yaa Kɔraawiizi hiinaa ani u wibii. 18Nɛr maa haa waa Kɔraawiizi nawɛɛ. Ka Yeesu la n ɛɛ Kɔraawiizi himmaa, di ɛɛ u biinɔŋŋii la, waabuu bagli yaa u wia, yaa wer zumuu.
Jɔɔn Kɔraawiizi Niisɔɔri amaniye lizaa wia
(Mat 3:1-12; Maak 1:1-8; Luuk 3:1-18)
19Denii Jus hina baŋhina n du Jɛrusalɛm hum ba Kizeehina baŋhina ni Levi dee ge baŋhina, dí ba la Jɔɔn be di ga pɛɛzuu nɛr la dee n ɛɛu. U ɛɛ Kristo la n niŋ ba labuu gɛɛ waa lɛiyɛi? Ba ba wa pɛɛzuu. Jɔɔn jaa bagli u himmaa wia tɛɛ baa. 20Waa sɛɛwɛ dar baa ka ŋɔ, “Akai. Min lɛi Kristo la.”
21Ba ŋɔ, “Ka anɛɛ hinnɛi? Hinuu Ɛlijaa?”
U ŋɔ, “Akai.”
“Amɔ, hinuu Kɔraawiizi dɔgtɛɛ laa?”
U ŋɔ, “Min lɛi.”#Gbɔg 18:18
22Ba ŋɔ, “Ka anɛɛ hinnɛi? Bagli yaa i wia, yá wer ga bagli tɛɛ banla n hum yaa la. Ɛrɛɛ i ge ra yir i hinnɛi?”
23U ŋɔ, “Kɔraawiizi dɔgtɛɛ Aizaaya faa ŋɔ n wiarɛ u hɔŋ biini, Ba daŋ nuu nɛbɛl n na sii hɛribɔduma biini, di ra ŋɔ, ‘Yaa Dɔɔri ra bau. Ií ra ɛɛ wia á ra deŋli ni a ŋmɛnizi.’ ”#Aiza 40:3
24Denii banla n ɛɛ Farisizi la pɛɛzuu, 25“Di haa Kristo ɛɛwɛ, haa kaa ɛɛ Ɛlija, haa a dɔgtɛɛ gba ɛɛwɛ, ka ɛrɛɛ i ra sɔ nɛra Kɔraawiizi nii kennei?”
26U ŋɔ, “Niirɛ miŋwaa kpa ra sɔ baa. Ka baal bɛl du ii be, ii siwee waa u ni chaanɛɛ. 27Mìŋ́ ballɛ mɔɔ ka u ge ba. Ka waabuu ɛɛ nabɔma n ni werge maa. Maa dɛg min niŋ lizi u gawa gba tɛu.”
28Ba maa n na ŋɔ wia naa, Bɛtani la n du Jɔɔdan muu keŋkere, bɔr la Jɔɔn n faa ra sɔ nɛra Kɔraawiizi nii labuu ba du.
Kɔraawiizi pebii wia
29Hɔɔŋ wa pizɛɛ, Yeesu ra ba u be. Jɔɔn kaa nau unna ba, di ŋɔ nɛra la n du de la be, “Ií na Kɔraawiizi Pebii. Waabuu niŋ waa lizi durnya wichɔgaa di ra ha la.#Lug 22:8 30Miŋ faa ŋɔ baal bɛl wia lugɔ mìŋ́ feluu ba, ka u ɛɛ nabɔma n ni werge maa, di du de mɔɔ ka ba haa wa luliŋ la, a hinnɛ keŋ. 31N himmaa gba faa wɔɔ zummɛ. Ka u wiarɛ n ba di waa sɔ nɛra Kɔraawiizi nii, Ízrɛl hina wer zumuu.”
32U kaa ŋɔ, “N na Kɔraawiizi Dumnanii n lii chiŋ tuu, di wa togni u nyuu lugɔ komma. 33N faa wɔɔ zummɛ, ka Kɔraawiizi la n humiŋ la feli ŋɔ lugɔ di n wa na u Dumnanii n tuuwe di wa togni nɛr maa ni, amɔ, waabuu nɛr la n niŋ kpa u Dumnanii di du nɛra ni la. 34Too. N na guŋ. Awia, n na ŋɔ ii benii lugɔ baal naa ɛɛ Kɔraawiizi Biibaallɛ.”
Yeesu lugli hiŋra wia
35Hɔɔŋ wa pizɛɛ, Jɔɔn ni u hiŋra banɛɛ kaa chi de. 36Yeesu ge ga ba kɛra di waa kaali. Jɔɔn nau di ŋɔ u hiŋra be, “Ií na Kɔraawiizi Pebii la!”
37U hiŋra la nuu guŋ, di izi ga hiŋ Yeesu di ra la. 38Yeesu kɛɛ binni di na banna hiŋuu, u pɛɛzi baa, “Bɛɛ ii ra nyiŋŋei?”
Denii ba ŋɔ “Rabai,#1:38 Rabai zɛɛrɛ Bagli. lee i dia duɛi?”
39U ŋɔ ba be, “Ií ba wa na.”
Ba la ga na u duuribɔr a chɔɔzi ni, di du u be guŋŋ wiizi wa chol.
40Baala la n faa nuu Jɔɔn wiŋɔzi di hiŋ Yeesu la, bɛl sɔnnɛ faa Andru. U kpɛɛma ge sɔnnɛ faa Saimɔn Pitta.#Mat 4:18-20 41U la ga nyiŋŋi u kpɛɛma la di ŋɔ u be, “Yaa na nɛr la n ɛɛ Mɛsia#1:41 Hibru hina mɔɔri biinii Mɛsia ka Giris hina mɔɔri biinii Kristo. labuu.” Andru n yiruu Kristo la, Kristo la Kɔraawiizi n faa ŋɔ lugɔ u daŋ ŋmɛnɛ ba la wiarɛ u ŋɔ. 42U kpogluu la ú ga zum Yeesu.
Yeesu n wa na Saimɔn la, u ŋɔ, “Ba faa ra yiriibuu Jɔɔn bie Saimɔn. Filaŋkeŋ yaa daŋ jaa ra yirii Sifas.”#1:42 Sifas zɛɛrɛ Bii, Aram hina mɔɔri biini. Pitta ge zɛɛrɛ Bii Giris hina mɔɔri biini.
Yeesu n yir Filip ni Natanɛl wia
43Hɔɔŋ wa pizɛɛ, Yeesu ra nyiŋŋi u kaali Galilii hɛri. U ga na baal bɛl, u sɔnnɛ Filip, di ŋɔ u be, “Izi ra hiŋiŋ.”#Jɔɔn 12:21
44A Filip ni Andru ni Pitta maa bolle faa Bɛtseida. 45Filip ge ga na baal bɛl banna yir Natanɛl, di ŋɔ u be, “Yaa na nɛr la Moosis ni dɔgtɛɛzi n faa sɛbi u wia Kɔraawiizi Hɔŋ biini labuu. Waabuu Nazarɛf hinuu Joosɛf biibaal Yeesu.”
46Natanɛl ŋɔ, “Aa! Boljaga naa! Maa sɛɛwɛ nɛnanii maa n niŋ lii a Nazarɛf.”
Filip ŋɔ, “Ba wa na.”
47Ba kpa la. Baŋ gaa hel Yeesu be, Yeesu binni Natanɛl ka ŋɔ, “Jus hina nɛnanii bɛllɛ ra ba. Waa beela maa dɔɔwɛ.”
48Natanɛl ŋɔ, “Lee i lii zuminnɛi?”
Yeesu ŋɔ, “Hiŋ faa du fig daa zɛɛ, mɔɔ ka Filip ba i be di wa yirii la, n naibuu de.”
49Natanɛl ŋɔ, “N Nabɔma, i ɛɛ Kɔraawiizi Biibaallɛ. Izrɛl hina koorii hiŋ.”#Jɛrɛ 23:5-6
50Yeesu ŋɔ, “Miŋ ŋɔ min nai fig daa zɛɛ la wiarɛ i yardiŋ gɛɛ? I daŋ haa na wizenaa aŋhina, á kaali annii. 51Ií gil n ŋɔ wibii maa tɛɛ ia. I daŋ ŋmɛnɛ na chiŋ n pillɛɛ, Kɔraawiizi mɛlikazi ga de ra lii di ra tuu Mìŋ́ Newee Biibaal be, ka bir tinni ra kaali.”
Currently Selected:
Jɔɔn 1: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
