Luglaa 27
27
Aizik n kissi Jekɔb wia
1Aizik n wa zɛŋŋɛ werge, waa kaa ra na nɛnnɛ, u yir u biinabɔma Ɛsau, di ŋɔ, “N biibaal,” Ɛsau sɛɛ, di ŋɔ, “Minuu keŋ.”
2Aizik ŋɔ, “Filaŋkennaa, n zɛŋŋɔɔ werge, maa zum hɔpizii la min niŋ siu. 3Awia, kpa i hoo di zuu pir di ga nyiŋŋi dɔzi,#Lug 25:28 4di daaluu gunla minna nyiŋŋi la, di wa tɛŋ ń hee, ka kissii mɔɔ, ka siu.”
5Ka banna ŋɔ wia la, di Ribɛka pɛlɔɔ di ra nuu a maa. Ɛsau n wa liwɛɛ kaali pir la, 6Ribɛka ŋɔ Jekɔb be, “N nuuwɔɔ i mɛɛ n ŋɔ Ɛsau be 7lugɔ ú ga nyiŋŋi pir ol di wa daali diunanaa tɛu, ú di, ka kissuu Kɔraawiizi sibɔɔ mɔɔ, ka siu. 8Awia, n biibaal, keŋŋi digna di ra nuu nɛnnɛ. 9La ga binni sela la biini di lau bupɔlnanaa anɛɛ ba, ya kpaa daali diunanaa la i mɛɛ n na nyiŋŋi werge la. 10Di n wa daalɔɔ tuŋ, í kpaa la ga tɛɛ i mɛɛ ú di, ka kissii Kɔraawiizi sibɔɔ mɔɔ, ka siu.”#Lug 25:28
11Denii Jekɔb bir ŋɔ u maa be, “N ma, i zum gunla Ɛsau n dɔɔ huna, ka maa huna dɔɔwɛ. 12Di n mɛɛ wa largiŋ na, u daŋ zum lugɔ n na daruubuu, di gil n kissaa ka seeŋ nua.”
13Ka Ribɛka ŋɔ, “Di a nuuseei waa ba, minuu a na. Awia, hiŋwaa ɛɛ gunla miŋ baglii naa. Lii ga nyiŋŋi a buuna ba.” 14Jekɔb faa jaa nuu u maa wiŋɔzi la, di lii ga lau a buuna anɛɛ ba, Ribɛka kpaa di daali diunanaa, gunla Aizik n ɔɔ ra nyiŋŋi la. 15Denii u kpa Ɛsau laala la n wesse werge di tɛɛ Jekɔb u laali. 16U faa kpa a buuna hɔna di tɔ u vaama ni u baŋaa, 17ka jaa kpa a diunanaa ni paanuu uŋ ɔɔzɛɛ tɛɛ Jekɔb.
18Jekɔb kpa a diwee di la u mɛɛ be, di ga ŋɔ, “N mɛ!” Aizik ŋɔ, “N biibaal.” Ka bir pɛɛzi, “Anɛɛwɛi?”
19Jekɔb na manaŋ ŋɔ, “I biinabɔma Ɛsaurɛ. N ɛɛ gunla maa hiŋ bagliŋ labuu. Izi so di hee a ol yeŋ ka kissiŋ.”
20Aizik pɛɛzuu, “Ɛrɛɛ i ɛɛ di nau manaŋ kennei?”
Jekɔb ŋɔ, “Kɔraawiizi la hinna hum labuu hiiniŋ.”
21Denii Aizik ŋɔ Jekɔb be, “Ba n be bɔnnaa. N na nyiŋŋuu ń largi i bɔrahɔŋ na, di Ɛsaurɛ hiŋ wibii maa gɛɛ?” 22Jekɔb la u be, u ga larguu di na, ka ŋɔ, “I loobii ra lii Jekɔb loobiire, ka i vaama waa ɛɛ Ɛsau vaama.” 23U faa waa wette zum Jekɔb, dikuu u vaama n dɔɔ huna alugɔ Ɛsau vaama wia. U faa ra nyiŋŋuu ú kissuu ka bir pɛɛzuu, 24“Hinuu Ɛsau wibii maa?”
Jekɔb ŋɔ, “Ɛɛh, minuu wibii maa.”
25Denii Aizik jaa ŋɔ, “Kpa a ol tɛŋ ń hee ka kissii.” Jekɔb kpa a ol tɛɛ u mɛɛ, u hee, di kaa kpa siŋ di tɛu, u nyɔɔ. 26Aizik kaa ŋɔ, “Ba ɛŋ di wa faamiŋ, n biibaal.”
27Denii Jekɔb la ga faamuu. Uŋ ga faamuu la, u nuu u laala la sɔɔh, ka faa jaa kissuu di ŋɔ,
“N biibaal sɔɔh summɔɔ
alugɔ pir yembɛl
Kɔraawiizi n kisseere.
28Kɔ́raawiizi ɔɔ tɛi sɔnii
di gil i pattikuna lɛɛ,
í na mia ni siŋ werge.
29Kɔ́raawiizi gil hɛrkpila maa nɛra
ɛɛ i balaa di ra tognii.
I daŋ ɛɛ i lulla maa dɔɔri
bá ge ra tognii.
Di banla maa wa seei nua,
Kɔraawiizi daŋ see baa nua.
Di banla maa ge kaa wa kissii,
Kɔraawiizi daŋ kissi baa.”#Lug 25:23
30Aizik n haŋ wa kissuu ka u lii kaali, a waa birgee ka u kpɛɛma Ɛsau ge lii pir ba. 31Denii u ge daali diwee la u mɛɛ n na nyiŋŋi werge la di wa tɛu, ka ŋɔ u be, “N mɛ, izi so di hee a ol yeŋ, ka kissiŋ.”
32Aizik pɛɛzuu, “Anɛɛ hinnɛi?”
Ɛsau ŋɔ, “Minuu i biinabɔma Ɛsau.”
33Aizik n wa nuu guŋ, u bɔra ra sa werge, u ŋɔ, “Ka anɛɛ n kpu ol di daali diwee di wa tɛŋ lai? N diabuu tama ka i haŋ ba la. N teŋ kissuubuu, a waa kaa dɔɔ biraa maa.”
34Ɛsau n wa nuu guŋ, u ra chɛɛhgi di ra ŋɔ, “N mɛ, kissi n ge!”
35Ka Aizik ŋɔ, “I niwee ballɔɔ di wa dariŋ, n kpa a kissaa la maa tɛu.”
36Denii Ɛsau ŋɔ, “Guŋ wiarɛ u sɔŋ di Jekɔb la, dikuubɛɛwiai, u darimbuu bunɛɛ. U feloore lɛɛ n nabɔmuu, di kaa lɛɛ n kissaa naa ge jaa.” Denii u kaa pɛɛzi u mɛɛ, “Amɔ, kissaa maa waa kaa hoo hin niŋ kissi n gea?”
37Aizik ŋɔ Ɛsau be, “N teŋ gillɔɔ Jekɔb birgi i dɔɔri, di kaa ŋɔ lugɔ u kpɛɛnna ni u niuna maa daŋ ɛɛ u balaa di ra humuu. N tɛubuu mia ni siŋ. Awia, kissaa maa waa kaa hoo min niŋ kissii, n biibaal!”
38Ɛsau haa vɛɛ suŋŋuu, di ŋɔ, “Amɔ, kissikpaŋ bɛnnɛ i dɔɔ di ra kissi nɛraa? N mɛ, kissi n ge gba!” Uŋ wa ŋɔ guŋ tuŋ, u ra chɛɛhgi.
39Denii u mɛɛ Aizik ŋɔ u be,
“I duuribɔr wàá dɔɔ sɔnii,
i hɛri ge waa du sum.
40I daŋ birgi laallɔɔri,
di hum ra tɛɛ i niwee.
Ama, di i bɔra wa nyɛkkɔ
u dɔɔra sɛɛi wia,
i daŋ bargi i hiŋ
di lii u be.”
Jekɔb n chɔwɛɛ kaali Laban be wia
41Ɛsau faa jaa hah Jekɔb werge maa, dikuu un dar u mɛɛ u kissuu la wia. U ŋɔ, “N mɛɛ daŋ siu filaŋkeŋ maa, ka ń na bɔr di kpu Jekɔb.”
42Baŋ wa ŋɔ Ribɛka be gunla u biinabɔma Ɛsau n ŋɔwɛɛ la, u yir Jekɔb, di ŋɔ u be, “Ɛsau ra nyiŋŋi i kpuirɛ. 43Awia, n biibaal, a nuu n be. Izi manaŋ di chɔ di ra la n niubambie Laban be, Haran hɛri. 44Gilɛɛ waa ba di u baaŋ waa sɔɔnɛɛ. 45Di u wa sɔɔnɔɔ, u suuh gunla hiŋ ɛɛwɛ la, n daŋ yirii. Ɛrɛɛ wiarɛ n nyaa ii maa hɔpizikpanɛi?”
46Ribɛka ŋɔ Aizik be, “Hitti hina biihaana naa Ɛsau n kpawɛɛ naa wia ra lii n lɔgɔɔ. Awia, miŋ siuwɛ bɔ miŋ du de di na Jekɔb ge n kpa ba bɛl.”
Currently Selected:
Luglaa 27: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
