Luglaa 25

Abraham siu wia

1Denii Abraham faa kaa kpa haaŋ, ba ra yiruu Kɛtura.#1Faa 1:32-33 2U nuu lul Zimran, Jɔksan, Mɛdan, Midian, Isbak ani Suua. 3Jɔksan ge faa lul biibaala banɛɛ, ba ra yir baa Siiba ani Dɛdan. Dɛdan naannaa faa Assur, Lɛtus ani Lɛyum hina maa. 4Midian ge biibaalaa Efa, Ɛfɛ, Hanɔk, Abida ani Ɛldaa. Kɛtura naannaa faa bannii maa.

5Abraham faa gil u kundɔɔlaa maa tɛɛ Aizik. 6Ka uŋ faa haa du de ni miibɔɔ la, u faa tɛɛ u hahjigzi biibaalaa kuna, ka ta baa ŋmɛnɛɛ, ba lii u biibaal Aizik be kaali wiifurii paga hɛri.

7Abraham faa di binni kalfa ni tokkoahoro ni fidaanuere. 8Denii Abraham faa zɛŋ werge ka siu, di ga chɔɔ u naabaala be. 9U biibaala Aizik ni Ismɛl faa huguu Makpɛla bii bɔɔ baŋ tukke, u dugli Mamrɛ, Hitti hinuu Zɔha biibaal Ɛfrɔn hɛri,#Lug 23:7-9 10denii Abraham faa yau Hitti hina be, di hug u haaŋ Saara la. 11Abraham n wa siuwɛ la, Kɔraawiizi faa hiini Aizikii werge maa ni daama, saŋa la uŋ faa soge dugli Bɛɛ Lahai Rɔi la.

Ismɛl biibaala wia

12Abraham ni u haaŋ Haga biibaal Ismɛl la wiarɛ keŋ. A Haga faa ɛɛ Abraham haaŋ Saara yonne, ka faa ɛɛ Ijip hinuu.#Lug 21:13

13Ismɛl biibaalaa keŋ, di hiŋzi gunla baŋ lul baa, u biibambiluglii Nɛbayɔf, di kpa Kɛda, Adbiil, Mibsam, 14Misma, Duma, Massa, 15Hadad, Tɛma, Jɛtur, Nafis ani Kɛdɛma. 16Ismɛl biibaala faa ɛɛ dizi fidaanɛɛ kooraa, ba faa kpa ba sɔna dauri ba boljigzi ani ba chɔɔribɔra. 17Ismɛl faa di binni kalfa ni tokko ni kpɔrgɔ ni aniidaanɛɛrɛ ka siu, di ga chɔɔ u naabaala be. 18U naanna faa sogo Havilaa guŋŋ di ga hel Suur n dugli Ijip magbɔɔ, di i ra la Asur. Ba ni ba lulla maa dɔm.

Jekɔb ni Ɛsau wia

19Abraham biibaal Aizik wiarɛ keŋ, 20Aizik faa di binni tokkoanɛɛrɛ, ka kpa Ribɛka la n ɛɛ Bɛtuɛl la biihaaŋ, di faa kaa ɛɛ Laban ge niuhambie la. Bɛtuɛl ni Laban maa faa ɛɛ Siiria#25:20 Siiria sɔŋ bɛllɛ Aram. hinaa di lii Aram.

21Aizik faa suŋŋi Kɔraawiizii werge lugɔ ú tɛɛ u haaŋ Ribɛka bie, dikuubɛɛwiai, u faa waa lul.#Lug 16:1; 1Sam 1:2 Denii Kɔraawiizi faa nuu Aizik wiisuŋŋaa la, di gil u kpogli hia.#Luuk 1:13 22Biinɛɛri hiarɛ u faa kpogli. Mɔɔ ka u lul baa, ba faa haa du u hia biinii ka ra naa. Denii u pɛɛzi, “Bɛɛ wideere kennei?” Awia, u la ga pɛɛzi Kɔraawiizi, ú zum a zɛɛ.

23Denii Kɔraawiizi ŋɔ u be,

“Hɛssi anɛɛ hinaa du i hia,

a hɛssi anɛɛ

naa hina daŋ dɔm.

Bɛl daŋ du kpeg kaali u dɔŋ,

nabɔma hiŋ danna sɛɛ

bichala hiŋ dɔɔra.”#Lug 27:29; Room 9:11-12

24U hia n wa helle, u lul a biinɛɛri, ba ɛɛ baala. 25Unla n felee lii la aah, huna tɔ u bɔra maa lugɔ un tɔ wɛjɛ. Guŋ wia ba faa dau u sɔŋ Ɛsau. 26Uŋ wa ŋɔ u lul nɛɛhiŋ la, di u lau Ɛsau la naalume kpogli, ba faa dau u ge sɔŋ, Jekɔb. Aizik binni faa du tokkoahoro ka ba lul baa.

27A biizi n wa helle, Ɛsau la ɛɛ kpaaŋ di nɔŋŋi pir volaa. Ka Jekɔb ge ɛɛ nɛr la n du bɔɔiih, di du dia. 28Aizik faa nɔŋŋi Ɛsau dikuu uŋ ɛɛ kpaaŋ, di ɔɔ ra ba ola ni u ra hee wia. U haaŋ Ribɛka ge faa nɔŋŋi Jekɔb.

29Denii a hɔl bɛl Jekɔb ra daali sigaahma.#25:29 Lɛntil sɔŋ bɛllɛ sigaahma. Ɛsau ge lii pir ba, di lɔzi ra kpuu werge maa. 30Denii u ŋɔ u niwee Jekɔb be, “Lɔzi ra kpumbuu, awia, ɛɛ i dɔaahma naa yeŋ tɛŋ manaŋ!” Gunnɛ faa ɛɛwɛ ba faa kaa ra yiruu Ɛdɔm.#25:30 Hibru mɔɔri biini, Ɛdɔm zɛɛrɛ Aahmu.

31Ka Jekɔb ŋɔ, “Kpa i nabɔmuu tɛŋ, ka ń tɛi a diwee.”

32Ɛsau haa ŋɔ, “N na siwuu la! Bɛɛ tɔnaa ń nabɔmuu dɔɔ tɛŋ, di n siuwɔu?”

33Ka Jekɔb haa vɛɛ di ra ŋɔ a nabɔmuu wia di ŋɔ, “Hɛɛhzi tɛŋ lugɔ minuu dɔɔ a nabɔmuu.” Denii Ɛsau hɛɛhzi, di kpa u nabɔmuu tɛɛ Jekɔb.#Hib 12:16 34Uŋ wa ɛɛ gunla, Jekɔb haa tɛu paanuu ani siga dɔzi tama, Ɛsau jaa di di nyɔɔ nii ka kpa kaali. Haali u baga waa hoo u nabɔmuu la uŋ kpawɛɛ tɛɛ u niwee hiŋ wia be.

Currently Selected:

Luglaa 25: vag

Highlight

Copy