Luglaa 22

Kɔraawiizi n ɛɛ Abraham na wia

1Saŋa bɛl n wa helle, Kɔraawiizi ɛɛ Abraham na. Denii u yiruu, “Abraham!” Abraham sɛɛ, di ŋɔ, “N Dɔɔri, minuu keŋ!”#Hib 11:17-19

2Kɔraawiizi ŋɔ, “Kpogli i biibambikpaŋ Aizik la hiŋ nɔŋŋɛɛ werge la, di la Mɔria hɛri, ń ga baglii bizeŋ bɛl nyuu, í kpuu lizi mbusu, di fuuuh de tɛŋ.”#2Faa 3:1

3Hɔɔ n wa pizɛɛ chɔɔzimpikke ni, Abraham izi bɔg u kawee, di kpogli u balaa banɛɛ ani u biibaal Aizik jaa. Uŋ wa nyiŋŋi mbusu lizaa kuŋfuuhlii daazi tuŋ, ba jaa kpa di ra la bɔr la Kɔraawiizi n bagluu la. 4Baŋ wa volle hɔpizaa ahoro, Abraham na bɔr la Kɔraawiizi n bagluu la n dugli baa, 5u ŋɔ u balaa be, “Ií ni a kawee chi bɔnnaa, ka n ni n biibaal la ende, di ga jaami Kɔraawiizi, ka bir ba.” 6Denii Abraham gil Aizik kpa a daazi chi, ka u ge himmaa jaa kpogli kizee ani niŋ. Banna la la, 7Aizik ŋɔ u mɛɛ be, “N mɛ!” Abraham sɛɛ, “Ɛɛh, n biibaal.” Aizik ŋɔ, “Yaa kpogli daazi ni niŋ maanii, ka lee a peezi duɛi, yaa n niŋ kpa lizi mbusu di fuuhwei?”

8Abraham bir ŋɔ u be, “N biibaal, Kɔraawiizii niŋ tɛɛ yaa a peezi.” Ka ba haa ra vol.#Lug 22:13; Jɔɔn 1:29 9Baŋ wa hel bɔr la Kɔraawiizi n bagli Abraham la, u kuari mbusu lizibɔr, di kpa a daazi sag u ni. Uŋ wa ɛɛ guŋ tuŋ, u lau Aizik di vɔɔzuu, di kpau sag a daazi ni,#Jems 2:21-23 10ka jaa lalli u kizee ú kpu u biibaal hiŋ di lizi mbusu tɛɛ Kɔraawiizi. 11Ka Kɔraawiizi mɛlika yiruu lii chiŋ, di ŋɔ, “Abraham! Abraham!” Abraham sɛɛ, “Ɛɛh, n na nuuu.” 12A mɛlika ŋɔ, “Kpa i kizee dau! Gilɛɛ kpu a bie. Filaŋkeŋwaa, n zummɔ lugɔ i ra ɔm Kɔraawiizii wibii maa, dikuu hiŋ waa vɛɛwɛ í kpa i biikpaŋkpaŋ lizi mbusu tɛu wia.”

13Denii Abraham lalli u nyuu ŋɔ u binni, di pebal bɛllɛ, u nyigzi kar daapuza ni. U jaa gil u biibaal la ka lau a pebal kpu, di lizi mbusu, di fuuuh tɛɛ Kɔraawiizi. 14Abraham faa dau a bɔr sɔŋ, ‘Kɔraawiizii Tɛɛri.’#Lii 17:15 A sɔŋ naa jaa birgi sɛɛliirɛ filaŋkeŋ, ba ɔɔ ŋɔ, “Kɔraawiizi bizeŋ nyuurɛ u ra tɛɛ.”

15Denii Kɔraawiizi mɛlika kaa yir Abraham lii chiŋ, 16di ŋɔ, “Kɔraawiizi ŋɔwɔɔrɛ, ‘N hɛɛhzi n hinnɛ lugɔ hiŋ sɛɛwɛ hiŋ n nua, di lau i biikpaŋkpaŋ í kpu, di lizi mbusu, di fuuuh tɛŋ naa wia, n na ŋɔ i benii wibii maa lugɔ 17n daŋ kissii werge maa, di tɛi naanna kpila alugɔ chinchiŋwilaa gɛɛ muu nua hɛɛhriichaa. I naanna daŋ kpegli ba dɔma di foozi ba bola.#1Koo 4:20 18Hɛssi hina maa daŋ ga i naana bɛl be di na kissaa, dikuu hiŋ sɛɛwɛ hiŋ n nua wia.’ ”#Lug 18:18; 26:5

19Denii, Abraham bir la u balaa la be, ba bir kaali bolzeŋ Bɛɛsiba, Abraham ga so de.

Nahɔ biibaala wia

20Saŋa bɛl n wa helle, Abraham nuu lugɔ u niwee Nahɔ haaŋ Milka lul biibaalaa. 21Ba nabɔma hiŋ sɔnnɛ faa Uz, u niuna genii faa Buz, Kɛmuɛl n ɛɛ Aram mɛɛ, 22Kɛsɛd, Hazɔ, Pildas, Jidlaf ani Bɛtuɛl. 23Ribɛka mɛɛrɛ faa Bɛtuɛl. Biibaala ŋmantannaazi naabuu Milka lul tɛɛ Abraham niwee Nahɔ. 24U hahjiga Rema biibaala genii faa, Tɛba, Gaham, Tahas ani Maaka.

Currently Selected:

Luglaa 22: vag

Highlight

Copy