Jenesis 27

Aesak i blesem Jekob

1Nao long taem ya, Aesak i kam olfala we i olfala, mo ae blong hem i kam nogud, i no moa save lukluk. Nao wan dei, hem i singaot fasbon blong hem Esao i kam long hem, mo i talem long hem se, “Pikinini blong mi.”

Mo hem i talem se, “Yes, papa.”

2Nao papa blong hem i talem se, “Yu yu luk finis we mi mi olfala, mo mi harem se bambae i no longtaem, mi mi ded. 3I gud yu tekem bonara blong yu, yu go lukaot wan mit, blong mi kakae. 4Yu kukum olsem we mi mi laekem, we tes blong hem i gud we i gud, nao yu tekem i kam long mi. Bambae mi kakae, mo biaen, bambae mi blesem yu, we hemia bambae i lastok blong mi long yu.”

5Nao taem hem i stap talem tok ya, woman blong hem Rebeka i stap lesin long hem. Mo taem fasbon i aot blong go lukaot mit, 6Rebeka i talem long Jekob* we i sekenbon blong tufala se, “Naoia nomo, mi harem papa blong yu i talem long brata blong yu se, 7‘Yu go lukaot mit, yu karem i kam, yu kukum, yu kam givim long mi. Bambae mi kakae, nao biaen, bambae mi blesem yu long fes blong Hae God, we hemia bambae i lastok blong mi long yu.’ ” 8Nao hem i talem se, “Pikinini blong mi. Yu mas lesin gud long tok blong mi, mo yu mas mekem olsem we mi mi talem. 9Yu go long ples ya we ol nani blong yumi i stap long hem, yu jusumaot tu smol nani we tufala i fatfat gud, nao yu tekem tufala i kam, blong mi save kukum mit ya we papa blong yu i laekem tumas. 10Nao bambae yu yu save go givim mit ya long hem, blong bambae hem i blesem yu long lastok ya blong hem.”

11Be Jekob i talem se, “Mama. Yu yu save we Esao i gat fulap hea olbaot long bodi blong hem, be mi mi no gat. 12Sipos papa i holem han blong mi, bambae hem i haremsave wantaem nomo se mi ya, mi stap giaman long hem. Nao bambae hem i no save blesem mi, bambae i singaot* trabol nomo i kam long mi.”

13Nao mama blong hem i talem se, “Pikinini blong mi. Sipos hem i singaot trabol i kam, be trabol ya bambae i kam long mi nomo. Yu mekem olsem nomo we mi mi talem. Yu go tekem tu nani i kam.” 14Nao Jekob i go, i kilim tu smol nani, i karem tufala i kam, i givim long mama blong hem, nao mama blong hem i kukum mit ya long fasin we papa blong tufala i laekem. 15Mo hem i go tekem ol nambawan klos blong Esao we i stap putumgud olgeta long haos tapolen ya, i kam givim long Jekob blong i werem. 16Mo hem i tekem skin blong tufala nani ya, i putum long han blong hem mo long nek blong hem tu we i no gat hea long hem. 17Nao hem i tekem mit ya wetem bred* we i jes bekem, i givim long hem, blong i karem i go.

18Nao Jekob i karem, i go luk papa blong hem, i talem se, “Papa.”

Nao papa blong hem i talem se, “Yes. ?Yu hu ya?”

19Nao hem i talem se, “Mi mi Esao, mi fasbon blong yu. Mi mekem olsem we yu yu talem. Hemia mit ya we mi karem i kam. Plis yu sidaon, yu kakae, nao bambae yu save blesem mi.”

20Nao papa blong hem i talem se, “?Pikinini blong mi, yu yu kwik, a? ?Yu faenem samting ya olsem wanem?”

Mo hem i talem se, “Hae God i God blong yu, mo hem i stap givhan long mi blong mi faenem.”

21Nao papa blong hem i talem se, “?Pikinini blong mi, i tru se yu yu Esao? Yu kam klosap ya, blong mi save holem yu.” 22Nao hem i go klosap long olfala, mo olfala i holem hem, nao i talem se, “Mi harem voes blong yu se voes blong Jekob, be han blong yu i han blong Esao.” 23Hem i no save se man ya i Jekob, from we i gat hea blong nani i stap olbaot long han blong hem. Nao i rere blong blesem hem, 24be i askem bakegen wan taem moa se, “?Yu yu Esao tru?”

Mo hem i talem se, “Yes, papa. Mi ya.”

25Nao olfala i talem se, “Ale, yu tekem mit ya i kam. Bambae mi kakae, nao biaen, bambae mi blesem yu.” Nao hem i karem kakae ya i kam long hem, mo i tekem waen tu i kam. 26Nao olfala i talem long hem se, “Pikinini blong mi, yu kam klosap, yu kis long mi.” 27#Hib 11.20Mo taem hem i kam blong kis long papa blong hem, papa blong hem i harem smel blong klos ya blong hem, nao i blesem hem. Hem i talem se, “Pikinini blong mi, mi harem smel blong klos blong yu i gud tumas, i olsem smel blong wan garen we Hae God i blesem. 28Prea blong mi, we God bambae i mekem we graon bambae i givim ol gudgudfala kakae long yu blong yu yu no sot long kakae, mo we skae bambae i givim gudfala wota long yu, blong yu no sot nating long waen. 29#Jen 12.3Prea blong mi, we ol man blong ol narafala kantri bambae oli wok blong yu, mo we ol man blong ol narafala ples bambae oli bodaon long yu. Prea blong mi, we yu bambae yu bos long ol brata blong yu, mo we olgeta bambae oli bodaon long yu. Prea blong mi, we man we i singaot trabol i kam long yu, trabol bambae i kasem hem, be man we i askem blong God i blesem yu, God bambae i blesem hem.”

Esao i wantem tumas blong Aesak i blesem hem

30Nao taem Aesak i finisim ol tok blong hem blong blesem sekenbon blong hem Jekob,* Jekob i girap, i go afsaed, mo wantaem nomo, fasbon ya blong hem Esao we i stap lukaot mit, hem i kambak long haos. 31Nao hem i kukum mit ya we i tekem i kam, i mekem tes blong hem i gud we i gud, nao i tekem i kam long papa blong hem, mo i talem se, “Papa, hemia mit ya nao, mi karem i kam. Plis yu sidaon, yu kakae, nao bambae yu save blesem mi.”

32Be papa blong hem i askem se, “!Ei! ?Yu hu ya?”

Mo hem i talem se, “Mi Esao, mi fasbon pikinini blong yu.”

33Nao papa blong hem i stat seksek we bodi blong hem i seksek tumas, nao i talem se, “?Be hu ya we i kilim wan samting, i kukum, i karem i kam long mi? Mi mi jes kakae naoia nomo, taem yu no kam insaed yet. Mi mi blesem hem finis we mi talemaot lastok blong mi long hem, mo mi no save jenisim, i blong hem olwe.”

34Mo taem Esao i harem tok ya, hem i singaot bigwan, mo i krae we i krae, nao i talem se, “!Papa! !Plis yu blesem mi tu!”

35Be papa blong hem i talem se, “Brata blong yu i kam, i giaman gud long mi. Nao ol samting ya we mi wantem askem long God blong i givim long yu, mi askem finis blong i givim long hem.”

36 # Jen 25.29-34 Nao Esao i talem se, “Hemia namba tu taem nao we hem i giaman, i stil long mi. Hem i no karem nem ya Jekob#27.36: Jekob. Long lanwis ya Hibru, nem ya klosap i olsem wan narafala tok we i min se “I giaman, i stil”. blong nating nomo. Fastaem, hem i tekem raet blong holem ol samting ya we mi nomo mi gat raet long hem from we mi fasbon. Mo naoia, hem i tekem ol samting ya we yu yu wantem askem long God blong i givim long mi. ?I no moa gat sam samting i stap we yu no talemaot yet, we yu save askem long God blong i givim long mi, blong blesem mi?”

37Nao papa blong hem i talem se, “Mi mi askem long God finis blong i mekem we brata ya blong yu bambae i masta blong yu, mo we ol famle blong hem wetem olgeta we bambae oli kamaot biaen long olgeta bambae oli kam slef blong hem bakegen. Mo mi askem long hem blong i givim kakae mo waen long hem. I no moa gat narafala samting i stap we mi save askem long God bakegen blong i givim long yu.”

38 # Hib 12.17 Be Esao i stap askem bakegen long papa blong hem se, “?Papa, olsem wanem? ?Hemia nomo tok we yu yu gat blong blesem man? !Plis yu blesem mi tu!” Nao hem i stap krae bigwan.

39 # Hib 11.20 Nao papa blong hem i talem se,

“Pikinini blong mi.

Ples blong yu bambae i no stap klosap nating long graon ya

we bambae i givim

ol gudgudfala kakae, mo long ples ya

we skae bambae i givim gudfala wota long hem.

Ples blong yu bambae i stap longwe long hem.

40 # Jen 36.8; 2 King 8.20 Oltaem, bambae yu stap faet,

long naef blong faet,

blong yu save kasem kakae blong yu,

blong yu stap laef,

mo yu bambae yu slef nomo

blong brata blong yu.

Be taem yu girap agens long hem,

hem bambae i no moa save holem yu,

yu bambae yu aot long han blong hem.”

41Nao Esao i no laekem Jekob nating, i agens long hem, from we papa blong tufala i blesem Jekob olsem. Nao hem i stap tingting se, “Bambae i no longtaem, olfala ya i lus, nao bambae mifala i stap krae from hem. Be biaen long taem ya, bambae mi mi kilim brata blong mi i ded.”

42Be taem mama blong tufala i harem nius we Esao i talem olsem, hem i singaot Jekob i kam long hem, nao i talem long hem se, “Pikinini blong mi, yu lesin. Brata blong yu i stap mekem plan blong givimbak ol samting ya long yu. Hem i wantem blong i kilim yu yu ded. 43-44Yu mas mekem olsem we mi bambae mi talem long yu. Yu mas ronwe, yu go stap long taon ya Haran. Yu mas go stap wetem brata blong mi Laban, gogo kasem we tingting blong brata blong yu i kam kwaet, kros blong hem i godaon, 45mo hem i fogetem ol samting ya we yu yu mekem long hem. Long taem ya nao, bambae mi mi sanem wan man i go luk yu blong tekem yu yu kambak long ples ya. !I nogud mi mi lusum yutufala evriwan long sem dei nomo!”

Aesak i sanem Jekob i go luk Laban

46Nao biaen, Rebeka i talem long Aesak se, “Tufala woman ya blong Esao, tufala i no kamaot biaen long olfala bubu ya blong yumi. !Mi mi taed gud long tufala! !Sipos Jekob* i tekem wan gel bakegen we i laen* blong Het, ating i moa gud mi mi ded nomo!”

Currently Selected:

Jenesis 27: BBR

Highlight

Copy