Ma̱rkut 7

Yesu Tyiet tazwa Nkyang na̱ Tyei A̱tyubishyi A̱na̱ndyung a̱ni

(Mat 15:1-9)

1A̱fa̱risawa ma̱ng á̱niet tyiet doka á̱ghyang si̱ neet Urusha̱lima. Ba̱ si̱ tung da̱ a̱vwuo Yesu. 2Ba̱ si̱ li nang mman ta̱m Yesu á̱ghyang ba̱ ya nkyayak ma̱ng mbwak nang A̱fa̱risawa bani kyiak na̱ byia̱ a̱na̱ndyung a̱ni. Huhwa yet; ba̱ ku kwi mbwak na na̱ tyia̱ za̱za̱rak bah. 3(Mat A̱fa̱risawa ba ma̱ng a̱mgba̱m A̱yahudawa á̱ghyang ni̱ ya nkyayak di̱ mi̱ nwai kwi mbwak na̱ tyia̱ a̱za̱za̱rak bah. Mat ba̱ khwi taada a̱cha̱chet á̱niet khwop á̱niet mba wu. 4Kidee, ka̱ ba̱ bwuok á̱ neet mi̱ tungga, ba̱ si̱ mi̱n gya kyayak bah; si̱ nang ba̱ kwi mbwak na, ba̱ si̱ tyia̱ a̱za̱za̱rak. Taada á̱ghyang ku nshya̱ ma̱ a̱di̱di̱t, nang ba̱ nyia̱ gado, a̱wot ba̱ si̱ bu khwi a̱ni. Bibya yet; kwi a̱yaakashyi, a̱ka̱kurung, ma̱ng li̱la̱n ntswam,#7:4 Lyuut ghyang mbyia̱: “Ma̱ng a̱yaabaat nang ba̱ ngya a̱ni.” ku tyia̱ a̱za̱za̱rak.)

5Huhwa A̱fa̱risawa ba ma̱ng a̱cha̱chet á̱niet tyiet doka ba si̱ lyip Yesu nyia̱, “Yihwa mbyia̱ nang mman ta̱m ang na nwai nkhwi gado a̱cha̱chet á̱niet khwop á̱niet hu? A̱wot ba̱ ya nkyayak na ma̱ng mbwak a̱na̱ndyung?”

6A̱ si̱ nwuak ba shim nyia̱, “Nyin á̱bubuk á̱niet! A̱tsak a̱lyiat wa Ishaya a̱ta̱m a̱kwonu A̱gwaza gbangbang ku tak á̱zanson tazwa nyin, ma̱nang á̱ ndyuut a̱ni nyia̱,

‘Á̱niet bani dyep nung

ma̱ng nunu hwa ma̱nyin hu.

A̱wot nfwuo mba na

shya̱ ma̱ zan ma̱ng a̱nung.

7Khwi ba̱ khwi nung a̱ni,

ku yet a̱buk nta̱m wa.

Mat tyiet nang ba̱ tyiet a̱ni,

yet taada á̱nietbishyi ja ma̱nyin ji.’

8“Nyi ghwon doka A̱gwaza ji. A̱wot da̱ a̱kwonu a̱kya, nyi si̱ ya a̱son mi̱ khwi taada á̱nietbishyi ja.”

9Yesu si̱ nyia̱, “Nyi lak khwi doka A̱gwaza ji shansham, da̱nian nyi ka khwi taada nyin ji. 10Musa ku lyuut nyia̱, ‘Nwuak a̱tyia̱ ang wu ma̱ng a̱yang ang wu shi,’ a̱wot, ‘Konyan wa jhyuai a̱tyia̱ nggu ku a̱yang nggu wu, ku yet ta hwa á̱ hyat gu.’ 11A̱wot nyi nyia̱ ka̱ a̱yin nyia̱ ma̱ng a̱tyia̱ nggu ku a̱yang gu: ‘A̱mgba̱m beang ku myim nyi shya̱ da̱ a̱vwuo nung a̱ni, n khai hu sak zan nang Korban#7:11 Wa̱i a̱lyiat: Korban fa, za̱nang á̱ khai á̱ sak A̱gwaza ndyo ma̱nyin gu a̱ni. a̱ni.’

12“Ma̱ a̱ni wa, nyi nvwuong guu, gu beang a̱tyia̱ gu ku a̱yang nggu ma̱ng kuzang kyang. 13Di̱ tangka̱i tyiet huni, nyi si̱ tyia̱ A̱lyiat A̱gwaza na a̱buk kyang, di̱ tyiet mman nyin na taada jhyang. Ma a̱nia wa nyi nnyia̱ nkyang jhyang ma̱ a̱di̱di̱t nang si̱ nani a̱ni.”

14Yesu si̱ bu yorong á̱kpa á̱niet ka, a̱ si̱ nyia̱ ma̱ mba, “A̱mgba̱m nyin, nyi myiai a̱fufwuo nyi fa̱k nung! A̱wot nyi bu fi̱k a̱lyiat nani shansham! 15Á̱ mbyia̱ kyang ku neet nta a̱ nwuai mi̱ vam a̱tyubishyi ku tyei nggu a̱na̱ndyung a̱ni bah. Da̱ a̱kwonu a̱kya, kyang ku na ghwut mi̱ fwuo a̱tyubishyi a̱ni, huhwa tyei nggu a̱na̱ndyung wu. 16Nyi myiai a̱fufwuo nyi fa̱a̱k!”

17Nang Yesu nghwon á̱kpa á̱niet ka a̱ si̱ nwuo a̱mali a̱ni, mman ta̱m nggu na si̱ lyip gu kyang gu fa ma̱ng kidee jini a̱ni. 18A̱ si̱ lyip ba nyia̱, “Nyin, nyi shya̱ mi̱ ndyin, ka̱ni? Ku myim nyi lyen nang kyang ku na nwuo mi̱ vam a̱tyubishyi neet nta a̱ni; huhwa na tyia̱ nggu a̱na̱ndyung wu bah. 19Mat kyayak ku neet nta a̱ni, ku ni̱ nwuo mi̱ fwuo nggu huhwa bah. Ku ni̱ nwuo ma a̱fa nggu kikya. A̱wot ku sii ghwut mi̱ vam hu.” (Di̱ tyiet huni, Yesu ku tak nang kuzang tangka̱i kyayak ngyet a̱za̱za̱rak da̱ a̱vwuo A̱gwaza).

20A̱wot Yesu si̱ ya a̱son mi̱ shei nyia̱, “Kyang ku ghwut mi̱ fwuo a̱tyubishyi a̱ni, huhwa yet si̱ hu ku tyei nggu a̱na̱ndyung a̱ni. 21Mat neet mi̱ fwuo a̱tyubishyi hwa, nang nkyang na̱ yet a̱ka̱tuk a̱ni nghwut; nang á̱ka̱tuk a̱di̱dam, a̱shi̱shi̱k nyia̱, tsang, hyaai á̱niet, katnaan, 22shushok, a̱guk mi̱ fwuo, laai á̱niet, á̱ka̱tuk nshyuo, kwi swam, tyam á̱ghyang, gba̱p a̱pyia̱, ma̱ng bwuon. 23A̱mgba̱m á̱ka̱tuk nkyang nani ni̱ ghwut neet mi̱ fwuo a̱tyubishyi hwa. Ni̱nia tyei nggu a̱na̱ndyung wu.”

A̱nap a̱ Nwai yet A̱yahudawa a̱ni Nwuak Fwuo di̱ Yesu

(Mat 15:21-28)

24Yesu si̱ ghwon fam a̱byin Ga̱lili, a̱ si̱ nat di̱ fam bibyin Taya ma̱ng Sidon#7:24 Lyuut ghyáng mbyia̱ Sidon bah.. A̱ si̱ nwuo a̱mali a̱ghyang, a̱ si̱ chat a̱yin gu lyen nang gu nshya̱ a̱ja bah. Ma̱ng a̱nia, da̱ nggu a̱ maai a̱ niat a̱pyia̱ nggu bah. 25Mi̱ di̱ yong a̱hwa, a̱byii̱k a̱ghyang nang a̱bada̱dei nggwon a̱nap gu ku byia̱ a̱ka̱tuk ntswa a̱ni, a̱ si̱ fa̱k nkhang Yesu, a̱ si̱ bai, a̱ si̱ ba̱ kwa da̱ a̱ti̱tak nggu ba.

26A̱ si̱ naai Yesu gu kam a̱ka̱tuk ntswa a̱ ghwut ma̱ banggwon a̱nap nggu ka. A̱byii̱k wu ku yet a̱nap Nnwap a̱ nwai yet A̱yahudawa a̱ni; a̱nap A̱helenawa wa nang á̱ byin ma̱ a̱byin Fi̱ni̱kiya mi̱ fam a̱byin Suriya a̱ni.

27A̱wot Yesu si̱ nwuak gu shim di̱ kidee nyia̱, “Yok zi̱ ya nghwon mman A̱yahudawa na ba̱ ya kyayak na, ba̱ swa̱i. Mat ku myim á̱ kyiak kyayak mman á̱ ta a̱ka̱bwu#7:27 Wa̱i a̱lyiat: A̱ka̱bwu. A̱yahudawa ku kyiak Nnwap na̱ nwai yet A̱yahudawa nang a̱ka̱bwu a̱ni. ndyo bah.”

28A̱byii̱k wu si̱ nwuak shim nyia̱, “Ii, A̱tyoli. A̱mgba̱m ma̱ng a̱nia, a̱ka̱bwu na ni̱ kwok chunchong kyayak ji̱ kwa̱i tafa a̱tyii ka neet da̱ a̱vwuo mman ka a̱ni.”

29A̱wot Yesu si̱ nyia̱ ma̱ng a̱nggu, “Mat tangka̱i nwuak shim nang a nwuak a̱ni, nat a̱mali! A̱ka̱tuk ntswa wu wa ka̱n ghwut, a̱ si̱ ghwon nggwon a̱nap ang ka.”

30A̱byii̱k wu si̱ bwuok a̱ nat a̱mali. A̱ si̱ shya̱ nggwon nggu ka myian da̱ a̱gbaat, nang a̱ka̱tuk ntswa wu ka̱n ghwut a̱ si̱ ghwon kaa.

Yesu Choot A̱tyu a̱ yet Ma̱ma̱m ma̱ng A̱shi̱lan a̱ni

(Mat 15:29-31)

31Yesu si̱ ghwon fam a̱byin Taya. A̱ si̱ kai a̱ ghwut fam a̱byin Sidon, a̱ naat ma̱ a̱gba̱ndang jok Ga̱lili wu. A̱wot a̱ si̱ nwuo mi̱ fam a̱byin a̱ka̱keang Dikafolit#7:31 Wa̱i a̱lyiat: Dikafolit fa “A̱ka̱keang swak nia” cha̱chaat.. 32A̱ja á̱ghyang á̱niet si̱ bai ma̱ng a̱nggu a̱tyok a̱ ku yet ma̱ma̱m ma̱ng a̱shi̱lan a̱ni. A̱wot ba̱ si̱ naai Yesu a̱ byiam gu a̱ choot guu.

33Nang Yesu nkhwat gu a̱ ghwut ndyo ma̱ á̱kpa á̱niet ka a̱ni, ba̱ si̱ yong da̱ gbang a̱nyiung. A̱ si̱ tyia̱ ga̱swuong nggu ji ma̱ a̱fufwuo nggu ba. A̱wot a̱ si̱ ta a̱ta̱mpyia̱, a̱ si̱ mbyiam a̱lyem a̱tyok a̱kya. 34A̱ si̱ gba̱t á̱ghyi gu ba tswazwa. A̱ si̱ tuk a̱nwurung, a̱ si̱ nyia̱ ma̱ng a̱tyok a̱wa di̱ lyem A̱ra̱mik, “Ifata!” Huhwa yet, “Khwuk!”

35Mi̱ di̱ yong a̱hwa, a̱fufwuo a̱tyok a̱bya si̱ kin khwuk a̱ si̱ nwuo fwuong! A̱lyem nggu ka si̱ kin byii̱k, a̱wot a̱ si̱ nwuo lyiat shansham!

36Yesu si̱ gba mba ba̱ yok hyia̱ ma̱ng a̱nyin bah. Ma̱ng a̱nia, ma̱nang gu ngba mba a̱ni, a̱nia wa ba̱ si̱ mban mi̱ shei nkhang na. 37A̱wot a̱mgba̱m á̱niet ba, ku si̱ yet mba kyang a̱ga̱de ba̱t. Ba̱ si̱ nyia̱, “A̱ nyia̱ kuzang kyang shansham! A̱ si̱ tyei a̱yaashi̱lan si̱ fwuong a̱lyiat, a̱wot a̱yaama̱ma̱m si̱ lyiat!”

Currently Selected:

Ma̱rkut 7: TyapNT

Highlight

Copy