Ma̱rkut 14

A̱yaakwak A̱son A̱yahudawa ba La̱p A̱nu ba̱ Hyat Yesu

(Mat 26:2-16; Luk 22:1-6)

1Nang á̱ mbwat mam feang á̱ song A̱yet Ghwut Mman Isi̱rela mi̱ Khwo, ma̱ng A̱yet ya Burodi Sang Yit a̱ni; a̱cha̱chet a̱yaapris ma̱ng a̱yaagwak tyiet doka si̱ chat a̱wat nang ba̱ na nta̱bat Yesu da̱ bang, ba̱ ka hyat gu a̱ni. 2Huhwa ba̱ si̱ nyia̱, “Zi̱ si̱ mi̱n ta̱bat gu di̱n jen song A̱yet ji bah, kalak á̱kpa á̱niet ka ba̱ doot jhya̱.”

Á̱ Koot Yesu A̱sham A̱myia̱ ma̱ A̱keang Ba̱ta̱ni

(Mat 26:6-13; Yon 12:1-8)

3Nang Yesu nshya̱ ma̱ a̱keang Ba̱ta̱ni a̱ fwung a̱mali Siman, a̱tyu a̱ ku mi̱ mbyia̱ gbap a̱ni; a̱byii̱k a̱ghyang si̱ kin neet a̱ bai ma̱ng a̱za̱za̱rak a̱myia̱, nang á̱ ngyei “nar” na̱ byia̱ kurum ba̱t a̱ni, mami sha̱p a̱myia̱ nang á̱ nok ma̱ng nfang a̱la̱basta a̱ni. A̱byii̱k wu si̱ fwuoi a̱nu sha̱p a̱myia̱ ka. A̱ si̱ bwak a̱myia̱ na a̱ koot Yesu ndyo a̱pyia̱.

4Á̱ghyang á̱niet ba̱ shya̱ a̱ja a̱ni si̱ fa̱k a̱lyia̱ ya. Ba̱ si̱ nyia̱ ma̱ng á̱ghyang mba a̱ni, “Yihwa mbyia̱ nang a mbyian a̱sham a̱myia̱ kani a̱nia? 5Ku myim da̱ á̱ lyap na di̱ kurum ta̱m a̱yin ku bai a̱lyia̱ nyiung a̱ni! A̱wot á̱ ka̱u á̱kunak kurum hu!” Ba̱ si̱ ngai ma̱ng a̱byii̱k a̱wa ba̱t.

6A̱wot Yesu si̱ nyia̱ ma̱ng a̱mba a̱ni, “Nyi yok gu. Yihwa mbyia̱ nyi ngai ma̱ng a̱nggu a̱nia? A̱ nyia̱ nung a̱tan ta̱m wa za̱m! 7Kuzang jen nyi shya̱ ndung ma̱ng á̱kunak; nyi si̱ mi̱n beang ba kuzang jen nang nyi nchat a̱ni. A̱wot nung, n na shya̱ ndung ma̱ng a̱nyin kuzang jen bah. 8A̱byii̱k wuni nyia̱ ta̱m gu si̱ mi̱n nyia̱ a̱ni. A̱ koot nung a̱myia̱ na mi̱ vam hu a̱ nchok jen nang á̱ na nniat nung a̱ni.

9“A̱tsak a̱lyiat, kuzang a̱vwuo mi̱ swanta hu nang á̱ na nshei A̱sham Nkhang kani a̱ni; á̱ na jhyung a̱byii̱k wuni, á̱ bu mbwoi nkhang tazwa a̱tan ta̱m nang gu nyia̱ nung ndyo a̱ni.”

Yahuda Iska̱riyoti Shim a̱ Bwuk ma̱ng Yesu

(Mat 26:14-16; Luk 22:3-6)

10A̱jawa Yahuda Iska̱riyoti, a̱tyo nyiung mami mman ta̱m Yesu swak ma̱ a̱feang na, si̱ nat da̱ a̱vwuo a̱cha̱chet a̱yaapris. Da̱nian a̱ ka la̱p a̱nu ma̱ng a̱mba nang gu na mbwuk ma̱ng Yesu a̱ni. 11Nang mba a̱cha̱chet a̱yaapris ba nfa̱k a̱nia a̱ni, ba̱ si̱ gwai ba̱t. A̱wot ba̱ si̱ nyia̱ a̱li̱ka̱uli ba̱ na tan nggu kurum. Nggu Yahuda mameang, a̱ si̱ ya a̱son ma̱ng chat a̱wat nang gu na mbwuk ma̱ng Yesu a̱ni.

Yesu ya Kyayak Ngaan ma̱ng Mman Ta̱m nggu na

(Mat 26:17-25; Luk 22:7-14,21-23; Yon 13:21-30)

12A̱tuk mam nyiung A̱yet Ya Burodi Sang Yit wu, mam hu nang á̱ ni̱ nfaat fi̱ng a̱nfwuk A̱yet Ghwut Mman Isi̱rela mi̱ Khwo wu á̱ ka neap A̱gwaza za̱nang a̱ni; huhwa mman ta̱m Yesu na si̱ lyip gu nyia̱, “A̱ji wa nang a nchat zi̱ njhyi ang kyayak nang a na ya di̱n jen A̱yet ji a̱ni?”

13Yesu si̱ ta̱m mman ta̱m gu a̱feang ba̱ khwat a̱son, a̱ si̱ nyia̱ ma̱ng a̱mba, “Nyi nwuo mami Urusha̱lima. A̱wot nyi na myim ma̱ng a̱tyok a̱ pyia̱t a̱dong a̱sa̱khwot a̱ni. Nyi khwi ngguu. 14A̱wot a̱vwuo gu nnwuo a̱ni, nyi hyia̱ ma̱ng a̱tyoli wu nyia̱, ‘A̱tyu tyiet nyia̱, zi̱ lyip ang, “Da̱ a̱ji wa yet tutu á̱nietchen hu nang n na ngya A̱yet wu ma̱ng mman ta̱m nung na?” ’

15“A̱tyoli a̱wa na tak ma̱ng a̱nyin a̱gba̱ndang tutu a̱ghyang a̱mali tazwa nang á̱ jhyi a̱ni. A̱ja wa nyi na njhyi nzi̱t kyayak hu.” 16Huhwa mman ta̱m nggu na si̱ ghwut, ba̱ si̱ nat ma̱ a̱keang Urusha̱lima. Ba̱ si̱si̱ shya̱ nkyang a̱nia ma̱ cha̱chaat nang Yesu ntak ma̱ng mba a̱ni. Ba̱ si̱ jhyi nkyayak a̱yet na a̱ja.

17Nang jenshyung nnyia̱ a̱ni, Yesu si̱ nat a̱ si̱ nwuo Urusha̱lima ma̱ng mman ta̱m swak ma̱ a̱feang nggu na. 18Nang ba̱ nshya̱ di̱ fwung á̱ tsa á̱ bu ngya kyayak hu a̱ni, Yesu si̱ nyia̱ ma̱ng a̱mba, “N shei nyin a̱tsatsak a̱lyiat; a̱yin ma̱ nyin na bwuk ma̱ng a̱nung! Nggu wa yet a̱tyu nang zi̱ ya kham jhyung ma̱ng a̱nggu a̱ni.”

19Mman ta̱m Yesu na si̱ nwuo a̱fi̱fa! Ba̱ si̱ ta̱bat nyia̱ ma̱ng a̱nggu a̱nyanyin, “A̱tsak a̱lyiat nung gwa kee?”

20Yesu si̱ tak ma̱ng a̱mba nyia̱, “A̱tyo nyiung wa mami nyin mman ta̱m swak ma̱ a̱feang na; a̱tyu a̱ zwup burodi wu cha̱chaat ma̱ng a̱nung mi̱ kham jhyung a̱ni, nggu wa! 21Ku yet ta hwa nang Nggwon A̱tyubishyi na nkat ma̱nang á̱ ndyuut tazwa nggu a̱ni. A̱mgba̱m ma̱ng a̱nia, ku swan a̱tyu a̱wa a̱ yet jat ji nang á̱ na mbwuk ma̱ng Nggwon A̱tyubishyi ka a̱ni! Ka̱ á̱ wa byin a̱tyu a̱wa bah, si̱ ku lan!”

Yesu Kpaat A̱tsan Ya Kyayak A̱di̱dam A̱khwu Nggu

(Mat 26:26-30; Luk 22:14-20; 1A̱ko 11:23-25)

22Nang ba̱ nshya̱ di̱ ya kyayak a̱yet hu a̱ni, Yesu si̱ kyiak burodi sang yit wu. A̱ si̱ gwai A̱gwaza, a̱ si̱ kpa̱ra̱m da̱ gbi̱ngba̱ra̱m, a̱ si̱ nwuak mba nyia̱, “Nyi ngga, kidee vam nung jaji!”

23Ma a̱nia wa, a̱ si̱ kyiak a̱sa̱khwot sum a̱na̱p ma̱ a̱kashyi wu. A̱ si̱ gwai A̱gwaza, a̱ si̱ nwuak baa; a̱mgba̱m mba a̱nyanyin konyan si̱ swuo ma̱ a̱kashyi wu.

24Yesu si̱ nyia̱ ma̱ng a̱mba, “Di, kidee a̱sok nung nia na! Na̱ yet a̱si̱ nang n da̱p a̱li̱ka̱uli, nang á̱ neap na̱ yet za̱nang chi a̱ka̱tuk nyia̱ da̱nian á̱niet ma̱ a̱di̱di̱t a̱ni. 25N tak ma̱ng a̱nyin a̱tsak a̱lyiat; n bu si̱ mi̱n swuo a̱sa̱khwot sum a̱na̱p na bah; si̱ a̱tuk a̱kya nang n bye nswuo na a̱fai mi̱ Tyok A̱gwaza hu a̱ni.”

26Nang ba̱ mbwom a̱bwom dyep A̱gwaza ka á̱ tyak a̱ni, ba̱ si̱ ghwut ba̱ si̱ nyeak á̱ nat di̱ Tsok Za̱itun ji.

Yesu tak Nang Siman Bitut na Nfwuo Lyen gu

(Mat 26:31-35; Luk 22:31-34; Yon 13:36-38)

27Nang ba̱ nshya̱ di̱n vak á̱ naat di̱ Tsok Za̱itun ji a̱ni, Yesu si̱ nyia̱ ma̱ng a̱mba, “A̱mgba̱m nyin, nyi na tyong nyi ghwon nung; ma̱nang á̱ ndyuut mami A̱lyiat A̱gwaza na a̱ni,

‘Á̱ na hyat a̱tyu chok zón seap wu,

a̱wot zón seap ji na seang.’#14:27 Za̱k 13:7.

28“A̱wot ka̱ n ba̱ ndoot ma̱ng swuan ma̱ á̱niet ba̱ ka̱n kwi a̱ni, n na nkhwat a̱son nyin nat mi̱ fam Ga̱lili. N na myim ma̱ng a̱nyin a̱ja.”

29Bitut si̱ nyia̱ ma̱ng a̱nggu, “Ku a̱mgba̱m á̱niet ba lak khwi ang hu, n na mak kai ang ghwon bah!”

30A̱jawa Yesu si̱ nyia̱ ma̱ng Bitut, “A̱tsak a̱lyiat n tak ma̱ng a̱nwan; a̱tyetuk a̱fwun a na fwuo lyen nung a̱ka̱tat, a̱gbak a̱ sii du tyiap a̱ka̱feang.”

31A̱wot Bitut si̱ yong ma̱ chi̱k nyia̱, “Kaai a̱tyoli! Ku n na khwu wa da̱nian ang, n si̱ mi̱n mak fwuo lyen ang bah!” Ma a̱nia wa konyan ma̱ mba si̱ nhyia̱.

Yesu Naai A̱gwaza mi̱ Gesa̱mani

(Mat 26:36-46; Luk 22:40-46)

32Yesu ma̱ng mman ta̱m nggu na si̱ chong á̱ si̱ tat sop a̱ka̱kwon za̱itun, nang á̱ ngyei Gesa̱mani a̱ni. A̱jawa gu nyia̱ ma̱ng a̱mba, “Nyi swan a̱ji. N nat n naai A̱gwaza.” 33Yesu si̱ doot a̱ si̱ kyiak Bitut, Yakubu, ma̱ng Yoona. A̱ si̱ nwuo swuo a̱bung ma̱ng byian fwuo ba̱t. 34A̱wot a̱ si̱ nyia̱ ma̱ng a̱mba a̱ni, “N shya̱ ma̱ng fwuo byian za̱m, á̱ ngyei n na khwu. Nyi swan a̱ji cham. Nyi yok kai nda bah!”

35A̱ si̱ doot ba a̱ ghwon, a̱ si̱ laai neap ti̱taa. A̱ si̱ kpaat a̱khwukhwut a̱ si̱ naai A̱gwaza nyia̱, “Ka̱ ku myim ang, tyia̱ jen a̱ka̱tuk swuo a̱bung jini, ji̱ swak nung.”

36A̱jawa gu si̱ naai A̱gwaza nyia̱, “Abba, A̱tyia̱ nung! A̱mgba̱m kuzang kyang na tyia̱ da̱ a̱vwuo ang. Ti̱n nung a̱kashyi swuo a̱bung wuni! A̱mgba̱m ma̱ng a̱nia, yok nyia̱ kyang hu n chat wa a̱ni bah; nyia̱ kyang ku myim ang wa a̱ni!”

37Yesu si̱ bwuok a̱ ba̱ shya̱ nang mman ta̱m nggu a̱nia a̱tat khat nda. A̱jawa gu si̱ nyia̱ ma̱ng Bitut a̱ni, “Siman, nyi khat nda nia kee? Nyi si̱ mi̱n swan cham da̱ a̱banjen ma̱ chunchwiit baa? 38Nyi swan cham nyi naai A̱gwaza, kalak nyi ba̱ kwa di̱n jen mak ji. A̱tsak a̱lyiat, fwuo hu chat nyia̱ kyang ku myim a̱ni; a̱wot vam hu swan bobwot a̱bwot di̱ nyia̱ hu.”

39Nang Yesu bu nnat a̱ naai A̱gwaza a̱ka̱feang a̱ni, swáng a̱lyiat naai ji si̱ yet ma̱ kyang nyiung hwa. 40A̱ si̱ bu bwuok a̱ bai da̱ a̱vwuo mman ta̱m ka, a̱ si̱ ba̱ shya̱ nang ba̱ ni̱ khat nda. Mat nda na ba̱ng ba ba̱t. A̱wot ba̱ si̱ lyin kyang hu ba̱ na hyia̱ ma̱ng a̱nggu a̱ni.

41Nang gu mbwuok a̱ bai da̱ a̱ka̱tat ka a̱ni, a̱ si̱ nyia̱ ma̱ng a̱mba, “Nyi ni̱ ya a̱son ma̱ng khat nda na, fwung waa? Kaai, jen ji nyia̱! Nyi li, á̱ tyia̱ nggwon A̱tyubishyi mbwak á̱ka̱tuk á̱niet. 42Nyi doot, zi̱ chong. Di la! A̱tyu a̱ na bwuk ma̱ng a̱nung a̱ni, bai kpa̱mkpaan!”

Á̱ Ta̱bat Yesu

(Mat 26:47-56; Luk 22:47-50; Yon 18:3-11)

43Ma̱ di̱ yong a̱hwa, nang Yesu ni̱ shya̱ da̱ a̱lyiat na, ba̱ si̱ kin ndi Yahuda, a̱tyo nyiung mami mman ta̱m nggu na swak ma̱ a̱feang, nang gu kwak a̱son a̱ chobai ma̱ng á̱kpa á̱niet ba̱ ba̱ng tswát ma̱ng shán a̱ni. Bibya nang a̱cha̱chet a̱yaapris ma̱ng a̱yaagwak tyiet doka ma̱ng á̱niet khwop á̱niet ba ku ta̱m ba̱ ta̱bat Yesu. 44A̱wot ma̱ninika, Yahuda, a̱tyu a̱ yet a̱bang a̱byin wu a̱ni, ku mi̱ nda̱p ma̱ng a̱mba nyia̱, “A̱tyu nang n na nvwuk n byiat a̱ni, nggu wa nyi na ta̱bat, nyi nkat ma̱ng a̱nggu, nyi chok gu shansham.”

45Nang Yahuda nneet a̱ bai da̱ a̱vwuo Yesu a̱ni, a̱ si̱ nyia̱, “A̱tyu tyiet, n byiat ang!” A̱wot a̱ si̱ vwuk guu. 46A̱jawa ba̱ si̱ kin ta̱bat Yesu, ba̱ si̱ la̱p gu gi̱ngi̱ng. 47A̱jawa a̱tyo nyiung mami mman ta̱m nggu na ba̱ yong kpa̱mkpaan a̱ja a̱ni, si̱ kin khwat tswat nggu ji, a̱ si̱ ntyap fufwuo a̱khwo a̱gba̱ndang pris hu a̱ ti̱n.

48Huhwa Yesu nyia̱ ma̱ng a̱mba, “Nyi ghwut ma̱ng tswát ma̱ng shán, nyi si̱ bai ta̱bat nung á ngyei n gyet a̱tyu a̱tsaai a? 49Kuzang mam n ni̱ shya̱ dundung ma̱ng a̱nyin tyiet Mali Nwuat Za̱nang A̱gwaza ka. A̱wot nyi ta̱bat nung bah. A̱wot ku yet ta hwa A̱lyiat A̱gwaza na nang á̱ lyuut tazwa nung a̱ni, na̱ bai cha̱chaat da̱ a̱nu ka.”

50Mman ta̱m nggu na si̱ kai gu á̱ ghwon, ba̱ si̱ tyong.

51Nggwon seam a̱ghyang ku nshya̱ di̱ khwi Yesu hu, ka̱ si̱ kup a̱sha̱shet a̱toot. Á̱niet ba si̱ kwan ba̱ ta̱bat kaa, 52a̱wot ka̱ si̱ kai a̱sha̱shet a̱toot wu, a̱ ghwon mba ndyo. Ka̱ si̱ tyong ka̱gbang a̱ shot.

Yesu a̱zaghyi A̱gba̱ndang A̱tung Sot A̱cha̱chet A̱yahudawa

(Mat 26:57-68; Luk 22:54,55,63-71; Yon 18:13-14,19-24)

53Ba̱ si̱ nat ma̱ng Yesu a̱zaghyi a̱gba̱ndang pris wu. Ba̱ si̱ tung a̱cha̱chet a̱yaapris ba, á̱niet khwop á̱niet, ma̱ng á̱niet tyiet doka ba. 54Di̱n jen a̱ja Bitut ku shya̱ ti̱taa di̱ khwi Yesu, a̱ si̱ nwuo mi̱ didyaat a̱li a̱gba̱ndang pris hu. A̱ si̱ swan dundung ma̱ng á̱khwo ba, a̱ wa̱i long.

55A̱cha̱chet a̱yaapris ba, dundung ma̱ng a̱mgba̱m sot a̱cha̱chet A̱yahudawa ji, ba̱ si̱ nwuo chat ta̱fwat di̱ Yesu, da̱nian ba̱ ka hyat gu. Ba̱ si̱ shya̱ bah. 56Á̱niet ma̱ a̱di̱di̱t si̱ nwuat ta̱fwat bwoi a̱ka̱laa di̱ Yesu. A̱wot ta̱fwat mba ji si̱ nat kankang. 57A̱wot á̱ghyang á̱niet si̱ doot á̱ yong, ba̱ si̱ nwuak ta̱fwat a̱ka̱laa jini tazwa Yesu nyia̱, 58“Zi̱ ku fa̱k gu nyia̱ a̱ na bi̱ri̱m A̱li Nwuat Za̱nang A̱gwaza kani nang á̱ nok ma̱ng bwak á̱nietbishyi a̱ni. A̱wot mami mam tat, a̱ nok a̱ghyang nang á̱ si̱ mi̱n nok ma̱ng bwak á̱nietbishyi a̱ni bah.” 59A̱mgba̱m ma̱ng a̱nia, ta̱fwat ba̱ ku nwuat a̱ni, si̱ nat kankang!

60Huhwa a̱gba̱ndang pris wu si̱ doot a̱ yong a̱zaghyi mba, a̱ si̱ lyip Yesu nyia̱, “A na nwuak shim tazwa a̱hyiak nang á̱ bat ang a̱ni baa?” 61A̱wot Yesu si̱ tyia̱ nywang, a̱ si̱ kaat kyang bah. A̱jawa a̱gba̱ndang pris wu si̱ bu lyip gu, nyia̱ “Nwan wa yet Kristi, A̱gwam nang A̱gwaza kup gu tyok a̱ni; a bu yet Nggwon A̱gwaza a̱ Swak ma̱ng A̱kyenkyai Shi a̱ni aa?”

62Yesu si̱ shim nyia̱, “Nung gwa. A̱wot nyi na li Nggwon A̱tyubishyi ka̱ swan a̱zayak A̱gwaza a̱ byia̱ Tyok a̱ni, nang gu neet tswazwa a̱ chobai ma̱ á̱ni̱nian!”

63A̱jawa a̱gba̱ndang pris wu si̱ sam a̱yaatoot nggu ba, a̱ si̱ nyia̱, “Yihwa mbyia̱ zi̱ bu nchat ta̱fwat jhyáng#14:63 Lyuut cha̱chaat: “Á̱niet sheda á̱ghyang.”?!” A̱ si̱ lyip nyia̱, 64“Nyin meang, nyi fa̱k lihyat nang gu nyia̱ A̱gwaza ndyo a̱ni! Yihwa nang nyi li?” A̱mgba̱m mba, ba̱ si̱ nyia̱ nggu shi̱ri̱ya. Ba̱ si̱ nyia̱ ku myim á̱ hyat gu.

65A̱jawa á̱ghyang á̱niet si̱ ta̱bat tang Yesu a̱ta̱mpyia̱. Ba̱ si̱ la̱p á̱ghyi nggu ba. Ba̱ si̱ tsot gu, ba̱ si̱ mang gu a̱lyem nyia̱, “Tyai a̱tyu a̱ lwi ang a̱ni!” Ma a̱nia wa, á̱niet chok a̱vwuo ba si̱ tsot gu.

Siman Bitut Fwuo Lyen Yesu

66Nang Bitut nswan mi̱ ndidyaat tafa tutu zop a̱lyiat hu a̱ni, a̱khwo nggwon neam mami á̱khwo a̱gba̱ndang pris ba si̱ kin neet a̱ bai. 67Nang gu ndi Bitut gu ni̱ wa̱i long hu a̱ni, a̱ si̱ ti̱p á̱ghyi di̱di̱r da̱ nggu, a̱ si̱ nyia̱, “Nwan meang, a shya̱ dundung ma̱ng Yesu a̱tyu Na̱za̱ra̱t wuni!”

68A̱wot Bitut si̱ fwuo nyia̱, “N dyen gu bah! Da̱ nung, n fi̱k kyang hu nang a lyiat a̱ni bah!” Nang nggu nhyia̱ a̱nia a̱ni, a̱ si̱ tyia̱ kwak a̱ ghwut a̱ bai a̱zanu didyaat ka. [[A̱jawa a̱gbak si̱ kin tyiap.]]#14:68 Lyuut ghyang mbyia̱: “A̱jawa a̱gbak si̱ kin tyiap” bah.

69A̱khwo nggwon neam a̱wa si̱ bu li guu nang gu yong. Huhwa gu bu shei ma̱ng á̱niet ba ba̱ yong a̱ja a̱ni nyia̱, “Di, a̱tyu wuni yet a̱tyo nyiung ma̱ a̱mba za̱m!” 70A̱wot Bitut si̱ bu fwuo. Á̱ si̱ labeang bah, á̱niet ba ba̱ yong a̱ja a̱ni, ba̱ si̱ bu nyia̱ ma̱ng a̱nggu, “A̱tsak a̱lyiat, a yet a̱tyo nyiung ma̱ mba za̱m, mat a yet a̱tyu Ga̱lili wa!”

71A̱jawa Bitut si̱ shyi shyishyi nyia̱, “N shyi, n dyen a̱tyu wuni nang nyi lyiat a̱ni bah!”

72Mi̱ di̱ yong a̱hwa a̱gbak si̱ bu tyiap a̱ka̱feang ka. A̱wot Bitut si̱ kin jhyung a̱lyiat nang Yesu ku hyia̱ ma̱ng a̱nggu a̱ni nyia̱, “Neet nang a̱gbak ka̱n tyiap a̱ka̱feang bah, a na fwuo lyen nung a̱ka̱tat.” A̱ si̱ mat kun, a̱ si̱ ta̱bat a̱nak.

Currently Selected:

Ma̱rkut 14: TyapNT

Highlight

Copy