Luka 3
3
Yoona A̱tyu Nyia̱ Ba̱ptisman Jhyi Vak Bai Yesu
(Mat 3:1-12; Ma̱r 1:1-18; Yon 1:19-28)
1Jen nang Tiba̱riyut Kaisar ku nnyia̱ a̱lyia̱ swak ma̱ a̱fwuon di̱ yet a̱gba̱ndang a̱gwam shan A̱romawa a̱ni; Buntut Bilatut wa si̱ yet gwomna fam a̱byin Yahudiya hu; a̱gwam Hiridut Antibat wa si̱ ma nyia̱ tyok mi̱ fam a̱byin Ga̱lili hu; a̱gwam Filibut a̱ ku yet a̱na̱nyiuk Hiridut a̱ni, a̱ si̱ ma nyia̱ tyok fam bibyin Ituriya ma̱ng Tarakunitit; a̱gwam Lisaniyat wa si̱ ma nyia̱ tyok fam a̱byin A̱biliya hu. 2Di̱n jen a̱ja ja nang Hanana ma̱ng Ka̱yafat, bibya yet a̱cha̱chet a̱yaapris ba. A̱gwaza si̱ ta̱m ma̱ng a̱lyiat nggu na da̱ a̱vwuo Yoona, a̱fai Za̱ka̱riya, nang gu swan mi̱ ntswa a̱yit.
3Yoona si̱ chong a̱ kat nfam bibyin na̱ hyia̱k a̱ghyui Urdun ka a̱ni. A̱ si̱ shei a̱lyiat A̱gwaza na nyia̱, á̱niet ba ba̱ ghwon a̱ka̱tuk nyia̱ mba wu, ba̱ nwuo khwi A̱gwaza, a̱wot á̱ nyia̱ mba ba̱ptisman; da̱nian á̱ ka chi a̱ka̱tuk nyia̱ mba wu.
4Ma̱nang Ishaya, a̱ta̱m a̱kwonu A̱gwaza wu, ndyuut tazwa Yoona a̱ni, nyia̱,
“A̱yin ta̱ngam a̱nwuat mi̱ chet mi̱ tswa a̱yit nyia̱,
‘Nyi jhyi vak hu A̱tyoli gu ba̱ nkai!
Nyi jhyi vak nggu hu ku nat cha̱chaat!
5Kuzang a̱vwuo ka̱ yet a̱niak a̱ni,
á̱ na chi ma̱ng mbyin,
ka̱ bai cha̱chaat.
Kuzang a̱fan ma̱ng tsok,
á̱ na bi̱ri̱m, ba̱ nat cha̱chaat.
Kuzang vak hu gorong a̱ni,
á̱ na nyep hu ku nat di̱di̱r.
Kuzang vak ku byia̱ a̱gbi̱ngba̱ra̱ng a̱ni,
á̱ na jhyi nhu, ku tyia̱ sha̱shet.
6A̱wot a̱mgba̱m á̱niet ba na li
san ku neet da̱ a̱vwuo A̱gwaza a̱ni.’ ”#3:6 Ish 40:3-5.
7Mat a̱nia, Yoona ni̱ tak ma̱ng á̱kpa á̱niet, ba̱ ni̱ bai gu ka nyia̱ mba ba̱ptisman ji a̱ni, nyia̱, “Nyin a̱ka̱sorong mman tsuup a̱byin! Nyi fa nyi na shot mwai lyen A̱gwaza hu, ku chobai a̱ni mat ba̱ptisman ji a?#3:7 Lyuut cha̱chaat: “A̱nyan wa gba nyin nyi tyong mwai lyen A̱gwaza ku chobai a̱ni?” 8Nyi nyia̱ á̱tsatsak nta̱m na̱ na tak kpa̱sai nang nyi nghwon a̱ka̱tuk nyia̱ nyin wu, nyi si̱ khwi A̱gwaza! Nyi yok laai pyipyia̱ nyin nyia̱, ‘Zi̱ shya̱ san, mat#3:8 Lyuut cha̱chaat: “Ibrahim wa yet a̱tyia̱ a̱khwop nzi̱t wu!” Mat 3:9. Ibrahim wa yet a̱tyia̱ a̱khwop nzi̱t wu.’ Mat n shei nyin nang A̱gwaza mbyia̱ chet a̱ tyia̱ nfang nani na̱ yet mman kwai Ibrahim!
9“A̱wot ku ma̱ninika, á̱ ka̱n sak a̱khwon ka da̱ á̱ni̱nan a̱ka̱kwon ba; á̱ nfwuong á̱ tyam a̱ka̱kwon na. Huhwa, kuzang a̱kwon ka ka̱ lak tyia̱ a̱tsatsak sum a̱ni, á̱ na tyam á̱ni̱nan ba ka̱ kwa a̱byin! A̱wot á̱ ta nka mi̱ ndong!”
10Á̱kpa á̱niet ka si̱ nwuo lyi̱ri̱m nggu nyia̱, “Ka̱ a̱nia wa, yihwa myim zi̱ nyia̱?”
11Yoona si̱ nwuak ba shim nyia̱, “A̱tyu a̱ byia̱ a̱yaatoot a̱feang a̱ni, ku myim gu ni̱ nnang a̱tyu a̱ sang a̱ni a̱nyiung. Ma a̱nia wa, a̱tyu a̱ byia̱ kyayak a̱ni, gu ni̱ nnang a̱tyu a̱ sang a̱ni.”
12Ku á̱niet shyuo á̱niet di̱ saai kurum ga̱ndu, ba̱ si̱ bai Yoona a̱ ka nyia̱ mba ba̱ptisman ji. Ba̱ si̱ lyip gu nyia̱, “A̱tyu tyiet, yihwa myim zi̱ nyia̱?”
13A̱ si̱ nwuak ba shim nyia̱, “Nyi ni̱ ngyok saai kurum ga̱ndu hu, ku swak si̱ nang á̱ tyia̱ nyin saai hu a̱ni bah!”
14Á̱niet nzwang á̱ghyang mameang, si̱ bai á̱ ba̱ lyip Yoona nyia̱, “Nzi̱t meang, yihwa myim zi̱ nyia̱?”
A̱ si̱ nyia̱ ma̱ng a̱mba, “Nyi ni̱ ngyok tsa a̱yin, nyi ta̱wap kyang nggu mi̱n chet bah. Nyi bu ni̱ ngyok fa̱t a̱yin á̱ghyi di̱ bat gu a̱bun bah. Nyi ni̱ nswa nyi yok jhyuai kurum nang á̱ teang nyin a̱ni bah.”
15Á̱niet ba ba̱ tyia̱ fwuo di̱ bai Kristi ma a̱nggang a̱ni, ba̱ si̱ byia̱ di̱dang ba̱ lyen ke Yoona wa yet Kristi#3:15 Wa̱i a̱lyiat: Kristi fa, “A̱tyu nang A̱gwaza kup gu tyok a̱ bu na ta̱m nggu a̱ni.” Ma̱r 1:1; Yon 1:41. a̱ chobai a̱ni. 16Huhwa Yoona si̱ tak ma̱ng a̱mba nyia̱, “Nung, n nyia̱ nyin ba̱ptisman ji ma̱ng a̱sa̱khwot nia. A̱wot a̱tyu a̱ swak nung ma̱ za̱nzan a̱ni chobai. Nung, n maai mi̱ maai n gyet a̱khwo nggu wu, n ta̱bwak mbyii̱k ywan á̱kwatak nggu hu bah. Nggu, a̱ na nyia̱ nyin ba̱ptisman ji ma̱ng A̱za̱za̱rak Ntswa wa ma̱ng long.
17A̱tyu a̱ chobai a̱ni, a̱ na kyiak bibyia̱,
gu nchyok yak nggu hu;
gu lyang a̱vwuo tsot yak ka.
A̱wot a̱ na ti̱n tswa yak ji,
a̱ tyia̱ ma̱ a̱gban nggu wu.
A̱wot a̱sunsong wu,
a̱ na fwui nggu ma̱ a̱nga̱ngak ndong sang sangba̱p,
nang á̱ si̱ mi̱n nyiip a̱ni bah!”
18A̱ni wa, Yoona si̱ nkhwat á̱kpa á̱niet ka a̱fufwuo ma̱ng gba ma̱ a̱di̱di̱t. A̱ si̱ tak ma̱ng a̱mba A̱sham Nkhang ka.
19A̱wot Yoona si̱ mun a̱ gba a̱gwam Hiridut Antibat a̱ka̱tuk nyia̱ nggu wu kpa̱sai (nggu wa ku yet a̱gwam fam a̱byin Ga̱lili wu); mat nang a̱gwam Hiridut mbwuo Hiridiyat, a̱ ku yet a̱byii̱k a̱na̱nyiuk nggu wu a̱ni#3:19 Wa̱i a̱lyiat: A̱ ku yet a̱byii̱k a̱na̱nyiuk nggu wu a̱ni. A̱gwam Hiridut san Hiridiyat a̱byii̱k Filibut a̱na̱nyiuk gu a̱ bwuo nang gu ni̱ shya̱ a̱chet.. Yoona si̱ bu gba nggu di̱ tangka̱i a̱ka̱tuk nyia̱ ma̱ a̱di̱di̱t á̱ghyang nang gu nyia̱ a̱ni. 20Mat a̱nia, á̱ si̱ labeang bah, Hiridut si̱ ta̱bat Yoona a̱ si̱ tyia̱ nggu mi̱ jaru. A̱ si̱ bu mbeang a̱ka̱tuk nyia̱ wuni tazwa a̱ka̱tuk nyia̱ ma̱ a̱di̱di̱t nang gu ka̱n nyia̱ a̱ni.
Á̱ Nyia̱ Yesu Ba̱ptisman
(Mat 3:13-17; Ma̱r 1:9-11)
21Neet nang á̱ ka̱n tyia̱ Yoona mi̱ jaru bah, a̱ ku nyia̱ á̱ghyang á̱niet ba̱ptisman ji; a̱ si̱ mun a̱ nyia̱ Yesu ndyo mameang. Nang Yesu nshya̱ di̱ naai A̱gwaza a̱ni, Ma A̱gwaza tswazwa si̱ kin khwuk.
22A̱za̱za̱rak Ntswa wu si̱ chorop a̱ chobai nang a̱bwa#3:22a Lyuut cha̱chaat: “Mi̱ vam nang a̱bwa.” a̱ni neet Ma A̱gwaza tswazwa, a̱ ba̱ swan da̱ nggu! A̱wot á̱ si̱ fa̱k a̱nwuat ka̱ neet Ma A̱gwaza tswazwa nyia̱, “Nwan wa yet nggwon nung ka nang n chat a̱ni ba̱t! A̱wot a bai ma̱ng a̱nung a̱gba̱ndang a̱lyia̱ sai!#3:22b Lyuut ghyang mbyia̱: “… chat a̱ni ba̱t. A̱wot a̱fwun n gyet A̱tyia̱ ang wa.””
Nche A̱yaatyia̱ A̱khwop Yesu Kristi
(Mat 1:1-17)
23Jen nang Yesu nnaat a̱lyia̱ swak ntat ma̱ng kyang a̱ni, a̱ si̱ nwuo ta̱m shei á̱niet a̱lyiat A̱gwaza na.
Á̱ si̱ kyiak nyia̱ Yesu yet a̱fai Isuu wa.
Isuu ku yet a̱fai Heli.
Heli si̱ yet a̱fai Matat.
24Matat si̱ yet a̱fai La̱wi.
La̱wi si̱ yet a̱fai Ma̱lki.
Ma̱lki si̱ yet a̱fai Yanai.
Yanai si̱ yet a̱fai Isuu.
25Isuu si̱ yet a̱fai Ma̱tatiyat.
Ma̱tatiyat si̱ yet a̱fai A̱mot.
A̱mot si̱ yet a̱fai Na̱hum.
Na̱hum si̱ yet a̱fai A̱sa̱li.
A̱sa̱li si̱ yet a̱fai Na̱ga̱i.
26Na̱ga̱i si̱ yet a̱fai Maata.
Maata si̱ yet a̱fai Ma̱tatiyat.
Ma̱tatiyat si̱ yet a̱fai Sa̱meen.
Sa̱meen si̱ yet a̱fai Yosek.
Yosek si̱ yet a̱fai Yoda.
27Yoda si̱ yet a̱fai Yoonan.
Yoonan si̱ yet a̱fai Risa.
Risa si̱ yet a̱fai Za̱rubabel.
Za̱rubabel si̱ yet a̱fai Sha̱li̱tiyel.
Sha̱li̱tiyel si̱ yet a̱fai Ni̱ri.
28Ni̱ri si̱ yet a̱fai Ma̱lki.
Ma̱lki si̱ yet a̱fai A̱di.
A̱di si̱ yet a̱fai Kusam.
Kusam si̱ yet a̱fai A̱lmadam.
A̱lmadam si̱ yet a̱fai A̱r.
29A̱r si̱ yet a̱fai Joshuwa.
Joshuwa si̱ yet a̱fai A̱li̱aza.
A̱li̱aza si̱ yet a̱fai Yorim.
Yorim si̱ yet a̱fai Matat.
Matat si̱ yet a̱fai La̱wi.
30La̱wi si̱ yet a̱fai Simiyon.
Simiyon si̱ yet a̱fai Yahuda.
Yahuda si̱ yet a̱fai Isuu.
Isuu si̱ yet a̱fai Yoonam.
Yoonam si̱ yet a̱fai A̱li̱yakim.
31A̱li̱yakim si̱ yet a̱fai Ma̱laya.
Ma̱laya si̱ yet a̱fai Mena.
Mena si̱ yet a̱fai Matata.
Matata si̱ yet a̱fai Natan.
Natan si̱ yet a̱fai a̱gwam Da̱wuda.
32A̱gwam Da̱wuda si̱ yet a̱fai Yesi.
Yesi si̱ yet a̱fai Obed.
Obed si̱ yet a̱fai Bowat.
Bowat si̱ yet a̱fai Salmun.
Salmun si̱ yet a̱fai Na̱hi̱shun#3:32 Ku: “Nashon.”.
33Na̱hi̱shun si̱ yet a̱fai A̱minadap.
A̱minadap si̱ yet a̱fai A̱da̱min.
A̱da̱min si̱ yet a̱fai A̱ram#3:33 Lyuut ghyang mbyia̱: A̱ra̱ni. A̱mgba̱m lyulyoot huni A̱rama ma̱ng A̱ra̱ni yet a̱lyoot a̱tyo nyiung nang á̱ ngyei Ram a̱ni. 1TNA 2:9-10..
A̱ram si̱ yet a̱fai Ha̱sa̱ron.
Ha̱sa̱ron si̱ yet a̱fai Fa̱risa.
Fa̱risa si̱ yet a̱fai Yahuda.
34Yahuda si̱ yet a̱fai Yakubu.
Yakubu si̱ yet a̱fai Ishaku.
Ishaku si̱ yet a̱fai Ibrahim.
Ibrahim si̱ yet a̱fai Tera.
Tera si̱ yet a̱fai Na̱hor.
35Na̱hor si̱ yet a̱fai Sa̱ruk.
Sa̱ruk si̱ yet a̱fai Ra̱ga̱u.
Ra̱ga̱u si̱ yet a̱fai Fa̱lek.
Fa̱lek si̱ yet a̱fai A̱biru.
A̱biru si̱ yet a̱fai Shela.
36Shela si̱ yet a̱fai Ka̱nan.
Ka̱nan si̱ yet a̱fai A̱ri̱fahat.
A̱ri̱fahat si̱ yet a̱fai Shem.
Shem si̱ yet a̱fai Nuhu.
Nuhu si̱ yet a̱fai La̱mek.
37La̱mek si̱ yet a̱fai Ma̱tusha̱la.
Ma̱tusha̱la si̱ yet a̱fai Enok.
Enok si̱ yet a̱fai Ya̱red.
Ya̱red si̱ yet a̱fai Ma̱hala̱lel.
Ma̱hala̱lel si̱ yet a̱fai Ka̱nan.
38Kenan si̱ yet a̱fai A̱nosh.
A̱nosh si̱ yet a̱fai Set.
Set si̱ yet a̱fai A̱da̱mu.
A̱da̱mu si̱ yet a̱tyu nang A̱gwaza nyia̱ a̱ni#3:38 Lyuut cha̱chaat: “A̱da̱mu si̱ yet nggwon A̱gwaza.”.
Currently Selected:
Luka 3: TyapNT
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
