Markus 10
10
Ya̱m chikku ki̱naam
(Mat 19:1-12; Luk 16:18)
1Yo n Yesu a du fiko, a yika bale Yafudiya, a yabu la Wurdune. Ki̱tu ni̱be a ki̱la mura ki̱mi̱ntuwe, n ki̱n a miya chimi̱n yinangu ki̱madi kwadangu.
2Bi̱kam ni̱bu Farisamu a be fi a di̱ki̱ne be ki̱swe ki̱nu ko “Kanodu a dakan ni ka mar naye konga?”
3A yi chi ko, “M Musa a fwa chimi̱n ko wureni?”
4N chi a ke ki̱mi̱n ko, “M Musa a ni ni̱n da ko ni̱n mwal lwangi̱n chikku ki̱nanu, ni̱n du naye a yikan.”
5N Yesu a yi chi ko, “M Musa a mwal chimi̱n ki̱ku yilang di̱ne kuli̱ne chi̱n. 6Aya we tile bi̱rke, n Kwama a muni, kwarta n ti naye. 7Di̱ne ye, nii ka du te ki̱n n ti ne ki̱n ka swedu wa̱re n ti naye ko, 8N chi ki̱ni bura ko, ka kaddi wiin. A kau ki̱ka̱ngu chi a newe burau. 9Di̱ne yiko, chi n Kwama a kwarkane ni a yarkaduwe.”
10Yo n chi a ki̱la lo, miyari̱mu a ma Yesu mi̱n di̱bi̱du we ya̱mu n ki̱n a fwamu. 11Yinu a yi chi ko, “Kanang wuwule nii wu a mar naye, a yiu wukane naye ki̱ma ti̱kuli n ti ki̱n. 12Ti̱nti̱ne ka naye a mar kwarta ko, a yikan a na wukane niye, n ki̱n ki̱ma ti̱kuli ti̱n.”
N Yesu a dela bwesi̱m bi̱ti̱ri̱m
(Mat 19:13-15; Luk 18:15-17)
13Ni̱bu ki̱bedu ki̱ni bwesi̱m bi̱ti̱ri̱mu a di̱Yesuwe ko ke a yo chimi̱n delaku. Aya miyari̱m ki̱mu ki̱kwabu ni̱bu 14Yo n Yesu a ku ye, a ma ki̱fwini ki̱ni miyari̱mu. A yi chi ko, “Ti̱du bwesi̱mu a be fi a di̱mi̱ne, ti̱kwabi̱duwe di̱ne Yaa Kwama n wu ki̱dum bi̱bu. 15Mi̱n fwa chimi̱n bi̱yili̱m, ni wu a ne ka yiu Yaa Kwama yinangu bwesi̱mu ki̱madangu, a ne ka le Yaa Kwama.” 16Yinu a da̱u bwesi̱mu a kwar chi, ki̱twai chidu, ki̱yo chimi̱n delaku.
Naba kuli
(Mat 19:16-30; Luk 18:18-30)
17Yo n Yesu a kun ki̱yikadu a wa̱re, wuka nii a wule ki̱ni banang a be sung we a kakku kangu, a bi̱u ki̱n ko, “Naba yungku yile, kanodu mang madi yire mang ya ti̱kuri ki̱diya kwadite?”
18N Yesu a yi ki̱n ko, “Di̱ne wule mun yaliyu mwiko naba yile? Aya a ne naba yile we ka n ke Kwama n ki̱n ki̱kune. 19‘A mwang yim yili̱ntu. Chidu nii we, madu ti̱kuli we, madu kutu we, mwedu ti̱kwanitu we, fulu ni we, ni temun n ti ne mun dwiyentu.’ ”
20Nii wu a yi ki̱n ko, “Naba yungke, n mwe mi̱n tum yili̱n ti̱tu yo mi̱ni bwesi̱ne.”
21Yinu n Yesu a da̱ng ki̱n, ki̱ni mi̱laku ko, “A du mi̱n chiti wiin. Ya feku chi muni ki̱niti kwang ni babumbu, mwang ya delaki̱ku nabwen we bwa diye. Ki̱lawe be bumite.”
22Yo a nwe ya̱m bi̱be, nii wu a kai kabu ko a yikan ki̱ni kaiyan ni̱re, di̱ne n ki̱n ki̱ni kulitu nabwen.
23Yinu n Yesu a da̱ng miyari̱m ki̱mu, a yi chi ko, “Ka kadu ki̱ni bwar yinangu naba kuli ka le Yaa Kwamangu!”
24Ya̱m bi̱bu a yo miyari̱m ki̱mu a ya̱r yii. Aya n Yesu a yiti̱ chi ki̱da ko, “Bwesi̱mi̱m, ka kadu ki̱ni bwar yinangu naba kuli ka le Yaa Kwama. 25Ka bungdu twali̱m ka le bwang libra n ti ki̱ku naba kuli ka le Yaa Kwamangu.”
26Yo miyari̱m ki̱mu a nwe ya̱m bi̱be, a ya̱r yii a laan fiko. N chi ko ka yiko “N wure ka ya swike?”
27N Yesu a da̱ng chi a yi ko, “We da̱ngku niyangu a ma bwar, ka n Kwama a newe; aya we di̱Kwama a ne bwar we.”
28Yinu m Biti̱r a yi ki̱n ko, “Da̱ng, ni̱n ni̱n duwe chiti kwang, ni̱n bumi̱n te.”
29N Yesu a yi ko, “Bi̱yili̱m mi̱n fwa chimi̱nu, a ne niwu ka du loko ka kebu ki̱m bi̱wuwiye ki̱me, ka n neki̱ne, ka n teki̱ne, ka bwesi̱m ki̱me, ka kunikiye, di̱ne mi̱n n ti ya̱m bi̱li̱me, 30chi ka yadu we ki̱dang ki̱ke, ka la kuulu, we loniyu n ti kebi̱bu bi̱bari̱mu n ti bi̱wuwiye ki̱mu n ti ne ki̱n n ti te ki̱n n ti bwesi̱mu n ti kuniyu aya ki̱ni delaki̱ku ta nwe riye, ka kadu we ti̱ti̱nitu ki̱beditu, ta ya ti̱kuri ki̱diya kwadi. 31A ya ni̱bu nabwen bi̱bu a tiye kaki̱mu ka kau swang kuteng. Yinu swang kuten ka kau bi̱kaki̱m.”
N Yesu a fwati̱ ya̱m ki̱dum bwakomu ki̱da
(Mat 20:17-19; Luk 18:31-34)
32Yo n chi a yaki̱ fi̱lu ki̱yika Wurchalimange, n Yesu a ti kakku, miyari̱m ki̱mi kub chiri burabi̱mu ki̱nabu ki̱nu ki̱ni ya̱r yii. Bi̱bu ki̱bunti̱ ki̱nu a kutemu a nwe tayi. A fwa chi mi̱nti̱ ki̱da, chi yaka fwedu n ti ki̱nitu, 33a yi ko, “Ki̱ka̱ngu ni ya Wurchalima ni̱bu ka tau Bwe Nii ka nidu a fa̱li wuduwe fansetiye n ti ni̱bu yungku yili̱ni̱m, n chi ka ma ki̱mi̱n mwataku chikkang, ka ni kuuti bi̱bu n chi n ke ni̱bu Yafudam. 34N chi ka swa̱ba ki̱nu, ka tibi̱ ki̱nu ki̱tuum, ka twala ki̱nu, ka chi̱u ki̱nu, we kuteng ditiyi yittangu, ka kunti̱nuwe.”
Ka̱lku Yakubu n ti Yowanamu
(Mat 20:20-28)
35Yinu n Yakubu n ti Yowana bwesi̱m Sa̱badimu, a be fi a di̱Yesuwe, n chi a yi ko, “Naba yungke, ni̱n baddu nang bi̱n ti̱kan chi.”
36Yinu a yi ko, “N ti̱n ti̱badu mang ma chimi̱n wureni?”
37N chi a yi ko, “We yaamo, yo wuka a kang ki̱yilang mwang, yinu wuka wiine a kantakwelang mwang.”
38Aya n Yesu a yi chi, “Ta yimbu chi ti̱bi̱ditu, we ta yindu ta nwe riye mi̱n yadu mang nwedenga? We ta yindu ta ma batisma wu a riye yamang mada?”
39N chi a ke ko, “Ngo, nang medu.” N Yesu a yi chi ko, “Ta nwe riye wu yamang nwede? Ka ma chimi̱n batisma ki̱ni ki̱dum batismamu ka mamida? 40Aya mi̱n n ke wu ki̱ni dukanu mang yo wuka chi̱n a kang ki̱yilang ka a kantakwelange. Fanti yiyu n bi̱u ni̱bu a tu a do chi mi̱ni̱mu.”
41Yo bi̱kamu miyari̱m bi̱bi kubi̱mu a nwe ya̱m bi̱be, n chi a nwe ki̱fwini Yakubu n ti Yowana. 42N Yesu a yale chi a fi wiine ko, “Ti̱yim, we kuuti n ke Yafudamu, bi̱bu ni̱bu a yim chi ki̱ni mati̱ni̱mu, ki̱yung ni̱bu chimu mi̱n dukan. Ti̱nti̱ne bi̱duum chimu ki̱yung ni̱bu chimu mi̱n dukan. 43Aya a ne ka kadi yiko n ti chi̱n. Ka n wure wu ki̱baddu ka kau tikake we tibe chi̱ne, n ki̱n ka kau naba nangang bi̱kamu ni̱be. 44Ti̱nti̱ne wu ki̱baddu ka kau tikake a tibe chi̱ne, ka kau ka̱be ni̱be. 45Aya Bwe Nii a bebu di̱ne ke ni̱ba nang sii ki̱nu, aya ke ki̱kau ka̱be, yinu ka ni ti̱kuri kitu di̱ne ke ni̱bu nabwen aya yuki̱ku.”
M Batimawu a ku di
(Mat 20:29-34; Luk 18:35-43)
46Yinu yo n chi a lam Yerikonge, n ki̱n n ti miyari̱m ki̱mu, n ti ni̱bu nabwen, a ya wukane ki̱du a swe a ki̱ti̱ku wa̱reng ki̱ka̱la chi, di̱n ki̱nu n Bartimawus bwe Timawuse. 47Yo a nwe ko n Yesu Banasa̱rete nang wu ki̱sude, a mwe ki̱yalu ki̱ni dukan ko, “Waa Yesu bwe Dauda, nwe ki̱bunemi!”
48Bi̱kamu a kwabu ki̱n ko a lemi̱n. Aya n ki̱n a su keru ki̱yalu ko, “Waa! Bwe Dauda, nwe ki̱bune me!”
49N Yesu a ti a yi ko, “Ti̱yal miye ki̱n.” N chi a yale ki̱du, a yi ki̱n ko, “Nang mi̱ladu, ki̱yali̱nu.” 50M Batimawu a kaibu ki̱swi, a suku luke a mau a bwa, yinu a kuni ngi̱rtu, a yika fi a di̱Yesu we.
51N Yesu a bi̱u ki̱n ko, “Mun baddu mang ma mi̱n wureni?” Ki̱du a ke ki̱mi̱n ko, “Naba yuke, mi̱n baddu mang ku di.”
52Yinu n Yesu a yi ki̱n ko, “Yikan, keki̱ bi̱yili̱mang mwangu a been.” Bi̱nabi̱na a ku di, a nabu Yesu, a bunga ti̱n ware.
Currently Selected:
Markus 10: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
