Matta 12

Di̱bi̱du a difi̱kare ni̱bu Yafudam

(Mar 2:23-28; Luk 6:1-5)

1We diko, n Yesu a suwe kuni alkamayu a difi̱kare ni̱bu Yafudame. Di̱ne chune, miyari̱m ki̱mu a le ki̱kiya ti̱changri alkamaitu ki̱kudu. 2Yo ni̱bu Farisamu a ku ti̱te, n chi a yi ki̱n ko, “Da̱ng miyari̱m mumu ki̱ma chi yilang a ko makitu difi̱kare ni̱bu Yafudam.”

3A ki̱nta chi ko, ta kibu chi n Dauda a ma ki̱dangu n ki̱n n ti fati̱bu ki̱mu a nwe chunanga? 4N Dauda n ti fati̱bu ki̱mu a le Kan Kwama na Wurchalimanu ki̱dangu chun a buwangu, a chau ki̱danne wu a nike we,#12:4 Lo Kwama, nang ti̱kubitu ni̱bu Yafudam a no ki̱siin Kwama, ki̱ma Kwama mi̱nti̱ niku ki̱tumang we ki̱dangu n Solomon a tibu mu Kan di̱duna Wurchalima a be suteni̱nu. wu a no dakabu ka chadu yinangu yilangu a fwangu, ka fanseti a dakan ka chadu.

5Ka ta kibu we yilang Musangu yinangu fanseti ki̱ki yilang difi̱kare ni̱bu Yafudame we Kan Kwama di̱duna Wurchalimanu, ki̱chiru a ne ki̱lewenga? 6Mi̱n fwa chimi̱nu, nii wu a la kan Kwamane n we fi. 7Ka no ti̱yim chi ti̱kwa̱liyi ti̱tu ki̱yungditu ko, “Mi̱n bau ni̱r ki̱bune n ke niku ki̱tumangite.” A no ta swa̱babu bi̱bu yinang Kwamamu. 8Nangki̱n, Bwe Nii nang Tewuduwe difi̱kare ni̱bu Yafudam.

Wu ngi̱rmane nii

(Mar 3:1-6; Luk 6:6-11)

9N Yesu a du fiko a le di̱kan kan muraku ni̱bu Yafudam. 10Wuka nii we fiko wu fa̱la̱ngu a ngi̱rmane, yade n chi ki̱bau wa̱re wu ka tan Yesu ki̱ni ki̱le, a bi̱u Yesu ko, we yilangu, “A le ni ma nangang bekangu we difi̱kare ni̱bu Yafudam?”

11N Yesu a yi chi ko, “Ka wukane chi̱n ki̱ni kwamiye, yinu a yar a bwir difi̱kare ni̱bu Yafudam, fangko a ne chakeda?” 12Nii a la kwami ki̱da yile? A le ni ma chi ti̱yilitu difi̱kare ni̱bu Yafudam n ti ki̱ku ni lekadu a lireku yili̱nangu.

13Yinu a yi nii wuko ko, “Tare fa̱la̱ngu. Nii wu a tar fa̱la̱ngu, fa̱la̱ngu a yati̱ li̱mangu yinang kangu fa̱la̱ng no wemi̱nang.” 14Aya ni̱bu Farisamu a chir, a yikan yaka dokadu yinangu n chi ka medu ka chi̱u Yesuwangu.

N Yesu wu swabre Kwama

15Tiyangu n Yesu a swaan chitangu, a du fiko, ni̱bu nabwen a bunti̱ ki̱n we bwa a ya mi̱ne, n ki̱n a bera ni̱bi kwang. 16A ngau chimi̱nti̱ ki̱kure ko, “Ti̱fwaduwe ka m mi̱n n wure.” 17Ti̱tu a fwe ke a ri chitu fa̱ku Yichaya a fwaatu ko,

18“Bwe nangangemi,

nang wu mang mi̱lane,

wu a le ni̱r mi̱ne,

mang ri ki̱nu ki̱ni Fi̱ki̱m mi̱mu,

yinu mang mwata

kuuti mi̱n bi̱yili̱mu.

19A ne kwila chi, a ne kukku keer ki̱nu.

A ne le nelo ki̱ni didi̱kuni̱n.

20Bi̱bu a ki̱tani̱mu n ki̱n ka

tau chidu ki̱ni bwanu,

yinang swa̱ku ki̱ku a bwa wuri̱mang.

N ki̱n ka maka bi̱bu keku bi̱yili̱mang

chiyangu ki̱bwadimu ka tidi ki̱ri̱ng,

ka lami̱n ti̱n yo yile ka chau ki̱la we bwila.

21Di̱n ki̱nu ka kadu n nang

fi kuuti ka yoon ni̱re.”

Yesu n ti Bayalsabul

(Mar 3:20-30; Luk 11:14-23)

22Yinu n chi a be ki̱mi̱ne ki̱ni wuka nii wu ki̱fi̱bti a tau a kubudi ki̱lwa̱bi̱dulwa̱be, n Yesu a be nii wu, ki̱kudi, ki̱fwati̱ ya̱mu. 23Ni̱bi kwang a ya̱r yii, ki̱fwadu ko, “Wu nangki̱ bwe Dauda?”

24Aya yo ni̱bu Farisamu a nwe ya̱m bi̱be, n chi a yi ko, “N ki̱n ki̱chaku ki̱fi̱bti di̱ne tikake Mai chi n Bayalsebul a ni dukan ko a ma ti̱te.”

25Aya n Yesu a swan ti̱kuran chitu, a yi chi ko, “Ka bi̱ngai a le ti̱m ni̱bu me, yare a be we ti̱m bi̱ki̱mu. Ti̱nti̱ne, ti̱mu ki̱ma bi̱ngai mu, a ne ti kwiru. 26Ka n Setan ki̱ kaka Setane, a yung n chi a newe fiwiine. Yaako ka tidi yire? 27Ka mi̱n chaku ki̱fi̱bti ki̱ni dukan Bayalsebul ne, bi̱chimu ki̱chaki̱di dukan wuren? N chi ka mwata ya̱m chimu. 28Aya ka mi̱n chaki̱ ki̱fi̱bti ki̱ni Fi̱ki̱m Kwamame, a yung Yaa Kwama a be chimi̱ne.”

29A ne wu ka le lo naba dukane ka ma kuute we, ka a mwebu a kwababu nii we, yinu ka ya da ka ma kuuti̱te?

30Nii wu a ne we ware n ti mi̱ne, fakware mi, nii wu a makaibu murke ki̱yaiyuyaiye. 31Di̱ne yiko mi̱n fwa chimi̱nu, ka nang wuwule ki̱le n ti swa̱bane, n Kwama ka du ni̱bu mi̱nu aya a ne du wu a swa̱ba di̱n Fi̱ki̱m Kwamane. 32Kanang wuwule niye wu a tu Bwe Nii, ka du ki̱mi̱nu aya a ne du wu a swa̱ba Fi̱ki̱m Kwamame mi̱nu ki̱diya kwadu.

Tiyangu n ti ti̱kulankitu

33“Do tiyangu a le ka mun bau ti̱kulan ti̱yiliye. Ka tiyangu a lebe a ne tu chi ti̱yili. Ni swaan tiyangu a ti̱kulan ki. 34Ti̱n soti yikwaniyu, ta medu ta fwa ti̱yiliti yire, kangu n ti̱n bi̱bwilamangu? Di̱ne ya̱mu bi̱bu a ni̱ri̱mu nang bi̱bu ki̱chire fi̱langi̱mu. 35Nii wu yile, ki̱fwa chi ti̱yili ti̱tu n ki̱ni ki̱n a ni̱ritu. Wu bwila yiko ti̱n, ki̱chake ti̱bwilai ti̱tu a ni̱r ki̱ni. 36Mi̱n fwa chimi̱nu, a mwintuwe ka nang bi̱bi̱le ya̱m bi̱kusum bi̱bu ni̱bu ki̱fwadi̱me, ka le kabaku we kakku Kwamangu. 37Ti̱kwa̱liyi mwitu nang chi ka chaki̱nu, yinu n nanti̱ chi ka kaiyine.”

Ni̱bu Farisam n ti ni̱bu yilang ki̱bau swaanku

(Mar 8:11-12; Luk 11:29-32)

38Yinu bi̱kam ni̱bu Farisa n ti ni̱bu yungku yilangmu a yi ko, “Naba yungke, ni̱n baddu mwang yung ni̱n chi ka̱ta̱ki ti̱tu ka kau ni̱mi̱n di̱mwali.”

39N ki̱n a yi chi ko, “Di̱kalan di̱bwilan di̱du ki̱ma ka ti̱kuli n ke ni̱bu ni̱ri diini̱m we kakku Kwamangu! A ne di̱kan di̱mwal we di̱du a la di̱du a fa̱ku Yunanangu. 40Yinangu n Yunana a ma ditiyi yitta kuko n ti kum we fur chi̱nge wuduwengu, we yiko ti̱n Bwe Nii ka ma ditiyu yitta kuko n ti kum we ni̱r ki̱ti̱mi̱nu.

41“We dimwatake ni̱bu Ni̱ni̱bemu ka kunu ware n ti di̱kalan di̱du. N chi ka mwata ni̱bu di̱kalan di̱di̱nu mi̱nu ko n chi bi̱bwilam, di̱ne n chi a wo ki̱ti̱m we di̱mwar Yunanangu. A ya wu a la Yunana ki̱ni dwiyene n nang wu. 42We dimwatake, Cheba wuwiye Mai a ne kedu ki̱ni di̱kalan di̱du, ka yung chidu ko n chi bi̱bwilam, di̱ne n ki̱n a chire a bwa twa̱re ke be ki̱nwe dukan ya̱m yingku Mai Solomon. Aya mi̱n fwa chi mi̱nu wu a la Solomone we fi.

Ki̱laku ki̱fi̱be wu bwila

(Luk 11:24-26)

43“Yo ki̱fi̱be wu bwila a chir we bwi niye, ki̱bwa̱ladu we fantiyu ki̱bau fi̱kaku. Ka a yaabe,

44“N ki̱n ki̱yidu ko, ‘Mang ki̱lati̱ nii no mang swe mi̱ne we.’ Ka a be aya lo nga̱ra̱nge. 45Ka ki̱ladu ka ka̱re yikai ki̱fi̱bti yi̱di̱bi̱n yiyu a la ki̱n ki̱ni bwilayu, ka le lo wu n ki̱n a fi̱rene ka sweduwe. We ki̱ku ki̱dang, da nii we ka kaiyadu ka la wu kake. Nang tiyangu ka fwedu ki̱ni di̱kalan di̱dangu.”

Ne Yesuwe n ti kebi̱ki̱mu

(Mar 3:31-35; Luk 8:19-21)

46Yo a lekan ki̱fwa ni̱bu mi̱n ya̱me, kebu ki̱mu a lam fi̱lang. N chi a ke ka fwa ki̱mi̱n ya̱m. 47Wuka we ni̱bu a fikomu a yi ki̱n ko, “Da̱ng! N ne mun n ti kebu mumu a fi̱lang. N chi ki̱baddu ka fwa ya̱m n ti mun.”

48N Yesu a yi chi ko, “N Nemi nang wure? Kemi nang wure?” 49A yung miyari̱m ki̱mu ko, “N nemi n ti kebu mi̱mu nang bi̱bu n ni̱n waremu! 50Nangki̱n, wu ki̱tum ki̱ke Temi wu a diye, nang kebumi̱m n ti nemi.”

Currently Selected:

Matta 12: Tula

Highlight

Copy