Luka 24

N Yesu a kun

(Mat 28:1-10; Mar 16:1-8; Yow 20:1-10)

1We a di wu kake wu a difi̱kare, ki̱ni kunsiin, nati̱bu a yika furu ki̱ni ki̱nungi fi̱rfi̱ra̱ng. 2N chi a ya kale a bi̱len we furu. 3Aya yo n chi a le mure, a kubu kwa̱me Tewuduwe Yesu we furu. 4Yo n chi we ki̱kura ti̱te, Bi̱nabi̱na bi̱kam ni̱bi burau a tiye ki̱dwang ti chi, a do lukeyi mwemwei ki̱yiladu yinang kali yili. 5Di̱ne taya tau chiye, nati̱bu a swa kabi̱ni chiyu a ti̱m. Aya ni̱bu bi̱bu a yi chi ko, “A mayire ti̱baba wu kure a bi̱bwari̱me?” 6N ki̱n a newe fi, a kun! Ti̱kur chitu a fwa chimi̱nitu we ki̱dangu n ti̱n no ware a Ka̱lili yangu ko. #24:6-7 Mat 16:21; 17:22-23; 20:18-19; Mar 8:31; 9:31; 10:33-34; Luk 9:22; 18:31-33. 7“Ni̱bu ka ni Bwe Nii a kani ni̱bu ki̱leti̱m, ka kuka ki̱nu aya we wu tare di ka kunu.”

8Yinu n chi a kuri ki̱ni ya̱m Yesumu.

9Yo n chi a ki̱la we bwana fure, n chi a fwa bi̱bi kub chiri wiini̱mu mi̱n n ti bi̱kami kwang. 10Maryamu wu a Maka̱dala n ti Yowena n ti Maryamu ne Yakubu n ti bi̱kamu nati̱bu n ti chi bi̱bu a fwa fanduti mi̱n ya̱m bi̱bumu. 11Aya n chi a kebu ki̱ni ya̱m nati̱bi̱mu. Di̱ne ya̱m chimu ki̱madu yinang ti̱kwani. 12M Biti̱r a tababu bwi, a kun, a wul, a yika bwa fure. Yinu yo n ki̱n a lam kwa̱r furune, a sung, a da̱ng, a ku kana luke kwa̱me. Yinu a ki̱lawe, chitu a fwetu a ya̱r ki̱n yi. #24:12 Yikayu tatti̱ki̱dai Yika̱ri a mwalbu wa̱re 12.

A Wa̱re bi̱n Yimi̱wasu

(Mar 16:12-13)

13We ka di wu wiine, burau we miyari̱m Yesumu ki̱ya wuka be bi̱ne ni̱bu ki̱yalu ko Yimi̱wasu. Yimi̱wasu a lam Siriyu kub chiri wiin we Wurchalima. 14N chi ki̱fwadu we yichiyu kanang ti̱ti̱le chiye ti̱tu a fwetu. 15Kangu n chi a chakakku ki̱ni twayakangu, n Yesu a fwadi chi mi̱ntuwe, ki̱bungadu ware n ti chi. 16Aya n chi a swaanbu ki̱n di̱ne n Kwama kwa̱l chi mi̱nbu.

17A bi̱u chi ko, “Ti̱twaya wureni we a yayu chi̱n ti̱yade wu.”

N chi ki̱ni burako a ti we fiko yi ki̱ni kaiyan ni̱re. 18Wiin we mure chi, wu di̱n ki̱nun Kiliyobase, a bi̱u ko “N mun nang rungko a Wurchalima wu mwang yimbu chitu a fwe we diti yitta?”

19Yinu a yi chi, “Wule fwe.”

N chi a yi ki̱n ko, “Chi a fwe n ti Yesu Banasa̱rete. N ki̱n fa̱ku wu ki̱ni dukan we nangaritu n ti ya̱mu we kakki̱ Kwamangu n ti ni̱bu ki̱ni kwang.” 20Wu tikaketi fanseti n ti mati̱mu a ni ki̱n ko ni̱bu a chi̱u, ni̱bu a kukan a ki̱tiyang bwang. 21Ni yo ni̱ru ko ki̱n nang nii wu ka yu Yisrela! Aya ki̱ka̱ngu a lam ditiyi yitta kangu ti̱chitu wu a fwe mi̱nangu. 22A kuteng ki̱ku bi̱kamu nati̱bu a ya̱r ni̱n yii, n chi a ya furu ki̱ni kunsiin wu. 23Aya n chi a yabu bwikiyu, Yo n chi a ki̱lawe, a be yi ni̱n ko, chi ku Naba di̱tumbi̱re Kwama wu a yi chi ko n we ki̱ni ti̱kuriye. 24Bi̱kamu ni̱bu ni̱m we tibe ni̱n a ya bwa fure, a ya a lakanbu n ti ya̱mu nati̱bu a fwa chimi̱ni̱mu aya n chi a kuwebu ki̱n.

25N Yesu a yi chi ko, “A mayire ta kasabu kassane, ta ki̱tan we keku bi̱yili̱mang change we chitu fa̱kubu Kwamama fwaatu. 26Tayimbu tiko a mwintuwe m Masiya ka nwe riye, yinu ka le dwiyen kita?” 27Yinu n Yesu a fwa chimi̱n chitu ki̱ni kwang ti̱tu a mwal a dur ki̱nitu we taki̱da Kwama, a mwetuwe yilang Musangu a lanti̱ tati̱ki̱dai fa̱kubu Kwamamu kwang.

28Yo n chi a mwatawe be bi̱ne wu n chi ki̱yade, n Yesu a ma yinangu ka sudang. 29Aya n chi a wana ki̱n ki̱ni dukan ko, “Swe ti ni̱n, a ya me a lam, dii a mwatan ka ledu.” Yinu n ki̱n a ya swe ware ti chi.

30Yo n chi a yaki̱ chau chabte, yinu a da̱u ki̱danniyu, a wana Kwama, a wulan a nika chi. 31Bi̱nabi̱na nui chiyu a wuden, n chi a swaan ti̱n ko n Yesu. N chi a bau ki̱ni si̱ng. 32N chi ki̱bi̱be yichiyu ko, “Ni̱tu chi̱retu a li̱mbu we wa̱re ki̱dangu n ki̱n yaki̱ fwa ni mi̱n ya̱m Kwamamma?”

33N chi a du fiko a ki̱la Wurchalima, a ya bi̱bi kub chiri wiini̱mu, a swe ware ti bi̱kam ni̱bu. 34Ki̱yidu ko, “Bi̱yili̱m, Tewuduwe a kun! A fwe Simun Biti̱r mi̱ntuwe.” 35Yinu n chi bi̱bi burabi̱mu a fwa chi a fwetu we wa̱re, n ti yinangu n chi a swaan Yesu a kuteng ki̱ku a kera ki̱danniyangu.

N Yesu a fwe miyari̱mu mi̱ntuwe

(Mat 28:16-20; Mar 16:14-18; Yow 20:19-23; Nfa 1:6-8)

36Ki̱daangu n chi a le ki̱fwa ya̱m bi̱bangu, n Yesu a fwetuwe tibe chi fwadu, a yi chi ko, “Li̱mang a be chimi̱ne.” #24:36 Li̱mang a be chimi̱ne: Yikayu tatti̱ki̱dai Yika̱ri a mwalbu wa̱re 36.

37Taiyi a tau chi, bwiyu chiyu ki̱mi̱kadu, n chi ko kano chi ku butu. 38A yi chi ko, “A mayire ta mi̱kane, a mayire ti̱ma ti̱kaman we dutu chinte? 39Ti̱da̱ng fa̱li miyu n ti nani miyu, m mi̱n, m mi̱fwan. Ti̱twaiyi, ti̱da̱ng, buti̱tu a newe ki̱ni nam bwiye ka ti̱kute, yinangu ta kuiyangu.”

40Yo n ki̱n a fwa bi̱be, a yung chi fa̱li kiyu n ti nani kiyu. 41Kangu n chi a tibu kebi̱yili̱mu didinangu di̱ne nabwe furi mwemwenu n ti ya̱r yii chi a bi̱u chi ko, “N ti̱ni ki̱ni chabtu we fi ta chadda?” 42N chi a ni ki̱n chi̱nge wukere. 43N ki̱n a yiu, a wu, we kakku chiyangu.

44N ki̱n a yi chi ko, “Ti̱tu nang chi mang fwa chimi̱n we ki̱dangu mi̱n no we ti chi̱nangu. Kanang ti̱ti̱le chiye ti̱tu ni̱bu a mwal a dur mi̱n we yilang Musangu n ti fa̱kubi̱bu n ti Sa̱bura.”

45Yinu n ki̱n a wudu chimi̱n ki̱kwa̱mi chiyu ke n chi a swaan ya̱m Kwamamu. 46N ki̱n a yi chi ko, “Ti̱tu nang chi a mwale ko, ‘M Masiya ka nwe riye, we di wu tare, ka kunti̱nuwe furu.’ 47Yinu di̱mwar woki̱ ki̱ti̱mangu we ki̱leti ni̱biyu ka mwadu we dinkinu we kuuti kwang, ka mweti̱nu we Wurchalima. 48N ti̱n ti̱ku ti̱chitu wu ki̱ni nui chi̱n. 49Mi̱n yikadu yamang tum chimi̱ne chi n Temi a bwa̱bitu. Aya Ti̱swe we bi̱n di̱du ka lami̱nti̱ yo ta ya dukan Kwamane.” #24:49 Nfa 1:4.

N Yesu a ki̱la bwadiye

(Mar 16:19-20; Nfa 1:9-11)

50Yo n ki̱n a ya ki̱ni chi a tanti̱lange Betani, a kuku fa̱liyu a yo chi mi̱n delaku. #24:50-51 Nfa 1:9-11. 51Yo n ki̱n we ki̱yo chimi̱n dela ke, a da̱u ki̱n, a yikan di, a du chi. 52Yinu n chi a si ki̱n a kun a ki̱la Wurchalima ki̱ni furi mwemwenu yinang. 53N chi a da̱u ki̱swi we Kan Kwamana Wurchalimanu ki̱ dela Kwama.

Currently Selected:

Luka 24: Tula

Highlight

Copy