Luka 22
22
Yafuda a kwa̱l Yesu.
(Mat 26:1-5; Mar 14:1,2,10,11; Yow 11:45-53)
1Yo ki̱swi Yiye wu a#22:1 ki̱dane: Chabtu Ki̱tulei ti̱tu ni̱bu ki̱sidu a lwangi̱n ki̱kulai. Nang chi niing sween burodiye. ki̱dane wu a ne chi ki̱fude we, ni̱bu ki̱yalu ko Yiye yabake a lame. #22:1 Chi̱ 12:1-27. 2Aya wuduwe fansetiye, n ti ni̱bu yungku yili̱n Musati̱mu, ki̱babba wa̱riyu ka yo Yesu ka bwadiyu. N chi ki̱nwe tayi ni̱biyu. 3Yinu n Setan a le ni̱r Yafuda Yiskariyoti, wu n ki̱n we miyari̱mi kub chiri burabi̱me. 4N Yafuda a ya yi tikake Fansetiye n ti bi̱duumu ki̱to Kan Kwamana Wurchalimanu yinangu ka kwa̱l chimi̱n Yesuwangu. 5N chi a ma furi mwemwen, a ke ka ni ki̱n ka̱mbi̱r. 6Yafuda a ke ti̱n, a bau kana da wu ka niin Yesu a di̱chiye a yo a ne muraku we.
N Yesu a chau chabtu n ti Miyari̱m ki̱m
(Mat 26:17-25; Mar 14:12-21; Yow 13:21-30)
7Yinu di Yiye yabake wu a chaku ki̱danne wu a ne Yis we a lame, wu ni̱bu ki̱ma niku ki̱ni kwan niki̱ne. 8N Yesu a tum Biti̱r n ti Yowana ko, “Ya ti̱do nimi̱n chabtu Yiye yabake ti̱tu niing chadu.”
9Chi a bi̱u ki̱n ko, “Mun baddu yana dodu a bwa̱le?”
10A yi chi ko, “Ka ti̱le bi̱ne, ta tekadu n ti nii ki̱ni sur mwen. Ti̱bunti̱ ki̱n ka lam mi̱nti̱ fi ka lede. 11Yinu ti̱yi naba lo tiko, ‘Naba yungke ki̱bi̱du, a bwa̱le kan rungkonu, fi mang chan chabtu Yiye yabake n ti miyari̱m mi̱me?’ 12N ki̱n ka yung chi̱n di̱kan kan di̱dun ki̱ni fanti sweriyu we. Ti̱do chabti̱tu a fiko.”
13N chi a yikan, a ya chitu we yinang ka n Yesu a fwa chimi̱nangu. N chi a do chabtu Yiye yabake ti̱tu fal.
Ki̱danne Tewuduwe
(Mat 26:26-30; Mar 14:22-26; 1Kor 11:23-25)
14Yo ki̱swi a lame, n Yesu ti fandubu ki̱mu a swerani mal we teburu. 15N ki̱n a yi chi ko, “M bau mang chau chabtu ti̱tu Yiye yabake, yinu mang nwe riye. 16Mi̱n fwa chimi̱nu, ne mang chati̱ chabtu ti̱tu ki̱da, ka lami̱nti̱ ki̱dangu ti̱chitu wu ka ridu wa Yaa Kwamangu.” 17A kuteng ki̱ku n ki̱n a da̱u be sanengu, a wana Kwama, yinu a yi ko, “Ti̱da̱u ti̱keran we yichiyu. 18Mi̱n fwa chimi̱nu, a ne mang noti̱nu ki̱da we mwe yinabe, #22:18 yinabi: Ti̱kulan tiyangi. ka lami̱ti̱ yo Yaa Kwama ka bede.”
19Yinu a da̱u ki̱danne, a ma di̱wana di̱Kwama, a wulan, a nika chi, a yi ko, “Yiyu bwimi, yiyu mang nidu di̱ne chi̱ni. Ti̱ma ying ti̱nang kuri̱n mi̱nu.”
20A lakanbu, a da̱u wuka sa̱ne ko, “Wu sa̱ne wu a bwa̱ki̱ ki̱fwiyange a ki̱tum mi̱m, wu mang kuru di̱ne chi̱ne. #22:20 Yir 31:31-34. 21Aya fa̱la̱ng ni wu yaka kwa̱liye we chi̱be mi̱n chande ware n ti ki̱n. #22:21 Sa̱b 41:9. 22Aya Bwe Nii ka bwadu yinang kangu a do ki̱mi̱nangu, aya a no ni wu n ki̱n ka dwalade.”
23We fiko miyari̱m ki̱mu a le ki̱bi̱be yichiyu, ka nodu n wure we tibe chi ka ma ti̱te.
24Ti̱kwilantu a kun we tibe chi ti̱n, we ka nang wuwule ni wu a la chiye. #22:24 Mat 18:1; Mar 9:34; Luk 9:46. 25N Yesu a yi chi ko, “Mati̱m kuuti ni̱bu bi̱bu a yimbu Kwamamu ki̱yo ni̱bu mi̱n mati̱n. Bi̱kam chimu ki̱yidu ko n chi ni̱bu makaki̱ ni̱bi̱m. #22:25-26 Mat 20:25-27; Mar 10:42-44. 26Aya we di̱chine, ni̱bu chim bi̱duumu we tibe chi̱n a kau yinang bi̱ti̱ri̱m, bi̱kaki̱mu a kau yinang Bwesi̱m ditumbi̱ri̱m. #22:26 Mat 23:11; Mar 9:35. 27Kano n wure nang wuduwe, nang nii wu a swe a tebura, ka wu ki̱kera chiya? N ke wu a swe a tebure? Aya mi̱n we tibe chi̱n mi̱n kera chimi̱nu. #22:27 Yow 13:12-15. 28N ti̱n nang bi̱bu ta timituwe we ki̱dang swa̱ka̱ku mangu. 29Nangki̱n mang ni chi̱n yaa yinang mati̱m, Yinang ka n Temi a ni mi̱n wukangu. 30Ke ti̱chau, ti̱noti̱n we tebur mi̱nu we yaa mi yinu ta swedu yinang mati̱m ta mwata kuu Yisrela kub chiri burab mi̱nu.” #22:30 Mat 19:28.
M Biti̱r yaka kwila Yesu
(Mat 26:31-35; Mar 14:17-31; Yow 13:36-38)
31N Yesu a yal ko, “Simun Biti̱r, n Setan ki̱baddu ka swe ka nang wuwule chi̱ne. Ka yu chi̱nu yinangu naba kuwe ki̱chaku chaam we tui kitangu. 32Aya n twa̱ba̱ mi̱n buni Biti̱r, mi ke keku bi̱yili̱mang mwangu a ki̱taduwe. Yo mwang ki̱la bwa di̱mi̱ne, maka bi̱kamu.”
33M Biti̱r a yi ko, “Tewuduwe, n ke mang ya lo di̱bi̱ti̱le ware ti mun, ka bwange ni bwati̱du ware.”
34N Yesu a yi ko, “Mi̱n fwa mi̱nu Biti̱r a ne lanti̱ kunsiin kware ki̱tari̱n chiye, mwang kwilayu ki̱da yitta mwi mwang yimbu mi̱n.”
Ti̱so bwiti chiyu di̱ne ki̱swi riye ki̱bede
35Yinu n Yesu a bi̱u miyari̱m ki̱mu ko, “Yo mang tum chi̱n a ne ka̱mbi̱r we, a ne chabtu we, a ne swe we ka ki̱wamiye, ti̱kwala ti̱kan chiya?”
N chi a yi ko, “Ngango.” #22:35 Mat 10:9-10; Mar 6:8-9.
36Yinu n ki̱n a yi chi ko, “Aya ki̱ka̱ngu ka nii ki̱ni swe ka̱mbi̱re, a tati̱ we fa̱la̱ngu n ti swe yayuwe. Yinu ka n ne kul wenge, mi lukemo ta̱ni wiin. 37A mwalmwale ko, A ki ki̱n n ti ni̱bu ki̱letimu. A mwintuwe ka ridu n ti mi̱n. Ki̱kumang chi ni̱bu a mwal a dur mi̱nitu ki̱lam fi a ki̱yilang kange.” #22:37 Yic 53:12.
38Miyari̱m ki̱mu a yi ki̱n ko, “Tewuduwe, kulitu nang ti̱ti turabu.” N Yesu a yi chi ko, “A lwe yi ko.”
Yesu a twa̱ba̱ buni a ku Saitune
(Mat 26:36-46; Mar 14:32-42)
39Yesu a du bi̱nu a yika ku Setuniye, miyari̱m ki̱mu a buntu ki̱n. 40Yo a lam fikonge a yi chi ko, “Ti̱twa̱ba̱ buni ke ti̱yaruwe sweki̱ku.” 41Yinu a ki̱lani kuteng a ni chi baki̱twalangi bayim, a sung, a twa̱ba̱ bunitu. 42A yi ko, “Tete, ka mwang kenge yo n nwedu riye we. Aya n ke di̱ne ki̱ke mi, ma ki̱ke mo.” 43Yinu naba di̱tumbi̱re Kwama a chire a bwa diye, a be ni ki̱n dukanu. 44Di̱ne ni̱r ki̱nu a mutene, a le twa̱ba̱ bune wu a yo ture ko ki̱yaradu yinang ki̱tuum we ti̱mu#22:43-44 Yikayu tatti̱ki̱dai Yika̱ri a mwalbu wa̱re 43 n ti wu 44. .
45Yo Yesu a kun we twa̱ba̱ku buniyange, a ki̱la bwana miyari̱m ki̱me, a ya chi a da duum di̱ne n chi a tibwi we kaiyan ni̱re. 46A yi chi ko, “A mayire ti̱da duume? Ti̱kun ti twa̱ba̱ buni ke ti yaruwe a sweki̱ku.”
Ni̱bu a tau Yesu
(Mat 26:47-56; Mar 14:42-50; Yow 8:2-11)
47Yo n Yesu we ki̱fwa ya̱me, muraki̱ ni̱bangu a be. Ni wu ni̱bu ki̱yalu ko Yafuda, wu wetuwe miyari̱mi kub chiri burabi̱m ki̱me, a ti chimi̱ne kakku, n ki̱n a be ka kwar#22:47 kwarku: Di̱siir di̱du a li̱men. Yesu. 48Aya Yesu a yi ko, “Yafuda, mwang mi Bwe Nii ki̱ni kwarka ka?”
49Yo miyari̱m ki̱mu a ku chi yaka fwedite, a bi̱u Yesu ko, Tewuduwe, “Ni̱n ma kunu ki̱ni kuli ni̱nta?” 50Yinu wuka chi a mwatu ki̱tele ka̱be wuduwe fansetiye wu a kang ki̱yilange wad.
51N Yesu a yi chi ko, “A ri yiko! A twai ki̱tele niwe, a beti̱ ni wuwe.”
52Yinu n Yesu a yi wuduwe fansetiye, bi̱duumu we bi̱bu ki̱to Kan Kwamana Wurchalimanu, n ti seli̱bu bi̱bu a be ka tau ki̱ni̱mu ko, “A mayire ta chire ki̱ni tooti, kuli n ti dwami yinang ka m mi̱n wu bwilange? 53Ditiyu ki̱dang mi̱n we ware ti chin we Kan Kwamana Wurchalimanu, ta taibu. Aya ki̱ka̱ngu nang ki̱swi chi̱n wu a dukan ki̱liyene.” #22:53 Luk 19:47; 21:37.
M Biti̱r ko ka yimbu Yesu
(Mat 26:57-58; Yow 18:12-18)
54N chi a tau Yesu a yikan lo tikake Fansetiye m Biti̱r a marti̱ ki̱twalang ki̱bun chimi̱nti̱nu. 55Yo n chi a mwaka ki̱rang, we tare lo, a sweran a fiwiine. M Biti̱r a swetuwe ti chi. 56Wuka we mure ka̱be be fwa̱ne, wu a swe ki̱do n ti ki̱range, a da̱ng ki̱n yinang, yina fwa ko, “Nii wu no ware n ti Yesu!”
57Aya Biti̱r a kwilan ko, “Naye, mang yimbu ki̱n!”
58A mabu ki̱twalang, wuka nii a ku ki̱n a yi ko, “M mun ti̱n wetuwe mure chi.” M Biti̱r a yi ki̱n ko “Tete, mi̱n n ke ki̱n.”
59Ki̱twalangu yinang awa wiin, wuka nii a ti chik ko, “Ki̱kumang nii wu we ware n ti ki̱n, n ki̱n naba Ka̱liliye.”
60Aya Biti̱r a yi ko, “Tete, mang yimbu chi mun fwaditu!” N ki̱n a tibu ri ya̱mu, kware a ta̱r ti̱n. 61Tewuduwe a sabran a da̱ng Biti̱r ri̱ng, yinu m Biti̱r a kur chitu Tewuduwe fwa ki̱mi̱nitu ko, “Ka lanti̱n yo kware ka ta̱re we kum wu diye, mwang yidu mwi mwang yimbu mi̱n ki̱da yitta.” 62M Biti̱r a chir fi̱lang, a ki wii dukan.
Ni̱bu toki̱mu a ma ti̱kali ki̱ni Yesu
(Mat 26:67-68; Mar 14:65)
63Yinu ni̱bu ki̱to Yesumu, a le ki̱fita ki̱nu ki̱ngauti̱ ki̱nu. 64A bwa̱ba ki̱mi̱n nuyu, ki̱ngadu yinu ki̱bi̱u ki̱nu ko, “M ma fa̱kuitu, n wure ngane?” 65N chi a fwa ki̱mi̱n ya̱miyu nabwen yiyu a swa̱ba̱ke n ti ki̱fiyeyu.
A yikani ki̱ni Yesu a di̱ Bi̱latu n ti Yiridu
(Mat 26:59-66; Mar 14:55-64; Yow 18:19-24)
66Yo ti̱mu a kwiyane, bi̱duuma kuumu n ti wuduwe fansetiye n ti kwa̱l ni̱bu yungku yili̱n Musati̱mu a muran, yinu ni̱bu a ya chimi̱ni ki̱ni Yesu. 67Chi a bi̱u ki̱n ko, “N fwa ni̱mi̱n, ka mun nang Masiya?”
N Yesu a ke ki̱mi̱n ko, “Ka n fwami̱ne, a ne mwan ke bi̱yili̱mu we di̱mi̱ne. 68Ti̱nti̱ne ka m ma mi̱n di̱bi̱de, a ne mwang nii di̱ki̱li̱n yiin. 69A mwetuwe ki̱ka̱ngu Bwe Nii ka swedu a kan ki̱yilang Kwama naba dukane kwang.”
70N chi ki̱ni kwang a bi̱u ki̱n ko, “M mun Bwe Kwama?”
A yi chi ko, “Ti̱fwa tas yinang ka ta yi tiko mi̱n nangki̱nangu.”
71Yinu n chi a yi ko, “Yinu ni bau wule wu niyang yabe? A fwa n ki̱fwan.”
Currently Selected:
Luka 22: Tula
Highlight
Share
Copy
Want to have your highlights saved across all your devices? Sign up or sign in
© 2015, The Nigeria Bible Translation Trust and Wycliffe Bible Translators, Inc. All rights reserved.
