Yowana 5

N Yesu a be wu ngi̱rmane ni a far betasidan

1A kute ki̱ku n Yesu a yika Wurchalima di̱ne Yiye ni̱bu Yafudam. 2Di̱kan far we Wurchalima, ki̱dwan n ti kwa̱r kwanti di̱du n chi ki̱yalu ko Betasdan#5:2 Betasdan: Yikayu tatti̱ki̱dai a mwal ko Besa̱ta. ki̱ni yi ni̱bu Yafudam, n chi a kana far di̱ki̱nu ki̱ni ti̱kubiti tunu. 3Ni̱bu bi̱bu a bubuwemu ki̱daradu we ti̱kubi ti̱ti kwadu. [We fiko ki̱dubi̱bu ti ki̱kubtiyu n ti bi̱bu a ngi̱rmani̱mu n we.

4Wuka Naba di̱tumbi̱re Kwama ki̱bedu beki̱ luku mwe a fare, naba burange ka mwedu, ka le mwe wa lukune ki̱be ti̱du kono a ki̱ki̱le ki̱dum burame.] 5We fiko, wuka naba bura we wa ma swa̱ti̱tu wan ti̱ta chiri nari̱bu ki̱ni burang kange. 6N Yesu a da̱ng ni wu, a yim ti̱n ko burang ni wangu ki̱ka̱ra̱ng. N Yesu a bi̱u ni wu ko, “Mu baddu mwang beda?”

7Naba burange a ke ki̱mi̱n ko, “Tewuduwe mi̱ni ki̱ni wure wu ka makayu ka di̱ki̱yu we faru yo mwe a lukene. Ka n yo mi mang kune, wuka nii ki̱tui ti̱nu.”

8Yinu n Yesu a yi ki̱n ko, “Kun, da̱u chi ti̱dari mwitu, yikan.”

9Bi̱nabi̱na nii wu a be, a da̱u chi ti̱dari kitu a yikan. Ti̱tu a fwe difi̱kare ni̱bu Yafudam, ka nang chikiye Disabwi. 10Ni̱bu Yafudam a ku ye, a yi nii wu a benge ko, “Di wu difi̱kare, we yili̱n musatu a dakabu mwang da̱u kwa̱mbi̱re mwemo mwang yikadu.” #5:10 Nee 13:19; Yir 17:21.

11Nii wu a ke chi mi̱n ko, “Nang chi nii wu a beye a fwaatu, a yi ko, ‘N da̱u chi ti̱dari mwitu yikan.’ ”

12N chi a bi̱u ko, “N wure ki̱niko wa ya̱n ko n da̱u chi ti̱darimitu, n yikane?”

13Nii wa benge a yimbu ka n wure a be ki̱ne, di̱ne ki̱chitu wa fwe a fina ki̱tuu ni̱be. N Yesu a setuwe ni̱bu.

14A kutengu ki̱ku n Yesu a ya ki̱n a Kan Kwaman, a yi ki̱n ko, “Da̱ng, a mwang be. Dang, du ki̱letiyu, ke ki̱la chi a la ti̱te a fwe.”

15Kangu n ki̱n a swaan Yesungu, a yikan a ya yi bi̱duum ni̱bu Yafudamu ko n Yesu nang ni a beki̱ne.

N Yesu a ke ko, n ki̱n Bwe Kwama

16Di̱ne yiko, ni̱bu Yafuda a mwe ki̱fuma Yesu ko a mayire kani̱n ma ki̱chitu wu difi̱kare. 17Yinu n Yesu a yi chi ko, “N Temi ki̱ma nangangu a lanta ki̱ka̱ng, m mi̱n ti̱n mi̱n ma ti̱du.”

18Ya̱m bi̱bu a ni ni̱bu Yafudam dukan di̱du ki̱baddu ka chi̱u Yesunu. N chi a yi ko, “N ke di̱ne a ki yilang difi̱kare, aya a ki̱la yi ti̱n ko Kwama n Teki̱n. N ki̱n a mar yikiyu yinang Kwama.”

Dukan Bwenu

19Yinu n Yesu a ki̱nta chi ko, ki̱kumang mi̱n fwa chimi̱nu, bwe a ne ma chitu n ki̱fwan ka a kubu Teki̱n ki̱made, di̱ne chi Te ki̱maditu ki̱ni kwang nang chi bwe ki̱ma ti̱ne. 20Nangki̱n, Te ki̱mi̱la Bwe, ki̱yungti̱ chi n ki̱ni ki̱fwan ki̱maditu. Ka yungti̱ nangi̱n ti̱tu a la ti̱titu. Ka kau chimi̱n chi ka̱ta̱ki.

21Ti̱nti̱n, tiyangu Te ki̱kukku kwa̱miyu ki̱ni ti̱kuriyangu yiko. Bwe ki̱ni wu n ki̱n a ku diye ti̱kuritu. 22Te a kaba ni̱bu mi̱nbu ya̱m aya a ni Bwe dukan di̱du kani̱n mwata ya̱mi̱nu. 23Di̱ne ke ni̱ba ni Bwe dwiyentu tiyangu n chi ki̱ni Tengu. Kwang nii wa nibu Bwe dwiyente, a niti̱bu wa tume ki̱ne.

24“Bi̱yili̱m mi̱n fwa chimi̱nu, ka nang wuwule niye wu ki̱nwe ya̱m mi̱me, wu ki̱ke bi̱yili̱m we nii wa twiye, ki̱ni ti̱kuri ki̱diya kwaditu. Mwataku ya̱ma̱ng a ne we di chiye, n chi a yabi̱ bwa, a ya ti̱kuri. 25Bi̱yili̱m mi̱n fwa chimi̱nu, ki̱swi ki̱bedu, a tu a be wu ni̱ba bwamu ka nwe ker Bwe Kwama. Bi̱bu a nwe mu fal ka ya ti̱kuri. 26Nangki̱n, tiyangu Te n ki̱fwan nang dur ti̱kurinu, yiko a yoti̱ Bwe ko dur ti̱kuriin. 27A ni ki̱n dukan di̱du a mwata ki̱nu di̱ne n ki̱n Bwe Nii.”

28“Ti̱ka̱ta̱du ya̱m bi̱bu we, di̱ne ki̱swi ki̱bedu wu ni̱ba futumu ka nwe ker Bwe Kwamane. 29Ka chiredu, bi̱bu a ma chi ti̱yili̱mu ka kunu, ka kadu aya bi̱bu a tumbu bi̱yili̱mu, ka kunu, ka wuran bwi ki̱ni ki̱fwini Kwama. #5:29 Dan 12:2. 30Mang mebu mang mabu chi mi̱ni mi̱kun, mi̱mwata ya̱m mi̱mu yinangu Kwama fwamiyangu. Di̱ne yiko, kabaku mangu ki̱yilang di̱ne ma bunti̱bu chitu mi̱n kuri, kana chitu wa twiye ka badditu.”

Ya̱miyu ni̱ba fwara na dur Yesunu

31N Yesu a chakakku a yi ko, “Ka m ma di̱mwaru a dur mi̱ne, di̱du n ke di̱mwar di̱yili̱n.” 32Aya wukani we ki̱ma di̱mwaru we dur mi̱nu, n yim ki̱ma di̱mwar di̱yili̱n we dur mi̱nu.

33Ti̱tum ni̱bu we di Yowana wu ki̱ma batisma, n ki̱n ti̱n a fwa chimi̱n bi̱yili̱mu. #5:33 Yow 1:19-27; 3:27-30. 34A ya a bwin yiko, mang bunti̱bu di̱mwar niin. N fwa ying ke ti̱ya yuku. 35N Yowana fiti̱la wu ki̱takira, wu ki̱yii chiye, ti̱n fal ti̱ke ti̱n ta ma furi mwen ki̱ni yiiku kangu a baki̱swi bayim.

36Aya m mi̱n ki̱ni di̱mi̱n di̱mwar we dur mi̱nu di̱du a lati̱ di̱du n Yowana a mwa a dur mi̱ni̱nu. Chitu mi̱n maditu, a wu n Temi a ni ko m ma, chitu a kau di̱mwar mi̱nitu a yung Te a twiye. 37Ti̱nti̱n, Te wa twiye n ki̱fwan a kau di̱mwar mi̱n. Ta nweembu ker ki̱nu we, ta kuun ti̱bu we yinangu n ki̱n wemi̱nangu. #5:37 Mat 3:17; Mar 1:11; Luk 3:22.

38Ya̱m ki̱mu a swebu we ni̱tu chi̱ntu di̱ne ta kebu bi̱yili̱mu we wa tum ki̱ne. 39Ti̱lekan we a tatti̱ki̱dai Kwamayu ni̱ba mwa̱liyu di̱ne we kuraku changu, ta ya ti̱kuri ki̱diyatu a di̱chiye. Yiyu tatti̱kiki̱dai Kwamai fal nai yiyu ki̱ma di̱mwar a dur mi̱niyu. 40Aya a mwintuwe tiko tiyangu ta be bwan di̱ mi̱ne ke ti̱ya ti̱kuritu.

41“Mang yibu dwiyen we ni̱bu. 42Aya n yin chi̱n, ti̱nti̱n n yim ta mi̱labu Kwama we ni̱tu chi̱ntu. 43M be a di̱n Tenu, ta yiibu, aya ka wuka ni a be a di̱n dur ki̱ne ta yiu ki̱nu. 44Ta ke bi̱yili̱mi yire kangu ti̱funti̱ bwi ta ya delaki̱ku a bwiti chiyangiyu, aya ta funti̱bu bwi ta ya delaki̱ku ki̱chiredu a bwanu a di̱Kwama ki̱ku n ki̱kunangu?”

45“Ti̱kamadu we ti ma Mai keme chi̱n a bwa Te, nii ki̱mai keme chi̱ne nang Musa, wu ti̱kuradu ti ka maka chi̱ne. 46Ka no ti̱ke bi̱yili̱mu we di̱Musa, no ta ke bi̱yili̱mu we di̱mi̱ne. Di̱ne m Musa, a mwal ya̱mu a dur mi̱n. 47Aya ka ta kebu bi̱yili̱mu we chi n ki̱n a mwale, yire ta ke bi̱yili̱mu we ya̱m mi̱me?”

Currently Selected:

Yowana 5: Tula

Highlight

Copy