Yowana 2

N Yesu a sute mwe, a kau mwe yinabi

1We wu tare di, ti̱kali ki̱nai we Kana wa yaa Ka̱lili. Aya n ne Yesu we we fiko. 2Ni̱bu a yal Yesu n ti miyari̱m ki̱mu ti̱n we ki̱na wu. 3Yo mwe yinabi a riye, n ne Yesuwe a yi Yesu ko, “Mwe yinabi a ri.”

4N Yesu a yi ki̱n ko, “Nene, mun yaliyu ko wule? Ki̱swi mi a lambu.”

5N ne ki̱n a yi ni̱bu nanganmu ko, “Ti̱ma chi ka yi chi̱ne.”

6Ni̱bu Yafudam ki̱ni da wa nurake, ti̱kan sebi we, ti̱ta swa̱ba kwantii, ki̱yiu subiti turukun.

7N Yesu yi chi ko, “Ti̱ri sebi mwetu ki̱ni mwe.”

N chi a ri sebiti bel ki̱ni mwe.

8N ki̱n a yi chi ko, “Ti̱dwe, ti̱ni fate wutabare ti̱kali ki̱naiye#2:8 ti̱kali ki̱nayi: Ki̱ni yi biri nang bikin aure..”

9Kangu fate wutabare ti̱kali ki̱naitu a twai mwegu, aya mwe a kau mwe yili̱me. N ki̱n a yimbu ki̱dangu ki̱chitu wa fwengu. Aya ni̱bu nanganmu a dwe mwemu a yim. Fate wutabare ti̱kali ki̱naiye a yale bwele ki̱yiu naye, 10A yi ki̱n ko, “Ka wuwule niye ki̱mwedu, a mwe yili̱me wa li̱n li̱me didin, ka ni̱ba noo, a lwenge, yinu ka bedu ki̱ni bi̱bu a li̱mbi̱mu. Aya m mun, n lai mwe yili̱me wa li̱nli̱me, n be ki̱ni kuteng.”

11N Yesu a mwe chi ka̱ta̱ki ti̱tu#2:11 Chi ka̱ta̱ki: Chi ka̱ta̱kitu nang chi ki̱fwedu di̱ne ke ni ku dukan Kwaman. a Kana, wa yaa Ka̱lili, a yung dukan ki̱nu, a yo miyari̱m ki̱mu, a ke bi̱yili̱mu we di̱Ki̱ne.

12A kuteng ki̱ku, n ki̱n a subbi bwa Kafanawu me. A ya n ti ne ki̱n n ti kebu ki̱mu n ti miyari̱m ki̱mu. N chi a swe a dabi̱ ditiyu nabwen we bwako. #2:12 Mat 4:13.

N Yesu a do Kan Kwamana Wurchalimanu

(Mar 11:15-17; Luk 19:45-46)

13Ki̱dangu Yiye yabake wa ni̱bu Yafuda a mwatanangu, n Yesu a yika Wurchalima.#2:13 Chi̱ 12:1-27. 14We Kan Kwamanu, n ki̱n a ya ni̱bu ki̱feku tanti̱kai n ti kwanti n ti ki̱kubti n ti bi̱bu ki̱sute ka̱mbi̱ri̱mu, a yii nangange chi. 15Yinu n ki̱n a kwa̱r ki̱swi, a kaka ni̱bi kwang we Kan Kwamanu. N ki̱n a yai kwantiyu n ti tanti̱kayu. A ya ka̱mbi̱r ni̱bu suteki̱nu, a kurana bwa, a tungati̱ teburitu. 16A yi chi bi̱bu ki̱feku ki̱kubti̱mu ko, “Ti̱wora kuli̱ni ti̱tu, long Temiye a kadu kwa̱ma̱r we.”

17Miyari̱m ki̱ma kur chi ni̱bu a mwal we tatti̱ki̱dai yika̱riyu ko, “Mi̱laku Kan Kwamana a chau ni̱r ki̱nu.”#2:17 Sa̱b 69:9.

18Ni̱bu Yafudam a bi̱u Yesu ko, “N yung ni̱n dukan di̱du mun rikandi̱nu, ni̱n baddu nang ku chi ka̱ta̱ki.”

19N Yesu a ke chi mi̱n ko, “Ti̱wur Kan Kwamana Wurchalimanu, mang muddu a ditiyi yitta.”#2:19 Mat 26:61; 27:40; Mar 14:58; 15:29.

20Ni̱bu Yafudam fal a yi ko, “Kan Kwamanu ni̱ba mu swa̱ti̱tu wan taana chiri turukununu, nang wu mwiko ni̱n wur mwang muddu, a ditiyi yitta?”

21Aya n Yesu a fwabu Kan Kwaman di̱du n chi ki̱kuradi̱nu, ki̱fwa bwiki. 22A kute ki̱ku n Kwama a kukku Yesu we furangu, miyari̱m Yesumu a kur ya̱m bi̱bu n Yesu a fwamu. N chi a ke bi̱yili̱mu we ya̱m Kwamamu, ni̱ba mwali̱mu n ti bi̱bu ni̱ba fwamu.

N Yesu a yim ni̱tu ni̱bitu

23Ki̱dangu Yiye yabake a lamengu, aya n Yesu a yika Wurchalima. Ni̱bu nabwen a ke bi̱yili̱mu we di̱ki̱ne, di̱ne chi ka̱ta̱kitu n ki̱n a yaki̱ maditu. 24Aya n Yesu a kebu ki̱ni chi, di̱ne n ki̱n, a yim chi a ni̱tu ni̱biye.

25Wuka nii, a ne fwa ki̱mi̱n ni̱r ni̱nu, di̱ne n ki̱n a yim ni̱tu niibitu.

Currently Selected:

Yowana 2: Tula

Highlight

Copy