Yowana 16

1N Yesu a yiko, “N fwa chimi̱n ki̱chitu di̱ne ke ti ki̱ladu kuteng we ki̱ni keku bi̱yili̱mang changu. 2Ni̱bu ka naba chi̱nu we kambi muraku ni̱bu Yafudamu. Ki̱swi ki̱bedu, wu nii ki̱chi̱u chi̱ne, ka kudu ko ki̱ sii Kwamange. 3N chi ka madi yiko, di̱ne n chi a tibu yim Kwama ti Mi̱n. 4Mi̱n fwa chimi̱n ya̱mi yiyu, di̱ne ka ki̱swi a benge ta yindu ti̱kono n fwa chimi̱n.”

Nangang Fi̱ki̱m Kwamam

5“Aya ki̱ka̱ngu mi̱n yika bwa wu a tum mi̱ne, n ti̱n fal, a ne nii ki̱bi̱du ko, mu yadi bwa̱le we? 6Di̱ne mang fwa chimi̱n ya̱m bi̱be, ni̱tu chi̱ntu a kaiyan. 7Aya ki̱ka̱ngu ma fwa chimi̱nu, a la chi ki̱ku mang yikadangu. Ka mang yika̱be, Fi̱ki̱m Kwamamu a ne bedu, we di̱chine. Aya ka n yikane, ma tum chimi̱nedu. 8Ka Fi̱ki̱m bi̱ba benge, ni̱bu ka swaan yile we chi ni yalu ko ki̱letiye ti chi a leitu we kabaku Kwamangu.” 9Ki̱le chi nang di̱ne a kebu bi̱yili̱mu we di̱mi̱ne. 10Yile Yesuwe ka chakakku ti chi di̱ne mi̱n ya bwa a di̱Te, n ti̱n neta chakakku tani̱n kuyi ti̱nu ki̱da kwadu. 11We mwata ki̱ku, di̱ne Kwama a tu a mwata tikake wa tau ti̱ti̱niye mi̱ne.

12“Mi̱ni ki̱ni ya̱mu nabwen, a ya ka la chimi̱nu la ki̱ka̱ngu. 13Aya yo Fi̱ki̱m bi̱yili̱mu ka bede, be ka maka chi̱nu we swangki̱ bi̱yili̱mangu, beka fwa chi a nwe, n ke bi̱ki̱m ti chi beka fwedu kake. 14N ki̱n ka ni mi̱n dwiyentu di̱ne, chi ma fwa ki̱mi̱nitu, nang ti̱tu yaka fwa chimi̱nditu. 15Chi n temi ki̱ne, kwang n ti̱ mi̱n nang chi a yo ma yi mi Fi̱ki̱mu ka yiu ya̱mu, ka fwa chi mi̱nde.”

16“A ne ti ke, a neta kuyu, a ne ti ke ti̱n ta kuyu.”

Furi ki̱lin di̱du a miyari̱mi̱nu, ka ki̱lawe ti̱mi̱lan

17Bi̱kamu we miyari̱m ki̱mu ko, “Ki̱bi̱bu ya̱m wurenim bi̱bu ni fwadi yemu ko, A ne ti ke ne ta kuyu, yinu a ne tike ta kuyi di̱ne miya bwa a di̱Temiyemu.” 18N chi a chakakku ko, “Ya̱m wulemu ki̱yidu ko, ‘A kutengu baki̱swi bayimangu,’ ko chi a swaanbu bi̱bu ya̱m.”

19N Yesu a yim miyari̱m ki̱mu ki̱baddu ka bi̱u ki̱n ya̱m bi̱bu. N ki̱n a yi chi ko, “Ti̱bi̱be yichiyu we ti̱kwa̱li yitu ma fwa mi, A ne tike neta kuyu, a ne tike ta kuyita.” 20N Yesu a chakakku ko, bi̱yili̱m mi̱n fwa chimi̱nu, ta ki̱wii ki̱ni twa̱ba̱bune, a ya ti̱ti̱nitu kani̱n mi̱la ka ti̱chi. N ti̱n ni̱tu chi̱ntu kanodi ki̱li, aya kaiyan ni̱re chi̱n, ka ki̱ladu, ka kau ti̱mi̱lan. 21Yo naye a lam ka bi̱dde, ki̱nwe riye yinang, di̱ne bwe a suten. Aya yo bwe a chire, naye ki̱ma furi mween, ki̱ tabti̱ riye wa nwe, di̱ne n ki̱n a bi̱u bwe we ti̱ti̱nitu. 22N ti̱n ki̱ka̱ngu ta nwe riye, aya be ma ku chi̱nu, nang yoko ta ma furi mwen chi̱ne. We ki̱dang kangu a ne wu ka yiti̱ chi̱n furi mwene we. 23We diko, a ne ta bi̱i ti̱kan chi we. Bi̱yili̱m mi̱n fwa chimi̱nu, n temi ka ni chi̱n chitu ti̱baditi kwang a di̱n mi̱n. 24A lanta ki̱ka̱ng, ta tibu bi̱u chi a di̱n mi̱ne. Ti̱bi̱u, ta yadu, ke furi mwen chi̱nu a lwe.

Chakku

25“M balta chi̱n baltane we ya̱mu ma fwamu. Aya ki̱swi ki̱bedu wu ma fwa chimi̱n ya̱m Temi kwa̱rikwa̱riye, a ne mang balta ti̱chinu we ki̱da. 26We diko ta twa̱ba̱ bunitu a di̱n mi̱n. Ta bi̱u Temi n ti̱fwan, nemang bi̱u chimi̱nu. 27Ki̱kumang n temi ki̱mi̱la chi̱nu, di̱ne ta mi̱laye, ta keti̱ bi̱yili̱mu tiko m be a di̱Temiye.” 28N Yesu a chakakku ko, “N chire a bwa di̱Temiye, yinu n be ti̱ti̱nitu, ki̱ka̱ngu mi̱n du ti̱ti̱nitu mi̱n yika bwa a di̱Temiye.”

29Miyari̱mu ko, “Angso, ko ki̱ka̱ngu mu fwa ya̱mi kwa̱rikwa̱ri, mwang baltabi̱ chi. 30Ki̱kangu ni̱n swaan ko, n yim chiti kwang. Kasi no ni a ya̱nbu ya̱m. Nang chi a yo fal nang ke bi̱yili̱mu ko n mun chire a di̱Kwama.”

31N Yesu a ki̱nta chi ko, “Ti̱ke bi̱yili̱mu ki̱ka̱nga?” 32Yinu a yi ko, “Ki̱swi a lame, a tu ma a lam wu ta yaradu, ta wulu, ta dwiyu we fi n kawure ka yika loko. Kasi ki̱ku mang newe m mi̱kunangu, di̱ne n Temi we wa̱re ti mi̱n.”

33“Mi̱n fwa chimi̱n ki̱chitu wu, di̱ne ke ti̱ya li̱mangu a di̱mi̱ne, we ti̱ti̱nitu ta le riye aya ti̱mu ni̱ri kwing, di̱ne m mi̱n n la ti̱ti̱nitu.”

Currently Selected:

Yowana 16: Tula

Highlight

Copy