Nangi̱n Fandubi̱m 2

Beku Fi̱ki̱m Kwamam

1Yo di Fentikos a lame, n chi ki̱ni kwang a muran a fiwiine. 2Bi̱nabi̱na di̱kan ker a chire a bwa diye yinang si̱ki̱n di̱dun a ri lo ki̱ni kwang, finu n chi ki̱sweende. 3Yinu n chi a ku ti̱kan chi yinang ben ki̱rangin a keran a sub we dur ka nang wuwule niye. 4N chi a rii ki̱ni Fi̱ki̱m Kwamamu, a mwe ki̱fwa ya̱miyu ki̱ni yikai yiini, yinangu Fi̱ki̱mu a ni kawure ki̱ti̱me ya̱mengu.

5Ki̱dang kangu bi̱kam ni̱bu Yafudam bi̱bu ki̱nwe tayi Kwamamu ki̱swedu we Wurchalima, kuu ni̱be bi̱bu a chire a kasi no a bi̱bi̱le ti̱m we ti̱ti̱niti̱mu. 6Ki̱tuu ni̱be a be di̱ne ker chi ka̱ta̱kin di̱du n chi a nwenu. N chi a be, a nwe ki̱fwa ya̱mu ki̱ni yiini bi̱ntu chi. 7Chitu a ya̱r chi yii, n chi ki̱fwadu ko, “Ni̱bu bi̱bu n ke ni̱bu a Ka̱lilima?” 8Yinu a ma yire ni nwedu, n kawure ki̱fwa ya̱mu ki̱ni yii chire? 9N chi̱ni ni̱bu Fartiyam n ti Madinam n ti Yelmam n ti ni̱bu Mesofotanam n ti Yafudam n ti Kafadokiyam, n ti Fontum n ti Asiyam, 10n ti Firichiyam n ti Famfiliyam n ti Masari̱m n ti bi̱bu a ki̱dire Sayiri̱m wu a ti̱m Libiyame n ti rungko a ti̱m Romamu. 11Ni̱bu Yafudam n ti bi̱bu a wo ki̱ti̱m a kau Yafudame. Ki̱retan n ti ni̱bu Larabamu, ki̱nwe chi ya̱r yii ti̱tu a dukan Kwama n chi ki̱fwadu ki̱ni yiinitu. 12Chitu a ya̱r chi yii a kwala chi maki, n chi ki̱bi̱bedu ko, “Ti̱tu wureni?”

13Aya bi̱kamu a le ki̱fi miyari̱mu fiye ko, “Yim ki̱ma ni̱bu bi̱bu!”

Ya̱m Biti̱r

14Yinu m Biti̱r a kun we ki̱tuu ni̱be a ti n ti miyari̱mi kub chiri wiini̱mu a fwa ya̱mu ki̱ni dukan ko, “Ni̱bu Yafudamu n ti bi̱bu ki̱swedu a Wurchalimamu, ti̱si ki̱teliyu, ti̱nwe chi mang fwa chimi̱nditu. 15Ni̱bu bi̱b u a nobu chi, yinangu ti̱kamadangu, ki̱swi a fi turkube, a ma si̱n. 16Aya ti̱tu nang chi fa̱ku Kwama n Yowel a fwaatu.”

17N Kwama a yi ko, we diti swan kuteyu,

“Mang kure Fi̱ki̱m

we ni̱bi kwang,

Bi̱bari̱m chimu n ti bi̱wuti̱mu

ka mwa ya̱m mi̱mu.

Kal tayon chi̱nu ka ma dwakam

bi̱bu a chire a di̱Kwamam.

Yinu seli̱bu chimu ka

ma fa̱kui a dwakam.”

18Ki̱kumang, kono nang diti yikiyu,

“Mang fwale Fi̱ki̱m Kwamamu

we ka̱bi bi̱bari̱mu n ti bi̱wuti̱mu.

Ka ma fa̱kui we chi ka fweditu.”

19Mang yung chi ka̱ta̱kitu we twiye,

n ti chi ya̱r yiitu we ti̱ti̱nitu,

Kanang chikiye ki̱tuum n ti ki̱rang,

ti ti̱dali̱ni ywa̱ni.

20Yinu dii ka kadi ki̱li

Swangu ka kadi wur yinang ki̱tuum,

Ka lami̱nti̱ di ki̱lake Tewuduwe,

di wuduwe Kwama.

21Yinu ka nang wuwule niye wu ka yalu we di̱n Tewuduwe ne, ka ya yuki̱ku.

22Ni̱bu Yisrelamu ti̱ nwe, N Yesu naba Nasa̱ret ni wu n Kwama a yung chi̱n ko ki̱ke ki̱ne. N Kwama a yung ti̱tu a nabwe chi ya̱r yii n ti chi ka̱ta̱ki n ti di̱mwalu a yung a di̱Yesuwenu, kangu n ti̱ni ti̱fwan ta yimangu. 23N Kwama a ni chi̱n nii wu a ki̱ke ko n ti yingku kang. Ti̱chiu ki̱n, a Fa̱li ni̱bu ki̱leti̱m. 24Aya n Kwama a kuki̱ ki̱n we bwa, a yu ki̱n we kwaku tuwang ki̱ku a riyengu, di̱ne a ne wa̱re we bwa ka tau ki̱nu we furu. 25Nangki̱n, n Dauda a fwa ya̱m we dur ki̱nu ko,

“Mi̱n ku Tewuduwe

kwadu we kakku mangu.

Di̱ne n ki̱n we kang ki̱yilang

mangu, a ne mang nwe tayi.”

26Di̱ne yiko ni̱r mi̱nu ki̱ma ti̱mi̱lan,

ben mi̱nu ki̱kaba teni ti̱mi̱lani,

bwi miyu ka swedu ki̱ni yo ni̱re.

27Nangki̱n, ne mwang duiyu we furu, ti̱nti̱ne ne mwang du nimo wu wauwade ka fwidu we furu.

28Mun n yungi ki̱swa̱ti wa̱ri ti̱kuriyu, mwang riyu ki̱ni ti̱mi̱lan we kakku mwangu.

29“Kebu mang fwa chimi̱n ya̱mi kwa̱rikwa̱ri we di̱tuke chire n Dauda. N ki̱n a bwa, ni̱bu a fur ki̱n, yinu fur ki̱nu n we n ti chi̱ni a lanta di. 30Aya n ki̱n fa̱ku, yinu a yim ko n Kwama a fwa ki̱mi̱n ya̱m bwa̱ki̱mu ki̱ni di̱twa̱mbi̱r ko, ka yo wuka nii we ki̱kuwang kangu ka kau Masiya. 31Yinangu Dauda a swanangu, a fwa ya̱mu we kunku Masiyangu ko, a ne du ki̱nu we furu yinu bwi kiyu a ne fwidu we furu. 32N Kwama a kukku Yesu we bi̱bwari̱mu, n chi̱ni kwang ka ni̱bu mwari̱m ki̱m we ti̱tu. 33A ni ki̱n dwiyen we fa̱la̱ng ki̱yilang Kwamangu, yinu n ki̱n a yiu Fi̱ki̱m bi̱bi wauwadi̱mu we Te yinang ka bwa̱bangu. Ki̱ka̱ngu n ki̱n a kure fi̱ki̱mu a di̱ chire. Nang chi a be ki̱ni chi ti̱kuditu n ti ti̱tu ti̱nweditu.” 34Di̱ne wu a yika diye n ke Dauda, aya n ki̱n a yi ko,

N Kwama a yi Tewuduwe mi ko,

“Swe a kang ki̱yilang mangu.”

35Ka lami̱ti̱ yo ta fau fakwarbu chimu a nani chiye.

36Di̱ne yiko, “Ni̱bu Yisrelamu ti̱yim ti n Yesu wu ta kukane, n Kwama a yo ki̱n Tewuduwe n ti Masiya.”

37Kangu n chi a nwe bi̱bangu, ya̱mu a twai chi yinu n chi a bi̱u Biti̱r n ti bi̱kamu fandubu Yesumu ko, “Kebu, nang ma wureni?”

38M Biti̱r a yi chi ko, “Ti̱wo ki̱ti̱m, n kawure a ma batisma a di̱n Yesu Masiya ke a ya duku ki̱letiyangu. Yinu ta ya ki̱li̱mang Fi̱ki̱m Kwamam. 39Nangki̱n bwa̱ki̱ku ka Kwama di̱ne n chi̱n n ti bwesi̱m chimu n ti bi̱bu kutan n ti chini̱mu ka nang chikiye, bi̱bu n Tewuduwe a yal a di̱ki̱nemu.”

40M Biti̱r a chakakku ki̱ni ya̱mu nabwen, ki̱ngau chimi̱n ki̱kure ko, “Ti̱yu dutu chi̱ntu we mwataki̱ku a dutu bi̱bwilamitu.” 41Ni̱bu a ke ya̱m Biti̱remu a ma batisma. We diko ni̱bu a sub a lam kuniriti ti̱ta.

Ni̱bu bunti̱ki̱mu a muran a fiwiine

42N Chi a chakakku ki̱ni yungku fandubu, ki̱chau chitu a fiwiine ki̱ lweka ti̱nu a fiwiine we twa̱ba̱ku.

Ni̱bu bunti̱ki̱mu a muran a fiwiine

43Tayi a tau ka nang wuwule niye, di̱ne n Kwama ki̱ma chi ka̱ta̱ki n ti di̱mwalu nabwen we fandubi̱bu. 44Ni̱bu bunti̱ki̱mu a ke bi̱yili̱mi kwang a swe a fi wiine, ki̱kunkadu, ki̱kerati̱ chitu n chi a yaatu a fiwiine.

45N chi a feku kuli chitu n ti kuli̱n chi̱nu, a ni ka nang wuwule niiye yinangu kawure ki̱bandangu. 46Ka wuwule diye, n chi ki̱muradu we Kan Kwamana Wurchalimanu, ki̱dwa̱ka ki̱danniyu ki̱nikadu we loniyu, ki̱chadu ki̱noti̱nu ki̱ni furi mwen, 47n ti delaki̱ Kwama. N chi ki̱ni wule we ni̱bi kwang. Kanang wuwule diye n Tewuduwe ki̱su chimi̱n ni̱bu ka suku bi̱bu ki̱wo ki̱ti̱mi̱mu.

Currently Selected:

Nangi̱n Fandubi̱m 2: Tula

Highlight

Copy