Tourat 1: Foeda Nama 17

Abram taki noya nam Ibrahim

1Abramor nirannobboi borosor shomoy Mabude hirbar tanre didar dia ḳoila, “Ami Shorbo-shoktiman Alla. Tumi amar deoa foto takia kamil o. 2Ami tumar-amar maze chukti kaim ḳormu ar tumar oarish kub beshi baṛai dimu.” 3Teu Abram soizdat foṛla, ar Allae tan loge batchit ḳori koila, 4“Tumar loge ami oada ḳaim ḳoriar, tumi bout zatir mul baf oibae. 5Tumare ar Abram [mani, boṛo baf] ḳoia ḍaḳa oito nae, oḳon taki tumar nam oilo Ibrahim [mani, bout zatir baf], ami tumare bout zatir mul baf banailam. 6Ami tumare bout folala ḳormu, ar tumar maz tone bout zati ar bashsha oḳol foyda ḳormu. 7Ami tumar ar tumar oarishor for oarish oḳlor loge ze chukti kaim ḳormu, ikṭa hor-hamesha boail taḳbo, ou usillae ami tumar ar tumar oarishor for oarish oḳlor Alla oimu. 8Ar ze Kenan desho tumi oḳon musafir oia taḳrae, i furaṭa-u ami tumare ar tumar oarish oḳolre hor-hameshakur doḳolor lagi dimu. Ami tarar Alla oimu.”

Mosolmani ḳamor chukti

9Allae Ibrahimre ḳoila, “Tumi amar ḳaim ḳora chukti manio, tumi ar tumar oarishor for oarish oḳole-o mania solio. 10Tumrar loge ar tumrar oarishor loge amar oula chukti kaim oilo, tumrar hoḳol beṭaintor mosolmani ḳam ḳoraite oibo. 11Tumra hoḳole nizor purush ongor mukar samṛa ḳaṭbae. Oḳṭa-u tumrar ar amar maze boail ḳora chuktir nishana. 12Oarishor for oarish doria tumrar hoḳol fuaintore zonmor aṭ dinor din mosolmani koraibae. Zara tumar oarish nae, ḳali tumrar baṛit zonmise ba tumrar ḳorida gulam, tarar-o mosolmani korani lagbo. 13Tumrar goro zonmise ba ḳorida gulam oḳolre nisoy mosolmani koraibae. Tumrar shorilo zari kora amar i chukti hor-hameshakur chukti oibo. 14Ze beṭae purush ongor mukar samṛa ḳaṭto nae, tare tar zatir maz taki fusia falail oibo. He to amar chuktir borkelaf ḳorse.”

15Allae Ibrahimre ḳoila, “Tumar bibire ar Sara ḳoia ḍakio na. En nam oibo Saera [mani, rani]. 16Ami taire borkot nazil ḳormu, tair goro tumar eḳ fua dimu. Ar borkot nazil ḳoria bout zatir mul ma banaimu, ar bout mullukor bashsha oḳol-o foyda oiba.” 17Ou Ibrahime maṭit soizdat foṛi ashia mone mone ḳoila, “Hasau eḳ-sho bosoror buṛar hurutta oito ni! Ta-o nobboi bosoror buṛi Saerar feṭo?” 18Tain Allare ḳoila, “Ah! Ismailgu zanu tumar rohomote basia taḳe.” 19Ou Allae formaila, “Ṭik ase. Oile tumar bibi Saerar feṭo hasau tumar fua oibo, tumi tar nam raḳbae Isʼhak [mani, he ashe]. Tar loge amar chukti kaim ḳormu, tar oarishor loge ikṭa amar hor-hameshakur chukti oibo. 20Ar Ismailor lagi-o tumar dua hunchi. Huno, ami tare-o borkot nazil ḳormu ar tare folala ḳoria bout baṛai dimu. He barozon razar baf oibo ar tar mazedi ami biraṭ zati foyda ḳormu. 21Samnor boros i sando Saerar goro tumar ze hurutta oibo, hou Isʼhakor loge ami amar chukti kaim ḳormu.” 22Ibrahimor loge batchit shesh ḳoria Allae tan ges taki uṭia toshrif nilagi.

23Allar hukum moto Ibrahime hou din-u Ismailre mosolmani koraila. Er loge ḳorida gulam oḳol ar tan baṛit zonmise ila hoḳol gulamre, baṛir hokkol beṭaintore mosolmani koraila. 24Ibrahimor nizor mosolmani ḳam ḳoranir shomoy tan boyosh asil nirannobboi boros, 25ar tan fua Ismailor boyosh tero. 26Eḳ dine-u Ibrahim ar tan fua Ismailor mosolmani korail oilo. 27Hi din baṛir hoḳol beṭaintor, zara tan baṛit zonmisil ar zerare bidesh taki loia anchoin, ita hoḳlor-u mosolmani ḳam eḳloge ḳorail oilo.

Currently Selected:

Tourat 1: Foeda Nama 17: sylL

Highlight

Copy