Tourat 1: Foeda Nama 15
15
Hozrot Ibrahim (a:)or loge Allar oada
1Ota goṭona oḳlor bade ohir maze Mabudor kalam Abramor gese nazil oilo. Tain ḳoila, “O Abram, ḍoraio na, ami-u tumar hefazotkari, tumar bout boṛo furuskar.” 2Abrame ḳoila, “O Mabud Moula, amare kita ditae? Ami to niaoladi. Ami morar bade Dameskor Eliezer amar shompottir malik oibo. 3Tumi to amare kunu aolad dilae na, erlagi amar baṛir gulam amar oarish oibo.” 4Ou Mabude Abramre ḳoila, “Na, he nae, tumar nizor bour aolad-u tumar oarish oibo.” 5Mabude Abramre bare ania ḳoila, “Asmanor bae sao, ar farle ou tera oḳol gonia fuṛao, tumar bongshor oarish oula behishab oibo.” 6Abrame Mabudor ou oadare ekin ḳorla, ar Mabude hou ekinre dindari ḳam hishabe ḳobul ḳorla.
7Ar tain Abramre ḳoila, “Ami-u Mabud. I Kenan deshor odikari oibar lagi ami tumare Babil deshor Ur ṭaun taki bar ḳoria anchi.” 8Ou Abrame ḳoila, “O Mabud Moula, ami itar malik oimu ḳori kila buzmu?” 9Tain ḳoila, “Tumi tin bosoror eḳṭa ḳori ḍeki, sagi, ar meṛar faṭa amar samne loia ao, er loge eḳṭa ḍufi faki ar eḳṭa faror baichcha-o anio.” 10Abrame oula ḳorla. Tain ita hoḳolṭi ania dui ṭukra ḳoria ulṭa-ulṭi kori hazaia raḳla, ḳali faki oḳolre ṭukraila na. 11Teu hokun aia ou ṭukra oḳlor ufre foṛle, Abrame ḳedaila.
12Shuruz ḍubar shomoy Abramor eḳ beushi gum ailo. Gumor maze betaya ḍor ar andaire tane asor ḳorlo. 13Ou Mabude tanre ḳoila, “Tumi nichchoy oia zanio, tumar oarish oḳole oula desho gia roiba zeḳṭa tarar nizor nae. Hono tara kub zulum-mosibotor maze roia sair-sho boros forzonto gulami korba. 14Ar ze zatie tarare gulam banaiba, ami hi zatir bisar ḳormu. Bade tara bout don-doulot loia hon tone bar oia aiba. 15Ar tumi shantie tumar baf-dadar gese zaibae. Tumi fura murobbi boyosho ḳoyboro hamaibae. 16Tumar sair siṛi bade era ono firia aiba, ḳaron Amuri oḳlor guna oḳono fura oise na.”
17Shuruz ḍubia zebla andair oigelo ou shomoy dumae bora eḳ undal ar agunir mushal hou hazaia raḳa kurbanir ṭukraintor mazedi gelo. 18Mabude hou din-u Abramor loge oula oada ḳorla, “Mishoror gang tone boṛo gang Furat forzonto asta desh ami tumar oarishre dilam. 19Ikṭa oilo Keni, Konizi, Kodmuni, 20Hiṭṭi, Farizi, Rofayi, 21Amuri, Kenani, Girgashi ar Zibuzi oḳlor desh.”
Currently Selected:
Tourat 1: Foeda Nama 15: sylL
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
