Tourat 1: Foeda Nama 13

Hozrot Ibrahim ar Hozrot Lut (a:)

1Teu Abram ar tan bibie hoḳolta loia Mishor desh falaia Negeb morubumit gelagi, Lut-o tan loge asla.

2Abram kub doni asla, tan bout heman-zanuar ar shuna-rufa asil. 3Bade tain Negeb taki horte horte Betel forzonto gela. Gia tain Betel ar Oy ṭaunor mazḳano fosla, ze zagat tain age tambu gaṛisla 4ar foyla kurbani kana banaisla. Ono gia tain hirbar Mabudor nam loila. 5Abramor loge musafir asla tan batiza Lut, en-o bout goru-sagol ar tambu asil. 6Oile zagaṭa ila asil na zen, duiozonor foshur fale eḳloge ḳaita farba. Goru-sagol ar tambu oto beshi asil zen, ita loia tarar taḳar ufae asil na. 7Erlagi Abram ar Lutor raḳal oḳole hamesha dorbar-ḳaijja ḳorta. Ar hi shomoy Kenani ar Farizi oḳol-o hi desho boshot ḳorto.

8Teu Abrame Lutre ḳoila, “Huno, amra to duiozon-u afon. Te tumar-amar maze ar tumar-amar raḳalor maze-o dorbar-ḳaijja ḳora ṭik nae. 9Hara deshṭa-u tumar samne foṛi roise. Te ao, amra alga oizai. Tumi baue fosond ḳorle, ami ḍaine, ar tumi ḍaine gele, ami baue zaimu.” 10Lute saia deḳla, Zordan gangor tʼol zagar hoḳol bae Suar gau forzonto bout fani ase, Mabudor bagisa ba Mishor deshor laḳan i zaga-o gash-fani ala. Ou shomoy-o Mabude Sadum ar Amura ṭaun binash ḳorsoin na. 11Erlagi Lute Zordan gangor hoḳol tʼol zaga nizor lagi basia fubedi horia gelagi. Oula tara alga oigela. 12Abram Kenan desho roila, ar Lut hou tʼol zominor ṭaun oḳlor ḳasat gia boshot ḳorla. Tain Sadum ṭaunor kinaro tambu gaṛilla. 13Sadumor manush oḳol kub ḳobis asil, Mabudor nozoro tara betaya gunagar.

14Lut alga oar bade Mabude Abramre ḳoila, “Tumi ze zagat ubaiso, ikan taki utore-douḳne, fube-foisme eḳbar saia deḳo. 15Ze zaga oḳol tumi deḳrae, ita ami tumare ar tumar oarish oḳolre hameshakur lagi dilaimu. 16Ami tumar oarishre duniair duil-balur laḳan behishab ḳormu. Duniar duil-balu zudi keu gonia fuṛaito fare, te tumar oarishre-o gonto farbo. 17Uṭo, asta deshṭa tumi eḳbar guria ao, ou desh-u ami tumare dimu.” 18Teu Abrame tan tambu tulia, Hebron elaḳat Momrir elon bonor ḳandat nia gaṛila. Hoḳano tain Mabudor lagi kurbani kana banaila.

Currently Selected:

Tourat 1: Foeda Nama 13: sylL

Highlight

Copy