ꠁꠘ꠆ꠎꠤꠟ ১: ꠝꠕꠤ 9
9
ꠅꠛꠡ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣ
1ꠛꠣꠖꠦ ꠢꠎꠞꠔ ꠁꠍꠣ ꠘꠣꠅꠅ ꠇꠞꠤ ꠀꠅꠞ ꠙꠣꠠꠤ ꠖꠤꠀ ꠘꠤꠎꠞ ꠐꠣꠃꠘꠅ ꠀꠁꠟꠣ। 2ꠀꠁꠀ ꠢꠣꠞꠟꠦ ꠇꠄꠎꠘ ꠝꠣꠘꠡꠦ ꠄꠇꠎꠘ ꠅꠛꠡ ꠛꠦꠝꠣꠞꠤꠞꠦ ꠙꠟꠅꠖꠤ ꠛꠁꠀ ꠟꠁꠀ ꠔꠣꠘ ꠉꠦꠍꠦ ꠀꠁꠟ। ꠔꠣꠞꠣꠞ ꠁꠝꠣꠘꠞ ꠛꠟ ꠖꠦꠈꠤꠀ ꠁꠍꠣꠄ ꠅꠃ ꠛꠦꠝꠣꠞꠤꠞꠦ ꠇꠁꠟꠣ, “ꠝꠘꠅ ꠛꠟ ꠞꠣꠈꠅ ꠞꠦ ꠙꠥꠔ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠣ ꠅꠁꠍꠦ।”
3ꠁꠈꠣꠘ ꠢꠥꠘꠤꠀ ꠇꠄꠎꠘ ꠝꠃꠟꠣꠘꠣꠄ ꠝꠘꠦ ꠝꠘꠦ ꠇꠁꠟꠣ, “ꠁ ꠛꠦꠐꠣꠄ ꠔ ꠡꠤꠞꠤꠇꠤ ꠇꠞꠦꠞ।” 4ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠀ ꠇꠁꠟꠣ, “ꠀꠙꠘꠣꠞꠣ ꠇꠦꠘꠦ ꠁꠟꠣ ꠇꠥ-ꠌꠤꠘ꠆ꠔꠣ ꠇꠞꠞꠣ? 5ꠀꠝꠣꠞ ꠟꠣꠉꠤ ꠇꠥꠘꠈꠣꠘ ꠇꠅꠀ ꠡꠥꠎꠣ, ꠔꠥꠝꠣꠞ ꠉꠥꠘꠣ ꠝꠣꠚ ꠇꠞꠤ ꠖꠤꠟꠣꠁꠟꠣꠝ, ꠘꠣ ꠃꠑꠅ, ꠔꠥꠝꠣꠞ ꠛꠤꠍꠘꠣ ꠟꠁꠀ ꠛꠣꠠꠤꠔ ꠎꠣꠅꠉꠤ? 6ꠔꠦ ꠅꠈꠘ ꠀꠙꠘꠣꠞꠣ ꠙꠞꠝꠣꠘ ꠖꠦꠈꠃꠇ꠆ꠇꠣ, ꠁ ꠖꠥꠘꠤꠀꠔ ꠉꠥꠘꠣ ꠝꠣꠚꠤꠞ ꠈꠦꠝꠔꠣ ꠀꠝꠤ ꠛꠤꠘ-ꠀꠖꠝꠞ ꠀꠍꠦ।” ꠅꠈꠣꠘ ꠇꠁꠀꠃ ꠔꠣꠁꠘ ꠛꠦꠝꠣꠞꠤ ꠛꠦꠐꠣꠞꠦ ꠇꠁꠟꠣ, “ꠅꠛꠣ ꠃꠑꠅ, ꠔꠥꠝꠣꠞ ꠈꠦꠔꠣ-ꠛꠣꠟꠤꠡ ꠟꠁꠀ ꠛꠣꠠꠤꠔ ꠎꠣꠅꠉꠤ।”
7ꠇꠁꠔꠦꠃ ꠢꠤ ꠛꠦꠝꠣꠞꠤ ꠛꠦꠐꠣ ꠃꠑꠤꠀ ꠔꠣꠞ ꠛꠣꠠꠤꠔ ꠉꠦꠟꠉꠤ। 8ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠅꠁꠉꠦꠟꠣ, ꠀꠟ꠆ꠟꠣꠄ ꠝꠣꠘꠡꠞꠦ ꠅꠔ ꠈꠦꠝꠔꠣ ꠖꠤꠍꠂꠘ ꠇꠞꠤ ꠔꠣꠞꠣ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
ꠢꠎꠞꠔ ꠝꠕꠤꠞꠦ ꠔꠞꠤꠇꠣꠞ ꠖꠣꠅꠔ
9ꠁꠍꠣꠄ ꠙꠕꠦꠖꠤ ꠀꠐꠤꠀ ꠎꠣꠁꠞꠣ, ꠅꠃ ꠡꠝꠄ ꠖꠦꠈꠟꠣ, ꠝꠕꠤ ꠘꠣꠝꠞ ꠄꠇꠎꠘ ꠝꠣꠘꠥꠡ ꠈꠣꠎꠘꠣ ꠔꠥꠟꠣꠞ ꠅꠚꠤꠡꠅ ꠛꠁꠞꠁꠍꠂꠘ। ꠖꠦꠈꠤꠀ ꠔꠣꠘꠞꠦ ꠇꠁꠟꠣ, “ꠀꠅ, ꠀꠝꠣꠞ ꠃꠝ꠆ꠝꠔ ꠅꠅ।” ꠔꠦꠃ ꠝꠕꠤ ꠃꠑꠤꠀ ꠁꠍꠣꠞ ꠈꠞꠦ ꠈꠞꠦ ꠉꠦꠟꠣ।
10ꠄꠞꠛꠣꠖꠦ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠝꠕꠤꠞ ꠛꠣꠠꠤꠔ ꠉꠤꠀ ꠈꠣꠅꠀꠔ ꠛꠁꠟꠣ। ꠔꠣꠘ ꠟꠉꠦ ꠛꠃꠔ ꠈꠣꠎꠘꠣ ꠔꠥꠟꠞꠣ ꠀꠞ ꠘꠣꠚꠞꠝꠣꠘ ꠅꠇꠟꠅ ꠈꠣꠘꠤꠔ ꠀꠍꠟꠣ। 11ꠁꠔꠣ ꠖꠦꠈꠤꠀ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠁꠍꠣꠞ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠔꠥꠝꠞꠣꠞ ꠝꠥꠞꠡꠤꠖꠦ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ ꠀꠞ ꠈꠛꠤꠍ ꠅꠇꠟꠞ ꠟꠉꠦ ꠈꠣꠅꠀ-ꠖꠣꠅꠀ ꠇꠞꠂꠘ ꠇꠦꠘꠦ?”
12ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠜꠣꠟꠣ ꠝꠣꠘꠡꠞ ꠟꠣꠉꠤ ꠇꠛꠤꠞꠣꠎ ꠟꠣꠉꠦ ꠘꠣ, ꠅꠁꠟꠦ ꠛꠦꠝꠣꠞꠤꠞ ꠟꠣꠉꠤ ꠔ ꠟꠣꠉꠦ। 13ꠀꠟ꠆ꠟꠣꠞ ꠇꠣꠟꠣꠝꠅ ꠛꠣꠔꠣꠁꠟ ꠅꠁꠍꠦ, ‘ꠀꠝꠤ ꠇꠥꠘꠥ ꠙꠡꠥ ꠇꠥꠞꠛꠣꠘꠤ ꠘꠣꠄ, ꠈꠣꠟꠤ ꠖꠄꠀ ꠖꠦꠈꠔꠣꠝ ꠌꠣꠁ।’ ꠔꠦ ꠅꠃ ꠀꠄꠀꠔꠞ ꠝꠣꠘꠤ ꠇꠤꠔꠣ, ꠅꠈꠣꠘ ꠔꠣꠟ꠆ꠟꠣꠡ ꠇꠞꠃꠇ꠆ꠇꠣ। ꠝꠘꠅ ꠞꠣꠈꠛꠣ, ꠀꠝꠤ ꠇꠥꠘꠥ ꠙꠞꠦꠎꠉꠣꠞꠞꠦ ꠖꠣꠅꠔ ꠖꠦꠅꠀꠔ ꠀꠁꠍꠤ ꠘꠣ, ꠈꠣꠟꠤ ꠉꠥꠘꠣꠉꠣꠞ ꠅꠇꠟꠞꠦꠃ ꠖꠣꠅꠔ ꠖꠤꠔꠣꠝ ꠀꠁꠍꠤ।”
ꠙꠥꠞꠣꠘ ꠔꠣꠟꠤꠝ ꠕꠣꠇꠤ ꠢꠎꠞꠔ ꠁꠍꠣꠞ ꠔꠣꠟꠤꠝ ꠜꠣꠟꠣ
14ꠄꠞꠛꠣꠖꠦ ꠄꠢꠤꠀ ꠘꠛꠤꠞ ꠃꠝ꠆ꠝꠔ ꠅꠇꠟꠦ ꠀꠁꠀ ꠁꠍꠣꠞꠦ ꠎꠤꠇꠣꠁꠟꠣ, “ꠢꠥꠎꠥꠞ, ꠀꠝꠞꠣ ꠀꠞ ꠚꠞꠤꠡꠤ ꠝꠎꠛꠞ ꠝꠣꠘꠡꠦ ꠢꠣꠝꠦꠡꠣ ꠞꠥꠎꠣ ꠞꠣꠈꠤ, ꠅꠁꠟꠦ ꠀꠙꠘꠣꠞ ꠃꠝ꠆ꠝꠔ ꠅꠇꠟꠦ ꠞꠥꠎꠣ ꠞꠣꠈꠂꠘ ꠘꠣ ꠇꠦꠘꠦ?” 15ꠔꠣꠁꠘ ꠎꠥꠀꠙ ꠖꠤꠟꠣ, “ꠘꠡꠣ ꠟꠉꠦ ꠕꠣꠇꠟꠦ ꠟꠉꠞ ꠛꠂꠞꠣꠔꠤꠞꠦ ꠇꠥꠘꠥ ꠖꠥꠈ ꠖꠦꠅꠀ ꠎꠣꠄ ꠘꠤ? ꠖꠦꠈꠛꠣꠘꠦ, ꠁꠟꠣ ꠡꠝꠄ ꠀꠁꠛ, ꠎꠦꠛꠟꠣ ꠘꠡꠣꠞꠦ ꠔꠣꠞꠣꠞ ꠉꠦꠍ ꠕꠣꠇꠤ ꠢꠞꠣꠁꠟ ꠅꠁꠎꠤꠛ, ꠢꠃ ꠡꠝꠄ ꠔꠣꠞꠣ ꠞꠥꠎꠣ ꠞꠣꠈꠛꠣ।
16“ꠀꠘꠣ-ꠗꠅꠀ ꠘꠄꠀ ꠇꠣꠙꠠꠞ ꠐꠥꠇꠞꠣꠖꠤ ꠇꠦꠃ ꠙꠥꠞꠣꠘ ꠇꠥꠞ꠆ꠔꠣꠔ ꠔꠣꠟꠤ ꠖꠦꠄ ꠘꠣ। ꠁꠟꠣ ꠇꠞꠟꠦ ꠗꠁꠀ ꠢꠣꠞꠟꠦ ꠙꠥꠞꠣꠘ ꠇꠣꠙꠠ ꠕꠣꠇꠤ ꠘꠄꠀ ꠔꠣꠟꠤ ꠈꠥꠍ ꠅꠁꠀ ꠍꠤꠠꠤꠎꠣꠄ, ꠀꠞ ꠍꠤꠠꠣꠈꠣꠘ ꠀꠞꠅ ꠛꠠ ꠅꠄ। 17ꠙꠥꠞꠣꠘ ꠌꠣꠝꠠꠣꠞ ꠕꠟꠤꠔ ꠇꠦꠃ ꠘꠄꠀ ꠀꠋꠉꠥꠞꠞ ꠞꠡ ꠜꠞꠦ ꠘꠣ। ꠜꠞꠟꠦ ꠅꠃ ꠔꠣꠎꠣ ꠞꠡꠞ ꠚꠣꠚꠦ ꠕꠟꠤ ꠚꠣꠐꠤꠀ ꠞꠡ ꠀꠞ ꠕꠟꠤ ꠖꠥꠁꠅꠔꠣ ꠛꠞꠛꠣꠖ ꠅꠄ। ꠄꠞꠟꠣꠉꠤ ꠝꠣꠘꠡꠦ ꠔꠣꠎꠣ ꠞꠡ ꠘꠄꠀ ꠕꠟꠤꠔ ꠕꠂꠘ। ꠔꠦꠃ ꠖꠥꠁꠅꠔꠣ ꠛꠣꠌꠦ।”
ꠄꠇ ꠝꠞꠣ ꠙꠥꠠꠤ ꠀꠞ ꠛꠦꠝꠣꠞꠤ ꠛꠦꠐꠤ
18ꠢꠎꠞꠔ ꠁꠍꠣꠄ ꠎꠦꠛꠟꠣ ꠅꠔꠣ ꠛꠦꠙꠣꠞꠦ ꠔꠣꠟꠤꠝ ꠖꠤꠞꠣ, ꠅꠃ ꠡꠝꠄ ꠄꠇ ꠘꠦꠔꠣ ꠀꠁꠀ ꠔꠣꠘ ꠙꠣꠅ-ꠅ ꠙꠠꠤꠀ ꠇꠁꠟꠣ, “ꠢꠥꠎꠥꠞ, ꠀꠝꠣꠞ ꠙꠥꠠꠤꠉꠥ ꠅꠃ ꠝꠣꠔ꠆ꠞ ꠝꠣꠞꠣ ꠉꠦꠍꠦ। ꠔꠦ ꠀꠙꠘꠦ ꠀꠁꠀ ꠝꠦꠢꠦꠞꠛꠣꠘꠤ ꠇꠞꠤ ꠔꠣꠁꠞꠦ ꠀꠔꠣꠁ ꠖꠤꠟꠦꠃ ꠙꠥꠠꠤꠉꠥ ꠎꠤꠘ꠆ꠖꠣ ꠅꠁꠎꠤꠛ।” 19ꠔꠦꠃ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠟꠁꠀ ꠄꠘ ꠟꠉꠦ ꠞꠅꠀꠘꠣ ꠖꠤꠟꠣ।
20ꠎꠣꠅꠀꠞ ꠙꠕꠦ ꠄꠇ ꠛꠦꠐꠤꠄ ꠈꠞꠦꠖꠤ ꠀꠁꠀ ꠁꠍꠣꠞ ꠌꠣꠖ꠆ꠖꠞꠞ ꠇꠥꠘꠣꠔ ꠍꠁꠟ। ꠛꠣꠞꠅ ꠛꠍꠞ ꠗꠞꠤ ꠁ ꠛꠦꠐꠤꠞ ꠛꠦꠐꠤꠀꠞꠣ ꠛꠦꠝꠣꠞꠞ ꠟꠃ ꠎꠣꠁꠔ। 21ꠛꠦꠐꠤꠞ ꠄꠇꠤꠘ ꠀꠍꠤꠟ, ꠔꠣꠁ ꠎꠥꠖꠤ ꠈꠣꠟꠤ ꠔꠣꠘ ꠌꠣꠖ꠆ꠖꠞꠞ ꠇꠥꠘꠣꠔ ꠍꠁꠟꠤꠔ ꠙꠣꠞꠦ, ꠔꠦ ꠛꠦꠝꠣꠞ ꠜꠣꠟꠣ ꠅꠁꠎꠤꠛ। 22ꠁꠍꠣꠄ ꠐꠦꠞ ꠙꠣꠁꠀ ꠈꠞꠦꠖꠤ ꠌꠣꠁꠀ ꠅꠃ ꠛꠦꠐꠤꠞꠦ ꠇꠁꠟꠣ, “ꠒꠞꠣꠁꠅ ꠘꠣ ꠉ ꠝꠣꠁ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।” ꠅꠈꠣꠘ ꠇꠅꠀꠞ ꠟꠉꠦ ꠟꠉꠦ ꠛꠦꠐꠤ ꠜꠣꠟꠣ ꠅꠁꠉꠦꠟ।
23ꠄꠞꠛꠣꠖꠦ ꠁꠍꠣ ꠢꠃ ꠘꠦꠔꠣꠞ ꠛꠣꠠꠤꠔ ꠉꠦꠟꠣ। ꠉꠤꠀ ꠖꠦꠈꠟꠣ, ꠀꠡ꠆ꠔꠣ ꠛꠣꠠꠤꠞ ꠝꠣꠘꠡꠦ ꠢꠂ-ꠢꠥꠟ꠆ꠟꠣ ꠇꠞꠞꠣ, ꠀꠞ ꠔꠣꠞꠣꠞ ꠡꠝꠣꠎꠞ ꠞꠦꠅꠀꠎ ꠝꠣꠚꠤꠇ ꠝꠞꠣ ꠛꠣꠠꠤꠔ ꠛꠣꠡꠤ-ꠛꠣꠎꠘꠣ ꠛꠣꠎꠣꠁꠞꠣ। 24ꠔꠣꠁꠘ ꠇꠁꠟꠣ, “ꠔꠥꠝꠞꠣ ꠢꠇꠟ ꠊꠞ ꠕꠣꠇꠤ ꠛꠣꠞꠦ ꠎꠣꠅ। ꠙꠥꠠꠤꠉꠥ ꠝꠞꠍꠦ ꠘꠣ, ꠔꠣꠁ ꠔ ꠊꠥꠝꠣꠞ।” ꠁꠈꠣꠘ ꠢꠥꠘꠤꠀ ꠝꠣꠘꠡꠦ ꠔꠣꠘꠞꠦ ꠟꠁꠀ ꠀꠡꠣ-ꠀꠡꠤ ꠟꠣꠉꠣꠁꠟꠣ। 25ꠝꠣꠘꠡꠞꠦ ꠛꠣꠞ ꠇꠞꠤꠀ ꠢꠣꠞꠟꠦ, ꠔꠣꠁꠘ ꠉꠤꠀ ꠊꠞꠞ ꠜꠤꠔꠞꠦ ꠢꠣꠝꠣꠁꠀ ꠙꠥꠠꠤꠞ ꠀꠔꠅ ꠗꠞꠟꠣ, ꠗꠞꠔꠦꠃ ꠔꠣꠁ ꠃꠑꠤꠀ ꠛꠁꠉꠦꠟ। 26ꠀꠞ ꠁ ꠊꠐꠘꠣꠞ ꠇꠕꠣ ꠅꠃ ꠄꠟꠣꠇꠣꠞ ꠢꠇꠟꠛꠣꠄ ꠞꠐꠤꠉꠦꠟ।
ꠀꠘ꠆ꠖꠣ ꠀꠞ ꠛꠥꠛꠣꠞꠦ ꠜꠣꠟꠣ ꠇꠞꠣ
27ꠁꠍꠣ ꠅꠃ ꠘꠦꠔꠣꠞ ꠛꠣꠠꠤ ꠕꠣꠇꠤ ꠛꠤꠖꠣꠄ ꠅꠁꠀ ꠢꠣꠞꠟꠦ ꠖꠥꠁꠎꠘ ꠀꠘ꠆ꠖꠣ ꠛꠦꠐꠣ ꠔꠣꠘ ꠈꠞꠦ ꠈꠞꠦ ꠉꠦꠟ। ꠔꠣꠞꠣ ꠎꠥꠞꠦ ꠎꠥꠞꠦ ꠇꠁꠟ, “ꠅ ꠖꠣꠃꠖꠞ ꠀꠅꠟꠣꠖ, ꠀꠝꠞꠣꠞꠦ ꠞꠢꠝ ꠇꠞꠃꠇ꠆ꠇꠣ।” 28ꠛꠣꠖꠦ ꠔꠣꠁꠘ ꠀꠁꠀ ꠊꠞꠅ ꠢꠣꠝꠣꠁꠟꠦ, ꠢꠃ ꠖꠥꠁꠅ ꠀꠘ꠆ꠖꠣꠅ ꠔꠣꠘ ꠉꠦꠍꠦ ꠀꠁꠟ। ꠔꠣꠁꠘ ꠎꠤꠇꠣꠁꠟꠣ, “ꠔꠥꠝꠞꠣ ꠄꠇꠤꠘ ꠇꠞꠞꠣꠄ ꠘꠤ, ꠀꠝꠤ ꠔꠥꠝꠞꠣꠞꠦ ꠜꠣꠟꠣ ꠇꠞꠔꠣꠝ ꠙꠣꠞꠝꠥ?” ꠔꠣꠞꠣ ꠇꠁꠟ, “ꠎꠤꠅꠄ ꠢꠥꠎꠥꠞ, ꠀꠙꠘꠦꠃ ꠙꠣꠞꠛꠣ।”
29ꠔꠦꠃ ꠔꠣꠁꠘ ꠄꠞꠣꠞ ꠌꠃꠈ ꠀꠔꠣꠁ ꠖꠤꠀ ꠇꠁꠟꠣ, “ꠔꠥꠝꠞꠣ ꠎꠦꠟꠣ ꠄꠇꠤꠘ ꠇꠞꠍ, ꠅꠟꠣꠃ ꠅꠃꠇ।” 30ꠅꠈꠣꠘ ꠇꠁꠔꠦꠃ ꠔꠣꠞꠣꠞ ꠌꠃꠈ ꠜꠣꠟꠣ ꠅꠁꠉꠦꠟ। ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠈꠥꠛ ꠖꠠꠣꠁꠀ ꠇꠁꠟꠣ, “ꠢꠥꠘꠅ, ꠁꠔꠣ ꠇꠦꠃꠞꠞꠦ ꠢꠥꠘꠣꠁꠅ ꠘꠣ।” 31ꠅꠁꠟꠦ ꠔꠣꠞꠣ ꠛꠣꠞ ꠅꠁꠀ ꠉꠤꠀ ꠀꠡ-ꠙꠣꠡ ꠢꠇꠟ ꠎꠣꠉꠣꠔ ꠔꠣꠘ ꠁ ꠈꠛꠞ ꠞꠐꠣꠁ ꠖꠤꠟ।
32ꠢꠃ ꠖꠥꠁꠅ ꠀꠘ꠆ꠖꠣ ꠎꠦꠛꠟꠣ ꠜꠣꠟꠣ ꠅꠁꠀ ꠎꠣꠁꠞꠣꠉꠤ, ꠅꠃ ꠡꠝꠄ ꠝꠣꠘꠡꠦ ꠜꠥꠔꠦ ꠗꠞꠣ ꠄꠇ ꠛꠥꠛꠣ ꠛꠦꠐꠣꠞꠦ ꠁꠍꠣꠞ ꠉꠦꠍꠦ ꠟꠁꠀ ꠀꠁꠟ। 33ꠔꠣꠁꠘ ꠁ ꠛꠦꠐꠣꠞ ꠜꠥꠔ ꠍꠣꠠꠣꠘꠤꠞ ꠛꠣꠖꠦ ꠔꠣꠞ ꠎꠛꠣꠘ ꠈꠥꠟꠤꠉꠦꠟ, ꠢꠦ ꠝꠣꠔ-ꠇꠕꠣ ꠝꠣꠔꠤꠟ। ꠁꠔꠣ ꠖꠦꠈꠤꠀ ꠢꠇꠟꠦ ꠔꠣꠁꠎ꠆ꠎꠥꠛ ꠅꠁꠀ ꠇꠁꠟꠣ, “ꠀꠡ꠆ꠔꠣ ꠁꠍꠞꠣꠁꠟ ꠖꠦꠡꠞ ꠝꠣꠎꠦ ꠁꠟꠣ ꠇꠣꠝ ꠔ ꠇꠥꠘꠥꠖꠤꠘ ꠖꠦꠈꠍꠤ ꠘꠣ।” 34ꠅꠁꠟꠦ ꠚꠞꠤꠡꠤ ꠅꠇꠟꠦ ꠇꠁꠟꠣ, “ꠁꠉꠤꠄ ꠔ ꠜꠥꠔꠞ ꠛꠣꠖꠡꠣꠞ ꠡꠣꠁꠎ꠆ꠎꠄ ꠜꠥꠔ ꠍꠣꠠꠣꠄ।”
ꠎꠝꠤꠘꠅ ꠚꠡꠟ ꠛꠃꠔ, ꠇꠣꠝꠟꠣ ꠇꠝ
35ꠢꠎꠞꠔ ꠁꠍꠣꠄ ꠉꠣꠃꠄ ꠉꠣꠃꠄ ꠀꠞ ꠐꠣꠃꠘꠦ ꠐꠣꠃꠘꠦ ꠉꠤꠀ ꠔꠣꠞꠣꠞ ꠝꠍꠤꠖꠅ ꠢꠣꠝꠣꠁꠀ ꠔꠣꠟꠤꠝ ꠖꠤꠟꠣ। ꠔꠣꠁꠘ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠞ ꠈꠥꠡ-ꠈꠛꠞꠤ ꠔꠛꠟꠤꠉ ꠇꠞꠟꠣ, ꠀꠞ ꠢꠇꠟ ꠘꠝꠥꠘꠣꠞ ꠛꠦꠝꠣꠞꠤꠞꠦ ꠜꠣꠟꠣ ꠇꠞꠟꠣ। 36ꠅꠃ ꠡꠝꠄ ꠝꠣꠘꠡꠞ ꠜꠤꠠ ꠖꠦꠈꠤꠀ ꠔꠣꠘ ꠈꠥꠛ ꠖꠥꠈ ꠟꠣꠉꠟ, ꠁꠔꠣ ꠝꠣꠘꠥꠡ ꠔ ꠀ-ꠞꠣꠈꠣꠟꠤ ꠝꠦꠠꠣꠞ ꠟꠣꠈꠣꠘ ꠛꠦꠚꠣꠘꠣ ꠟꠣꠉꠤ ꠊꠥꠞꠤꠞꠣ। 37ꠔꠦꠃ ꠁꠍꠣꠄ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠎꠝꠤꠘꠅ ꠔ ꠚꠡꠟ ꠛꠃꠔ ꠀꠍꠦ, ꠅꠁꠟꠦ ꠇꠣꠝꠟꠣ ꠈꠥꠛ ꠇꠝ। 38ꠄꠞꠟꠣꠉꠤ ꠎꠝꠤꠘꠞ ꠝꠣꠟꠤꠇꠞ ꠉꠦꠍꠦ ꠖꠥꠀ ꠇꠞꠅ, ꠔꠣꠘ ꠚꠡꠟ ꠔꠥꠟꠣꠞ ꠟꠣꠉꠤ ꠔꠣꠁꠘ ꠇꠣꠝꠟꠣ ꠙꠣꠑꠣꠁꠛꠣ।”
Currently Selected:
ꠁꠘ꠆ꠎꠤꠟ ১: ꠝꠕꠤ 9: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
