ꠁꠘ꠆ꠎꠤꠟ ১: ꠝꠕꠤ 7
7
ꠝꠣꠘꠡꠞ ꠖꠥꠡ ꠔꠥꠇꠣꠁꠅ ꠘꠣ
1“ꠔꠥꠝꠞꠣ ꠝꠣꠘꠡꠞ ꠖꠥꠡ ꠔꠥꠇꠣꠘꠤꠔ ꠞꠁꠅ ꠘꠣ, ꠔꠦꠃ ꠔꠥꠝꠞꠣꠞ ꠖꠥꠡꠅ ꠔꠥꠇꠣꠁꠟ ꠅꠁꠔ ꠘꠣꠄ। 2ꠔꠥꠝꠞꠣ ꠎꠦꠟꠣ ꠝꠣꠘꠡꠞ ꠖꠥꠡ ꠔꠥꠇꠣꠅ, ꠀꠟ꠆ꠟꠣꠄꠅ ꠅꠃꠟꠣ ꠔꠥꠝꠞꠣꠞ ꠖꠥꠡ ꠔꠥꠇꠣꠁꠛꠣ। ꠔꠥꠝꠞꠣ ꠎꠦꠟꠣ ꠙꠣꠟ꠆ꠟꠣꠖꠤ ꠝꠣꠙꠤꠛꠣꠄ, ꠔꠥꠝꠞꠣꠞ ꠟꠣꠉꠤꠅ ꠅꠟꠣ ꠝꠣꠙꠣ ꠅꠁꠛ।
3“ꠔꠥꠝꠣꠞ ꠜꠣꠁꠞ ꠌꠃꠈꠞ ꠜꠤꠔꠞꠦ ꠉꠥꠠꠣ ꠀꠍꠦ ꠁꠈꠣꠘ ꠖꠦꠈꠞꠣꠄ, ꠅꠁꠟꠦ ꠘꠤꠎꠞ ꠌꠃꠈꠅ ꠉꠣꠍꠞ ꠌꠦꠟꠤ ꠀꠍꠦ ꠁꠈꠣꠘ ꠖꠦꠈꠞꠣꠄ ꠘꠣ ꠇꠦꠘꠦ? 4ꠔꠥꠝꠣꠞ ꠌꠈꠥꠔ ꠌꠦꠟꠤ ꠢꠣꠝꠣꠁꠍꠦ ꠁꠈꠣꠘ ꠎꠦꠛꠟꠣ ꠖꠦꠈꠞꠣꠄ ꠘꠣ, ꠔꠦ ꠔꠥꠝꠣꠞ ꠜꠣꠁꠞꠦ ꠇꠤꠟꠣ ꠇꠁꠛꠣꠄ, ꠜꠣꠁ, ꠔꠥꠝꠣꠞ ꠌꠈꠥꠔ ꠉꠥꠠꠣ ꠢꠣꠝꠣꠁꠍꠦ, ꠀꠅ, ꠛꠣꠞ ꠇꠞꠤꠀ ꠖꠦꠁ? 5ꠢꠣꠄꠞꠦ ꠜꠘ꠆ꠒ, ꠙꠄꠟꠣ ꠘꠤꠎꠞ ꠌꠃꠈ ꠕꠣꠇꠤ ꠌꠦꠟꠤ ꠛꠣꠞ ꠇꠞꠅ, ꠛꠣꠖꠦ ꠔꠥꠝꠣꠞ ꠜꠣꠁꠞ ꠌꠃꠈ ꠕꠣꠇꠤ ꠉꠥꠠꠣ ꠛꠣꠞ ꠇꠞꠣꠔ ꠟꠣꠉꠟꠦ ꠜꠣꠟꠣ ꠇꠞꠤ ꠖꠦꠈꠔꠣꠄ ꠙꠣꠞꠛꠣꠄ।
6“ꠢꠥꠘꠅ, ꠇꠥꠔ꠆ꠔꠣꠞ ꠍꠣꠝꠘꠦ ꠙꠣꠇ-ꠙꠛꠤꠔ꠆ꠞ ꠇꠥꠘꠥ ꠌꠤꠎ ꠖꠤꠅ ꠘꠣ। ꠡꠥꠅꠞꠞ ꠍꠣꠝꠘꠦ ꠝꠘꠤ-ꠝꠥꠇ꠆ꠔꠣ ꠍꠤꠐꠣꠁꠅ ꠘꠣ। ꠀꠞꠘꠣꠄ ꠅꠃ ꠌꠤꠎꠞꠦ ꠔꠣꠞꠣꠞ ꠙꠣꠅꠖꠤ ꠃꠠꠤꠀ, ꠃꠟꠐꠣ ꠀꠁꠀ ꠔꠥꠝꠞꠣꠞꠦꠅ ꠢꠣꠝꠟꠣ ꠇꠞꠔꠣ ꠙꠣꠞꠂꠘ।
ꠖꠥꠀ-ꠝꠥꠘꠣꠎꠣꠔꠞ ꠛꠦꠙꠣꠞꠦ ꠅꠀꠖꠣ
7“ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠌꠣꠅ, ꠔꠥꠝꠞꠣꠞꠦ ꠖꠦꠅꠀ ꠅꠁꠛ। ꠔꠣꠟ꠆ꠟꠣꠡ ꠇꠞꠅ, ꠔꠦꠃ ꠙꠣꠁꠛꠣꠄ। ꠖꠥꠀꠞꠅ ꠑꠥꠇꠣ ꠖꠦꠅ, ꠔꠦꠃ ꠖꠥꠀꠞ ꠈꠥꠟꠣ ꠅꠁꠛ। 8ꠎꠣꠞꠣ ꠌꠣꠄ, ꠔꠣꠞꠣꠃ ꠔ ꠙꠣꠄ। ꠎꠦ ꠔꠣꠟ꠆ꠟꠣꠡ ꠇꠞꠦ ꠢꠦ ꠙꠣꠄ। ꠎꠦ ꠖꠥꠀꠞꠅ ꠑꠥꠇꠣꠄ, ꠔꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠄ। 9ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠝꠣ-ꠛꠣꠚ ꠀꠍꠦ ꠘꠤ, ꠎꠣꠞ ꠙꠥꠔꠦ ꠞꠥꠐꠤ ꠌꠣꠁꠟꠦ ꠝꠣꠐꠤ ꠖꠤꠛ? 10ꠝꠣꠍ ꠌꠣꠁꠟꠦ ꠢꠣꠚ ꠖꠤꠛ? 11ꠔꠥꠝꠞꠣ ꠈꠣꠞꠣꠙ ꠅꠁꠀꠅ ꠎꠥꠖꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠤꠔꠣꠄ ꠎꠣꠘ, ꠔꠦ ꠎꠣꠞꠣ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠉꠦꠍꠦ ꠌꠣꠁꠛ, ꠔꠣꠁꠘ ꠔ ꠘꠤꠌꠄ ꠔꠣꠞꠣꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠣꠘ ꠇꠞꠛꠣ, ꠁꠔꠣ ꠔ ꠡ꠆ꠛꠣꠜꠣꠛꠤꠇ। 12ꠢꠥꠘꠅ, ꠔꠥꠝꠞꠣ ꠝꠣꠘꠡꠞ ꠉꠦꠍ ꠕꠣꠇꠤ ꠎꠦꠟꠣꠈꠣꠘ ꠛꠦꠛꠢꠣꠞ ꠙꠣꠁꠔꠣꠄ ꠌꠣꠅ, ꠔꠥꠝꠞꠣꠅ ꠢꠇꠟꠞ ꠟꠉꠦ ꠅꠃ ꠟꠣꠈꠣꠘ ꠛꠦꠛꠢꠣꠞ ꠇꠞꠅ। ꠅꠔꠣꠃ ꠅꠁꠟ ꠔꠃꠞꠣꠔ ꠇꠤꠔꠣꠛ ꠀꠞ ꠘꠛꠤ ꠅꠇꠟꠞ ꠍꠢꠤꠚꠣꠞ ꠝꠥꠟ ꠔꠣꠟꠤꠝ।
ꠇꠥꠘ ꠙꠕꠦ ꠌꠟꠔꠣꠄ
13“ꠢꠥꠘꠅ, ꠔꠥꠝꠞꠣ ꠌꠤꠙꠣ ꠖꠥꠀꠞꠦꠖꠤ ꠢꠣꠝꠣꠁꠅ, ꠇꠣꠞꠘ ꠎꠦ ꠙꠕꠦ ꠛꠤꠘꠣꠡꠞ ꠛꠣꠄ ꠐꠣꠘꠦ, ꠁ ꠙꠕ ꠝꠥꠐꠣ, ꠙꠕꠞ ꠖꠥꠀꠞꠅ ꠛꠠ, ꠛꠃꠔ ꠝꠣꠘꠥꠡ ꠅꠃ ꠖꠥꠀꠞꠦꠖꠤ ꠢꠣꠝꠣꠁꠘ। 14ꠅꠁꠟꠦ ꠎꠦ ꠙꠕꠦ ꠉꠦꠟꠦ ꠎꠤꠘ꠆ꠖꠦꠉꠤ ꠝꠤꠟꠦ, ꠁ ꠙꠕꠞ ꠖꠥꠀꠞ ꠌꠤꠙꠣ, ꠙꠕꠅ ꠢꠥꠞꠥ-ꠝꠥꠞꠥ। ꠈꠥꠛ ꠇꠝ ꠝꠣꠘꠡꠦꠃ ꠁ ꠖꠥꠀꠞꠞ ꠈꠥꠎ ꠙꠣꠁꠘ।
15“ꠜꠘ꠆ꠒ ꠘꠛꠤ ꠅꠇꠟ ꠕꠣꠇꠤ ꠢꠥꠡꠤꠀꠞ ꠞꠁꠅ। ꠔꠣꠞꠣ ꠔꠥꠝꠞꠣꠞ ꠉꠦꠍꠦ ꠝꠦꠠꠣꠞ ꠍꠥꠞꠔꠦ ꠀꠄ, ꠅꠁꠟꠦ ꠜꠤꠔꠞꠦ ꠜꠤꠔꠞꠦ ꠔꠣꠞꠣ ꠞꠣꠁꠇ꠆ꠇꠡ ꠛꠣꠊꠞ ꠟꠣꠈꠣꠘ। 16ꠔꠣꠞꠣꠞ ꠎꠤꠘ꠆ꠖꠦꠉꠤ ꠖꠦꠈꠤꠀꠃ ꠌꠤꠘꠔꠣꠄ ꠙꠣꠞꠛꠣꠄ। ꠎꠣꠘ ꠔ, ꠉꠍꠣ-ꠇꠣꠐꠣꠞ ꠝꠣꠎꠦ ꠇꠥꠘꠥ ꠀꠋꠉꠥꠞ ꠗꠞꠦ ꠘꠤ ꠛꠣ ꠛꠘ-ꠎꠋꠟꠣꠞ ꠝꠣꠎꠦ ꠇꠥꠘꠥ ꠒꠥꠝꠥꠞ ꠚꠟ ꠗꠞꠦ ꠘꠤ? 17ꠑꠤꠇ ꠅꠃ ꠟꠣꠈꠣꠘ, ꠜꠣꠟꠣ ꠉꠣꠍꠦ ꠔ ꠜꠣꠟꠣ ꠚꠟꠃ ꠗꠞꠦ ꠀꠞ ꠝꠘ꠆ꠖ ꠉꠣꠍꠦ ꠝꠘ꠆ꠖ ꠚꠟꠃ ꠗꠞꠦ। 18ꠜꠣꠟꠣ ꠉꠣꠍꠦ ꠔ ꠝꠘ꠆ꠖ ꠚꠟ ꠗꠞꠦ ꠘꠣ, ꠀꠞ ꠝꠘ꠆ꠖ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ। 19ꠎꠦ ꠉꠣꠍꠦ ꠜꠣꠟꠣ ꠚꠟ ꠗꠞꠦ ꠘꠣ, ꠁꠉꠥꠞꠦ ꠇꠣꠐꠤꠀ ꠖꠣꠞꠥ ꠎꠣꠟꠣꠁꠟ ꠅꠄ। 20ꠅꠟꠣꠃ ꠜꠘ꠆ꠒ ꠘꠛꠤ ꠅꠇꠟꠞ ꠎꠤꠘ꠆ꠖꠦꠉꠤꠞ ꠚꠟ ꠖꠦꠈꠟꠦꠃ ꠁꠔꠣꠞꠦ ꠌꠤꠘꠛꠣꠄ।
ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠇꠦ ꠢꠣꠝꠣꠁꠛ?
21“ꠝꠘꠅ ꠞꠣꠈꠤꠅ, ꠀꠝꠣꠞꠦ ‘ꠢꠥꠎꠥꠞ, ꠢꠥꠎꠥꠞ!’ ꠇꠁꠟꠦꠃ ꠎꠦꠘ ꠛꠦꠢꠦꠡ꠆ꠔꠤ ꠛꠣꠖꠡꠣꠁꠔ ꠢꠣꠝꠣꠁꠎꠤꠛꠣꠄ, ꠁꠈꠣꠘ ꠑꠤꠇ ꠘꠣꠄ। ꠛꠞꠋ ꠎꠦ ꠎꠘꠦ ꠀꠝꠣꠞ ꠛꠦꠢꠦꠡ꠆ꠔꠤ ꠛꠣꠚ ꠀꠟ꠆ꠟꠣ ꠙꠣꠇꠞ ꠝꠞ꠆ꠎꠤ ꠎꠥꠉꠣꠁꠀ ꠌꠟꠦ, ꠈꠣꠟꠤ ꠢꠦ-ꠃ ꠢꠣꠝꠣꠁꠔ ꠙꠣꠞꠛ। 22ꠢꠃ ꠖꠤꠘ ꠀꠁꠟꠦ ꠛꠃꠔꠦ ꠇꠁꠛꠣ, ‘ꠝꠥꠘꠤꠛ, ꠝꠥꠘꠤꠛ, ꠀꠝꠞꠣ ꠔꠥꠝꠣꠞ ꠘꠣꠝꠦ ꠉꠣꠁꠛꠤ ꠈꠛꠞ ꠇꠁꠍꠤ ꠘꠣ ꠘꠤ? ꠔꠥꠝꠣꠞ ꠘꠣꠝꠦ ꠎꠤꠘ-ꠜꠥꠔ ꠍꠣꠠꠣꠁꠍꠤ ꠘꠣ ꠘꠤ? ꠔꠥꠝꠣꠞ ꠘꠣꠝꠦ ꠛꠃꠔ ꠇꠦꠞꠣꠝꠔꠤ ꠖꠦꠈꠣꠁꠍꠤ ꠘꠣ ꠘꠤ?’ 23ꠅꠁꠟꠦ ꠀꠝꠤ ꠔꠣꠞꠣꠞꠦ ꠎꠥꠀꠙ ꠖꠤꠝꠥ, ‘ꠗꠥꠞ, ꠁꠛꠟꠤꠍꠞ ꠖꠟ! ꠀꠝꠤ ꠔ ꠔꠥꠝꠞꠣꠞꠦ ꠌꠤꠘꠤꠃ ꠘꠣ, ꠀꠝꠣꠞ ꠉꠦꠍ ꠕꠣꠇꠤ ꠜꠣꠉꠅ।’
ꠁꠝꠣꠘꠞ ꠖꠥꠁ ꠘꠝꠥꠘꠣ
24“ꠎꠦ ꠝꠣꠘꠡꠦ ꠀꠝꠣꠞ ꠅꠃ ꠔꠣꠟꠤꠝ ꠢꠥꠘꠤꠀ ꠀꠝꠟ ꠇꠞꠦ, ꠢꠦ ꠀꠈꠟꠖꠣꠞ ꠝꠣꠘꠡꠞ ꠟꠣꠈꠣꠘ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠔꠣꠞ ꠊꠞ ꠛꠣꠘꠣꠄ। 25ꠛꠣꠖꠦ ꠝꠦꠊ-ꠔꠥꠚꠣꠘ ꠀꠞ ꠎꠥꠀꠞ ꠀꠁꠀ ꠅꠃ ꠊꠞꠞꠦ ꠑꠦꠟꠣ ꠖꠤꠟꠦꠅ ꠚꠣꠟꠣꠁꠔ ꠙꠣꠞꠦ ꠘꠣ, ꠇꠣꠞꠘ ꠁꠈꠣꠘ ꠔ ꠝꠎꠛꠥꠔ ꠈꠥꠐꠤꠞ ꠃꠙꠞꠦ ꠛꠣꠘꠣꠁꠟ ꠅꠁꠍꠦ। 26ꠅꠁꠟꠦ ꠎꠦ ꠀꠝꠣꠞ ꠔꠣꠟꠤꠝ ꠢꠥꠘꠤꠀꠅ ꠀꠝꠟ ꠇꠞꠦ ꠘꠣ, ꠢꠦ ꠛꠦꠀꠈꠟꠞ ꠟꠣꠈꠣꠘ ꠘꠞꠝ ꠝꠣꠐꠤꠞ ꠃꠙꠞꠦ ꠊꠞ ꠛꠣꠘꠣꠄ। 27ꠛꠣꠖꠦ ꠎꠦꠛꠟꠣ ꠝꠦꠊ-ꠔꠥꠚꠣꠘ ꠀꠞ ꠎꠥꠀꠞ ꠀꠁꠀ ꠅꠃ ꠊꠞꠞꠦ ꠑꠦꠟꠣ ꠖꠦꠄ, ꠅꠃ ꠡꠝꠄ ꠁꠈꠣꠘ ꠙꠠꠤꠀ ꠌꠦꠙ꠆ꠐꠣ ꠅꠁꠎꠣꠄ।”
28ꠁꠍꠣꠞ ꠁꠔꠣ ꠔꠣꠟꠤꠝ ꠢꠥꠘꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ। 29ꠇꠣꠞꠘ ꠔꠣꠁꠘ ꠔ ꠔꠣꠞꠣꠞ ꠝꠃꠟꠣꠘꠣ ꠅꠇꠟꠞ ꠟꠣꠈꠣꠘ ꠔꠣꠟꠤꠝ ꠘꠣ ꠖꠤꠀ, ꠈꠦꠝꠔꠣꠛꠣꠘ ꠝꠣꠘꠡꠞ ꠟꠣꠈꠣꠘ ꠔꠣꠟꠤꠝ ꠖꠤꠔꠣ।
Currently Selected:
ꠁꠘ꠆ꠎꠤꠟ ১: ꠝꠕꠤ 7: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
