ꠁꠘ꠆ꠎꠤꠟ ৩: ꠟꠥꠇ 14
14
ꠈꠣꠘꠤꠞ ꠖꠣꠅꠔꠅ ꠛꠁꠀ ꠔꠣꠟꠤꠝ
1ꠢꠎꠞꠔ ꠁꠍꠣ ꠚꠞꠤꠡꠤ ꠖꠟꠞ ꠄꠇ ꠝꠥꠞꠛ꠆ꠛꠤꠞ ꠛꠣꠠꠤꠔ ꠇꠥꠘꠥ ꠄꠇ ꠎꠥꠝ꠆ꠝꠣꠛꠣꠞꠦ ꠖꠣꠅꠔꠅ ꠉꠦꠟꠣ, ꠉꠤꠀ ꠢꠣꠞꠟꠦ ꠔꠣꠞꠣ ꠔꠣꠘ ꠛꠣꠄ ꠈꠥꠛ ꠜꠣꠟꠣ ꠇꠞꠤ ꠌꠃꠈ ꠞꠣꠈꠟ। 2ꠀꠈꠔꠣꠃ ꠔꠣꠘ ꠍꠣꠝꠘꠦ ꠄꠇ ꠛꠦꠝꠣꠞꠤ ꠛꠦꠐꠣ ꠀꠁꠟ, ꠔꠣꠞ ꠀꠡ꠆ꠔꠣ ꠡꠞꠤꠟ ꠛꠦꠝꠣꠞꠦ ꠚꠥꠟꠤꠉꠦꠍꠤꠟ। 3ꠔꠦꠃ ꠁꠍꠣꠄ ꠢꠘꠞ ꠀꠟꠤꠝ ꠀꠞ ꠚꠞꠤꠡꠤ ꠅꠇꠟꠞꠦ ꠎꠤꠇꠣꠁꠟꠣ, “ꠝꠥꠍꠣ ꠘꠛꠤꠞ ꠡꠞꠤꠅꠔ ꠝꠣꠚꠤꠇ ꠎꠥꠝ꠆ꠝꠣꠛꠣꠞꠦ ꠇꠥꠘꠥ ꠝꠣꠘꠡꠞ ꠛꠦꠝꠣꠞ ꠡꠤꠚꠣ ꠇꠞꠣ ꠎꠣꠁꠎ ꠘꠤ?” 4ꠁꠈꠣꠘ ꠢꠥꠘꠤꠀ ꠔꠣꠞꠣ ꠢꠇꠟ ꠘꠤꠞꠣꠁ ꠞꠁꠟꠣ, ꠀꠞ ꠁꠍꠣꠄ ꠢꠤ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠤꠀ ꠛꠤꠖꠣꠄ ꠖꠤꠟꠣꠁꠟꠣ। 5ꠛꠣꠖꠦ ꠔꠣꠞꠣꠞꠦ ꠇꠁꠟꠣ, “ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠎꠘ ꠀꠍꠦ ꠘꠤ, ꠎꠣꠞ ꠇꠥꠘꠥ ꠢꠥꠞꠥꠔ꠆ꠔꠣ ꠛꠣ ꠉꠞꠥ-ꠍꠣꠉꠟ ꠎꠥꠝ꠆ꠝꠣꠞ ꠖꠤꠘ ꠙꠣꠘꠤꠔ ꠙꠠꠤꠉꠦꠟꠦ, ꠢꠦ ꠁꠉꠥꠞꠦ ꠙꠣꠘꠤ ꠕꠣꠇꠤ ꠔꠥꠟꠦ ꠘꠣ?” 6ꠁꠈꠣꠘ ꠢꠥꠘꠤꠀ ꠔꠣꠞꠣ ꠇꠥꠘꠥ ꠎꠥꠀꠙ ꠖꠤꠔꠣ ꠙꠣꠞꠟꠣ ꠘꠣ।
7ꠀꠞ ꠎꠦ ꠝꠦꠝꠣꠘ ꠅꠇꠟ ꠖꠣꠅꠔꠅ ꠀꠁꠍꠂꠘ, ꠔꠣꠞꠣ ꠢꠇꠟꠦ ꠜꠣꠟꠣ ꠜꠣꠟꠣ ꠎꠣꠉꠣ ꠔꠥꠇꠣꠁ ꠛꠁꠞꠣ ꠖꠦꠈꠤꠀ, ꠁꠍꠣꠄ ꠔꠣꠞꠣꠞꠦ ꠅꠃ ꠔꠣꠟꠤꠝ ꠖꠤꠟꠣ, 8“ꠇꠥꠘꠥ ꠝꠣꠘꠡꠦ ꠔꠥꠝꠣꠞꠦ ꠛꠤꠀꠞ ꠖꠣꠅꠔ ꠖꠤꠟꠦ, ꠔꠥꠝꠤ ꠝꠎꠟꠤꠍꠅ ꠢꠣꠝꠣꠁꠀ ꠖꠣꠝꠤ ꠎꠣꠉꠣꠔ ꠛꠅꠀ ꠑꠤꠇ ꠘꠣꠄ। ꠇꠣꠞꠘ ꠝꠣꠟꠤꠇꠦ ꠇꠤꠛꠣꠘ ꠔꠥꠝꠣꠞ ꠕꠣꠇꠤ ꠀꠞꠅ ꠁꠎ꠆ꠎꠔꠤ ꠇꠦꠃꠞꠞꠦ ꠖꠣꠅꠔ ꠖꠤꠍꠂꠘ। 9ꠔꠦ ꠅꠁꠟꠦ ꠎꠦꠁꠘ ꠔꠥꠝꠣꠞꠦ ꠖꠣꠅꠔ ꠖꠤꠍꠂꠘ ꠔꠣꠁꠘ ꠀꠁꠀ ꠇꠁꠛꠣ, ꠅꠃ ꠍꠤꠐ ꠕꠣꠇꠤ ꠃꠑꠤꠀ ꠀꠝꠣꠞ ꠖꠣꠝꠤ ꠝꠦꠝꠣꠘꠞꠦ ꠛꠁꠛꠣꠞ ꠖꠦꠁꠘ। ꠔꠦꠃ ꠔꠥꠝꠤ ꠡꠞꠝꠤꠘ꠆ꠖꠣ ꠅꠁꠀ ꠄꠝꠘꠦꠃ ꠢꠇꠟ ꠕꠣꠇꠤ ꠘꠤꠌꠣ ꠎꠣꠉꠣꠔ ꠉꠤꠀ ꠛꠁꠛꠣꠄ। 10ꠄꠞꠖꠣꠄ ꠔꠥꠝꠤ ꠇꠥꠘꠥ ꠖꠣꠅꠔꠅ ꠉꠦꠟꠦ ꠙꠄꠟꠣ ꠘꠤꠌꠣ ꠎꠣꠉꠣꠔ ꠉꠤꠀ ꠛꠁꠅ। ꠔꠦꠃ ꠎꠣꠞ ꠛꠣꠠꠤꠔ ꠖꠣꠅꠔꠅ ꠉꠦꠍ ꠔꠣꠁꠘ ꠀꠁꠀ ꠇꠁꠛꠣ, ꠜꠣꠁꠍꠣꠛ, ꠁꠘꠅ ꠇꠦꠘꠦ ꠛꠁꠍꠂꠘ, ꠜꠣꠟꠣ ꠎꠣꠉꠣꠔ ꠔꠡꠞꠤꠚ ꠀꠘꠃꠇ꠆ꠇꠣ। ꠄꠔꠦ ꠀꠞꠅ ꠝꠦꠝꠣꠘ ꠅꠇꠟꠞ ꠍꠣꠝꠘꠦ ꠔꠥꠝꠣꠞ ꠁꠎ꠆ꠎꠔ ꠛꠣꠠꠛ। 11ꠀꠍꠟꠦ ꠎꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ, ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ। ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ, ꠔꠣꠞꠦ ꠛꠠ ꠇꠞꠣ ꠅꠁꠛ।”
12ꠎꠦ ꠝꠃꠟꠣꠘꠣꠄ ꠢꠎꠞꠔ ꠁꠍꠣꠞꠦ ꠖꠣꠅꠔ ꠖꠤꠍꠟꠣ, ꠁꠍꠣꠄ ꠄꠘꠞꠦ ꠇꠁꠟꠣ, “ꠖꠤꠘꠞ ꠛꠣ ꠞꠣꠁꠔꠇꠥꠞ ꠈꠣꠘꠤꠞ ꠟꠣꠉꠤ ꠔꠥꠝꠤ ꠇꠥꠘꠥ ꠅꠘꠥꠡ꠆ꠑꠣꠘ ꠇꠞꠟꠦ, ꠔꠥꠝꠣꠞ ꠛꠘ꠆ꠖꠥ-ꠛꠣꠘ꠆ꠖꠛ, ꠜꠣꠁ-ꠛꠤꠞꠣꠖꠞ, ꠈꠦꠡ-ꠇꠥꠐꠥꠝ, ꠀꠞ ꠗꠣꠞꠅ ꠇꠣꠍꠞ ꠗꠘꠤ ꠝꠣꠘꠡꠞꠦ ꠖꠣꠅꠔ ꠖꠤꠅ ꠘꠣ। ꠔꠣꠞꠣꠞꠦ ꠈꠣꠅꠀꠁꠟꠦ ꠛꠣꠖꠦ ꠔꠣꠞꠣꠅ ꠔꠥꠝꠣꠞꠦ ꠈꠣꠅꠀꠁꠀ ꠛꠖꠟꠣ ꠖꠤꠟꠣꠁꠛꠣ। 13ꠄꠞꠟꠣꠉꠤ ꠔꠥꠝꠤ ꠇꠥꠘꠥ ꠝꠦꠝꠣꠘꠖꠣꠞꠤ ꠇꠞꠔꠦ ꠌꠣꠁꠟꠦ, ꠈꠣꠟꠤ ꠉꠞꠤꠛ ꠝꠣꠘꠥꠡ, ꠀꠔꠥꠞ, ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣꠞꠦ ꠖꠣꠅꠔ ꠖꠤꠅ। 14ꠄꠞꠣ ꠔ ꠚꠤꠞꠤꠀ ꠔꠥꠝꠣꠞꠦ ꠈꠣꠅꠀꠁꠔ ꠙꠣꠞꠔ ꠘꠣꠄ। ꠄꠔꠦ ꠇꠤꠀꠝꠔꠞ ꠖꠤꠘ ꠔꠥꠝꠤ ꠙꠞꠦꠎꠉꠣꠞ ꠅꠇꠟꠞ ꠟꠉꠦ ꠁꠔꠣꠞ ꠛꠖꠟꠣ ꠙꠣꠁꠛꠣꠄ।”
15ꠁꠔꠣ ꠢꠥꠘꠤꠀ ꠢꠃ ꠈꠣꠘꠤꠞ ꠝꠎꠟꠤꠍꠞ ꠄꠇꠎꠘꠦ ꠇꠁꠟꠣ, “ꠝꠥꠛꠣꠞꠇ ꠢꠃ ꠛꠘ꠆ꠖꠣ, ꠎꠦꠁꠘ ꠀꠟ꠆ꠟꠣꠞ ꠛꠣꠖꠡꠣꠁꠔ ꠛꠁꠀ ꠈꠣꠘꠣ-ꠙꠤꠘꠣ ꠈꠣꠁꠛꠣ।” 16ꠔꠦꠃ ꠁꠍꠣꠄ ꠇꠁꠟꠣ, “ꠇꠥꠘꠥ ꠄꠇꠎꠘ ꠝꠣꠘꠡꠦ ꠈꠥꠛ ꠛꠠ ꠄꠇ ꠝꠦꠎꠛꠣꠘꠤ ꠇꠞꠤꠀ, ꠛꠃꠔ ꠝꠣꠘꠡꠞꠦ ꠖꠣꠅꠔ ꠖꠤꠟꠣ। 17ꠈꠣꠅꠀꠞ ꠡꠝꠄ ꠅꠁꠟꠦ ꠔꠣꠘ ꠉꠥꠟꠣꠝꠞꠦꠖꠤ ꠇꠅꠀꠁꠟꠣ, ‘ꠀꠙꠘꠣꠞꠣ ꠀꠁꠃꠇ꠆ꠇꠣ, ꠈꠣꠘꠣ ꠔꠤꠀꠞ ꠅꠁꠉꠦꠍꠦ।’ 18ꠅꠁꠟꠦ ꠢꠇꠟ ꠖꠣꠅꠔꠤꠄ ꠄꠇ ꠄꠇꠐꠣ ꠃꠎꠞ ꠖꠦꠈꠣꠁꠟ। ꠙꠄꠟꠣ ꠎꠘꠦ ꠇꠁꠟ, ‘ꠀꠝꠤ ꠕꠥꠠꠣ ꠎꠝꠤꠘ ꠈꠞꠤꠖ ꠇꠞꠍꠤ, ꠅꠈꠘ ꠖꠦꠈꠣꠔ ꠎꠣꠁꠔꠣꠝ, ꠔꠦ ꠢꠘꠅ ꠘꠣ ꠉꠦꠟꠦ ꠅꠁꠔ ꠘꠣꠄ, ꠄꠞꠟꠣꠉꠤ ꠀꠝꠣꠞꠦ ꠝꠣꠚ ꠇꠞꠃꠇ꠆ꠇꠣ।’ 19ꠖꠥꠍꠞꠣ ꠎꠘꠦ ꠇꠁꠟ, ‘ꠀꠝꠤ ꠀꠟꠞ ꠟꠣꠉꠤ ꠙꠣꠌ ꠎꠥꠠꠣ ꠛꠤꠍꠣꠟ ꠟꠁꠍꠤ। ꠅꠈꠘ ꠉꠤꠀ ꠖꠦꠈꠔꠣꠝ, ꠁꠔꠣꠄ ꠀꠟ ꠛꠣꠁꠘ ꠇꠤ ꠘꠣ, ꠀꠝꠣꠞꠦ ꠝꠣꠚ ꠇꠞꠃꠇ꠆ꠇꠣ।’ 20ꠀꠞꠇ ꠎꠘꠦ ꠇꠁꠟ, ‘ꠀꠝꠤ ꠔ ꠘꠄꠀ ꠛꠤꠀ ꠇꠞꠍꠤ। ꠅꠈꠘ ꠎꠣꠁꠔꠣꠝ ꠙꠣꠞꠔꠣꠝ ꠘꠣꠄ।’ 21ꠢꠤ ꠉꠥꠟꠣꠝꠦ ꠀꠁꠀ ꠔꠣꠞ ꠝꠣꠟꠤꠇꠞꠦ ꠢꠇꠟꠔꠣ ꠎꠣꠘꠣꠁꠟ। ꠁꠔꠣ ꠢꠥꠘꠤꠀ ꠝꠣꠟꠤꠇꠦ ꠉꠥꠍꠣ ꠇꠞꠤꠀ ꠇꠁꠟꠣ, ‘ꠔꠥꠁ ꠎꠟꠖꠤ ꠇꠞꠤ ꠐꠣꠃꠘꠞ ꠅꠟ꠆ꠟꠤꠄ-ꠉꠟ꠆ꠟꠤꠄ ꠎꠣ, ꠉꠤꠀ ꠉꠞꠤꠛ, ꠀꠔꠥꠞ, ꠀꠘ꠆ꠖꠣ, ꠟꠥꠟꠣ-ꠟꠦꠋꠠꠣꠞꠦ ꠀꠘꠉꠤ।’ 22ꠔꠦꠃ ꠢꠦ ꠅꠟꠣ ꠇꠞꠤꠀ ꠢꠣꠞꠤ ꠛꠣꠖꠦ ꠀꠁꠀ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠢꠥꠇꠥꠝꠦ ꠢꠇꠟꠔꠣ ꠇꠞꠣ ꠅꠁꠍꠦ, ꠅꠁꠟꠦ ꠅꠈꠘꠅ ꠎꠣꠉꠣ ꠈꠣꠟꠤ ꠞꠁꠍꠦ।’ 23ꠅꠃ ꠔꠣꠁꠘ ꠇꠁꠟꠣ, ‘ꠔꠦ ꠐꠣꠃꠘꠞ ꠛꠣꠞꠦ ꠙꠕꠅ-ꠊꠣꠐꠅ, ꠀꠞ ꠌꠤꠙꠣꠄ-ꠌꠣꠙꠣꠄ ꠎꠣ, ꠉꠤꠀ ꠝꠤꠘꠔ-ꠇꠣꠎ꠆ꠎꠤ ꠇꠞꠤ ꠝꠣꠘꠡꠞꠦ ꠀꠘ। ꠝꠣꠘꠥꠡ ꠀꠁꠀ ꠝꠎꠟꠤꠍ ꠜꠞꠤ ꠎꠣꠃꠇ꠆ꠇꠣ। 24ꠀꠞ ꠔꠥꠝꠞꠣ ꠈꠤꠀꠟ ꠇꠞꠤ ꠢꠥꠘꠅ, ꠀꠉꠦ ꠎꠦꠔꠣꠞꠦ ꠖꠣꠅꠔ ꠖꠤꠍꠟꠣꠝ, ꠁꠔꠣ ꠇꠥꠘꠥꠉꠤꠄ ꠎꠣꠘꠥ ꠀꠝꠣꠞ ꠈꠣꠘꠤ ꠘꠣ ꠙꠣꠁꠘ।’ ”
ꠀꠟ-ꠝꠍꠤꠞ ꠃꠝ꠆ꠝꠔ ꠅꠀꠞ ꠡꠞ꠆ꠔ
25ꠛꠣꠖꠦ ꠢꠎꠞꠔ ꠁꠍꠣꠞ ꠟꠉꠦ ꠅꠁꠀ ꠛꠃꠔ ꠝꠣꠘꠥꠡ ꠀꠐꠣꠔ ꠀꠍꠟꠣ। ꠅꠃ ꠡꠝꠄ ꠔꠣꠁꠘ ꠄꠞꠣꠞ ꠛꠣꠄ ꠌꠣꠁꠀ ꠇꠁꠟꠣ, 26“ꠇꠦꠃ ꠎꠥꠖꠤ ꠀꠝꠣꠞ ꠔꠞꠤꠇꠣꠔ ꠀꠁꠔ ꠌꠣꠄ, ꠔꠦ ꠔꠣꠞ ꠘꠤꠎꠞ ꠝꠣ-ꠛꠣꠚ, ꠛꠃ-ꠛꠣꠁꠌ꠆ꠌꠣ, ꠜꠣꠁ-ꠛꠤꠞꠣꠖꠞ, ꠀꠞ ꠘꠤꠎꠞ ꠎꠣꠘꠞꠦꠅ ꠀꠝꠣꠞ ꠕꠣꠇꠤ ꠢꠥꠞꠥ ꠝꠘꠦ ꠇꠞꠔꠦ ꠅꠁꠛ। ꠀꠞꠘꠣꠄ ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ। 27ꠎꠦ ꠝꠣꠘꠡꠦ ꠘꠤꠎꠞ ꠖꠥꠈ-ꠇꠡ꠆ꠐꠞ ꠍꠟꠤꠛ ꠇꠣꠘ꠆ꠖꠅ ꠟꠁꠀ ꠀꠝꠣꠞ ꠈꠞꠦ ꠈꠞꠦ ꠞꠄ ꠘꠣ, ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠦ ꠘꠣ।
28“ꠔꠥꠝꠞꠣꠞ ꠇꠦꠃ ꠎꠥꠖꠤ ꠃꠌꠣ ꠇꠥꠘꠥ ꠖꠟꠣꠘ ꠛꠣꠘꠣꠁꠔ ꠌꠣꠄ, ꠔꠦ ꠢꠦ ꠙꠄꠟꠣ ꠔꠣꠞ ꠈꠞꠌꠞ ꠢꠤꠡꠣꠛ ꠝꠤꠟꠣꠁꠀ ꠖꠦꠈꠦ, ꠖꠟꠣꠘꠞ ꠇꠣꠝ ꠡꠦꠡ ꠇꠞꠣꠞ ꠟꠣꠉꠤ ꠔꠣꠞ ꠐꠦꠇꠣ ꠀꠍꠦ ꠇꠤ ꠘꠣ। 29ꠘꠣ ꠅꠁꠟꠦ, ꠁꠀꠘ ꠖꠤꠀ ꠢꠣꠞꠤ ꠇꠣꠝ ꠡꠦꠡ ꠇꠞꠔꠦ ꠘꠣ ꠙꠣꠞꠟꠦ, ꠝꠣꠘꠡꠦ ꠑꠣꠐ꠆ꠐꠣ ꠇꠞꠛꠣ, 30ꠔꠣꠞꠣ ꠇꠁꠛꠣ, ꠛꠦꠐꠣꠄ ꠖꠟꠣꠘ ꠔꠥꠟꠤꠀ ꠅꠈꠘ ꠡꠦꠡ ꠇꠞꠔ ꠙꠣꠞꠦꠞ ꠘꠣ।
31“ꠀꠞ ꠎꠥꠖꠤ ꠄꠇ ꠞꠣꠎꠣ ꠀꠞꠇ ꠞꠣꠎꠣꠞ ꠛꠤꠙꠇ꠆ꠇꠦ ꠎꠥꠖ꠆ꠖ ꠇꠞꠣꠔ ꠟꠣꠉꠂꠘ, ꠔꠦ ꠙꠄꠟꠣ ꠛꠁꠀ ꠙꠞꠣꠝꠤꠡ ꠇꠞꠛꠣ, ꠔꠣꠁꠘ ꠇꠁꠛꠣ, ꠛꠤꠡ ꠀꠎꠣꠞ ꠚꠃꠎ ꠟꠁꠀ ꠎꠦꠞꠣ ꠀꠝꠣꠞ ꠛꠤꠙꠇ꠆ꠇꠦ ꠀꠁꠞꠣ, ꠀꠝꠤ ꠖꠡ ꠀꠎꠣꠞ ꠚꠃꠎ ꠟꠁꠀ ꠄꠞ ꠝꠥꠇꠣꠛꠤꠟꠣ ꠇꠞꠔꠣꠝ ꠙꠣꠞꠝꠥ ꠘꠤ? 32ꠎꠥꠖꠤ ꠘꠣ ꠙꠣꠞꠂꠘ, ꠔꠦ ꠢꠣꠝꠟꠣ ꠇꠞꠞꠣ ꠞꠣꠎꠣ ꠖꠥꠞꠁ ꠕꠣꠇꠔꠦꠃ ꠀꠙꠥꠡꠞ ꠟꠣꠉꠤ ꠇꠄꠎꠘ ꠔꠤꠀꠁꠔ ꠙꠣꠑꠣꠁꠛꠣ। 33ꠑꠤꠇ ꠅꠃꠟꠣ, ꠔꠥꠝꠞꠣꠞ ꠝꠣꠎꠦ ꠇꠦꠃ ꠎꠥꠖꠤ ꠔꠣꠞ ꠢꠇ꠆ꠇꠟꠔꠣꠞ ꠝꠣꠄꠀ ꠍꠣꠠꠔ ꠘꠣ ꠙꠣꠞꠦ, ꠔꠦ ꠢꠦ ꠀꠝꠣꠞ ꠃꠝ꠆ꠝꠔ ꠅꠁꠔ ꠙꠣꠞꠔ ꠘꠣꠄ।
34“ꠘꠥꠘ ꠔ ꠜꠣꠟꠣ ꠎꠤꠘꠤꠡ, ꠅꠁꠟꠦ ꠘꠥꠘꠞ ꠎꠥꠖꠤ ꠡ꠆ꠛꠣꠖ ꠘꠡ꠆ꠐ ꠅꠁꠎꠣꠄ, ꠔꠦ ꠀꠞ ꠘꠥꠘꠔꠣ ꠇꠞꠣ ꠎꠣꠄ ꠘꠤ? 35ꠁꠔꠣꠖꠤ ꠡꠣꠞꠅ ꠛꠣꠘꠣꠁꠟ ꠎꠣꠄ ꠘꠣ, ꠎꠝꠤꠘꠅ ꠖꠦꠅꠀ ꠎꠣꠄ ꠘꠣ, ꠄꠞꠟꠣꠉꠤ ꠝꠣꠘꠡꠦ ꠁꠔꠣ ꠛꠣꠞꠦ ꠚꠣꠟꠣꠁ ꠖꠦꠁꠘ। ꠢꠥꠘꠣꠞ ꠝꠔ ꠇꠣꠘ ꠎꠣꠞ ꠀꠍꠦ, ꠢꠦ ꠢꠥꠘꠃꠇ।”
Currently Selected:
ꠁꠘ꠆ꠎꠤꠟ ৩: ꠟꠥꠇ 14: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
