ꠁꠘ꠆ꠎꠤꠟ ৩: ꠟꠥꠇ 11
11
ꠖꠥꠀ ꠇꠞꠣꠞ ꠇꠣꠄꠖꠣ-ꠇꠣꠘꠥꠘ
1ꠄꠇꠖꠤꠘ ꠢꠥꠎꠥꠞ ꠁꠍꠣꠄ ꠇꠥꠘꠥ ꠄꠇ ꠎꠣꠉꠣꠔ ꠖꠥꠀ ꠇꠞꠣꠔ ꠀꠍꠟꠣ। ꠖꠥꠀ ꠡꠦꠡ ꠅꠁꠀ ꠢꠣꠞꠟꠦ ꠔꠣꠘ ꠄꠇ ꠍꠣꠢꠣꠛꠤꠄ ꠇꠁꠟꠣ, “ꠢꠥꠎꠥꠞ, ꠄꠢꠤꠀ ꠘꠛꠤꠄ ꠔ ꠔꠣꠘ ꠍꠣꠢꠣꠛꠤꠞꠦ ꠖꠥꠀ ꠇꠞꠣ ꠢꠤꠇꠣꠁꠔꠣ, ꠔꠦ ꠀꠙꠘꠦꠅ ꠀꠝꠞꠣꠞꠦ ꠖꠥꠀ ꠇꠞꠣ ꠢꠤꠇꠣꠃꠇ꠆ꠇꠣ।” 2ꠁꠍꠣꠄ ꠄꠞꠣꠞꠦ ꠇꠁꠟꠣ, “ꠖꠥꠀ ꠇꠞꠣꠞ ꠡꠝꠄ ꠔꠥꠝꠞꠣ ꠅꠃꠟꠣ ꠇꠁꠅ,
ꠅ ꠀꠍꠝꠣꠘꠤ ꠛꠣꠛꠣ, ꠔꠥꠝꠣꠞ ꠘꠣꠝ ꠙꠛꠤꠔ꠆ꠞ ꠇꠁꠀ ꠝꠣꠘꠣ ꠅꠃꠇ,
ꠖꠥꠘꠤꠀꠔ ꠔꠥꠝꠣꠞ ꠛꠣꠖꠡꠣꠁ ꠇꠣꠁꠝ ꠅꠃꠇ।
3ꠀꠝꠞꠣꠞ ꠙꠞꠔꠦꠇ ꠖꠤꠘꠞ ꠞꠤꠎꠦꠇ ꠙꠞꠔꠤꠖꠤꠘ ꠎꠥꠉꠣꠁ ꠖꠤꠅ;
4ꠛꠣꠛꠣ, ꠀꠝꠞꠣꠞ ꠔꠣꠝꠣꠝ ꠉꠥꠘꠣꠞꠦ ꠝꠣꠚ ꠇꠞꠤꠀ ꠖꠤꠟꠣꠅ,
ꠎꠦꠟꠣ ꠀꠝꠞꠣꠅ ꠝꠣꠚꠤ ꠖꠤꠟꠣꠁꠍꠤ ꠀꠝꠞꠣꠞ ꠅꠙꠞꠣꠗꠤ ꠅꠇꠟꠞꠦ;
ꠀꠞ ꠙꠞꠤꠇ꠆ꠇꠣ ꠕꠣꠇꠤ ꠢꠦꠚꠣꠎꠔ ꠇꠞꠅ ꠀꠝꠞꠣꠞꠦ।”
5ꠛꠣꠖꠦ ꠁꠍꠣꠄ ꠔꠣꠞꠣꠞꠦ ꠇꠁꠟꠣ, “ꠗꠞꠤꠟꠣꠅ, ꠀꠗꠣ ꠞꠣꠁꠔꠇꠥꠞ ꠛꠣꠟꠣ ꠔꠥꠝꠞꠣꠞ ꠇꠥꠘꠥ ꠖꠥꠡ꠆ꠔꠞ ꠛꠣꠠꠤꠔ ꠉꠤꠀ ꠇꠁꠟꠣꠄ, ꠖꠥꠡ꠆ꠔ, ꠀꠝꠣꠞꠦ ꠔꠤꠘꠈꠣꠘ ꠞꠥꠐꠤ ꠇꠞꠎ ꠖꠦꠅ। 6ꠀꠝꠣꠞ ꠄꠇ ꠛꠘ꠆ꠖꠥ ꠙꠕꠦꠖꠤ ꠎꠣꠅꠀꠞ ꠛꠣꠟꠣ ꠀꠈꠔꠣꠃ ꠀꠝꠣꠞ ꠛꠣꠠꠤꠔ ꠃꠑꠍꠂꠘ। ꠅꠈꠘ ꠔꠣꠘꠦ ꠇꠤꠔꠣ ꠈꠣꠅꠀꠁꠔꠣꠝ, ꠀꠝꠣꠞ ꠊꠞꠅ ꠔ ꠇꠥꠘ꠆ꠔꠣ ꠘꠣꠁ। 7ꠔꠦꠃ ꠖꠥꠡ꠆ꠔꠦ ꠊꠞꠅ ꠕꠘꠦ ꠎꠥꠀꠙ ꠖꠤꠟꠣ, ꠀꠝꠤ ꠖꠞꠎꠣ ꠛꠘ꠆ꠖ ꠇꠞꠤꠀ ꠀꠝꠣꠞ ꠢꠥꠞꠥꠔ꠆ꠔꠣꠁꠘ ꠟꠁꠀ ꠢꠥꠔꠤꠞꠁꠍꠤ, ꠀꠝꠣꠞꠦ ꠇꠡ꠆ꠐ ꠖꠤꠅ ꠘꠣ। ꠅꠈꠘ ꠃꠑꠤꠀ ꠇꠥꠘ꠆ꠔꠣ ꠖꠤꠔꠣꠝ ꠙꠣꠞꠔꠣꠝ ꠘꠣꠄ। 8ꠅꠁꠟꠦ ꠀꠝꠤ ꠇꠁꠞꠣꠝ, ꠅꠃ ꠖꠥꠡ꠆ꠔꠦ ꠃꠑꠤꠀ ꠛꠘ꠆ꠖꠥ ꠢꠤꠡꠣꠛꠦ ꠇꠥꠘ꠆ꠔꠣ ꠖꠤꠔꠦ ꠘꠣ ꠌꠣꠁꠟꠦꠅ, ꠔꠥꠝꠤ ꠛꠣꠞ ꠛꠣꠞ ꠝꠤꠘꠔ ꠇꠞꠟꠦ ꠢꠦ ꠃꠑꠛꠃ। ꠃꠑꠤꠀ ꠔꠥꠝꠤ ꠎꠦꠔꠣ ꠌꠣꠁꠞꠣꠄ, ꠁꠔꠣ ꠑꠤꠇꠃ ꠖꠤꠛ।
9“ꠔꠦ ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠔꠥꠝꠞꠣ ꠌꠣꠅ, ꠔꠦꠃ ꠖꠦꠅꠀ ꠅꠁꠛ। ꠔꠣꠟ꠆ꠟꠣꠡ ꠇꠞꠅ, ꠔꠦꠃ ꠙꠣꠁꠛꠣꠄ। ꠖꠥꠀꠞꠅ ꠑꠥꠇꠣ ꠖꠦꠅ, ꠔꠥꠝꠞꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠁꠛ। 10ꠎꠣꠞꠣ ꠌꠣꠄ, ꠔꠣꠞꠣꠃ ꠔ ꠙꠣꠄ। ꠎꠦ ꠔꠣꠟ꠆ꠟꠣꠡ ꠇꠞꠦ ꠢꠦ ꠙꠣꠄ। ꠎꠦ ꠖꠥꠀꠞꠅ ꠑꠥꠇꠣ ꠖꠦꠄ, ꠔꠣꠞ ꠟꠣꠉꠤ ꠖꠥꠀꠞ ꠈꠥꠟꠣ ꠅꠄ। 11ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠛꠣꠚ ꠀꠍꠦ ꠘꠤ, ꠎꠣꠞ ꠙꠥꠔꠦ ꠞꠥꠐꠤ ꠌꠣꠁꠟꠦ ꠔꠣꠞꠦ ꠝꠣꠐꠤ ꠖꠤꠛ, ꠝꠣꠍ ꠌꠣꠁꠟꠦ ꠢꠣꠚ ꠖꠤꠛ, 12ꠛꠣ ꠄꠘ꠆ꠒꠣ ꠌꠣꠁꠟꠦ ꠛꠤꠍꠣ ꠖꠤꠛ? 13ꠔꠦ ꠔꠥꠝꠞꠣ ꠘꠣꠚꠞꠝꠣꠘ ꠅꠁꠀꠅ ꠎꠥꠖꠤ ꠔꠥꠝꠞꠣꠞ ꠢꠥꠞꠥꠔ꠆ꠔꠣꠁꠘꠞꠦ ꠜꠣꠟꠣ ꠜꠣꠟꠣ ꠌꠤꠎ ꠖꠤꠔꠣꠄ ꠎꠣꠘ, ꠔꠦ ꠎꠣꠞꠣ ꠛꠦꠢꠦꠡ꠆ꠔꠤ ꠛꠣꠚꠞ ꠉꠦꠍꠦ ꠌꠣꠁꠛ, ꠔꠣꠁꠘ ꠘꠤꠌꠄ ꠔꠣꠞꠣꠞꠦ ꠙꠣꠇ ꠞꠥꠢꠥ ꠖꠣꠘ ꠇꠞꠛꠣꠃ।”
ꠢꠎꠞꠔ ꠁꠍꠣꠄ ꠇꠥꠘ ꠛꠟꠦ ꠇꠦꠞꠣꠝꠔꠤ ꠖꠦꠈꠣꠁꠘ
14ꠄꠇꠖꠤꠘ ꠄꠇ ꠛꠦꠐꠣꠞ ꠟꠉ ꠕꠣꠇꠤꠀ ꠁꠍꠣꠄ ꠄꠇ ꠛꠥꠛꠣ ꠎꠤꠘ꠆ꠘꠣꠔ ꠍꠣꠠꠣꠁꠟꠣ। ꠎꠤꠘ꠆ꠘꠣꠔꠦ ꠍꠣꠠꠣꠞ ꠛꠣꠖꠦ ꠢꠤ ꠛꠦꠐꠣꠞ ꠎꠛꠣꠘ ꠈꠥꠟꠤꠉꠦꠟ, ꠝꠣꠔ-ꠇꠕꠣ ꠝꠣꠔꠤꠟ। ꠁꠔꠣ ꠖꠦꠈꠤꠀ ꠝꠣꠘꠥꠡ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ। 15ꠅꠁꠟꠦ ꠇꠥꠘꠥ ꠇꠥꠘꠥ ꠝꠣꠘꠡꠦ ꠇꠁꠟ, “ꠁ ꠛꠦꠐꠣꠄ ꠎꠤꠘꠞ ꠛꠣꠖꠡꠣ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ ꠍꠣꠠꠣꠄ।” 16ꠀꠞꠅ ꠇꠁꠄꠇ ꠎꠘꠦ ꠔꠣꠘꠞꠦ ꠙꠞꠤꠇ꠆ꠇꠣ ꠇꠞꠣꠞ ꠘꠤꠅꠔꠦ, ꠔꠣꠘ ꠀꠔꠞ ꠇꠥꠘꠥ ꠇꠦꠞꠣꠝꠔꠤ ꠖꠦꠈꠔ ꠌꠣꠁꠟ। 17ꠁꠍꠣꠄ ꠔꠣꠞꠣꠞ ꠖꠤꠟꠞ ꠜꠣꠛ ꠛꠥꠎꠤꠟꠤꠟꠣ। ꠛꠥꠎꠤꠀ ꠇꠁꠟꠣ, “ꠇꠥꠘꠥ ꠞꠣꠁꠎ꠆ꠎ ꠘꠤꠎꠦ ꠘꠤꠎꠦ ꠜꠣꠉ ꠅꠁꠉꠦꠟꠦ, ꠁ ꠞꠣꠁꠎ꠆ꠎ ꠛꠤꠘꠣꠡ ꠅꠁꠎꠣꠄ। ꠅꠃꠟꠣ ꠇꠥꠘꠥ ꠙꠞꠤꠛꠣꠞꠅ ꠎꠦꠛꠟꠣ ꠛꠤꠛꠣꠖ ꠟꠣꠉꠤꠎꠣꠄ, ꠁ ꠙꠞꠤꠛꠣꠞꠅ ꠀꠞ ꠐꠤꠇꠦ ꠘꠣ। 18ꠔꠦ ꠎꠤꠘ꠆ꠘꠣꠔ ꠎꠥꠖꠤ ꠔꠣꠞ ꠘꠤꠎꠞ ꠛꠤꠙꠇ꠆ꠇꠦ ꠟꠣꠉꠤꠎꠣꠄ, ꠔꠣꠁꠟꠦ ꠔꠣꠞ ꠞꠣꠁꠎ꠆ꠎ ꠇꠦꠝꠘꠦ ꠐꠤꠇꠛ? ꠔꠥꠝꠞꠣ ꠔ ꠇꠁꠞꠣꠄ, ꠀꠝꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ। 19ꠈꠥꠛ ꠜꠣꠟꠣ ꠇꠕꠣ, ꠀꠝꠤ ꠎꠥꠖꠤ ꠛꠦꠟ-ꠍꠛꠥꠟꠞ ꠛꠟꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔꠥꠝꠞꠣꠞ ꠝꠣꠘꠡꠦ ꠇꠤꠔꠣꠖꠤ ꠍꠣꠠꠣꠄ? ꠔꠥꠝꠞꠣꠞ ꠝꠣꠔꠞ ꠛꠤꠌꠣꠞ ꠔꠥꠝꠞꠣꠞ ꠝꠣꠘꠡꠦꠃ ꠇꠞꠛ। 20ꠅꠁꠟꠦ ꠀꠝꠤ ꠎꠥꠖꠤ ꠀꠟ꠆ꠟꠣꠁ ꠇꠥꠖꠞꠔꠦ ꠎꠤꠘ꠆ꠘꠣꠔ ꠍꠣꠠꠣꠁ, ꠔꠦ ꠔ ꠀꠟ꠆ꠟꠣꠞ ꠛꠣꠖꠡꠣꠁ ꠔꠥꠝꠞꠣꠞ ꠘꠎꠖꠤꠇ ꠀꠁꠌ꠆ꠍꠦ।
21“ꠢꠥꠘꠅ, ꠇꠥꠘꠥ ꠛꠟꠀꠟꠣ ꠝꠣꠘꠡꠦ ꠅꠡꠔ꠆ꠞ-ꠡꠡꠔ꠆ꠞ ꠟꠁꠀ ꠔꠣꠞ ꠛꠣꠠꠤ ꠙꠣꠢꠣꠞꠣ ꠖꠤꠟꠦ, ꠔꠣꠞ ꠍꠣꠝꠣꠘꠣ ꠘꠤꠞꠣꠙꠖ ꠕꠣꠇꠦ। 22ꠅꠁꠟꠦ ꠔꠣꠞ ꠕꠣꠇꠤ ꠎꠛꠞꠖꠡ꠆ꠔ ꠀꠞꠇ ꠎꠘ ꠀꠁꠀ ꠢꠣꠝꠟꠣ ꠇꠞꠤꠀ ꠔꠣꠞꠦ ꠀꠞꠣꠁꠟꠤꠟꠦ, ꠢꠦ ꠎꠦꠔꠣ ꠅꠡꠔ꠆ꠞ-ꠡꠡꠔ꠆ꠞꠞ ꠛꠠꠣꠁ ꠇꠞꠍꠤꠟ, ꠁ ꠅꠡꠔ꠆ꠞꠅ ꠇꠣꠠꠤꠀ ꠘꠤꠛꠉꠤ। ꠔꠣꠞ ꠢꠇꠟ ꠝꠣꠟ-ꠍꠣꠝꠣꠘꠣꠅ ꠟꠥꠐꠤꠀ ꠘꠤꠀ ꠛꠣꠐꠤꠟꠤꠛ।
23“ꠔꠦ ꠎꠦ ꠎꠘ ꠀꠝꠣꠞ ꠙꠇ꠆ꠇꠦ ꠘꠣꠄ, ꠢꠦ ꠔ ꠀꠝꠣꠞ ꠛꠤꠙꠇ꠆ꠇ। ꠎꠦ ꠀꠝꠣꠞ ꠅꠁꠀ ꠇꠣꠝ ꠘꠣ ꠇꠞꠦ, ꠢꠦ ꠔ ꠀꠝꠣꠞ ꠛꠤꠞꠥꠖ꠆ꠖꠦ ꠇꠣꠝ ꠇꠞꠦ।
24“ꠇꠥꠘꠥ ꠎꠤꠘꠦ ꠎꠦꠛꠟꠣ ꠄꠇ ꠛꠦꠝꠣꠞꠤꠞ ꠟꠉ ꠍꠣꠠꠤꠀ ꠎꠣꠄꠉꠤ, ꠉꠤꠀ ꠛꠡꠔ ꠇꠞꠣꠞ ꠟꠣꠉꠤ ꠝꠞꠥꠜꠥꠝꠤꠔ ꠊꠥꠞꠣꠊꠥꠞꠤ ꠇꠞꠦ। ꠛꠣꠖꠦ ꠇꠥꠘꠥꠈꠣꠘꠅ ꠞꠁꠛꠣꠞ ꠎꠣꠉꠣ ꠘꠣ ꠙꠣꠁꠀ ꠝꠘꠦ ꠝꠘꠦ ꠇꠄ, ꠖꠥꠞ! ꠀꠝꠤ ꠎꠦꠘ ꠕꠣꠇꠤ ꠀꠁꠍꠤ ꠅꠘꠅꠃ ꠢꠤꠞꠛꠣꠞ ꠎꠣꠁꠉꠤ। 25ꠚꠤꠞꠔ ꠀꠁꠀ ꠢꠣꠞꠤ ꠖꠦꠈꠦ, ꠢꠤ ꠎꠣꠉꠣ ꠡꠥꠘ꠆ꠖꠞ ꠇꠞꠤ ꠢꠣꠎꠣꠁ-ꠙꠣꠠꠣꠁ ꠕꠅꠀ। 26ꠅꠃ ꠢꠦ ꠉꠤꠀ ꠔꠣꠞ ꠕꠣꠇꠤ ꠀꠞꠅ ꠛꠖ ꠡꠣꠔꠉꠥ ꠎꠤꠘ ꠟꠉꠦ ꠇꠞꠤ ꠀꠘꠦ। ꠀꠘꠤꠀ ꠅꠘꠅ ꠢꠣꠝꠣꠁꠀ ꠛꠣꠡꠣ ꠛꠣꠘꠣꠄ। ꠄꠞꠖꠣꠄ ꠅꠃ ꠛꠦꠝꠣꠞꠤꠞ ꠖꠡꠣ ꠙꠄꠟꠣ ꠕꠣꠇꠤ ꠢꠦꠡꠦ ꠀꠞꠅ ꠈꠣꠞꠣꠙ ꠅꠄ।”
27ꠁꠍꠣꠄ ꠅꠔꠣ ꠛꠄꠀꠘ ꠇꠞꠞꠣ, ꠀꠈꠔꠣꠃ ꠜꠤꠠꠞ ꠝꠣꠎ ꠕꠣꠇꠤ ꠄꠇ ꠛꠦꠐꠤꠄ ꠎꠥꠞꠦ ꠎꠥꠞꠦ ꠇꠁꠟ, “ꠢꠥꠎꠥꠞ, ꠎꠦ ꠝꠣʼꠄ ꠀꠙꠘꠣꠞꠦ ꠙꠦꠐꠅ ꠟꠁꠍꠂꠘ ꠀꠞ ꠖꠥꠗ ꠈꠣꠅꠀꠁꠍꠂꠘ, ꠄꠁꠘ ꠛꠠ ꠇꠙꠣꠟꠤ ꠝꠣ।” 28ꠁꠍꠣꠄ ꠇꠁꠟꠣ, “ꠁꠈꠣꠘ ꠢꠣꠍꠣ ꠇꠕꠣ, ꠅꠁꠟꠦ ꠄꠞ ꠌꠣꠁꠔꠦꠅ ꠛꠠ ꠇꠙꠣꠟꠤ ꠔꠣꠞꠣ, ꠎꠣꠞꠣ ꠀꠟ꠆ꠟꠣꠞ ꠇꠣꠟꠣꠝ ꠢꠥꠘꠦ, ꠢꠥꠘꠤꠀ ꠅꠟꠣ ꠀꠝꠟ ꠇꠞꠦ।”
ꠢꠎꠞꠔ ꠁꠃꠘꠥꠍ ꠘꠛꠤꠞ ꠀꠟꠣꠝꠔ
29ꠛꠣꠖꠦ ꠀꠞꠅ ꠛꠃꠔ ꠝꠣꠘꠥꠡ ꠢꠎꠞꠔ ꠁꠍꠣꠞ ꠉꠦꠍꠦ ꠀꠁꠟꠣ। ꠔꠣꠁꠘ ꠄꠞꠣꠞꠦ ꠇꠁꠟꠣ, “ꠁ ꠎꠝꠣꠘꠣꠞ ꠝꠣꠘꠥꠡ ꠔ ꠘꠣꠚꠞꠝꠣꠘ। ꠔꠣꠞꠣ ꠈꠣꠟꠤ ꠇꠦꠞꠣꠝꠔꠤ ꠔꠥꠇꠣꠄ, ꠅꠁꠟꠦ ꠁꠃꠘꠥꠍ ꠘꠛꠤꠞ ꠀꠟꠣꠝꠔ ꠍꠣꠠꠣ ꠖꠥꠍꠞꠣ ꠇꠥꠘꠥ ꠇꠦꠞꠣꠝꠔꠤ ꠔꠣꠞꠣꠞꠦ ꠖꠦꠈꠣꠁꠟ ꠅꠁꠔ ꠘꠣꠄ। 30ꠁꠃꠘꠥꠍ ꠘꠛꠤ ꠘꠤꠎꠦ ꠘꠤꠎꠦꠃ ꠎꠦꠟꠣ ꠘꠤꠘꠜ ꠐꠣꠃꠘꠞ ꠝꠣꠘꠡꠞ ꠉꠦꠍꠦ ꠄꠇ ꠀꠟꠣꠝꠔ ꠅꠁꠍꠟꠣ, ꠛꠤꠘ-ꠀꠖꠝꠅ ꠅꠃꠟꠣ ꠁ ꠎꠝꠣꠘꠣꠞ ꠝꠣꠘꠡꠞ ꠉꠦꠍꠦ ꠘꠤꠎꠦꠃ ꠀꠟꠣꠝꠔ ꠅꠁꠛꠣ। 31ꠞꠥꠎ ꠇꠤꠀꠝꠔꠞ ꠖꠤꠘ ꠖꠃꠇꠘꠞ ꠖꠦꠡꠞ ꠞꠣꠘꠤ ꠃꠑꠤꠀ ꠅꠃ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠛꠣꠖꠡꠣ ꠍꠥꠟꠣꠁꠝꠣꠘꠞ ꠀꠈꠟꠞ ꠇꠕꠣ ꠢꠥꠘꠣꠞ ꠘꠤꠅꠔꠦ ꠔꠣꠁꠘ ꠖꠥꠘꠤꠀꠞ ꠢꠦꠡ ꠝꠣꠕꠣ ꠕꠣꠇꠤ ꠀꠁꠍꠟꠣ। ꠅꠁꠟꠦ ꠅꠈꠘ ꠔ ꠍꠥꠟꠣꠁꠝꠣꠘ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠅꠘꠅ ꠀꠍꠂꠘ। 32ꠇꠤꠀꠝꠔꠞ ꠖꠤꠘ ꠘꠤꠘꠜ ꠐꠣꠃꠘꠞ ꠝꠥꠞ꠆ꠖꠣ ꠅꠇꠟ ꠃꠑꠤꠀ ꠁ ꠎꠝꠣꠘꠣꠞ ꠝꠣꠘꠡꠞ ꠖꠥꠡ ꠎꠣꠁꠞ ꠇꠞꠛꠣ। ꠇꠣꠞꠘ ꠁꠃꠘꠥꠍ ꠘꠛꠤꠞ ꠔꠛꠟꠤꠉ ꠢꠥꠘꠤꠀ ꠔꠣꠞꠣ ꠔꠃꠛꠣ ꠇꠞꠍꠤꠟꠣ। ꠅꠁꠟꠦ ꠅꠈꠘ ꠔ ꠁꠃꠘꠥꠍ ꠕꠣꠇꠤꠅ ꠀꠞꠅ ꠝꠢꠣꠘ ꠄꠇꠎꠘ ꠁꠘꠅ ꠀꠍꠂꠘ, ꠔꠣ-ꠅ ꠝꠣꠘꠡꠦ ꠔꠃꠛꠣ ꠇꠞꠦꠞ ꠘꠣ।
ꠌꠃꠈ ꠜꠣꠟꠣ ꠎꠣꠞ, ꠖꠤꠟ ꠜꠣꠟꠣ ꠔꠣꠞ
33“ꠇꠥꠘꠥ ꠝꠣꠘꠡꠦ ꠔ ꠟꠦꠝ ꠎꠣꠟꠣꠁꠀ ꠢꠣꠞꠤ ꠌꠇꠤꠞ ꠔꠟꠦ ꠛꠣ ꠐꠥꠇꠞꠤꠞ ꠔꠟꠦ ꠕꠄ ꠘꠣ, ꠛꠞꠋ ꠉꠣꠍꠣꠞ ꠃꠙꠞꠦꠃ ꠕꠄ, ꠎꠣꠔꠦ ꠊꠞꠞ ꠝꠣꠘꠡꠦ ꠚꠞ ꠖꠦꠈꠦ। 34ꠔꠥꠝꠣꠞ ꠌꠃꠈꠃ ꠅꠁꠟ ꠔꠥꠝꠣꠞ ꠇꠣꠄꠀꠞ ꠛꠣꠔ꠆ꠔꠤ। ꠌꠃꠈ ꠎꠥꠖꠤ ꠜꠣꠟꠣ ꠅꠄ, ꠔꠦ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠚꠞ ꠅꠁꠛ। ꠀꠞ ꠌꠃꠈ ꠈꠣꠞꠣꠙ ꠅꠁꠟꠦ, ꠔꠥꠝꠣꠞ ꠡꠞꠤꠟꠅ ꠀꠘ꠆ꠖꠣꠞꠤꠔ ꠞꠁꠛ। 35ꠔꠦ ꠈꠤꠀꠟ ꠞꠣꠈꠤꠅ, ꠔꠥꠝꠣꠞ ꠖꠤꠟꠅ ꠎꠦ ꠘꠥꠞ ꠀꠍꠦ, ꠁꠔꠣ ꠀꠘ꠆ꠖꠣꠁꠞ ꠅꠁꠎꠣꠞ ꠇꠤ ꠘꠣ? 36ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠅ ꠎꠥꠖꠤ ꠚꠞ ꠕꠣꠇꠦ, ꠇꠥꠘꠥ ꠅꠋꠉ ꠀꠘ꠆ꠖꠣꠁꠞ ꠘꠣ ꠕꠣꠇꠦ, ꠔꠦ ꠟꠦꠝꠦ ꠎꠦꠟꠣ ꠔꠣꠞ ꠘꠤꠎꠞ ꠔꠦꠎꠦ ꠔꠥꠝꠣꠞꠦ ꠚꠞ ꠖꠦꠄ, ꠅꠃꠟꠣ ꠁ ꠘꠥꠞꠦꠅ ꠔꠥꠝꠣꠞ ꠀꠡ꠆ꠔꠣ ꠡꠞꠤꠟꠞꠦ ꠚꠞ ꠇꠞꠤꠟꠤꠛ।”
ꠖꠤꠟꠞꠦ ꠙꠣꠇ-ꠙꠣꠇꠤꠎꠣ ꠞꠣꠈꠣ ꠎꠞꠥꠞ
37ꠁꠍꠣꠄ ꠛꠄꠀꠘ ꠇꠞꠞꠣ ꠅꠃ ꠡꠝꠄ ꠚꠞꠤꠡꠤ ꠖꠟꠞ ꠄꠇꠎꠘꠦ ꠔꠣꠘꠞꠦ ꠈꠣꠁꠛꠣꠞ ꠖꠣꠅꠔ ꠖꠤꠟꠣ। ꠔꠣꠁꠘ ꠉꠤꠀ ꠄꠘ ꠊꠞꠞ ꠜꠤꠔꠞꠦ ꠈꠣꠘꠤꠔ ꠛꠁꠟꠣ। 38ꠚꠞꠤꠡꠤꠄ ꠖꠦꠈꠟꠣ, ꠈꠣꠅꠀꠔ ꠛꠁꠛꠣꠞ ꠇꠣꠟꠅ ꠁꠍꠣꠄ ꠁꠢꠥꠖꠤ ꠘꠤꠅꠝ ꠝꠣꠚꠤꠇ ꠀꠔ ꠗꠁꠍꠁꠘ ꠘꠣ, ꠅꠃ ꠔꠣꠁꠘ ꠔꠣꠁꠎ꠆ꠎꠥꠛ ꠛꠘꠤꠉꠦꠟꠣ।
39ꠔꠦꠃ ꠁꠍꠣꠄ ꠔꠣꠘꠞꠦ ꠇꠁꠟꠣ, “ꠢꠥꠘꠃꠇ꠆ꠇꠣ, ꠀꠙꠘꠣꠞꠣ ꠚꠞꠤꠡꠤ ꠅꠇꠟꠦ ꠔ ꠛꠣꠡꠘ-ꠛꠞ꠆ꠔꠘꠞ ꠛꠣꠁꠞ ꠉꠣꠟꠣ ꠈꠥꠛ ꠡꠥꠘ꠆ꠖꠞ ꠇꠞꠂꠘ, ꠅꠁꠟꠦ ꠀꠙꠘꠣꠞꠣꠞ ꠜꠤꠔꠞꠦ ꠔ ꠘꠣꠚꠞꠝꠣꠘꠤ ꠀꠞ ꠟꠣꠟꠌꠦ ꠜꠞꠣ। 40ꠅ ꠛꠦꠀꠈꠟꠞ ꠖꠟ, ꠎꠦꠁꠘ ꠛꠣꠞꠉꠣꠟꠣ ꠛꠣꠘꠣꠁꠍꠂꠘ, ꠔꠣꠁꠘꠃ ꠇꠤꠔꠣ ꠜꠤꠔꠞ ꠉꠣꠟꠣꠅ ꠛꠣꠘꠣꠁꠍꠂꠘ ꠘꠣ ꠘꠤ? 41ꠄꠞꠟꠣꠉꠤ ꠀꠙꠘꠣꠞꠣꠞ ꠜꠤꠔꠞꠦ ꠎꠦꠔꠣ ꠀꠍꠦ, ꠅꠔꠣ ꠀꠉꠦ ꠀꠟ꠆ꠟꠣꠞ ꠅꠀꠡ꠆ꠔꠦ ꠟꠤꠟ꠆ꠟꠣ-ꠍꠖꠉꠣ ꠖꠦꠃꠇ꠆ꠇꠣ। ꠔꠦꠃ ꠖꠦꠈꠛꠣꠘꠦ, ꠀꠙꠘꠣꠞꠣꠞ ꠢꠇꠟꠔꠣꠃ ꠙꠣꠇ-ꠍꠣꠚ ꠅꠁꠎꠤꠛ।
42“ꠢꠣꠄꠞꠦ ꠚꠞꠤꠡꠤ ꠅꠇꠟ, ꠟꠣꠘ꠆ꠘꠔ ꠔꠥꠝꠞꠣꠞꠦ, ꠔꠥꠝꠞꠣ ꠈꠣꠟꠤ ꠔꠦꠎꠙꠣꠔꠣ, ꠙꠖꠤꠘꠣ ꠙꠣꠔꠣ ꠀꠞ ꠢꠇ꠆ꠇꠟ ꠢꠣꠉ-ꠔꠞꠇꠣꠞꠤꠞ ꠖꠡ ꠛꠣꠐꠞ ꠄꠇ ꠛꠣꠐ ꠀꠟ꠆ꠟꠣꠞ ꠘꠣꠝꠦ ꠎꠇꠣꠔ ꠖꠦꠅ, ꠅꠁꠟꠦ ꠀꠟ꠆ꠟꠣꠞ ꠝꠢꠛ꠆ꠛꠔ ꠀꠞ ꠢꠇ ꠁꠘꠍꠣꠚꠞ ꠛꠣꠄ ꠔꠥꠝꠞꠣꠞ ꠇꠥꠘꠥ ꠈꠤꠀꠟꠃ ꠘꠣꠁ। ꠀꠍꠟꠦ ꠅꠃ ꠙꠄꠟꠣꠔꠣ ꠝꠣꠘꠣꠞ ꠟꠉꠦ ꠟꠉꠦ ꠛꠣꠖꠞꠔꠣꠅ ꠀꠝꠟ ꠇꠞꠣ ꠚꠞꠎ। 43ꠅ ꠟꠣꠘ꠆ꠘꠔꠤ ꠚꠞꠤꠡꠤ ꠅꠇꠟ! ꠝꠍꠤꠖꠅ ꠢꠣꠝꠣꠁꠀ ꠍꠣꠝꠘꠞ ꠇꠣꠔꠣꠞꠅ ꠛꠅꠀ, ꠀꠞ ꠛꠣꠎꠣꠞ-ꠀꠐꠅ ꠉꠤꠀ ꠍꠣꠟꠣꠝ ꠙꠣꠁꠔꠦ ꠔꠥꠝꠞꠣ ꠈꠥꠛ ꠙꠍꠘ꠆ꠖ ꠇꠞꠅ। 44ꠟꠣꠘ꠆ꠘꠔ ꠔꠥꠝꠞꠣꠞ ꠃꠙꠞꠦ, ꠔꠥꠝꠞꠣ ꠅꠁꠟꠣꠄ ꠅꠌꠤꠘꠣ ꠇꠄꠛꠞꠞ ꠟꠣꠈꠣꠘ। ꠝꠣꠘꠡꠦ ꠘꠣ ꠌꠤꠘꠤꠀ ꠄꠞ ꠃꠙꠞꠦꠖꠤ ꠀꠐꠣ-ꠚꠤꠞꠣ ꠇꠞꠦ।”
45ꠁꠈꠣꠘ ꠢꠥꠘꠤꠀ ꠄꠇꠎꠘ ꠀꠟꠤꠝꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠅꠈꠣꠘ ꠇꠁꠀ ꠔ ꠀꠙꠘꠦ ꠀꠝꠞꠣꠞꠦꠅ ꠛꠦꠁꠎ꠆ꠎꠔ ꠇꠞꠞꠣ।” 46ꠁꠍꠣꠄ ꠇꠁꠟꠣ, “ꠘꠤꠌꠄ, ꠀꠙꠘꠣꠞꠣꠅ ꠟꠣꠘ꠆ꠘꠔꠤ, ꠀꠙꠘꠣꠞꠣ ꠝꠣꠘꠡꠞ ꠇꠣꠘ꠆ꠖꠅ ꠜꠣꠞ ꠛꠥꠏꠣꠁ ꠇꠞꠤꠀ ꠖꠦꠁꠘ, ꠅꠁꠟꠦ ꠔꠣꠞꠣꠞ ꠀꠍꠣꠘꠞ ꠟꠣꠉꠤ ꠀꠋꠉꠥꠟꠐꠣꠅ ꠟꠣꠠꠂꠘ ꠘꠣ।
47“ꠢꠣꠄꠞꠦ ꠟꠣꠘ꠆ꠘꠔꠤ ꠅꠇꠟ, ꠔꠥꠝꠞꠣ ꠘꠛꠤ ꠅꠇꠟꠞ ꠞꠅꠎꠣꠞꠦ ꠡꠥꠘ꠆ꠖꠞ ꠇꠞꠤꠀ ꠙꠣꠇ꠆ꠇꠣ ꠇꠞꠅ, ꠅꠁꠟꠦ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠄꠃ ꠔ ꠄꠞꠣꠞꠦ ꠎꠣꠘꠦ ꠝꠣꠞꠍꠟꠣ। 48ꠅꠔꠣ ꠖꠦꠈꠤꠀꠃ ꠛꠥꠎꠣ ꠎꠣꠄ, ꠔꠥꠝꠞꠣ ꠔꠥꠝꠞꠣꠞ ꠝꠄ-ꠝꠥꠞꠛ꠆ꠛꠤꠞ ꠇꠣꠝꠞ ꠡꠣꠇ꠆ꠇꠤ ꠅꠁꠞꠣꠄ, ꠔꠥꠝꠞꠣꠅ ꠅꠟꠣ ꠅꠁꠞꠣꠄ। ꠔꠣꠞꠣ ꠘꠛꠤ ꠅꠇꠟꠞꠦ ꠎꠣꠘꠦ ꠝꠣꠞꠍꠤꠟ, ꠀꠞ ꠔꠥꠝꠞꠣ ꠢꠃ ꠘꠛꠤꠞ ꠞꠅꠎꠣꠞꠦ ꠙꠣꠇ꠆ꠇꠣ ꠇꠞꠞꠣꠄ। 49ꠄꠞꠖꠣꠄ ꠀꠟ꠆ꠟꠣ ꠙꠣꠇꠦꠅ ꠔꠣꠘ ꠘꠤꠎꠞ ꠝꠞ꠆ꠎꠤꠄ ꠇꠁꠟꠣ, ꠀꠝꠤ ꠔꠣꠞꠣꠞ ꠉꠦꠍꠦ ꠀꠝꠣꠞ ꠘꠛꠤ-ꠞꠍꠥꠟ ꠛꠦꠎꠤꠝꠥ, ꠄꠞꠣꠞ ꠇꠦꠃꠞꠞꠦ ꠔꠣꠞꠣ ꠎꠥꠟꠥꠝ ꠇꠞꠛ, ꠀꠞ ꠇꠦꠃꠞꠞꠦ ꠎꠣꠘꠦ ꠝꠣꠞꠛ। 50ꠄꠔꠦ ꠖꠥꠘꠤꠀꠞ ꠙꠄꠟꠣ ꠕꠣꠇꠤ ꠅꠈꠘ ꠙꠞ꠆ꠎꠘ꠆ꠔ ꠎꠔ ꠘꠛꠤꠞꠦ ꠎꠣꠘꠦ ꠝꠣꠞꠣ ꠅꠁꠍꠦ, ꠄꠞꠣ ꠢꠇ꠆ꠇꠟꠞ ꠖꠣꠄꠁ ꠅꠁꠛꠣ ꠅꠃ ꠎꠝꠣꠘꠣꠞ ꠝꠣꠘꠥꠡ। 51ꠢꠥꠘꠃꠇ꠆ꠇꠣ, ꠀꠝꠤ ꠀꠙꠘꠣꠁꠘ꠆ꠔꠞꠦ ꠇꠁꠞꠣꠝ, ꠙꠄꠟꠣ ꠀꠖꠝꠞ ꠙꠥꠔ ꠢꠣꠛꠤꠟꠞ ꠈꠥꠘ ꠕꠣꠇꠤ ꠡꠥꠞꠥ ꠇꠞꠤꠀ, ꠘꠛꠤ ꠎꠣꠇꠣꠞꠤꠀꠞ ꠈꠥꠘ ꠙꠞ꠆ꠎꠘ꠆ꠔ ꠢꠇꠟ ꠟꠃꠞ ꠡꠣꠎꠣ ꠅꠃ ꠎꠝꠣꠘꠣꠞ ꠝꠣꠘꠡꠞ ꠉꠦꠍ ꠕꠣꠇꠤ ꠀꠖꠣꠄ ꠇꠞꠣ ꠅꠁꠛ। ꠘꠛꠤ ꠎꠣꠇꠣꠞꠤꠀꠞꠦ ꠔ ꠎꠦꠞꠥꠎꠣꠟꠦꠝꠞ ꠙꠛꠤꠔ꠆ꠞ ꠇꠣꠛꠣ ꠡꠞꠤꠚꠞ ꠇꠥꠞꠛꠣꠘꠤ ꠈꠣꠘꠣ ꠀꠞ ꠢꠦꠞꠦꠝ ꠡꠞꠤꠚꠞ ꠝꠣꠎꠈꠣꠘꠅ ꠈꠥꠘ ꠇꠞꠣ ꠅꠁꠍꠦ। 52ꠢꠣꠄꠞꠦ ꠟꠣꠘ꠆ꠘꠔꠤ ꠀꠟꠤꠝ ꠅꠇꠟ, ꠔꠥꠝꠞꠣ ꠝꠣꠘꠡꠞꠦꠅ ꠀꠟ꠆ꠟꠣꠞ ꠙꠕ ꠌꠤꠘꠣꠁꠞꠣꠄ ꠘꠣ, ꠘꠤꠎꠦꠅ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠞꠣꠄ ꠘꠣ, ꠀꠞ ꠎꠦꠞꠣ ꠢꠣꠝꠣꠁꠔ ꠌꠣꠞ, ꠔꠣꠞꠣꠞꠦꠅ ꠛꠣꠗꠣ ꠖꠤꠞꠣꠄ।”
53-54ꠛꠄꠀꠘ ꠛꠣꠖꠦ ꠁꠍꠣ ꠁꠈꠣꠘ ꠕꠣꠇꠤ ꠞꠅꠀꠘꠣ ꠖꠤꠟꠣꠁꠟꠣ। ꠔꠦꠃ ꠀꠟꠤꠝ ꠀꠞ ꠚꠞꠤꠡꠤ ꠅꠇꠟꠦ ꠝꠤꠎꠣꠎ ꠉꠞꠝ ꠇꠞꠤꠀ ꠁꠍꠣꠞꠦ ꠚꠣꠘ꠆ꠖꠅ ꠚꠣꠟꠣꠁꠔꠣ ꠇꠞꠤ ꠈꠥꠌꠣꠁ-ꠚꠣꠠꠣꠁ ꠝꠣꠔꠤꠟꠣ। ꠘꠣꠘꠣꠘ ꠘꠝꠥꠘꠣꠞ ꠍꠅꠀꠟ ꠇꠞꠤꠀ ꠔꠣꠘꠞꠦ ꠀꠐꠇꠣꠘꠤꠞ ꠡꠥꠎꠥꠉ ꠔꠥꠇꠣꠁꠟꠣ।
Currently Selected:
ꠁꠘ꠆ꠎꠤꠟ ৩: ꠟꠥꠇ 11: sylN
Highlight
Share
Copy
Want to have your highlights saved across all your devices? Sign up or sign in
© Ahle Kitab Society. All rights reserved.
